LISAUN ESTUDU 39
Bainhira ita-nia família husik Jeová
“Dala barak sira . . . hakanek ninia laran.”—SAL 78:40.
KNANANUK 102 ‘Tau matan ema neʼebé fraku’
IHA LISAUN NEʼE *
1. Irmaun-irmán balu sente oinsá bainhira sira-nia família ida para atu serbí Jeová?
KONGREGASAUN hasai Ita-nia família ruma ka lae? Neʼe bele halo Ita laran-kanek tebes. Irmán Hilda * hatete: “Haʼu no haʼu-nia laʼen kaben durante tinan 41. Nia laran-metin toʼo nia mate. Bainhira nia mate, neʼe susar tebes. Maibé bainhira haʼu-nia oan-mane deside atu husik hela ninia feen, ninia oan sira, no mós Jeová, haʼu bele dehan katak neʼe mak susar liu hotu.”
Jeová komprende ita-nia laran-triste bainhira ema neʼebé ita hadomi para atu serbí Jeová (Haree parágrafu 2-3) *
2-3. Tuir Salmo 78:40, 41, Jeová sente oinsá bainhira ninia atan sira para atu serbí nia?
2 Ita bele fiar katak Jeová sente laran-triste tebes bainhira anju balu la adora tan nia. (Jud 6) Ita mós bele fiar katak Jeová laran-kanek bainhira haree povu Izraél neʼebé nia hadomi kontra beibeik nia. (Lee Salmo 78:40, 41.) Ita mós bele fiar katak Jeová triste bainhira ema neʼebé Ita hadomi fila kotuk ba nia. Nia komprende Ita-nia laran-triste. Nia ho laran-diʼak sei fó kmaan no apoia Ita.
3 Iha lisaun neʼe, ita sei aprende kona-ba buat neʼebé ita bele halo atu simu Jeová nia ajuda bainhira ema ida para atu serbí Jeová. Ita mós sei aprende kona-ba oinsá ita bele ajuda irmaun-irmán seluk neʼebé hasoru susar hanesan neʼe. Maibé ulukliu, mai ita aprende kona-ba buat neʼebé ita labele halo bainhira ema ida para atu serbí Jeová.
KETA FÓ-SALA BA ITA-NIA AN
4. Inan-aman barak sente oinsá bainhira sira-nia oan ida para atu serbí Jeová?
4 Bainhira oan ida para atu serbí Jeová, dala barak sira-nia inan-aman fó-sala ba sira-nia an tanba sente katak sira la hakaʼas an ajuda sira-nia oan atu kontinua serbí Jeová. Depois kongregasaun hasai irmaun Luke nia oan-mane, irmaun Luke hatete: “Haʼu fó-sala ba haʼu-nia an. Haʼu mehi aat kona-ba neʼe. Dala ruma haʼu tanis no sente laran-kanek.” Irmán Elizabeth neʼebé hasoru situasaun hanesan, hatete: “Karik haʼu la halo didiʼak haʼu-nia knaar nuʼudar inan. Haʼu sente haʼu ladún hakaʼas an hanorin haʼu-nia oan atu hadomi Jeová.”
5. Sé mak sala bainhira ema ida para atu serbí Jeová?
5 Ita presiza hanoin-hetan katak Jeová fó ita ida-idak liberdade atu halo desizaun. Neʼe katak ita bele hili atu halo tuir nia ka lae. Inan-aman balu la hatudu ezemplu diʼak, maibé sira-nia oan deside atu serbí Jeová no kontinua laran-metin ba Jeová. Inan-aman seluk hakaʼas an makaʼas atu hanorin sira-nia oan tuir Bíblia nia prinsípiu, maibé sira-nia oan fila kotuk ba Jeová kuandu sai boot. Entaun ema ida-idak mak presiza deside rasik atu serbí Jeová. (Jos 24:15) Tan neʼe, inan-aman sira labele fó-sala ba sira-nia an kuandu sira-nia oan para atu serbí Jeová.
6. Oan ida bele sente oinsá bainhira ninia inan ka aman para atu serbí Jeová?
6 Dala ruma, inan ka aman mak husik lia-loos no mós karik husik ninia família. (Sal 27:10) Neʼe bele halo oan sira laran-triste tanba baibain oan sira respeitu no admira sira-nia inan-aman. Kongregasaun hasai irmán Esther nia aman. Irmán Esther hatete: “Haʼu tanis beibeik tanba apá ho neon halo desizaun atu husik Jeová no neʼe la hanesan ho ema neʼebé la ativu iha lia-loos. Haʼu hadomi apá, tan neʼe bainhira kongregasaun hasai nia, haʼu sempre hanoin barak kona-ba ninia kondisaun. Neʼe mós afeta haʼu-nia saúde no haʼu sai pániku beibeik.”
