1. Pedro sente oinsá bainhira haree Jesus nia milagre?

 PEDRO uza kalan tomak atu kaer ikan, maibé la hetan ikan ida. Derrepente deʼit Jesus hatete ba nia: “Lori ró ba tasi klaran, no hatún imi-nia rede.” (Lc 5:4) Pedro duvida katak nia sei hetan ikan, maibé nia halo tuir buat neʼebé Jesus haruka. Ikusmai sira kaer ikan barak toʼo rede hahú naklees. Bainhira sira rekoñese katak Jesus foin halo milagre ida, Pedro no sira neʼebé hamutuk ho nia “hakfodak loos”. Pedro hatete: “Naʼi, hadook an husi haʼu, tanba haʼu ema sala-naʼin.” (Lc 5:​6-9) Karik Pedro sente nia la merese atu laʼo ho Jesus.

2. Tanbasá mak diʼak atu estuda kona-ba Pedro nia ezemplu?

² Pedro koʼalia buat neʼebé loos, katak nia “ema sala-naʼin”. Bíblia hatete katak dala ruma Pedro koʼalia ka halo buat neʼebé ikusmai nia arrepende. Ita mós sente hanesan neʼe ka lae? Ita luta daudaun hasoru toman aat ka fraku ruma ka lae? Se nuneʼe, Ita bele hetan kmaan hodi aprende husi Pedro nia ezemplu. Oinsá? Hanoin toʼok: Jeová la presiza temi Pedro nia sala sira iha Bíblia. Maibé buat sira-neʼe hakerek iha Bíblia nuʼudar lisaun mai ita. (2 Tim 3:​16, 17) Bainhira ita aprende kona-ba Pedro neʼebé iha fraku no sentimentu hanesan ita, neʼe bele ajuda ita komprende katak Jeová la husu ita atu sai perfeitu. Jeová hakarak ita atu kontinua serbí nia ho laran-metin, maski ita iha fraku oioin.

3. Tanbasá ita presiza hakaʼas an atu kontinua serbí Jeová no la rende an?

³ Tanbasá ita presiza hakaʼas an atu kontinua serbí Jeová  no la rende an? Baibain se ita treinu atu halo buat ruma beibeik, ikusmai ita sei halo ida-neʼe ho diʼak. Porezemplu, karik tokadór ida uza tinan barak atu treinu toka instrumentu ida. Durante treinu, karik nia sei halo sala barak, maibé se nia kontinua pratika nia sei iha mudansa. Maski nia matenek ona atu toka, dala ruma mós nia bele halo sala. Maibé, nia la rende an. Nia nafatin pratika atu bele toka ho matenek. Nuneʼe mós, maski ita sente katak ita manán ona ita-nia fraku ida, maibé dala ruma ita mós bele halo fali sala. Maibé kontinua hakaʼas an atu halo mudansa. Ita hotu dala ruma koʼalia ka halo buat ruma neʼebé ikusmai ita arrepende, maibé Jeová sei ajuda ita atu halo mudansa se ita la rende an. (1 Ped 5:10) Mai ita aprende husi Pedro nia ezemplu kona-ba la rende an. Jesus nia laran-sadiʼa ba Pedro bele motiva ita atu kontinua serbí Jeová.

4. Tuir Lucas 5:​5-10, Pedro hatete saida kona-ba ninia an, maibé oinsá mak Jesus hametin nia?

⁴ Bíblia la esplika tanbasá Pedro temi ninia an nuʼudar “ema sala-naʼin”, ka nia hanoin hela kona-ba sala saida. (Lee Lucas 5:​5-10.) Maibé karik nia halo sala sériu ruma. Jesus hatene katak Pedro taʼuk, karik tanba Pedro sente folin-laek. Jesus mós hatene katak Pedro bele kontinua laran-metin. Tan neʼe Jesus ho laran-diʼak hatete ba Pedro: “Keta taʼuk.” Tanba Jesus tau fiar ba Pedro, neʼe troka Pedro nia moris. Pedro no ninia alin André husik hela sira-nia serbisu nuʼudar peskadór no kontinua laʼo tuir Mesias. Desizaun neʼe lori bensaun furak ba sira.—Mc 1:​16-18.

