1. Ita bele bolu Jeová saida?

JEOVÁ nia família inklui ninia “oan primeiru husi kriasaun hotu” Jesus no mós anju millaun ba millaun. (Kol 1:15; Sal 103:20) Bainhira Jesus iha mundu, nia ajuda ema atu haree katak sira bele bolu Jeová nuʼudar Aman. Bainhira Jesus koʼalia ho ninia dixípulu sira, nia bolu Jeová nuʼudar “haʼu-nia Aman no imi-nia Aman”. (João 20:17) No bainhira ita dedika an ba Jeová no hetan batizmu, ita sai parte ba Jeová nia família boot neʼebé hadomi malu.—Mc 10:29, 30.

2. Iha lisaun neʼe, ita sei aprende saida?

² Irmaun-irmán balu sente susar atu haree Jeová nuʼudar Aman neʼebé domin. Irmaun-irmán seluk sente susar atu hatudu domin ba irmaun-irmán sira. Iha lisaun neʼe, ita sei aprende kona-ba oinsá Jesus ajuda ita atu haree Jeová nuʼudar Aman neʼebé hadomi ita no ita bele hakbesik ba nia. Ita mós sei aprende oinsá ita bele banati-tuir Jeová hodi hadomi irmaun-irmán sira.

3. Oinsá Jesus nia orasaun ajuda ita atu hakbesik ba Jeová?

³ Jeová mak Aman neʼebé hadomi ita. Jesus haree Jeová nuʼudar Aman neʼebé laran-diʼak, nakonu ho domin, no ita bele koʼalia ba nia iha tempu naran deʼit. Jeová laʼós ukun-naʼin neʼebé laran-aat no buka deʼit atu domina ema. Jesus hakarak ita atu haree Jeová nuʼudar Aman. Ita bele aprende ida-neʼe husi orasaun neʼebé Jesus hanorin ba ninia dixípulu sira. Nia hahú ninia orasaun ho liafuan: “Ami Aman.” (Mt 6:9) Jesus karik bele deʼit haruka ita atu bolu Jeová ho títulu “Ida neʼebé Kbiit Boot Liu Hotu”,  “Kriadór” ka “Liurai rohan-laek” tanba Bíblia uza títulu sira-neʼe atu refere ba Jeová. (Gén 49:25; Isa 40:28; 1 Tim 1:17) Maibé Jesus haruka ita atu bolu Jeová nuʼudar “Aman”.

4. Oinsá ita bele hatene katak Jeová hakarak ita atu hakbesik ba nia?

⁴ Ita sente susar atu haree Jeová nuʼudar Aman neʼebé hadomi ita ka lae? Ema balu sente nuneʼe. Se Ita-nia aman rasik la hatudu laran-diʼak, karik susar ba ita atu imajina kona-ba aman neʼebé hadomi ita. Maibé ita bele sente kmaan tanba Jeová komprende ita-nia sentimentu. Nia hakarak hakbesik ba ita. Tan neʼe mak Bíblia anima ita: “Hakbesik ba Maromak, no nia sei hakbesik ba imi.” (Tgo 4:8) Jeová hadomi ita no hatete katak nia sei sai Aman neʼebé diʼak tebes ba ita.

5. Tuir Lucas 10:22, oinsá Jesus bele ajuda ita hakbesik ba Jeová?

⁵ Jesus bele ajuda ita hakbesik ba Jeová. Jesus koñese Jeová ho didiʼak no haleno Jeová nia hahalok sira ho perfeitu, tan neʼe nia hatete: “Ema neʼebé haree ona haʼu, haree ona mós Aman.” (João 14:9) Hanesan maun ida, Jesus hanorin ita atu hatudu respeitu no halo tuir Aman Jeová. Nia mós hanorin ita kona-ba oinsá atu halo Jeová kontente no nia simu ita. Dalan neʼebé Jesus halaʼo ninia moris iha mundu ajuda ita komprende katak Jeová mak laran-diʼak no hadomi ita. (Lee Lucas 10:22.) Mai ita haree ezemplu balu.

