1. Tanbasá dala ruma susar ba ita atu halo tuir?

 DALA ruma Ita sente susar atu halo tuir ka lae? Liurai David sente hanesan neʼe, tan neʼe nia halo orasaun ba Maromak: “Book haʼu-nia fuan-laran hodi prontu atu halo tuir Ita.” (Sal 51:12) David hadomi Jeová. Maibé dala ruma susar ba nia atu halo tuir, hanesan mós ho ita. Tanbasá? Primeiru, ita moris-mai ho sala husi Adão no Eva. Segundu, Satanás kontinua koko atu halo ita kontra Jeová hanesan buat neʼebé nia halo. (2 Kor 11:3) Terseiru, ita moris iha Satanás nia mundu “neʼebé agora book ema kontradór sira-nia neon”. (Éf 2:2) Ita presiza hakaʼas an atu kontra hasoru ita-nia fraku, Diabu, no mós mundu neʼebé obriga ita atu hatudu hahalok kontra. Ita mós presiza hakaʼas an atu halo tuir Jeová no mós sira neʼebé simu podér uitoan husi nia.

2. “Prontu atu halo tuir” katak sá? (Tiago 3:17)

² Lee Tiago 3:17. Tiago hatete katak ema neʼebé matenek “prontu atu halo tuir”. Neʼe katak sá? Ita presiza iha hakarak no prontu atu halo tuir ema neʼebé simu podér uitoan husi Jeová. Maibé Jeová la husu ita atu halo tuir ema neʼebé husu ita atu kontra ninia ukun-fuan.—Após 4:​18-20.

3. Tanbasá mak Jeová hakarak ita atu halo tuir sira neʼebé iha podér uitoan?

³ Karik ita sente fasil liu atu halo tuir Jeová duké halo tuir ema tanba Jeová sempre fó matadalan neʼebé perfeitu. (Sal 19:7) Ema neʼebé iha podér la fó matadalan neʼebé  perfeitu. Maski nuneʼe, ita-nia Aman iha lalehan fó podér uitoan ba ita-nia inan-aman, autoridade sira, no mós katuas kongregasaun. (Prov 6:20; 1 Tes 5:12; 1 Ped 2:​13, 14) Bainhira ita halo tuir sira, ita mós halo tuir Jeová. Mai ita haree oinsá mak ita bele halo tuir ema neʼebé Jeová fó podér uitoan, maski dala ruma susar ba ita atu simu sira-nia matadalan no halo tuir.

4. Tanbasá mak oan barak la halo tuir inan-aman?

⁴ Ohin loron oan barak “la halo tuir inan-aman”. (2 Tim 3:​1, 2) Tanbasá? Oan balu sente katak sira-nia inan-aman laran-makerek. Inan-aman balu haruka sira-nia oan atu halo buat neʼebé sira rasik la halo. Oan balu haree matadalan neʼebé inan-aman fó mak buat neʼebé tuan liu, la ajuda, ka halo sira la sente livre. Se Ita mak oan, dala ruma Ita mós sente hanesan neʼe? Oan barak sente susar atu halo tuir Jeová nia matadalan neʼebé dehan: “Halo tuir imi-nia inan-aman bá hodi tuir Naʼi nia hakarak, tanba ida-neʼe mak hahalok loos.” (Éf 6:1) Saida mak bele ajuda Ita atu halo nuneʼe?

5. Tuir Lucas 2:​46-52, oinsá mak Jesus hatudu ezemplu diʼak kona-ba halo tuir inan-aman?

⁵ Ita bele aprende atu halo tuir liuhusi Jesus nia ezemplu. (1 Ped 2:​21-24) Nia mak ema perfeitu, maibé ninia inan-aman la perfeitu. Jesus respeitu ninia inan-aman maski dala ruma sira halo sala ka la komprende nia. (Éx 20:12) Hanoin toʼok buat neʼebé akontese kuandu Jesus tinan 12. (Lee Lucas 2:​46-52.) Ninia inan-aman haluha tiha nia iha Jeruzalein. Tuir loloos, José no Maria presiza haree didiʼak katak sira-nia oan hotu hamutuk ho sira bainhira sira atu fila ba uma. Kuandu José no Maria hetan fali Jesus, Maria fó-sala ba Jesus kona-ba situasaun neʼe! Jesus bele deʼit koʼalia ba Maria katak neʼe la justu. Duké halo nuneʼe, nia hatán ho respeitu. Maibé José no Maria “la komprende liafuan neʼebé nia dehan ba sira”. Maski nuneʼe, Jesus “kontinua halo tuir sira”.

