1. Lakleur antes apóstolu Pedro mate, Jeová dirije nia atu halo saida?

 APÓSTOLU Pedro serbí Jeová ho laran-metin ba tinan barak. Nia laʼo tuir Jesus durante Jesus halaʼo serbisu haklaken, nia komesa haklaken ba ema neʼebé laʼós ema Judeu, no serbí nuʼudar membru ba Grupu Administradór. Bainhira Pedro hatene katak lakleur nia sei mate, Jeová fó tan serbisu ba nia. Maizumenus iha tinan 62-64 EC, Jeová dirije nia atu hakerek karta rua, neʼe mak livru Primeiru Pedro no Segundu Pedro. Pedro espera katak karta rua neʼe sei ajuda ema Kristaun sira kuandu nia mate.—2 Ped 1:​12-15.

2. Tanbasá Pedro nia karta sira hakerek iha tempu neʼebé loos?

² Apóstolu Pedro hakerek ninia karta sira bainhira maluk fiar-naʼin seluk “sente laran-susar . . . tanba hasoru terus oioin”. (1 Ped 1:6) Ema aat koko atu habelar hanorin falsu no hahalok la moos iha kongregasaun. (2 Ped 2:​1, 2, 14) Lakleur tan ema Kristaun iha Jeruzalein sei hasoru “buat hotu nia rohan”, katak tropa Roma sei harahun sidade Jeruzalein no mós templu. (1 Ped 4:7) Ita bele fiar katak Pedro nia karta sira ajuda ema Kristaun iha tempu neʼebá atu hatene oinsá sira bele tahan hasoru susar neʼebé mosu daudaun, no mós oinsá sira bele prepara atu hasoru susar neʼebé atu mai. b

3. Tanbasá ita presiza aprende kona-ba Pedro nia karta sira?

³ Maski Pedro nia karta sira mak ba ema Kristaun iha tempu uluk, maibé Jeová inklui karta sira-neʼe iha Bíblia.  Tan neʼe ita mós bele hetan benefísiu husi karta sira-neʼe. (Rom 15:4) Mundu neʼe nakonu ho hahalok la moos neʼebé bele halo susar mai ita atu serbí Jeová. Liután neʼe, lakleur tan ita sei hasoru terus boot neʼebé mak liu fali susar neʼebé ema Judeu hasoru iha tempu uluk. Ita bele hetan matadalan importante oioin iha Pedro nia karta rua. Matadalan sira-neʼe sei ajuda ita atu hein ba Jeová nia loron, manán hasoru sentimentu taʼuk, no hadomi malu tebetebes. Neʼe mós sei ajuda katuas sira aprende oinsá sira bele tau matan ba Maromak nia bibi sira ho didiʼak.

4. Tuir 2 Pedro 3:​3, 4, saida mak bele koko ita-nia fiar?

⁴ Ohin loron ema barak la fiar ba Bíblia nia profesia. Kontradór sira goza ita tanba ita hein namanas ba mundu nia rohan ba tempu kleur ona. Ema balu dehan katak mundu nia rohan sei nunka mai. (Lee 2 Pedro 3:​3, 4.) Se ita rona komentáriu sira hanesan neʼe husi ema iha haklaken-fatin, kolega serbisu, ka família, neʼe bele koko ita-nia fiar. Pedro esplika kona-ba saida mak bele ajuda ita.

5. Saida mak bele ajuda ita atu iha hanoin neʼebé loos kona-ba mundu nia rohan? (2 Pedro 3:​8, 9)

⁵ Karik ema balu hanoin katak Jeová demora atu halakon sistema aat neʼe. Pedro nia liafuan bele ajuda ita atu iha hanoin neʼebé loos. Ninia liafuan fó-hanoin ita katak Jeová nia haree kona-ba tempu la hanesan duni ho ema nia haree. (Lee 2 Pedro 3:​8, 9.) Ba Jeová tinan rihun ida mak hanesan loron ida. Jeová hatudu pasiénsia no lakohi ema ida atu lakon. Bainhira ninia loron toʼo mai, mundu aat neʼe sei lakon. Ita iha priviléjiu furak atu kontinua haklaken ba ema iha mundu tomak nuʼudar ita hela iha tempu neʼe nia rohan.