7. Jeová sente oinsá kona-ba joven sira bainhira kongregasaun hasai sira-nia inan ka aman?
7 Joven sira, ami komprende imi-nia sentimentu se kongregasaun hasai imi-nia inan ka aman. Fiar metin bá katak Jeová mós hatene imi-nia laran-triste. Nia hadomi imi no hafolin imi-nia laran-metin, no ami mós sente hanesan. Hanoin-hetan mós katak laʼós imi mak lori todan ba imi-nia inan-aman nia desizaun. Hanesan temi ohin, Jeová fó ona liberdade ba ema ida-idak atu hili hodi serbí nia ka lae. No ema ida-idak neʼebé dedika an ona no hetan batizmu tenke “lori ninia todan rasik”.—Gal 6:5.
8. Ita bele halo saida nuʼudar Ita hein ba Ita-nia família atu fila fali ba Jeová? (Haree mós kaixa “ Fila fali ba Jeová”.)
8 Bainhira ema neʼebé Ita hadomi para atu serbí Jeová, klaru katak Ita hakarak sira fila fali ba Jeová. Ita bele halo saida nuʼudar Ita hein ba tempu neʼe? Hakaʼas an atu hametin Ita-nia fiar. Hodi halo nuneʼe, Ita sei hatudu ezemplu diʼak ba ema seluk iha família laran no karik mós ba ema neʼebé kongregasaun hasai. Ita mós sei hetan forsa atu tahan Ita-nia laran-triste. Mai ita aprende kona-ba buat balu neʼebé ita bele halo.
OINSÁ ATU FIAR METIN NAFATIN?
9. Oinsá atu kontinua iha fiar neʼebé metin? (Haree mós kaixa “ Eskritura neʼebé fó kmaan bainhira família husik lia-loos”.)
9 Importante atu hakaʼas an hametin Ita-nia fiar no mós ita-nia família nia fiar. Oinsá? Bainhira ita lee Bíblia beibeik no medita kona-ba neʼe, no mós tuir reuniaun beibeik, Jeová bele ajuda ita atu iha fiar neʼebé metin. Irmán Joanna nia aman no biin ida husik lia-loos. Nia hatete: “Haʼu sente kalma bainhira haʼu lee istória iha Bíblia kona-ba Abigail, Ester, Job, José, no Jesus. Sira-nia ezemplu anima haʼu no ajuda haʼu atu iha hanoin pozitivu. Knananuk husi Broadcasting mós anima tebes haʼu.”
10. Oinsá Salmo 32:6-8 ajuda ita atu tahan ita-nia laran-triste?
10 Fakar sai Ita-nia laran-taridu ba Jeová. Bainhira Ita sente laran-triste, keta para atu halo orasaun ba Jeová. Harohan ba Maromak atu ajuda Ita haree situasaun neʼe tuir ninia haree no ‘fó ba Ita kbiit atu komprende kleʼan no hanorin Ita dalan neʼebé Ita tenke laʼo bá’. (Lee Salmo 32:6-8.) Klaru katak karik susar atu fó sai Ita-nia sentimentu ba Jeová. Maibé Jeová komprende didiʼak Ita-nia laran-triste. Nia hadomi tebes Ita no nia anima Ita atu fakar sai Ita-nia sentimentu ba nia.—Éx 34:6; Sal 62:7, 8.
11. Tuir Ebreu 12:11, tanbasá ita labele duvida ho Jeová nia dixiplina? (Haree mós kaixa “ Hasai ema husi kongregasaun hatudu sai Jeová nia domin”.)
11 Apoia katuas kongregasaun sira-nia desizaun. Arranju atu hasai ema husi kongregasaun mai husi Jeová. Jeová korrije ema ho domin no neʼe ba ema hotu nia diʼak, inklui ema neʼebé halo sala. (Lee Ebreu 12:11.) Karik irmaun-irmán balu dehan katak katuas sira halo desizaun sala bainhira hasai ema husi kongregasaun. No baibain irmaun-irmán sira-neʼe nunka koʼalia kona-ba ema neʼe nia hahalok aat. Tuir loloos, ita la iha faktu hotu. Tan neʼe, ita hatudu matenek bainhira ita fiar katak katuas sira neʼebé halo desizaun neʼe hakaʼas an ona atu halo tuir Bíblia nia prinsípiu no “tesi-lia hodi Jeová nia naran”.—2 Krón 19:6.
