Lakleur tan Maromak nia Ukun, governu ida neʼebé Maromak harii, sei lori dame no unidade iha mundu tomak hanesan Salmo 72:7 hatete, “dame sei sai barak”. Maibé bainhira mak Maromak nia governu sei ukun mundu tomak? Saida mak Ukun neʼe sei halo? No oinsá mak Ita bele hetan buat diʼak husi Ukun neʼe?

Bíblia fó sai nanis akontesimentu barak neʼebé hatudu katak lakleur tan Maromak nia Ukun sei toʼo mai. Akontesimentu sira-neʼe mak hanesan “sinál”, no neʼe inklui funu iha mundu tomak, rai-hamlaha, moras oioin, rai-nakdoko barak, no ema barak kontra lei.​—Mateus 24:3, 7, 12; Lucas 21:11; Apokalipse 6:2-8.

Profesia seluk hatete: “Iha loron ikus sira sei iha problema barak neʼebé susar atu tahan. Tanba ema sei hadomi deʼit sira-nia an, hadomi osan, . . . la halo tuir inan-aman, la hatene fó agradese, la hatudu laran-metin, la hadomi malu, la rona malu, koʼalia aat hodi hafoʼer ema seluk nia naran, la kontrola an, siʼak, la hadomi buat neʼebé diʼak . . . foti an, hadomi deʼit ksolok duké hadomi Maromak.” (2 Timóteo 3:1-4) Iha mundu neʼe, sempre iha ema ho hahalok sira-neʼe. Maibé ohin loron, ema barak liu iha hahalok hanesan neʼe.

Profesia sira-neʼe komesa sai loos iha tinan 1914. Istória-naʼin barak, polítiku-naʼin no hakerek-naʼin sira hatete katak mundu nia situasaun troka husi tempu neʼebá. Porezemplu, istória-naʼin naran Peter Munch husi rai-Dinamarka hakerek: “Antes Funu Mundiál iha tinan 1914, ema barak hanoin katak mundu nia kondisaun sei sai diʼak liután, . . . maibé tuir loloos mosu mai tempu neʼebé nakonu ho dezastre, sentimentu taʼuk no odi malu no mós ema hotu la sente seguru.”

Maibé mundu nia situasaun mak sinál katak lakleur Maromak nia governu sei ukun. Tuir loloos, Jesus rasik mós temi buat diʼak ida kuandu nia esplika kona-ba sinál loron ikus nian, nia hatete: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.”​—Mateus 24:14.

Liafuan diʼak neʼe mak sai nuʼudar tema importante husi mensajen neʼebé Testemuña ba Jeová fahe. No Testemuña ba Jeová nia revista ida ho títulu Livru Haklaken fó sai Maromak Jeová nia Ukun koʼalia beibeik kona-ba buat furak oioin neʼebé Maromak nia Ukun sei halo ba ema no mundu.

Resposta ba ida-neʼe envolve pontu haat importante tuirmai:

1. Ukun neʼe sei nunka uza mundu nia polítiku-naʼin sira.

2. Mundu nia polítiku-naʼin sira sei lakohi entrega sira-nia pozisaun no sira sei kontra hasoru Maromak nia Ukun.​—Salmo 2:2-9.

3. Maromak nia Ukun sei halakon ukun sira seluk neʼebé hakarak atu domina ema. (Daniel 2:44; Apokalipse 19:17-21) Konflitu boot liu hotu neʼe bolu nuʼudar Armagedon.​—Apokalipse 16:14, 16.

4. Ema hotu neʼebé apoia Maromak nia Ukun sei moris liu Armagedon no tama ba mundu neʼebé nakonu ho dame. Ema sira-neʼe mak hamutuk rihun ba rihun no sei bolu nuʼudar “ema-lubun boot”.​—Apokalipse 7:9, 10, 13, 14.

Hakat primeiru atu moris iha Maromak nia Ukun okos mak hodi hetan edukasaun kona-ba ukun neʼe. Jesus rasik hatete iha ninia orasaun ba Maromak: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.”​—João 17:3.

Bainhira ema hatene Maromak, neʼe sei ajuda sira iha dalan oioin. Hanoin toʼok buat rua: Primeiru, sira sei iha fiar neʼebé metin ba Maromak. Fiar neʼe bazeia ba evidénsia, no neʼe halo sira fiar katak Maromak nia Ukun mak realidade no lakleur tan sei ukun. (Ebreu 11:1) Segundu, sira-nia domin ba Maromak no ba ema seluk sei sai boot liután. Domin ba Maromak sei book sira atu halo tuir Maromak ho laran tomak. Domin ba ema sei book sira atu aplika Jesus nia ukun-fuan neʼebé hatete: “Buat neʼebé imi hakarak ema halo ba imi, halo mós nuneʼe ba sira.”​—Lucas 6:31.

Hanesan Aman ida, ita-nia Kriadór hakarak buat diʼak ba ita. Nia hakarak ita atu hetan “moris neʼebé loloos”. (1 Timóteo 6:19) Moris ohin loron laʼós “moris neʼebé loloos”. Ema barak moris terus no susar. Atu ajuda Ita imajina kona-ba “moris neʼebé loloos”, haree toʼok buat furak balu tuirmai neʼebé Maromak nia Ukun sei halo ba ninia povu.