5. Pedro simu bensaun saida tanba manán ninia sentimentu taʼuk no laʼo tuir Jesus?

⁵ Pedro hetan esperiénsia furak barak bainhira nia laʼo tuir Kristu. Nia haree Jesus kura ema moras, duni sai anju aat, no fó moris-hiʼas ba ema mate. b (Mt 8:​14-17; Mc 5:​37, 41, 42) Pedro mós haree vizaun kona-ba Jesus iha futuru nuʼudar Liurai ba Maromak nia Ukun, no nia nunka haluha akontesimentu neʼe. (Mc 9:​1-8; 2 Ped 1:​16-18) Pedro sei la haree akontesimentu sira-neʼe se nia la laʼo tuir Jesus. Ita bele fiar katak Pedro sente kontente tanba la husik ninia hanoin neʼebé negativu hanetik nia atu simu bensaun furak sira-neʼe!

6. Pedro manán kedas ninia fraku sira ka lae? Esplika toʼok.

 ⁶ Maski Pedro haree no rona ona buat sira-neʼe, maibé nia nafatin luta hasoru ninia fraku sira. Hanoin toʼok kona-ba ezemplu balu. Bainhira Jesus esplika kona-ba oinsá Jesus sei hasoru terus no mate hodi kumpre Bíblia nia profesia, Pedro korrije nia. (Mc 8:​31-33) Dala barak Pedro no apóstolu sira diskute malu kona-ba sé mak boot liu entre sira. (Mc 9:​33, 34) Iha kalan antes Jesus mate, Pedro sabir tiha mane ida nia tilun. (João 18:10) Iha kalan neʼebé hanesan, Pedro taʼuk ba ema no nega Jesus ba dala tolu. (Mc 14:​66-72) Tuirmai Pedro tanis makaʼas tanba laran-susar tebes.—Mt 26:75.

7. Depois Jesus nia moris-hiʼas, Pedro hetan oportunidade saida?

⁷ Jesus la husik hela Pedro neʼebé laran-kraik tebes. Depois Jesus hetan tiha moris-hiʼas, nia fó oportunidade ba Pedro atu hatudu katak Pedro sei hadomi Jesus. Jesus konvida Pedro atu tau matan ba ninia bibi sira ho haraik an. (João 21:​15-17) Pedro prontu atu halo tuir Jesus. Iha loron Pentekostes, Pedro iha Jeruzalein no simu espíritu santu hamutuk ho dixípulu sira seluk.

8. Sala saida mak Pedro halo iha Antiokia?

⁸ Maski Pedro simu ona esperansa atu moris iha lalehan, nia nafatin luta hasoru ninia fraku sira. Iha tinan 36 EC, Maromak haruka Pedro atu bá hasoru Cornélio neʼebé laʼós ema Judeu. Iha neʼebá mak Jeová hili Cornélio ho espíritu santu, no neʼe hatudu ho klaru katak “Maromak la todan ba sorin” no ema husi nasaun seluk bele sai parte ba kongregasaun Kristaun. (Após 10:​34, 44, 45) Tuirmai Pedro sai toman atu han hamutuk ho ema husi nasaun seluk, maski uluk nia nunka hanoin atu halo ida-neʼe. (Gal 2:12) Maibé ema Judeu balu neʼebé sai ona ema Kristaun hanoin katak sira labele han hamutuk ho ema husi nasaun seluk. Bainhira ema sira-neʼe mai iha Antiokia, Pedro para atu han ho maluk sira husi nasaun seluk. Karik nia taʼuk ba ema Kristaun Judeu sira-neʼe. Apóstolu Paulo haree Pedro nia laran-makerek neʼe no korrije nia iha ema hotu nia oin. (Gal 2:​13, 14) Maski Pedro halo sala, maibé nia nafatin la rende an. Saida mak ajuda nia?