6-7. Saida mak bele ajuda oan sira atu halo tuir inan-aman?

⁶ Oan sira, dala ruma Ita sente susar atu halo tuir inan-aman bainhira sira halo sala ka la komprende Ita? Saida mak bele ajuda? Primeiru, hanoin kona-ba buat neʼebé Jeová sente. Bíblia hatete katak bainhira Ita halo tuir Ita-nia inan-aman, “ida-neʼe halo Naʼi kontente tebes”. (Kol 3:20) Jeová hatene bainhira Ita-nia inan-aman ladún komprende Ita ka halo regra neʼebé la justu. Maibé bainhira Ita hili atu halo tuir sira, Ita halo nia kontente.

⁷ Segundu, hanoin kona-ba buat neʼebé Ita-nia inan-aman sente. Bainhira Ita halo tuir sira, Ita halo sira kontente no sira bele tau fiar ba Ita. (Prov 23:​22-25) Karik Ita-nia relasaun ho sira sei sai besik liután. Irmaun ida naran Alexandre husi rai-Béljika hatete: “Bainhira haʼu halo tuir haʼu-nia inan-aman beibeik, ami sente besik ba malu no kontente liután.” b Terseiru, hanoin kona-ba oinsá halo tuir agora sei ajuda Ita aban-bainrua. Paulo neʼebé hela iha rai-Brazíl hatete: “Bainhira haʼu aprende atu halo  tuir haʼu-nia inan-aman, neʼe ajuda haʼu atu halo tuir Jeová no mós sira neʼebé iha podér.” Bíblia fó razaun neʼebé klaru tanbasá Ita presiza halo tuir inan-aman, hodi dehan: “Atu imi bele hetan buat diʼak no imi bele moris naruk iha rai.”—Éf 6:​2, 3.

8. Tanbasá oan barak deside atu halo tuir inan-aman?

⁸ Oan barak hetan ona rezultadu diʼak tanba halo tuir. Irmán Luiza husi rai-Brazíl foufoun la komprende tanbasá nia labele kaer telemovel. Liután neʼe, nia haree katak joven barak neʼebé idade hanesan nia kaer telemovel. Maibé tuirmai nia komprende katak ninia inan-aman hakarak atu proteje nia. Nia hatete: “Bainhira halo tuir inan-aman, haʼu la sente katak ida-neʼe halo haʼu la livre. Tuir loloos, haʼu presiza duni matadalan sira-neʼe.” Irmán joven ida naran Elizabeth husi Estadus Unidus sente katak dala ruma susar ba nia atu halo tuir inan-aman. Nia hatete: “Bainhira haʼu ladún komprende tanbasá haʼu-nia inan-aman halo regra ida, haʼu hanoin fali kona-ba oinsá sira-nia regra balu proteje ona haʼu.” Monica neʼebé hela iha rai-Arménia hatete katak nia sempre hetan rezultadu diʼak bainhira halo tuir ninia inan-aman.

9. Ema barak sente oinsá kona-ba halo tuir lei?

⁹ Ema barak komprende katak ita presiza ema nia governu no presiza halo tuir lei balu neʼebé “autoridade sira” fó. (Rom 13:1) Maibé ema sira-neʼe dada an atu halo tuir lei neʼebé sira sente la justu ka la gosta. Porezemplu, hanoin toʼok kona-ba selu taxa. Iha nasaun ida iha Europa, ema barak fiar katak “la sala atu la selu taxa se ita sente neʼe la justu”. Tan neʼe mak sidadaun barak iha nasaun neʼe la selu taxa hotu neʼebé governu husu.

10. Tanbasá ita halo tuir lei balu maski la gosta?

¹⁰ Bíblia dehan katak ema nia governu hamosu susar, Satanás mak kontrola, no lakleur tan sei lakon. (Sal 110:​5, 6; Ecle 8:9; Lc 4:​5, 6) Bíblia mós dehan katak “ema neʼebé kontra autoridade, nia kontra Maromak nia arranju”. Agora daudaun Jeová husik ema nia governu atu ukun hodi kontrola buat hotu no nia husu ita atu halo tuir sira. Tan neʼe ita presiza “fó ba ema hotu buat neʼebé sira merese simu”, inklui selu taxa, respeitu, no halo tuir. (Rom 13:​1-7) Karik ita haree lei balu hanesan la justu, susar atu halo tuir, ka ita la gosta. Maibé ita halo tuir Jeová, no nia husu ita atu halo tuir autoridade sira, naran katak sira la husu ita atu kontra ninia ukun-fuan.—Após 5:29.