12. Ema balu hetan benefísiu saida tanba apoia Jeová nia arranju atu fó dixiplina ba ema?
12 Hodi apoia katuas sira-nia desizaun kona-ba hasai Ita-nia família husi kongregasaun, karik Ita bele ajuda nia atu fila fali ba Jeová. Irmán Elizabeth neʼebé temi ohin hatete: “Hakotu ransu ho ami-nia oan-mane neʼebé boot ona mak susar tebes. Maibé depois nia fila fali ba Jeová, nia dehan katak desizaun atu hasai nia husi kongregasaun mak desizaun neʼebé diʼak no nia aprende lisaun importante barak. Haʼu aprende katak Jeová nia dixiplina sempre diʼak.” Irmán Elizabeth nia laʼen Mark hatete: “Liutiha tempu balu, ami-nia oan hatete ba haʼu katak razaun ida tanbasá nia hakarak fila fali ba lia-loos mak tanba ami la ransu ho nia. Haʼu kontente tebes tanba Jeová ajuda ami atu halo tuir arranju neʼe ho laran-metin.”
13. Saida mak bele ajuda Ita atu tahan Ita-nia laran-triste?
13 Koʼalia ho Ita-nia belun neʼebé komprende Ita-nia situasaun. Ransu ho ema Kristaun neʼebé bele ajuda Ita atu iha hanoin pozitivu. (Prov 12:25; 17:17) Joanna neʼebé temi ohin hatete: “Haʼu sente mesamesak. Maibé koʼalia ho belun neʼebé haʼu konfia ajuda haʼu atu tahan.” Maibé oinsá se irmaun-irmán ruma koʼalia buat neʼebé halo Ita sente triste liután?
14. Tanbasá ita presiza kontinua “hatudu pasiénsia ba malu no prontu atu fó perdua ba malu”?
14 Hatudu pasiénsia ba irmaun-irmán sira. Ita labele espera katak ema hotu sei sempre koʼalia buat diʼak ba Ita. (Tgo 3:2) Ita hotu la perfeitu, tan neʼe keta hakfodak se ema ruma la hatene atu koʼalia saida ka hatete buat ruma neʼebé hakanek Ita-nia laran maski sira halo neʼe la ho neon. Hanoin-hetan apóstolu Paulo nia konsellu: “Kontinua hatudu pasiénsia ba malu no prontu atu fó perdua ba malu ho laran tomak maski ema halo buat ruma neʼebé hakanek imi-nia laran.” (Kol 3:13) Kongregasaun hasai irmán ida nia família no nia hatete: “Jeová ajuda haʼu atu fó perdua ba irmaun-irmán sira neʼebé koko atu anima haʼu, maski tuir loloos sira hakanek haʼu-nia laran.” Saida mak irmaun-irmán sira bele halo atu ajuda ema sira neʼebé kontinua laran-metin?
KONGREGASAUN BELE AJUDA
15. Oinsá atu ajuda sira neʼebé kontinua laran-metin?
15 Hatudu laran-diʼak ba irmaun-irmán neʼebé kontinua laran-metin maski kongregasaun hasai sira-nia família. Irmán Miriam dehan katak nia laran-taridu atu tuir reuniaun bainhira kongregasaun hasai ninia alin-mane. Nia hatete: “Haʼu taʼuk kona-ba buat neʼebé ema sei hatete. Maibé irmaun-irmán sira mós triste ho buat neʼebé akontese. Sira la koʼalia liafuan negativu kona-ba haʼu-nia alin. Haʼu agradese tebes ba sira, tanba ajuda haʼu hatene katak laʼós haʼu mesak mak triste.” Irmán seluk hatete: “Bainhira kongregasaun hasai ami-nia oan-mane, ami-nia belun sira fó kmaan ba ami. Ema balu dehan katak sira la hatene atu koʼalia saida. Sira tanis hamutuk ho haʼu ka hakerek karta ida ba haʼu. Buat neʼebé sira halo ajuda tebes haʼu.”