6. Fó toʼok ezemplu kona-ba oinsá Jeová rona ba Jesus.

⁶ Jeová rona ba ninia oan sira. Hanoin toʼok kona-ba oinsá Jeová rona ba ninia Oan-Mane primeiru. Jesus halo orasaun beibeik kuandu nia iha rai, no Jeová rona ba nia. (Lc 5:16) Jeová rona bainhira Jesus halo orasaun kona-ba desizaun importante, hanesan hili apóstolu naʼin-12. (Lc 6:12, 13) Jeová mós rona ba Jesus nia orasaun bainhira nia sente estrese. Antes Judas trai Jesus, Jesus harohan ba ninia Aman kona-ba susar  neʼebé lakleur tan nia sei hasoru. Jeová laʼós deʼit rona ba Jesus nia orasaun, maibé nia mós haruka anju ida atu hametin ninia Oan-Mane.—Lc 22:41-44.

7. Ita sente oinsá kuandu ita hatene katak Jeová rona ba ita-nia orasaun?

⁷ Ohin loron, Jeová mós rona ba ita-nia orasaun no mós hatán ba ita-nia orasaun iha tempu neʼebé loos no iha dalan neʼebé diʼak. (Sal 116:1, 2) Porezemplu, irmán ida iha rai-Índia sente laran-taridu demais, no nia halo orasaun ba Jeová kona-ba neʼe. Nia hakerek: “Programa JW Broadcasting^® ba fulan-Maiu 2019 kona-ba saida mak ita bele halo kuandu laran-taridu no hanoin barak ajuda tebes haʼu. Neʼe mak resposta ba haʼu-nia orasaun.”

8. Jeová hatudu domin ba Jesus iha dalan oinsá?

⁸ Jeová hadomi no tau matan ba ita hanesan nia halo ba Jesus kuandu Jesus iha mundu. (João 5:20) Jeová tau matan ba Jesus nia presiza espirituál, emosaun no fíziku. Nia mós la dada an atu fó sai katak nia hadomi no kontente ho Jesus. (Mt 3:16, 17) Jesus hatene katak ninia Aman iha lalehan sei nafatin hamutuk ho nia no sei ajuda nia, tan neʼe nia nunka sente mesamesak.—João 8:16.

9. Saida deʼit mak hatudu katak Jeová hadomi ita?

⁹ Hanesan Jesus, ita hotu sente rasik ona Jeová nia domin iha dalan oioin. Hanoin toʼok: Jeová dada ita atu sai ninia belun no nia mós fó ba ita irmaun-irmán sira neʼebé halo ita sente kontente no anima ita bainhira ita hasoru susar. (João 6:44) Jeová mós fó ba ita ai-han espirituál barak. Nia mós ajuda ita atu iha buat sira neʼebé ita presiza atu kontinua moris. (Mt 6:31, 32) Bainhira ita hanoin kona-ba Jeová nia domin ba ita, ita-nia domin ba nia mós sei aumenta.

10. Ita bele aprende saida husi Jeová nia dalan atu trata irmaun-irmán sira?

¹⁰ Jeová hadomi irmaun-irmán sira. Maibé karik la fasil ba ita atu sente domin ka hatudu domin ba irmaun-irmán sira tanba ita-nia kultura no situasaun moris la hanesan. No ita hotu halo sala neʼebé bele halo ema seluk laran-kanek ka triste. Maski nuneʼe, ita hotu bele hakaʼas an atu hadomi irmaun-irmán sira. Oinsá? Hodi banati-tuir Aman Jeová neʼebé hadomi irmaun-irmán sira. (Éf 5:1, 2; 1 João 4:19) Mai ita aprende husi Jeová nia ezemplu.

11. Oinsá Jesus haleno Jeová nia “laran-sadiʼa”?

¹¹ Jeová hatudu “laran-sadiʼa”. (Lc 1:78) Ema neʼebé laran-sadiʼa sente triste bainhira nia haree ema seluk hetan terus no nia sei buka dalan atu ajuda no mós fó kmaan. Jesus hatudu katak nia banati-tuir Jeová nia laran-sadiʼa liuhusi dalan neʼebé nia trata ema seluk. (João 5:19) Porezemplu, bainhira Jesus hasoru ema-lubun, Jesus “hanoin tebes sira, tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha”. (Mt 9:36) Jesus laʼós deʼit hanoin sira, maibé nia mós ajuda sira. Nia kura ema neʼebé moras no fó kmaan ba ema neʼebé “serbisu makaʼas no lori naha todan”.—Mt 11:28-30; 14:14.