9. Oinsá mak João 6:​68, 69 hatudu katak Pedro laran-metin?

⁹ Pedro nafatin laran-metin, nia la husik buat naran deʼit atu hapara nia hodi laʼo tuir Jesus. Nia hatudu laran-metin bainhira Jesus koʼalia buat ruma neʼebé dixípulu sira la komprende. (Lee João 6:​68, 69.) Dixípulu barak lakohi husu ka hein atu rona ba Jesus nia esplikasaun, no sira para atu laʼo tuir Jesus. Maibé Pedro la halo nuneʼe. Nia rekoñese katak só Jesus deʼit mak “iha liafuan moris rohan-laek nian”.

10. Oinsá mak Jesus hatudu katak nia tau fiar ba Pedro? (Haree mós dezeñu.)

¹⁰ Jesus la husik hela Pedro. Iha Jesus nia kalan ikus, nia hatene katak Pedro no apóstolu sira seluk sei husik hela nia. Maski nuneʼe, Jesus fó-hatene Pedro katak nia fiar duni Pedro sei fila fali no hatudu laran-metin. (Lc 22:​31, 32) Jesus komprende katak “laran hakarak maibé isin fraku”. (Mc 14:38) Maski Pedro nega Jesus, maibé Jesus la rende an  atu ajuda nia. Bainhira Jesus moris hiʼas, nia mosu ba Pedro kuandu Pedro mesak hela. (Mc 16:7; Lc 24:34; 1 Kor 15:5) Klaru katak neʼe hametin tebes Pedro!

11. Oinsá mak Jesus ajuda Pedro fiar katak Jeová sei tau matan ba nia?

¹¹ Jesus promete ba Pedro katak Jeová sei tau matan nia. Depois Jesus moris hiʼas, nia halo milagre ida tan hodi ajuda Pedro no apóstolu sira kaer ikan. (João 21:​4-6) Milagre neʼe hametin Pedro nia fiar katak Jeová sei tau matan ba ninia presiza fíziku nian. Karik Pedro hanoin-hetan Jesus nia liafuan katak Jeová sei tau matan ba sira neʼebé kontinua “buka uluk Maromak nia Ukun”. (Mt 6:33) Tan neʼe Pedro tau uluk serbisu haklaken duké kaer ikan. Iha loron Pentekostes tinan 33 EC, nia haklaken ho aten-brani no ema rihun ba rihun mak hetan lia-loos. (Após 2:​14, 37-41) Nia mós ajuda ema Samaria no ema husi nasaun seluk atu hatudu fiar ba Kristu. (Após 8:​14-17; 10:​44-48) Jeová uza Pedro iha dalan neʼebé boot atu ajuda ema oioin tama ba kongregasaun.

12. Oinsá mak Pedro nia ezemplu bele ajuda ita se ita kontinua luta hasoru ita-nia fraku sira?

¹² Jeová bele ajuda ita atu la rende an. Dala ruma la fasil ba ita atu serbí nia, liuliu se ita luta daudaun hasoru ita-nia fraku. Dala ruma ita sente katak ita-nia fraku mak boot liu fali buat neʼebé Pedro hasoru. Maibé Jeová bele fó ita kbiit atu la rende an. (Sal 94:​17-19) Porezemplu, irmaun ida antes nia aprende kona-ba lia-loos, nia halo hahalok omoseksuál ba tinan barak. Ikusmai nia husik tiha ninia toman neʼe no moris tuir Bíblia nia hanorin. Maski nuneʼe, dala ruma nia nafatin luta hasoru ninia hakarak neʼebé sala. Saida mak ajuda nia atu la rende an? Nia dehan: “Jeová fó kbiit mai ita. Ho Jeová nia espíritu, haʼu aprende katak ita bele kontinua moris tuir lia-loos. Jeová uza ona haʼu, no maski haʼu iha fraku oioin nia nafatin kontinua hametin haʼu.”