6. Oinsá atu “hanoin-hetan nafatin kona-ba Jeová nia loron”? (2 Pedro 3:​11, 12)

⁶ Pedro anima ita atu “hanoin-hetan nafatin kona-ba Jeová nia loron”. (Lee 2 Pedro 3:​11, 12.) Oinsá? Loroloron ita bele medita kona-ba bensaun neʼebé ita sei hetan iha mundu foun. Imajina toʼok kona-ba anin neʼebé fresku, ita han ai-han neʼebé saudavel, fó benvindu ba ema neʼebé moris hiʼas, no hanorin ema neʼebé moris iha tempu uluk kona-ba oinsá mak Bíblia nia profesia sai loos. Medita kona-ba buat sira-neʼe sei ajuda ita hanoin-hetan nafatin kona-ba Jeová nia loron no fiar metin katak ita moris iha loron ikus sira. Hodi “hatene nanis ona” kona-ba ita-nia futuru, mestre falsu sira “sei la lori lakon” ita.—2 Ped 3:17.

7. Oinsá sentimentu taʼuk ba ema bele afeta ita?

⁷ Tanba ita hatene katak Jeová nia loron besik ona, neʼe book ita atu hakaʼas an hodi fahe liafuan diʼak ba ema seluk. Maibé dala ruma iha situasaun balu ita dada an atu koʼalia kona-ba lia-loos. Tanbasá? Karik ba tempu balu ita taʼuk ba ema. Neʼe akontese ba Pedro. Iha kalan Jesus hetan tesi-lia, Pedro taʼuk no dehan katak nia laʼós Jesus nia dixípulu no nia nega Jesus dala tolu. (Mt 26:​69-75) Maibé ikusmai nia manán ninia sentimentu taʼuk no ho fiar metin nia hatete: “Keta taʼuk buat neʼebé ema seluk taʼuk, no keta laran-susar.” (1 Ped 3:14) Pedro nia liafuan neʼe hametin ita katak ita bele manán hasoru sentimentu taʼuk ba ema.

8. Saida mak bele ajuda ita atu manán sentimentu taʼuk ba ema? (1 Pedro 3:15)

 ⁸ Saida mak bele ajuda ita atu manán sentimentu taʼuk ba ema? Pedro hatete: “Rekoñese Kristu nuʼudar Naʼi neʼebé merese respeitu iha imi-nia laran.” (Lee 1 Pedro 3:15.) Ita bele medita kona-ba Jesus Kristu nia pozisaun no podér nuʼudar ita-nia Naʼi no Liurai. Se Ita sente nakdedar ka taʼuk bainhira iha oportunidade atu haklaken, hanoin kona-ba ita-nia Liurai. Imajina nia ukun daudaun iha lalehan no anju rihun ba rihun mak haleʼu nia. Hanoin-hetan katak nia iha “kbiit tomak iha lalehan no rai” no nia sei ‘hamutuk nafatin ho ita toʼo mundu neʼe nia rohan’. (Mt 28:​18-20) Pedro anima ita atu “sai prontu nafatin” hodi defende ita-nia fiar. Ita hakarak atu haklaken iha serbisu-fatin, iha eskola, ka iha situasaun la formál seluk tan? Se nuneʼe, hanoin kona-ba bainhira mak Ita bele halo ida-neʼe no prepara nanis Ita-nia liafuan. Halo orasaun hodi husu aten-brani, no fiar metin katak Jeová sei ajuda Ita atu manán sentimentu taʼuk ba ema.—Após 4:29.

9. Iha situasaun saida mak Pedro la hatudu domin? (Haree mós dezeñu.)

⁹ Pedro aprende oinsá atu hatudu domin. Nia mós rona bainhira Jesus dehan: “Haʼu fó ba imi ukun-fuan foun ida,  katak imi hadomi malu. Hanesan haʼu hadomi ona imi, imi mós tenke hadomi malu.” (João 13:34) Maski nuneʼe, Pedro nafatin sai taʼuk ba ema, no nia lakohi han hamutuk ho irmaun-irmán sira husi nasaun seluk. Apóstolu Paulo dehan katak Pedro hatudu “laran-makerek”. (Gal 2:​11-14) Pedro simu Paulo nia konsellu no aprende husi ida-neʼe. Iha ninia karta sira, Pedro énfaze katak ita laʼós deʼit atu sente domin ba irmaun-irmán sira, maibé mós atu hatudu domin.