11-12. Tuir Lucas 2:​1-6, oinsá José no Maria halo tuir lei, no neʼe lori rezultadu saida? (Haree mós dezeñu.)

 ¹¹ Ita bele aprende husi José no Maria nia ezemplu. Sira prontu atu halo tuir autoridade sira maski neʼe susar. (Lee Lucas 2:​1-6.) Bainhira Maria isin-rua maizumenus fulan sia, nia no José hasoru situasaun neʼebé susar. César Augusto neʼebé ukun Roma husu povu atu halo sensus. José no Maria presiza halo viajen ba Belein, viajen neʼe dook maizumenus kilómetru 150 no sira presiza laʼo liu área neʼebé iha foho barak. Neʼe mak viajen neʼebé susar, liuliu ba Maria. Karik sira hanoin barak kona-ba Maria no bebé neʼebé sei moris-mai. Oinsá se nia tuur-ahi durante sira-nia viajen? Maria presiza tau matan ba Mesias neʼebé promete nanis ona. Neʼe bele sai razaun ida atu sira la halo tuir governu nia lei ka lae?

¹² Maski José no Maria iha razaun atu hanoin barak, maibé sira nafatin halo tuir governu nia lei. Jeová haraik bensaun tanba sira halo tuir. Maria toʼo iha Belein ho seguru, tuur-ahi bebé neʼebé iha saúde diʼak, no mós hola parte atu kumpre Bíblia nia profesia!—Miq 5:2.

13. Bainhira ita halo tuir, oinsá mak neʼe bele afeta irmaun-irmán sira?

¹³ Bainhira ita halo tuir autoridade sira, neʼe lori benefísiu ba ita rasik no mós ema seluk. Oinsá? Ita sei la simu kastigu neʼebé baibain ema hetan tanba kontra lei. (Rom 13:4) Bainhira ita halo tuir, neʼe bele afeta autoridade sira-nia haree kona-ba Testemuña ba Jeová. Porezemplu tinan barak liubá iha rai-Nijéria, soldadu sira tama ba Reuniaun-Fatin durante reuniaun halaʼo hela, sira buka ema neʼebé lakohi selu taxa. Maibé xefe ba soldadu husu soldadu sira atu sai husi fatin neʼe, hodi dehan: “Testemuña ba Jeová mak ema neʼebé selu taxa.” Bainhira Ita halo tuir lei, Ita ajuda Jeová nia povu atu nafatin iha reputasaun  neʼebé diʼak. No karik loron ida, neʼe sei proteje irmaun-irmán sira.—Mt 5:16.

14. Saida mak ajuda irmán ida “prontu atu halo tuir” autoridade sira?

¹⁴ Karik ita nafatin sente susar atu halo tuir autoridade sira. Irmán Joanna neʼebé hela iha Estadus Unidus hatete: “Susar tebes ba haʼu atu halo tuir autoridade sira tanba membru ida husi haʼu-nia família hasoru situasaun neʼebé la justu husi autoridade sira.” Maibé Joanna hakaʼas an atu troka ninia hanoin. Primeiru, nia para atu lee notísias iha média sosiál neʼebé hamosu hanoin negativu kona-ba autoridade sira. (Prov 20:3) Segundu, nia halo orasaun ba Jeová hodi husu ajuda atu tau fiar ba Jeová duké tau esperansa ba ema nia governu. (Sal 9:​9, 10) Terseiru, nia lee informasaun iha ita-nia publikasaun sira kona-ba neutrál. (João 17:16) Agora Joanna dehan katak hodi halo tuir no hatudu respeitu ba autoridade sira, neʼe halo nia “sente dame iha laran”.

15. Tanbasá dala ruma susar atu halo tuir matadalan neʼebé mai husi Jeová nia organizasaun?

¹⁵ Jeová husu ita atu “halo tuir sira neʼebé dirije” ita iha kongregasaun. (Ebr 13:17) Jesus mak Ulun ba kongregasaun no nia perfeitu, maibé sira neʼebé nia uza iha rai atu dirije ninia organizasaun mak la perfeitu. Dala ruma susar atu halo tuir sira, liuliu se sira husu ita atu halo buat neʼebé ita la gosta. Apóstolu Pedro mós dada an atu halo tuir. Kuandu anju ida husu nia atu han animál neʼebé la moos tuir Moisés nia Ukun-Fuan, Pedro lakohi halo tuir, laʼós dala ida deʼit, maibé dala tolu! (Após 10:​9-16) Tanbasá? Tanba ba nia matadalan neʼe la lójiku. Neʼe la hanesan duni ho buat neʼebé nia toman ona atu halo antes neʼe. Se Pedro deʼit sente susar atu halo tuir matadalan husi anju neʼebé perfeitu, sá tan ho ita neʼebé presiza halo tuir matadalan husi ema neʼebé la perfeitu!

