TANBASÁ IMPORTANTE ATU RESPEITU ITA-NIA AN?

• Peskiza ida hatudu katak ema neʼebé la iha hanoin neʼebé loos kona-ba sira-nia an rasik bele sai laran-taridu demais, depresaun, no iha toman la normál kona-ba han. Iha mós posibilidade boot atu sira hemu tua demais no uza droga.

• Ema neʼebé respeitu sira-nia an la kompara sira-nia an ho ema seluk, neʼe halo fasil ba sira atu hakbesik ba ema seluk no iha relasaun diʼak. Maibé ema neʼebé ladún respeitu sira-nia an, baibain gosta atu kritika demais ema seluk no neʼe bele estraga relasaun diʼak.

• Ema neʼebé respeitu sira-nia an la rende an lalais bainhira hasoru problema. Sira la husik susar sira atu hanetik sira kumpre sira-nia planu. Maibé ema neʼebé ladún respeitu sira-nia an, haree problema kiʼik sira nuʼudar buat neʼebé boot. No neʼe bele halo sira lalais atu rende an.

 ITA BELE HALO SAIDA?

Hili kolega neʼebé sei enkoraja Ita. Ransu ho ema neʼebé respeitu Ita, hanoin Ita-nia diʼak, no hakarak atu hametin Ita.

Ajuda ema seluk. Bainhira Ita hatudu laran-diʼak no ajuda ema seluk, inklui ema neʼebé labele selu fali Ita, Ita sei sente haksolok tanba fó ba ema seluk. Ita sei sente kontente maski ema seluk la haree buat neʼebé Ita halo.

Ajuda Ita-nia oan atu respeitu sira-nia an. Dalan ida atu halo nuneʼe mak hodi husik sira rezolve sira-nia problema rasik tuir sira-nia kbiit. Neʼe ajuda sira atu aprende oinsá atu tahan susar no rezolve problema sira. Neʼe mós ajuda sira respeitu sira-nia an, no bele ajuda sira bainhira sira sai boot.