BA KABEN-NAʼIN
2: Apoia malu
NEʼE KATAK SÁ
Feen no laʼen neʼebé apoia malu mak hanesan ho pilotu no kopilotu neʼebé serbisu hamutuk atu lori aviaun semo ba fatin ida. Maski susar ruma mosu, feen-laʼen hanesan neʼe sei la hanoin an deʼit, maibé hanoin atu ajuda malu.
BÍBLIA NIA PRINSÍPIU: “Sira laʼós tan naʼin-rua maibé isin ida deʼit.”—Mateus 19:6.
“Atu iha moris kaben nian neʼebé kontente, feen no laʼen tenke apoia malu.”—Christopher.
TANBASÁ IMPORTANTE
Bainhira problema mosu, feen-laʼen neʼebé la apoia malu sei fokus liu kona-ba sé mak sala duké hanoin atu rezolve problema. Neʼe sei halo problema neʼebé kiʼik sai boot.
“Apoia malu mak importante tebes iha moris kaben nian. Se haʼu no haʼu-nia laʼen la apoia malu, ami hanesan deʼit ho kolega neʼebé hela hamutuk, no la iha hanoin neʼebé hanesan kona-ba desizaun importante sira.”—Alexandra.
SAIDA MAK ITA BELE HALO
HUSU BA ITA-NIA AN
-
Haʼu lakohi haʼu-nia kaben atu uza haʼu-nia saláriu ka lae?
-
Haʼu kontente liu bainhira haʼu-nia kaben la iha ka lae?
-
Haʼu hadook an husi haʼu-nia kaben nia família neʼebé besik ho nia ka lae?
KOʼALIA HO ITA-NIA KABEN
-
Iha dalan saida deʼit mak ita apoia malu?
-
Kona-ba saida deʼit mak ita presiza hadiʼa liután?
-
Saida deʼit mak ita bele halo atu apoia malu liután?
SUJESTAUN
-
Imajina toʼok, Ita no Ita-nia kaben halimar voleiból, imi iha ekipa neʼebé la hanesan. Entaun, saida mak imi bele halo atu sai ekipa ida deʼit?
-
Duké hanoin: ‘Oinsá mak haʼu bele manán?’, diʼak liu hanoin: ‘Oinsá mak ita rua bele manán?’
“Lalika hanoin kona-ba sé mak loos no sé mak sala. Importante liu atu buka dame no unidade iha Ita-nia moris kaben nian.”—Ethan.
BÍBLIA NIA PRINSÍPIU: “Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:4.
Karik Ita sei gosta
MATAN-MORIS BÁ!
Feen-laʼen tenke hanesan ka lae?
Ita sente katak Ita ho Ita-nia kaben nia hanoin no hakarak la hanesan ka lae?
