1. Nuʼudar ita sai ferik-katuas, ita bele halo planu saida?

BAINHIRA ita sai ferik-katuas, karik ita sai taʼuk katak ita labele tan halo buat barak ba Jeová hanesan uluk. Maski karik ita-nia enerjia menus, maibé ita nafatin bele uza ita-nia matenek no esperiénsia atu hanorin joven sira hodi bele halo knaar ka simu responsabilidade liután iha Jeová nia organizasaun. Irmaun neʼebé serbí nuʼudar Katuas kongregasaun ba tempu kleur hatete: “Maski haʼu labele halo buat barak hanesan uluk tanba haʼu-nia idade aumenta, maibé haʼu agradese tanba iha irmaun joven sira neʼebé bele halo fali serbisu neʼe.”

2. Iha lisaun neʼe, ita sei koʼalia kona-ba saida?

² Iha lisaun antes neʼe, ita aprende ona kona-ba oinsá joven sira bele hetan benefísiu liuhusi hakbesik ba ferik-katuas sira. Iha lisaun neʼe, ita sei aprende kona-ba oinsá ferik-katuas sira bele hatudu haraik an, rekoñese sira-nia limitasaun, hatudu agradese no laran-luak, ida-neʼe bele ajuda sira atu serbisu hamutuk ho joven sira no rezultadu mak ema hotu iha kongregasaun bele hetan bensaun.

3. Tuir Filipe 2:3, 4, haraik an katak sá no oinsá ida-neʼe bele ajuda ema Kristaun?

³ Ferik-katuas sira tenke hatudu haraik an se sira hakarak ajuda joven sira. Ema neʼebé haraik an haree ema seluk boot liu fali sira. (Lee Filipe 2:3, 4.) Ferik-katuas sira neʼebé hatudu hahalok neʼe rekoñese katak iha dalan diʼak oioin atu halo buat ruma hodi tuir Bíblia nia matadalan. Tan neʼe,  sira labele husu ema atu halo buat ruma tuir deʼit dalan neʼebé sira uluk halo. (Ecle 7:10) Maski sira bele ajuda joven sira liuhusi konta sira-nia esperiénsia, maibé sira mós rekoñese katak “situasaun iha mundu neʼe troka daudaun” no karik sira presiza aprende dalan foun atu halo buat ruma.—1 Kor 7:31.

4. Oinsá katuas área sira banati-tuir ema Levi?

⁴ Ferik-katuas sira neʼebé haraik an rekoñese katak nuʼudar sira-nia tinan aumenta, sira labele halo buat barak hanesan uluk. Porezemplu, bainhira katuas área sira tinan 70, organizasaun fó sira knaar foun. Dala ruma neʼe susar tanba sira kontente tebes atu ajuda irmaun-irmán sira, gosta sira-nia knaar no hakarak tebes atu nafatin halaʼo knaar neʼe. Maibé sira komprende katak diʼak liu se irmaun joven sira mak halaʼo fali knaar neʼe. Tan neʼe sira hatudu atitude neʼebé hanesan ho ema Levi iha Izraél antigu. Bainhira ema Levi tinan 50, sira tenke para serbí iha tenda santu. Sira-nia kontente la depende ba sira-nia knaar. Ho laran-manas sira halo buat neʼebé sira bele halo no ajuda ema neʼebé idade kiʼik liu fali sira. (Núm 8:25, 26) Ohin loron, maski katuas área sira neʼebé tinan 70 la halaʼo tan sira-nia knaar, maibé sira nafatin ajuda no anima sira-nia kongregasaun.

