“ATU IHA RELASAUN DIʼAK HO MAROMAK ITA PRESIZA IHA ESPERANSA. No esperansa mak ai-moruk neʼebé diʼak liu ba sentimentu laran-susar, mesamesak no taʼuk.”​—Hope in the Age of Anxiety.

Bíblia esplika katak ita presiza iha esperansa no sé mak ita la bele tau fiar, hodi hatete: “Imi keta tau fiar ba ulun-naʼin sira ka ema nia oan-mane, neʼebé labele lori salvasaun.” (Salmo [Mazmur] 146:3) Duké tau fiar ba ema nia kbiit atu salva ita, diʼak liu tau fiar ba ita-nia Kriadór, neʼebé iha forsa atu kumpre ninia promesa hotu. Saida deʼit mak Maromak promete ba ita? Mai ita haree promesa sira tuirmai:

BUAT AAT HOTU SEI LAKON; TUIRMAI EMA LARAN-LOOS SEI MORIS HO DAME BA NAFATIN: “Hela tempu uitoan tan, ema aat sei la iha ona . . . Maibé ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak.” (Salmo [Mazmur] 37:10, 11) Bíblia mós hatete iha Salmo 37:29 katak “ema laran-loos sira . . . sei moris ba nafatin” iha mundu neʼe.

FUNU SEI LA IHA TAN: “Jeová . . . sei hapara funu sira iha mundu tomak. Nia halo tohar rama no harahun diman; nia sunu tropa nia kuda-karreta funu nian.”​—Salmo (Mazmur) 46:8, 9.

MORAS, TERUS NO MATE SEI LA IHA TAN: “[Maromak] sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste.”​—Apokalipse 21:3, 4.

SEI IHA HAHÁN BA EMA HOTU: “Sei iha ai-han barak iha rai; foho-tutun sira sei nakonu ho ai-han.”​—Salmo (Mazmur) 72:16.

KRISTU SEI UKUN MUNDU TOMAK HO JUSTISA: “[Jesus Kristu] simu kbiit nuʼudar liurai, simu dignidade, no simu ukun ida, atu nuneʼe povu no nasaun sira neʼebé koʼalia língua oioin, sira hotu tenke serbí nia. Ninia ukun mak rohan-laek no ba nafatin, no ninia ukun sei nunka lakon.”​—Daniel 7:14.

Oinsá mak ita bele tau fiar ba promesa sira-neʼe? Bainhira iha mundu, Jesus hatudu katak nia kumpre kritériu atu sai nuʼudar Liurai. Nia kura ema moras, fó han ema kiak sira, no halo ema mate moris hiʼas. Laʼós neʼe deʼit, buat neʼebé nia hanorin mós importante tebes, tanba matadalan sira-neʼe ajuda ema atu moris hamutuk ba nafatin ho unidade no dame. Jesus mós fó sai kona-ba buat hotu neʼebé sei akontese iha futuru, inklui sinál kona-ba loron ikus sira.

Jesus fó sai nanis katak iha loron ikus sira, ema sei la moris ho dame! Nia esplika katak sinál sira kona-ba mundu nia rohan mak inklui funu iha mundu tomak, hahán menus, moras oioin, no rai-nakdoko makaʼas. (Mateus 24:3, 7; Lucas 21:10, 11; Apokalipse 6:3-8) Jesus mós hatete: “Tanba hahalok aat aumenta ba beibeik, entaun ema barak nia domin sei sai malirin.”​—Mateus 24:12.

Ita bele haree duni katak ohin loron ema barak nia domin sai malirin. Bíblia fó sai nanis iha 2 Timóteo 3:1-5 katak “iha loron ikus sira” ema sei hadomi deʼit sira-nia an, hadomi osan no hakarak atu buka kontente deʼit. Sira sei sai loko an no siʼak. Membru família sira sei la hadomi malu, no oan sira sei la halo tuir inan-aman. Ema barak sei la moris tuir buat neʼebé sira fiar.

Sinál sira-neʼe hatudu ho momoos katak ita moris daudauk iha loron ikus sira. Neʼe mós hatudu katak Maromak nia Ukun besik ona atu mai. Laʼós neʼe deʼit, Jesus mós temi buat ida tan iha ninia profesia kona-ba loron ikus sira: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.”​—Mateus 24:14.

Liafuan diʼak neʼe fó avizu ba ema aat sira, maibé fó esperansa ba ema laran-loos, no ema laran-loos bele fiar katak lakleur tan Maromak nia promesa sira sei sai loos. Ita hakarak atu aprende liután? Se nuneʼe, haree pájina ikus husi livru neʼe.