16. Oinsá kongregasaun bele kontinua apoia?
16 Kontinua apoia irmaun ka irmán sira neʼebé nafatin laran-metin. Sira presiza tebes Ita-nia domin no anima. (Ebr 10:24, 25) Dala ruma, sira mós sente hanesan kongregasaun hasai ona sira tanba irmaun-irmán balu la koʼalia tan ba sira. Ita lakohi sira sente hanesan neʼe. Joven sira neʼebé sira-nia inan ka aman para atu serbí Jeová, presiza ita-nia gaba no anima. Irmán Maria nia laʼen husik Jeová no família. Nia hatete: “Belun balu vizita ami, teʼin ba ami no ajuda ami halaʼo estuda família. Sira komprende haʼu-nia laran-kanek no tanis ho haʼu. Sira defende haʼu bainhira ema koʼalia lia-bosok kona-ba haʼu. Sira anima tebes haʼu.”—Rom 12:13, 15.
Kongregasaun hadomi no apoia sira neʼebé kontinua laran-metin maski sira-nia família husik Jeová (Haree parágrafu 17) *
17. Oinsá mak katuas sira bele fó kmaan ba ema neʼebé laran-triste?
17 Se Ita mak katuas, Ita presiza uza oportunidade ida-idak atu hametin irmaun-irmán sira neʼebé kontinua laran-metin maski sira-nia família husik lia-loos. Katuas sira iha responsabilidade atu fó kmaan ba maluk Kristaun sira-neʼe. (1 Tes 5:14) Atu bele anima sira, Ita presiza koʼalia ho sira antes no depois reuniaun. Bainhira Ita vizita sira, diʼak atu halo orasaun hamutuk ho sira. Haklaken hamutuk ho sira ka dala ruma konvida sira atu tuir Ita-nia adorasaun família. Katuas sira presiza tau matan, hatudu laran-sadiʼa no mós domin ba sira neʼebé laran-kraik.—1 Tes 2:7, 8.
KETA RENDE AN NO TAU FIAR BA JEOVÁ
18. Tuir 2 Pedro 3:9, saida mak Maromak hakarak ba ema sira neʼebé para atu serbí nia?
18 Jeová “lakohi ema ida lakon maibé nia hakarak ema hotu atu arrepende sala”. (Lee 2 Pedro 3:9.) Maski ema ida halo sala sériu, maibé Jeová nafatin hafolin ema neʼe nia moris. Jeová selu ona folin neʼebé karun atu sosa fali ema sala-naʼin sira-nia moris, folin neʼe mak ninia Oan-Mane doben nia sakrifísiu. Jeová ho laran-diʼak koko atu ajuda ema atu fila fali ba nia. Jeová hakarak sira atu fila fali ba nia. Ita bele hatene ida-neʼe liuhusi Jesus nia ai-knanoik kona-ba oan neʼebé sai husi uma. (Lc 15:11-32) Ema barak neʼebé husik lia-loos, ikusmai fila fali ba Aman Jeová neʼebé hadomi sira. No kongregasaun simu fali sira ho kontente. Irmán Elizabeth neʼebé temi ohin sente ksolok bainhira kongregasaun simu fali ninia oan-mane. Nia hatete: “Haʼu agradese tebes ba sira neʼebé anima haʼu atu la rende an.”
19. Tanbasá ita bele kontinua tau fiar ba Jeová?
19 Ita bele kontinua tau fiar ba Jeová. Ninia matadalan sempre ajuda ita. Nia mak Aman neʼebé laran-luak no laran-diʼak, no hadomi ita hotu neʼebé hadomi no adora nia. Fiar metin bá katak Jeová sei la husik Ita mesak bainhira Ita laran-triste. (Ebr 13:5, 6) Irmaun Mark neʼebé temi ohin hatete: “Jeová nunka husik ita. Nia nunka dook husi ita bainhira ita hasoru susar.” Jeová sei kontinua fó Ita “kbiit neʼebé la hanesan baibain”. (2 Kor 4:7) Sin, Ita bele kontinua laran-metin no iha esperansa maski Ita-nia família ida husik Jeová.
KNANANUK 44 Orasaun husi ema kbiit-laek
^ par. 5 Ita triste tebes bainhira ema neʼebé ita hadomi para atu serbí Jeová. Ita sei aprende kona-ba oinsá Maromak sente bainhira neʼe akontese. Ita sei aprende buat neʼebé família bele halo atu sente kmaan no mós kontinua iha fiar metin. Ita mós sei aprende oinsá irmaun-irmán hotu iha kongregasaun bele fó kmaan no apoia família neʼe.
^ par. 1 Naran balu iha lisaun neʼe laʼós naran neʼebé loos.