5. Saida mak ita aprende husi irmaun Dan no irmán Katie?

⁵ Hanoin toʼok kona-ba irmaun Dan  neʼebé serbí nuʼudar katuas área durante tinan 23. Bainhira irmaun Dan tinan 70, nia no ninia feen Katie simu knaar atu serbí nuʼudar pioneiru tempu-tomak. Sira gosta sira-nia knaar foun ka lae? Sin. Irmaun Dan hatete katak agora sira okupadu tebes. Nia iha knaar iha kongregasaun, ajuda irmaun seluk atu kumpre kritéria atu sai atan ba kongregasaun, no treinu irmaun-irmán seluk atu haklaken iha sidade laran no komarka. Se Ita mak ferik-katuas, Ita bele halo buat oioin atu ajuda irmaun-irmán seluk, maski Ita serbí Maromak tempu-tomak ka lae. Oinsá? Sai toman ho Ita-nia situasaun foun, halo planu foun, no tau fokus ba buat neʼebé Ita bele halo duké ba buat neʼebé Ita labele halo.

6. Tanbasá matenek atu rekoñese ita-nia limitasaun? Konta toʼok ai-knanoik.

⁶ Bainhira ita rekoñese ita-nia limitasaun, neʼe katak ita la obriga an atu halo buat neʼebé liu fali ita-nia kbiit. No rezultadu mak ita bele sente kontente no kontinua kumpre serbisu oioin. Ita bele kompara ema neʼebé rekoñese ninia limitasaun ho xofér neʼebé lori karreta saʼe foho. Xofér presiza troka gigi ba gigi neʼebé kiʼik atu karreta bele saʼe foho. Maski karik agora karreta laʼo neineik, maibé karreta nafatin ba oin. Nuneʼe mós, ema neʼebé rekoñese ninia limitasaun hatene bainhira nia presiza halo mudansa atu nuneʼe nia bele kontinua serbí Jeová no ajuda ema seluk.—Flp 4:5.

7. Oinsá Barzilai hatudu katak nia rekoñese ninia limitasaun?

⁷ Hanoin toʼok kona-ba Barzilai, nia mak tinan 80 bainhira Liurai David konvida nia atu serbí iha palásiu. Barzilai hatudu haraik an no la simu liurai nia konvite. Barzilai rekoñese katak nia iha limitasaun tanba nia idade ona, tan neʼe nia rekomenda mane joven ida naran Kiman atu troka ninia fatin. (2 Sam 19:35-37) Hanesan Barzilai, irmaun neʼebé idade kontente atu husik irmaun joven sira tau matan ba serbisu oioin.

8. Oinsá Liurai David rekoñese ninia limitasaun bainhira nia hakarak harii templu?

⁸ Liurai David mós hatudu ezemplu diʼak kona-ba rekoñese ninia limitasaun. Nia hakarak tebes atu harii Jeová nia uma. Maibé bainhira Jeová fó-hatene David katak Salomão mak sei halo serbisu neʼe, David simu Jeová nia desizaun no apoia projetu neʼe ho ninia laran tomak. (1 Krón 17:4; 22:5) David la hanoin katak diʼak liu nia mak harii templu tanba Salomão mak “joven deʼit no la iha esperiénsia”. (1 Krón 29:1) David hatene katak projetu atu harii templu sei hetan susesu tanba Jeová nia bensaun, laʼós tanba ema nia idade ka esperiénsia. Hanesan ho David, ferik-katuas sira kontinua serbí Jeová ho laran tomak maski sira-nia knaar troka. No sira hatene katak Jeová sei haraik bensaun ba joven sira neʼebé agora halaʼo fali sira-nia serbisu.

9. Oinsá irmaun Shigeo hatudu katak nia rekoñese ninia limitasaun?

⁹ Irmaun Shigeo rekoñese ninia limitasaun. Iha tinan 1976, bainhira nia idade 30, nia simu knaar atu serbí nuʼudar membru ba Komisaun ba Sukursál. Iha tinan 2004 nia sai koordenadór ba Komisaun ba Sukursál. Lakleur nia rekoñese katak ninia forsa menus no agora atu halo serbisu ruma, nia presiza tempu barak liu. Nia halo orasaun no hanoin katak diʼak liu  se irmaun neʼebé tinan kiʼik liu fali nia mak sai koordenadór. Maski irmaun Shigeo la serbí tan nuʼudar koordenadór, maibé nia nafatin serbí nuʼudar membru ba Komisaun ba Sukursál. Barzilai, Liurai David no irmaun Shigeo nia ezemplu hatudu katak ema neʼebé haraik an no rekoñese ninia limitasaun sei tau fokus ba buat neʼebé joven sira hatene ona duké ba buat neʼebé sira seidauk hatene. Ema hanesan neʼe sei la kompete malu ho joven sira, maibé haree sira nuʼudar maluk serbisu-naʼin.—Prov 20:29.