12. Oinsá ita bele hatudu laran-sadiʼa ba irmaun-irmán sira?

¹² Se ita hanoin kona-ba problema neʼebé irmaun-irmán sira hasoru, neʼe sei ajuda ita hatudu laran-sadiʼa ba sira. Porezemplu, irmán ida karik moras todan. Nia nunka koʼalia kona-ba ninia situasaun neʼe, maibé nia sei sente kontente loos se ema  ida ajuda nia. Nia bele sustenta ninia família nia presiza ka lae? Ita bele ajuda teʼin ba nia ka ajuda hamoos ninia uma ka lae? Ka karik irmaun ida lakon ninia serbisu. Ita bele fó osan uitoan atu ajuda nia toʼo nia hetan fali serbisu ka lae? No karik ita la presiza fó sai katak ita mak fó osan neʼe.

13-14. Oinsá ita bele banati-tuir Jeová nia laran-luak?

¹³ Jeová mak laran-luak. (Mt 5:45) Labele hein toʼo irmaun-irmán husu ajuda mak ita foin hatudu laran-luak. Hanesan Jeová, ita bele hatudu laran-luak antes sira husu. Jeová halo loro-matan atu fó naroman ba ita loroloron, maski ita la husu ida-neʼe. No ema hotu bele hetan benefísiu husi loro-matan, laʼós deʼit ema neʼebé hatudu agradese ba nia. Jeová hatudu katak nia hadomi ita hodi fó buat neʼebé ita presiza. Ita hadomi tebes Jeová tanba ninia laran-diʼak no laran-luak.

¹⁴ Irmaun-irmán barak banati-tuir Jeová hodi hatudu laran-luak ba ema seluk. Porezemplu, iha tinan 2013 anin-fuik Haiyan estraga área barak iha rai-Filipinas, no mós estraga irmaun-irmán barak nia uma no sasán. Maibé irmaun-irmán iha mundu tomak ajuda lalais. Sira barak kontribui osan ka ajuda hadiʼa ka harii fali irmaun-irmán sira-nia uma hamutuk 750 durante tinan ida. Durante pandemia COVID-19, Testemuña sira serbisu makaʼas atu ajuda maluk fiar-naʼin. Kuandu ita la demora atu ajuda irmaun-irmán sira, ita hatudu katak ita hadomi sira.

15-16. Tuir Lucas 6:36, saida mak ita presiza halo atu banati-tuir ita-nia Aman?

¹⁵ Jeová mak laran-sadiʼa no prontu atu fó perdua. (Lee Lucas 6:36.) Loroloron ita-nia Aman iha lalehan fó perdua ba ita. (Sal 103:10-14) Jesus nia dixípulu sira la perfeitu, maski nuneʼe Jesus prontu perdua sira. Nia mós prontu fó ninia moris atu ita bele hetan perdua. (1 João 2:1, 2) Tanba Jeová no Jesus prontu atu perdua ita no hatudu laran-sadiʼa, neʼe book ita atu hakbesik liután ba sira.

¹⁶ Ita-nia domin ba malu sei sai metin liután se ita “perdua malu ho laran”.  (Éf 4:32) Klaru katak dala ruma la fasil atu perdua ema seluk, tan neʼe ita presiza hakaʼas an atu haburas hahalok neʼe. Irmán ida sente katak informasaun ho títulu “Sai prontu atu fó perdua ba malu” husi Livru Haklaken ajuda tebes nia. * Nia hakerek: “Informasaun neʼe ajuda haʼu komprende oinsá fó perdua ba ema seluk lori benefísiu mai haʼu. No mós esplika katak fó perdua la dehan katak ita simu deʼit ema seluk nia hahalok sala, ka taka matan ba hahalok sala neʼe. Maibé, bainhira ita fó perdua, ita sei la rai tan hirus ba ema neʼebé halo sala no ita bele kontinua sente dame.” Kuandu ita sai prontu atu fó perdua ba irmaun-irmán sira, ita hatudu katak ita hadomi sira no banati-tuir Aman Jeová.