10. Saida mak bele ajuda ita atu hatudu “domin neʼebé la laran-makerek ba malu”? Esplika toʼok. (1 Pedro 1:22)

¹⁰ Pedro dehan katak ita presiza “iha domin neʼebé la laran-makerek ba malu hanesan maun-alin”. (Lee 1 Pedro 1:22.) Ita sei hatudu domin se ita “halo tuir lia-loos”. Neʼe inklui lia-loos katak “Maromak la todan ba sorin”. (Após 10:​34, 35) Se ita hatudu domin ba ema balu deʼit iha kongregasaun laran maibé seluk lae, neʼe katak ita la halo tuir Jesus nia mandamentu kona-ba domin. Hanesan Jesus, karik ita sente besik liu ba ema balu duké ema seluk. (João 13:23; 20:2) Maibé Pedro fó-hanoin ita katak ita presiza hakaʼas an atu hadomi irmaun-irmán hotu tanba sira mak parte ba ita-nia família.—1 Ped 2:17.

11. Oinsá mak ita bele ‘hadomi malu tebetebes husi laran’?

¹¹ Pedro anima ita atu ‘hadomi malu tebetebes husi laran’. Iha kontestu neʼe, “hadomi malu tebetebes” envolve nafatin hatudu domin maski susar atu halo ida-neʼe. Porezemplu, oinsá se irmaun ida halo ita laran-kanek? Karik ita hakarak atu selu fali ninia hahalok aat duké hatudu domin. Pedro aprende husi Jesus katak hahalok hanesan neʼe la halo Maromak kontente. (João 18:​10, 11) Pedro hakerek: “Keta selu aat ho aat ka liafuan kroʼat ho liafuan kroʼat. Maibé, koʼalia ho laran-diʼak bá.” (1 Ped 3:9) Bainhira Ita hadomi malu tebetebes, neʼe sei book Ita atu hatudu laran-diʼak no hanoin sira neʼebé hakanek Ita-nia laran.

12. (a) Hadomi malu tebetebes sei ajuda ita atu halo saida? (b) Hanesan hatudu iha vídeo Haburas unidade, hahalok neʼebé furak, Ita hakarak halo saida?

¹² Iha ninia karta primeiru, Pedro uza liafuan “hadomi malu tebetebes”. Domin hanesan neʼe ajuda ita laʼós deʼit atu perdua sala balu, maibé “sala barak”. (1 Ped 4:8) Karik Pedro hanoin-hetan lisaun neʼebé Jesus hanorin ba nia tinan barak liubá kona-ba fó perdua. Karik iha tempu neʼebá, Pedro hanoin katak nia hatudu laran-diʼak bainhira nia fó sujestaun atu perdua ninia maun-alin “toʼo dala hitu”. Maibé Jesus hanorin nia no mós ita katak ita presiza fó perdua “toʼo dala 77”, neʼe signifika la iha limite. (Mt 18:​21, 22) Keta sai laran-kraik se Ita sente susar atu aplika konsellu neʼe! Jeová nia povu hotu dala ruma mós sente susar atu fó perdua. Buat neʼebé importante agora mak Ita presiza hakaʼas an atu fó perdua ba irmaun-irmán sira no halo dame ho sira. c

13. Saida mak halo susar ba katuas sira atu tau matan ba irmaun-irmán sira?

¹³ Klaru katak Pedro nunka haluha Jesus nia liafuan ba nia kuandu Jesus moris hiʼas: “Tau matan ba haʼu-nia bibi-oan  sira.” (João 21:16) Se Ita mak katuas kongregasaun, Ita hatene katak matadalan neʼe mós aplika ba Ita. Dala ruma susar ba katuas sira atu buka tempu hodi halaʼo knaar neʼe. Katuas sira presiza tau matan uluk ba sira-nia família nia presiza fíziku, emosaun, no espirituál. Sira mós presiza hatudu ezemplu diʼak kona-ba haklaken no mós prepara no hatoʼo parte iha reuniaun, asembleia, no mós reuniaun boot sira. Sira balu serbí nuʼudar membru ba Komisaun neʼebé Komunika ho Ospitál, ka balu simu knaar husi Departamentu Planeamentu no Konstrusaun Lokál. Katuas kongregasaun sira okupadu tebes!