10. Ferik-katuas haree joven sira oinsá?

¹⁰ Ferik-katuas sira haree joven sira nuʼudar prezente furak husi Jeová no sira agradese ba buat neʼebé joven sira halo. Bainhira ferik-katuas sira-nia forsa menus, sira sente agradese tebes tanba joven sira prontu atu uza sira-nia forsa hodi serbí iha kongregasaun.

11. Tuir Rute 4:13-16, oinsá ferik-katuas hetan benefísiu hodi simu ajuda husi joven sira?

¹¹ Iha Bíblia, Noemi hatudu ezemplu diʼak kona-ba ferik ida neʼebé simu ajuda husi feto neʼebé idade kiʼik liu nia. Foufoun, Noemi haruka ninia feto-foun Rute neʼebé faluk ona atu fila fali ba ninia família. Maibé Rute lakohi husik Noemi no nia hamaluk Noemi ba Belein. Noemi kontente tebes tanba Rute halo ida-neʼe no Noemi simu Rute nia ajuda. (Rute 1:7, 8, 18) Ida-neʼe lori bensaun ba feto naʼin-rua neʼe. (Lee Rute 4:13-16.) Ferik-katuas sira neʼebé haraik an sei banati-tuir Noemi.

12. Oinsá mak apóstolu Paulo hatudu agradese?

¹² Apóstolu Paulo agradese ba ajuda  neʼebé nia simu. Porezemplu, nia fó obrigadu ba ema Kristaun iha Filipe tanba sira fó buat neʼebé nia presiza. (Flp 4:16) Nia agradese ba ajuda neʼebé nia simu husi Timóteo. (Flp 2:19-22) No Paulo mós fó obrigadu ba Maromak tanba ema sira neʼebé bá anima nia bainhira nia halo viajen ba Roma nuʼudar prizioneiru. (Após 28:15) Paulo badinas no halo viajen dook ba fatin oioin atu bele haklaken no hametin kongregasaun sira. Maibé, nia haraik an no simu ajuda husi irmaun-irmán sira.

13. Oinsá ferik-katuas sira bele hatudu agradese ba joven sira?

¹³ Se Ita mak ferik ka katuas, Ita bele hatudu agradese ba joven sira iha Ita-nia kongregasaun iha dalan oioin. Se sira hakarak tula Ita ba fatin ruma, ajuda bá kompras ka ajuda iha dalan seluk, simu sira-nia ajuda. Hanoin-hetan katak neʼe mak dalan ida neʼebé Jeová hatudu domin ba Ita. No karik Ita sei sai belun diʼak ho sira. Diʼak mós atu kontinua koko ajuda sira hakbesik liután ba Jeová no fó-hatene sira katak Ita kontente atu haree sira aumenta sira-nia serbisu iha kongregasaun. Uza tempu hamutuk ho sira no konta Ita-nia esperiénsia ba sira. Bainhira Ita halo nuneʼe, Ita “hatudu agradese” ba Jeová tanba nia mak dada joven sira-neʼe ba kongregasaun.—Kol 3:15; João 6:44; 1 Tes 5:18.

14. Oinsá David hatudu laran-luak?

¹⁴ Ferik-katuas sira bele aprende hahalok importante seluk tan husi Liurai David, hahalok neʼe mak laran-luak. David fó osan barak no sasán folin-boot oioin atu apoia serbisu konstrusaun ba templu. (1 Krón 22:11-16; 29:3, 4) Nia halo nuneʼe maski ikusmai ninia oan-mane Salomão mak simu glória hotu kona-ba projetu neʼe. Bainhira ita la iha ona forsa atu hola parte iha projetu konstrusaun ba fatin adorasaun, ita bele kontinua apoia projetu sira-neʼe hodi fó kontribuisaun tuir ita-nia kbiit. No ita bele ajuda joven sira liuhusi fahe ita-nia matenek neʼebé ita hetan ona durante tinan barak.