13. Oinsá mak ita bele banati-tuir Pedro nia ezemplu neʼebé temi iha Apóstolu 4:​13, 29, 31? (Haree mós foto.)

¹³ Hanesan ita aprende ona, Pedro halo sala neʼebé boot tanba taʼuk ba ema. Maibé hodi halo orasaun ba Jeová husu  aten-brani, Pedro bele manán hasoru ninia sentimentu taʼuk. (Lee Apóstolu 4:​13, 29, 31.) Ita mós bele manán ita-nia sentimentu taʼuk. Hanoin toʼok kona-ba irmaun joven ida naran Horst neʼebé hela iha rai-Alemaña iha tempu Nazi. Dala balu, tanba taʼuk nia mós hatete: “Heil Hitler!” Duké hirus nia, Horst nia inan-aman halo orasaun ho nia atu husu Jeová haraik aten-brani ba nia. Ho ajuda husi ninia inan-aman no sadere ba Jeová, Horst bele haburas aten-brani no hamriik metin. Ikusmai nia hatete: “Jeová nunka husik hela haʼu.” c

14. Oinsá mak katuas sira bele ajuda ema neʼebé sente atu rende an?

¹⁴ Jeová no Jesus sei nunka husik hela ita. Depois Pedro nega tiha Jesus, Pedro presiza halo desizaun importante ida. Nia sei kontinua atu laʼo tuir Jesus ka lae? Jesus harohan ba Jeová atu Pedro la lakon fiar. Jesus fó-hatene Pedro kona-ba ninia orasaun, no katak Pedro sei hametin maluk fiar-naʼin sira. (Lc 22:​31, 32) Bainhira Pedro hanoin fali Jesus nia liafuan sira-neʼe, neʼe hametin duni nia! Bainhira ita presiza halo desizaun importante ruma, Jeová bele uza katuas sira atu fó matadalan mai ita hodi bele hametin ita-nia fiar. (Éf 4:​8, 11) Irmaun ida naran Paulo neʼebé serbí nuʼudar katuas ba tempu kleur ona koko atu fó kmaan hanesan neʼe. Bainhira iha irmaun ka irmán ruma neʼebé sente atu rende an, nia husu ba sira atu hanoin fali kona-ba oinsá Jeová dada sira ba lia-loos. Nia hametin sira katak Jeová sei nunka husik hela sira tanba ninia domin  neʼebé laran-metin. Nia hatete: “Haʼu haree ona ema barak neʼebé la rende an tanba simu ajuda husi Jeová.”

15. Oinsá mak Pedro no irmaun Horst nia ezemplu hatudu katak Mateus 6:33 mak loos?

¹⁵ Hanesan Jeová tau matan ba Pedro no apóstolu sira seluk nia presiza, nia mós sei tau matan ba ita-nia presiza bainhira ita tau uluk serbisu haklaken iha ita-nia moris. (Mt 6:33) Depois Funu Mundiál Segundu, Horst, neʼebé temi ona hakarak atu foti pioneiru regulár. Maibé nia kiak tebes, no taʼuk katak nia labele tau matan ba ninia presiza no serbí nuʼudar pioneiru regulár. Saida mak nia halo? Nia deside atu koko Jeová, tan neʼe durante katuas área nia vizita, nia uza semana tomak atu haklaken. Iha semana nia rohan, katuas área fó envelope ba nia no la fó-hatene sé mak fó ida-neʼe. Iha laran iha osan neʼebé natoon atu sustenta ninia presiza nuʼudar pioneiru durante fulan balu. Horst haree ida-neʼe nuʼudar garantia katak Jeová sei tau matan ba nia. Durante ninia moris tomak, nia tau uluk Maromak nia Ukun.—Mal 3:10.

16. Tanbasá importante atu aprende kona-ba Pedro nia ezemplu no buat neʼebé nia hakerek?

¹⁶ Klaru katak Pedro sente kontente tebes tanba Jesus nunka husik hela nia, hanesan uluk Pedro husu ba Jesus! Pedro kontinua simu treinu husi Kristu atu sai apóstolu neʼebé laran-metin no nuʼudar ezemplu ba ema Kristaun sira. Ita bele aprende lisaun oioin husi treinu neʼebé Jesus fó ba Pedro. Pedro hakerek kona-ba lisaun balu iha ninia karta rua ba ema Kristaun iha apóstolu sira-nia tempu. Iha lisaun tuirmai, ita sei koʼalia hamutuk kona-ba karta sira-neʼe no oinsá mak ita bele aplika ohin loron.