16. Maski apóstolu Paulo simu matadalan neʼebé la lójiku, maibé saida mak nia halo? (Apóstolu 21:​23, 24, 26)

¹⁶ Apóstolu Paulo “prontu atu halo tuir” maski simu matadalan neʼebé haree hanesan la lójiku. Porezemplu, loron ida, ema Kristaun Judeu rona lia-anin katak Paulo haklaken “kontra Moisés nia Ukun-Fuan” no la respeitu Moisés nia Ukun-Fuan. (Após 21:21) Tan neʼe, katuas sira iha Jeruzalein husu Paulo atu lori ho mane naʼin-haat ba templu no hamoos ninia an rasik hodi hatudu katak nia nafatin halo tuir Ukun-Fuan. Maibé Paulo hatene katak ema Kristaun la presiza tan halo tuir Moisés nia Ukun-Fuan no nia la halo sala ida. Maski nuneʼe, Paulo halo tuir kedas. “Iha loron tuirmai Paulo lori mane sira-neʼe no hamoos nia an rasik tuir ukun-fuan hamutuk ho sira”. (Lee Apóstolu 21:​23, 24, 26.) Tanba Paulo halo tuir, neʼe lori unidade ba sira.—Rom 14:​19, 21.

17. Saida mak Ita aprende husi Stephanie nia esperiénsia?

¹⁷ Irmán ida naran Stephanie sente susar atu simu desizaun ida neʼebé mai husi sukursál. Nia no ninia laʼen kontente tebes atu serbí iha grupu neʼebé koʼalia língua seluk. Tuirmai sukursál taka tiha grupu neʼe, no sira naʼin-rua presiza fila fali ba kongregasaun neʼebé koʼalia sira rasik nia língua. Stephanie  dehan: “Haʼu la kontente duni. Haʼu la simu katak kongregasaun neʼebé koʼalia ami-nia língua rasik presiza ajuda.” Maski nuneʼe, nia deside atu apoia arranju neʼe. Nia hatete: “Ikusmai haʼu komprende tanbasá desizaun neʼe mak matenek. Ami sai inan-aman espirituál ba sira balu neʼebé la iha família iha lia-loos. Haʼu mós estuda ho irmán ida neʼebé foin ativu fali. Agora haʼu iha tempu barak liután atu halaʼo estuda mesak. Haʼu iha konxiénsia neʼebé moos tanba hatene katak haʼu hakaʼas an ona atu halo tuir.”

18. Ita hetan benefísiu saida hodi halo tuir?

¹⁸ Ita bele aprende atu halo tuir. Porezemplu, Jesus “aprende atu halo tuir”, laʼós husi situasaun neʼebé diʼak maibé “liuhusi terus neʼebé nia hasoru”. (Ebr 5:8) Hanesan Jesus, ita bele aprende atu halo tuir liuhusi susar neʼebé ita hasoru. Porezemplu, kuandu pandemia COVID-19 hahú, ita simu matadalan atu la halaʼo tan reuniaun iha Reuniaun-Fatin no para atu haklaken husi uma ba uma. Ita sente susar atu halo tuir ka lae? Tuir loloos hodi halo tuir, neʼe proteje Ita, lori unidade entre maluk fiar-naʼin sira, no halo Jeová kontente. Agora ita prontu atu halo tuir matadalan hotu neʼebé ita sei simu durante terus boot. Ita-nia moris depende ba ida-neʼe!—Job 36:11.

19. Tanbasá Ita hakarak halo tuir?

¹⁹ Ita aprende ona katak halo tuir sei lori bensaun barak. Maibé ita hili liu atu halo tuir Maromak Jeová tanba ita hadomi nia no hakarak halo nia kontente. (1 João 5:3) Ita nunka bele selu fali buat hotu neʼebé Jeová halo ona mai ita. (Sal 116:12) Maibé ita bele halo tuir nia no sira neʼebé simu podér uitoan husi nia. Se ita halo tuir, ita hatudu katak ita matenek. No ema neʼebé matenek sei halo Jeová nia laran haksolok.—Prov 27:11.