17. Tuir Mateus 5:16, oinsá ita bele fó glória ba Jeová?

¹⁷ Ita sente agradese tebes tanba ita iha irmaun-irmán sira iha mundu tomak neʼebé hadomi malu. Ita hakarak ema barak liután atu serbí Jeová hamutuk ho ita. Tan neʼe, ita sei kuidadu atu la halo ema hanoin sala kona-ba Jeová no ninia povu. Ita sei hakaʼas an atu hatudu hahalok diʼak hodi nuneʼe ema hakarak atu aprende kona-ba Jeová no serbí nia.—Lee Mateus 5:16.

18. Saida mak bele ajuda ita atu haklaken ho brani?

¹⁸ Dala ruma, ema kritika ita ka haterus ita tanba ita halo tuir ita-nia Aman iha lalehan. Saida mak ita bele halo se ita sente taʼuk atu koʼalia kona-ba ita-nia fiar? Fiar bá katak Jeová no ninia Oan-Mane sei ajuda ita. Jesus hatete ba ninia dixípulu sira katak sira la presiza hanoin barak kona-ba oinsá ka saida mak sira sei hatete. Tanbasá? Jesus esplika: “Iha oras neʼebá Maromak sei halo imi hatene buat neʼebé imi atu koʼalia. Tanba laʼós imi rasik deʼit mak sei koʼalia, maibé imi-nia Aman nia espíritu mak ajuda imi atu koʼalia.”—Mt 10:19, 20.

19. Konta toʼok esperiénsia ida kona-ba fó sasin ho brani.

 ¹⁹ Porezemplu tinan balu liubá, irmaun Robert iha Áfrika Súl, presiza bá tribunál hodi esplika ba juís tanbasá nia lakohi tama militár. Iha tempu neʼebá, nia foin aprende Bíblia no seidauk iha koñesimentu barak kona-ba Bíblia. Maibé nia ho aten-brani esplika ba juís katak nia hakarak atu nafatin neutrál tanba ninia domin ba ninia maluk Kristaun sira. Nia hafolin tebes Jeová nia família! Derrepente juís neʼe husu: “Sé mak ó-nia maluk?” Robert hakfodak ho juís nia pergunta neʼe, maibé nia hanoin-hetan eskritura ba loron neʼe. Neʼe mak Mateus 12:50 neʼebé hatete: “Ema naran deʼit neʼebé halo haʼu-nia Aman iha lalehan nia hakarak, ema neʼe mak haʼu-nia alin, feton no inan.” Maski Robert foin mak aprende Bíblia, maibé Jeová nia espíritu santu ajuda nia atu hatán ba pergunta neʼe no pergunta balu tan. Klaru katak Jeová sente orgullu ho Robert. Jeová mós sei orgullu ho ita se ita sadere nafatin ba nia atu haklaken ho aten-brani kuandu hasoru susar.

20. Ita sei hakaʼas an atu halo saida? (João 17:11, 15)

²⁰ Ita sente agradese tebes tanba bele sai parte ba família espirituál neʼebé hadomi malu. Ita iha Aman neʼebé diʼak liu hotu no mós irmaun-irmán sira neʼebé hadomi ita. Ita tenke kontinua sente agradese ba ida-neʼe. Satanás no sira neʼebé apoia nia hakarak halo ita duvida katak Jeová hadomi ita no mós koko atu sobu ita-nia unidade. Jesus halo orasaun ba Jeová atu nia tau matan didiʼak ita hodi nuneʼe ita nafatin iha unidade. (Lee João 17:11, 15.) Jeová hatán ba Jesus nia orasaun. Hanesan Jesus, ita la duvida katak Aman Jeová hadomi ita no sei ajuda ita. Mai ita hakaʼas an atu hakbesik liután ba ita-nia família espirituál.