Haʼu moris iha tinan 1983. Haʼu mak labarik neʼebé iha saúde diʼak, maibé kuandu haʼu tinan 10, haʼu-nia isin komesa sente moras tebes. Tinan rua liutiha, loron ida kuandu haʼu hadeer, haʼu labele book an. Haʼu hakaʼas an atu book haʼu-nia ain, maibé labele. Husi tempu neʼebá, haʼu nunka bele laʼo fali. Moras neʼe halo haʼu-nia isin mós la sai boot tan. Ohin loron, haʼu kiʼik hanesan labarik ida.

Fulan balu depois haʼu sai moras no labele sai husi uma, Testemuña ba Jeová vizita haʼu. Baibain kuandu ema mai vizita, haʼu subar deʼit. Maibé iha loron neʼebá, haʼu husik sira koʼalia ba haʼu. Sira koʼalia kona-ba mundu paraízu, no neʼe fó-hanoin haʼu kona-ba buat neʼebé haʼu rona kuandu haʼu tinan lima. Kuandu haʼu tinan lima, misionáriu ida naran Jethro vizita ami-nia knua fulan ida dala ida no nia estuda Bíblia ho haʼu-nia apá. Jethro hela iha rai-Suriname. Jethro hatudu laran-diʼak ba haʼu. Haʼu gosta tebes nia. No mós dala ruma haʼu-nia avó sira lori haʼu ba reuniaun sira iha ami-nia knua. Tan neʼe, kuandu Florence vizita haʼu no husu se haʼu hakarak aprende liután, haʼu hatán sin.

Florence ho ninia laʼen naran Justus vizita haʼu no komesa estuda Bíblia ho haʼu. Bainhira sira hatene katak haʼu la hatene lee, sira hanorin haʼu. Liutiha tempu balu, haʼu bele lee mesak. Loron ida, kaben-naʼin neʼe fó-hatene haʼu katak sira simu knaar atu serbí iha rai-Suriname. Triste mak la iha ema ida iha Orealla neʼebé bele kontinua estuda Bíblia ho haʼu. Maibé haʼu kontente tanba Jeová la haluha haʼu.

Lakleur deʼit, pioneiru ida naran Floyd muda ba Orealla no nia hasoru haʼu kuandu nia haklaken husi uma-tali ba uma-tali. Bainhira nia koʼalia ho haʼu kona-ba estuda Bíblia, haʼu hatudu oin-midar. Nia husu: “Tanbasá Ita oin-midar?” Haʼu hatete ba nia katak haʼu estuda ona broxura Saida maka Maromak Hakarak ita atu Halo? no mós komesa ona atu estuda livru Pengetahuan yang Membimbing kepada Kehidupan Abadi. * Haʼu esplika ba nia tanbasá haʼu para estuda. Floyd estuda livru Pengetahuan hamutuk ho haʼu toʼo hotu, maibé tuirmai nia mós simu knaar atu serbí iha fatin seluk. Dala ida tan, la iha ema atu estuda Bíblia ho haʼu.

 Maibé iha tinan 2004, irmaun naʼin-rua neʼebé serbí nuʼudar pioneiru tempu-tomak simu knaar atu serbí iha Orealla. Sira-nia naran mak Granville no Joshua. Kuandu sira haklaken husi uma-tali ba uma-tali, sira hasoru haʼu. Bainhira sira husu haʼu atu estuda Bíblia, haʼu oin-midar. Haʼu husu sira atu estuda ho haʼu hodi uza livru Pengetahuan no komesa fali husi primeiru. Haʼu hakarak hatene se sira sei hanorin buat neʼebé hanesan ho haʼu-nia mestre uluk nian. Granville hatete katak sira halaʼo reuniaun sira. Maski tinan 10 ona haʼu la sai husi uma, maibé haʼu hakarak tuir reuniaun. Entaun Granville mai, koʼus haʼu ba kadeira-roda no dudu haʼu ba Reuniaun-Fatin.

Liutiha tempu balu, Granville anima haʼu atu tama Eskola Serbisu Kristaun. Nia hatete: “Maski Ita defisiente, maibé Ita bele koʼalia. Loron ida, Ita sei hatoʼo diskursu públiku. Neʼe sei akontese duni.” Ninia liafuan sira-neʼe fó konfiansa mai haʼu.

Haʼu komesa haklaken ho Granville. Maibé iha ami-nia knua, dalan mak aat no kadeira-roda labele liu iha dalan sira-neʼe. Tan neʼe, haʼu husu Granville atu tau haʼu iha karrosa no dudu haʼu. Arranju neʼe laʼo ho diʼak. Iha fulan-Abríl 2005, haʼu hetan batizmu. Liutiha tempu uitoan, irmaun sira treinu haʼu atu tau matan ba kongregasaun nia livru sira no mós tau matan ba ekipamentu áudio.

Iha tinan 2007, haʼu-nia apá mate iha asidente ho ró. Haʼu-nia família triste tebes. Granville halo orasaun ho ami no lee eskritura sira neʼebé fó kmaan ba ami. Tinan rua liutiha, ami hasoru tan situasaun neʼebé triste. Irmaun Granville mate iha asidente ho ró.

Irmaun-irmán hotu iha ami-nia kongregasaun kiʼik sente triste tebes. Ami mós la iha ona katuas kongregasaun no iha atan ba kongregasaun ida deʼit. Haʼu sente triste tebes tanba haʼu-nia belun diʼak Granville mate. Nia sempre ajuda haʼu iha dalan espirituál no mós iha dalan fíziku. Reuniaun primeiru depois nia mate, haʼu iha knaar atu lee Livru Haklaken. Haʼu konsege lee parágrafu rua, maibé depois neʼe haʼu tanis no labele para. Haʼu tenke tun husi palku.

Haʼu komesa sente kontente uitoan kuandu irmaun sira husi kongregasaun seluk mai ajuda ami. No mós sukursál haruka pioneiru tempu-tomak foun ida naran Kojo. Haʼu kontente tebes kuandu haʼu-nia amá no alin-mane komesa estuda no hetan batizmu. Iha fulan-Marsu 2015, haʼu simu knaar atu serbí nuʼudar atan ba kongregasaun. Liutiha tempu balu, haʼu hatoʼo diskursu públiku ba dala primeiru. Iha loron neʼebá, haʼu hamnasa no mós tanis kuandu haʼu hanoin fali Granville nia liafuan: “Loron ida, Ita sei hatoʼo diskursu públiku. Neʼe sei akontese duni.”

Liuhusi JW Broadcasting^®, haʼu aprende kona-ba irmaun-irmán sira seluk neʼebé mós hasoru situasaun hanesan ho haʼu. Maski sira defisiente, maibé sira bele kumpre buat barak no moris kontente. Haʼu mós bele kumpre buat oioin. Haʼu hakarak uza haʼu-nia kbiit tomak atu serbí Jeová, tan neʼe haʼu komesa serbí nuʼudar pioneiru regulár. No iha fulan-Setembru 2019, haʼu hakfodak tanba simu knaar atu serbí nuʼudar katuas iha ami-nia kongregasaun neʼebé iha haklaken-naʼin hamutuk 40.

Haʼu agradese tebes ba irmaun-irmán sira hotu neʼebé estuda ho haʼu no ajuda haʼu atu serbí Jeová. No haʼu mós agradese tebes ba Jeová tanba nia la haluha haʼu.