14. Saida mak bele motiva katuas sira atu tau matan ba bibi-lubun? (1 Pedro 5:​1-4)

¹⁴ Pedro anima katuas sira atu “tau matan ba Maromak nia bibi-lubun”. (Lee 1 Pedro 5:​1-4.) Se Ita mak katuas ida, ami hatene katak Ita hadomi irmaun-irmán sira no hakarak tau matan ba sira. Maibé, dala ruma Ita sente okupadu ka kole atu halaʼo knaar neʼe. Saida mak Ita bele halo? Fakar sai Ita-nia sentimentu ba Jeová. Pedro hakerek: “Se ema ruma serbí ema seluk, nia tenke serbí tuir kbiit neʼebé Maromak fó ona ba nia.” (1 Ped 4:11) Karik irmaun-irmán sira hasoru problema neʼebé labele rezolve iha sistema aat neʼe. Maibé hanoin-hetan katak ita-nia “bibi-atan boot”, Jesus Kristu, bele ajuda irmaun-irmán sira iha dalan neʼebé liu fali buat neʼebé Ita bele halo. Nia bele halo ida-neʼe agora no mós iha mundu foun. Maromak husu katuas sira atu hadomi irmaun-irmán sira, tau matan ba sira, no “sai ezemplu ba bibi-lubun”.

15. Oinsá mak katuas ida tau matan ba bibi-lubun? (Haree mós foto.)

¹⁵ Irmaun William neʼebé serbí nuʼudar katuas ba tempu kleur ona komprende tanbasá importante atu tau matan ba bibi-lubun. Bainhira pandemia COVID-19 hahú, nia no katuas seluk tau prioridade atu kontaktu irmaun-irmán ida-idak iha sira-nia grupu kada semana. Nia esplika: “Irmaun-irmán barak hela mesak deʼit iha uma, no neʼe halo fasil deʼit ba sira atu hanoin negativu.” Bainhira irmaun-irmán sira hasoru susar, William  rona didiʼak ba sira atu bele komprende saida mak halo sira hanoin barak no saida mak sira presiza. Tuirmai nia buka informasaun ka vídeo ruma husi jw.org atu ajuda sira. Nia hatete: “Agora ita presiza tebes tau matan ba irmaun-irmán sira. Baibain ita hakaʼas an atu ajuda ema seluk aprende kona-ba Jeová. Tan neʼe ita mós presiza hakaʼas an atu tau matan ba bibi-lubun no ajuda sira atu kontinua laran-metin ba Jeová.”

16. Oinsá mak ita bele aplika lisaun sira neʼebé ita aprende husi Pedro nia karta?

¹⁶ Ita foin aprende lisaun balu deʼit husi Pedro nia karta rua. Karik Ita rasik nota hahalok ruma neʼebé Ita hakarak hadiʼa. Porezemplu, karik Ita hakarak medita liután kona-ba bensaun neʼebé Ita sei simu iha mundu foun. Karik Ita hakarak haklaken iha serbisu-fatin, eskola, ka iha dalan la formál seluk tan. Ita mós hakarak hatudu katak Ita hadomi tebes irmaun-irmán sira. Katuas sira mós hakarak hakaʼas an atu tau matan ba Jeová nia bibi sira ho hakarak rasik. Bainhira Ita analiza Ita-nia an karik Ita sei nota hahalok ruma neʼebé Ita presiza hadiʼa, maibé keta sai laran-kraik. ‘Naʼi laran-diʼak’, no nia sei ajuda Ita atu halo mudansa. (1 Ped 2:3) Pedro hatete: “Maromak . . . sei halo kompletu imi-nia treinu. Nia sei hametin imi, nia sei halo imi forte, nia sei halo imi hamriik metin.”—1 Ped 5:10.

17. Se ita hakaʼas an no simu treinu husi Jeová, neʼe sei lori rezultadu saida?

¹⁷ Foufoun Pedro sente katak nia la merese atu hamutuk ho Maromak nia Oan-Mane. (Lc 5:8) Maibé ho Jeová no Jesus nia ajuda, Pedro laʼo tuir Jesus ho laran-metin. Tan neʼe Pedro merese “tama ba ita-nia Naʼi no Salvadór Jesus Kristu nia Ukun neʼebé iha ba nafatin”. (2 Ped 1:11) Neʼe mak bensaun neʼebé furak tebes! Se Ita hakaʼas an hanesan Pedro no simu treinu husi Jeová, Ita mós sei hetan moris ba nafatin. Tanba Ita hatudu fiar, Ita sei “hetan salvasaun”.—1 Ped 1:9.