Edukasaun husi Bíblia iha kbiit boot atu troka ema nia moris. Haree toʼok esperiénsia husi: Ricardo no Andres.

RICARDO: Kuandu haʼu tinan 15, haʼu tuir gang ida no neʼe lori impaktu boot ba haʼu-nia moris. Haʼu planu atu tama komarka ba tinan sanulu. Karik neʼe rona beik, maibé iha haʼu-nia área, ema admira no respeitu ema neʼebé tama komarka. Haʼu mós hakarak ema admira no respeitu haʼu.

Haʼu koko buat oioin bainhira tuir gang, inklui uza droga, halo relasaun seksuál, no violénsia. Kalan ida, ami tiru malu ho gang seluk. Haʼu hanoin haʼu sei mate, maibé haʼu konsege halai no la hetan kanek. Husi tempu neʼebá, haʼu hanoin kona-ba haʼu-nia moris no futuru, no haʼu deside atu halo mudansa. Maibé oinsá? Iha neʼebé mak haʼu bele hetan ajuda?

Haʼu-nia família barak sempre hasoru problema oioin, no sira la kontente. Maibé haʼu-nia tiu ida no ninia família la hanesan. Sira mak ema neʼebé diʼak no moris tuir Bíblia nia matadalan. Husi sira mak haʼu aprende katak Maromak nia naran mak Jeová. Entaun, lakleur depois tiru malu neʼe, haʼu halo orasaun ba Jeová, temi ninia naran no husu nia atu ajuda haʼu. Haʼu hakfodak tebes tanba loron tuirmai, Testemuña ba Jeová ida mai haʼu-nia uma! No nia mak hanorin Bíblia ba haʼu.

Lakleur haʼu hasoru susar boot ida. Haʼu-nia kolega gang sira telefone haʼu beibeik no husu atu ransu hamutuk. Maski la fasil, haʼu hatete lae. Haʼu deside metin atu kontinua estuda Bíblia. No haʼu kontente ho desizaun neʼe. Haʼu halo mudansa boot iha haʼu-nia moris, no haʼu hetan kontente neʼebé loos.

Haʼu hanoin-hetan bainhira haʼu halo orasaun ba Maromak katak uluk haʼu iha planu atu tama komarka ba tinan sanulu hodi ema respeitu haʼu. Entaun, haʼu husu Maromak atu husik haʼu serbí nia ba tempu-tomak durante tinan sanulu, hodi bele ajuda ema seluk. Maromak hatán haʼu-nia orasaun, tanba haʼu serbí ona nia ba tinan 17! Laʼós neʼe deʼit, haʼu mós nunka tama komarka.

Haʼu-nia kolega gang balu iha komarka ba tinan barak ona no balu mate. Kuandu hanoin fali haʼu-nia pasadu, haʼu agradese tebes ba haʼu-nia tiu no ninia família. Sira la moe atu moris tuir Bíblia nia matadalan. Haʼu respeitu tebes sira liu fali respeitu neʼebé uluk haʼu iha ba haʼu-nia kolega gang sira. Haʼu mós agradese tebes ba Maromak tanba hanorin haʼu oinsá atu iha moris neʼebé diʼak.

 ANDRES: Haʼu moris no boot iha área kiak, nakonu ho ema neʼebé uza droga, ohodór, prostituisaun no hahalok hamatak ema. Haʼu-nia apá lanu-teen no uza droga naran kokaína. Haʼu-nia inan-aman sempre istori malu no baku malu.

Haʼu komesa hemu tua no uza droga bainhira haʼu sei labarik. Haʼu gasta tempu barak iha dalan, naʼok no faʼan fali sasán sira-neʼe. No kuandu haʼu sai boot ba daudaun, haʼu-nia apá koko hadiʼa ami-nia relasaun nuʼudar aman ho oan, maibé iha dalan neʼebé sala. Nia hanorin haʼu oinsá atu hatama subasubar droga husi rai liʼur no faʼan fali ida-neʼe. Haʼu lalais atu hetan osan barak. Maibé loron ida polísia mai haʼu-nia uma no kaer haʼu, tanba haʼu koko atu oho ema. Tinan lima haʼu iha komarka.

Dadeer ida, iha komarka ami rona avizu neʼebé konvida ami atu tuir diskusaun Bíblia ho Testemuña ba Jeová, no haʼu tuir. Buat neʼebé haʼu rona iha diskusaun neʼe mak lójiku duni, entaun haʼu komesa estuda Bíblia ho sira. Sira la taʼuk atu loke eskritura neʼebé hatudu sai Maromak nia matadalan kona-ba morál.

Haʼu rekoñese katak haʼu presiza ajuda atu halo mudansa, liuliu bainhira dadur seluk haterus haʼu tanba la kontente ho haʼu-nia desizaun. Entaun haʼu halo orasaun hodi husu Maromak atu fó forsa no matenek mai haʼu. Duké rende an deʼit, haʼu sai aten-brani atu koʼalia kona-ba Bíblia ba dadur seluk.

Tanba haʼu iha komarka ba tempu naruk, haʼu la toman ho buat oioin neʼebé akontese iha liʼur, tan neʼe bainhira besik atu livre husi komarka, haʼu-nia laran-nakdedar tebes toʼo haʼu hakarak atu hela nafatin iha komarka. Bainhira haʼu sai husi komarka, dadur balu fó adeus mai haʼu. Sira balu hatete ho domin “Fila ba uma, amu”.

Haʼu la brani atu imajina haʼu-nia moris se haʼu la simu hanorin husi Maromak. Haʼu agradese tebetebes ba Maromak tanba nia hadomi haʼu no la haree haʼu nuʼudar ema neʼebé labele troka. *