15. Oinsá Paulo hatudu laran-luak ba Timóteo?

¹⁵ Hanoin toʼok Paulo nia ezemplu kona-ba laran-luak. Nia konvida Timóteo atu hamaluk nia bainhira nia halo viajen nuʼudar misionáriu, no Paulo hatudu laran-luak hodi hanorin Timóteo kona-ba dalan diʼak atu haklaken no hanorin. (Após 16:1-3) Paulo treinu Timóteo atu haklaken no hanorin liafuan diʼak ho didiʼak. (1 Kor 4:17) Tuirmai, Timóteo uza buat neʼebé nia aprende husi Paulo atu hanorin fali ema seluk.

16. Tanbasá irmaun Shigeo treinu ema seluk?

¹⁶ Ferik-katuas barak treinu joven sira no la hanoin barak katak joven sira sei hadau sira-nia serbisu iha kongregasaun. Porezemplu, durante tinan barak, irmaun Shigeo neʼebé temi ona, fó treinu ba membru ba Komisaun ba Sukursál neʼebé tinan kiʼik liu fali nia. Nia halo nuneʼe atu apoia Maromak nia Ukun iha nasaun neʼebé nia serbí bá. Rezultadu mak kuandu presiza irmaun ruma atu troka ninia fatin nuʼudar koordenadór ba Komisaun ba Sukursál, iha duni irmaun neʼebé prontu. Irmaun Shigeo serbí nuʼudar membru ba Komisaun ba Sukursál durante tinan 45 liu no nia kontinua uza buat neʼebé nia aprende atu ajuda irmaun sira neʼebé tinan kiʼik liu  nia. Irmaun sira hanesan irmaun Shigeo mak folin-boot ba Maromak nia povu.

17. Tuir Lucas 6:38, saida mak ferik-katuas sira bele halo atu ajuda ema seluk?

¹⁷ Ferik-katuas sira-nia ezemplu hatudu katak serbí Jeová ho fiar no laran-metin mak dalan moris neʼebé diʼak liu. Sira-nia ezemplu hatudu katak diʼak ba Ita atu aprende Bíblia nia prinsípiu sira no aplika iha Ita-nia moris. Husi sira-nia esperiénsia rasik, sira hatene oinsá atu halaʼo knaar ruma iha tempu uluk, maibé sira mós komprende katak presiza halo mudansa tuir situasaun. Ferik-katuas sira neʼebé foin hetan batizmu mós bele ajuda iha dalan oioin. Ferik-katuas sira-neʼe bele konta kona-ba oinsá sira-nia moris sai kontente liután tanba aprende kona-ba Jeová. Joven sira sei kontente atu rona ferik-katuas sira-nia esperiénsia no buat neʼebé ferik-katuas sira aprende ona. Se ferik-katuas sira kontinua ajuda ema seluk liuhusi konta sira-nia esperiénsia, Jeová sei haraik bensaun barak ba sira.—Lee Lucas 6:38.

18. Oinsá mak ferik-katuas sira no joven sira ajuda malu?

¹⁸ Bainhira ferik-katuas sira no joven sira hakbesik liután ba malu, sira bele apoia malu. (Rom 1:12) Ita hotu iha esperiénsia neʼebé folin-boot no bele ajuda ema seluk. Ferik-katuas sira iha matenek no esperiénsia neʼebé sira hetan durante sira-nia moris tomak. Joven sira iha enerjia no kbiit. Bainhira joven sira no ferik-katuas sira serbisu hamutuk nuʼudar belun, sira lori glória ba Aman Jeová no sira mak bensaun ba kongregasaun.