Inan-aman neʼebé hatudu ezemplu diʼak moris tuir buat neʼebé sira hanorin ba oan. Porezemplu, bainhira ema ruma mai atu vizita Ita, maibé Ita hatete: “Dehan ba nia katak haʼu sai hela”, neʼe halo susar ba Ita-nia oan atu hatudu laran-moos.

“Ema barak hatete: ‘Halo tuir haʼu-nia liafuan, laʼós haʼu-nia hahalok.’ Maibé ita labele koʼalia hanesan neʼe kuandu hanorin oan sira. Labarik sira hanesan esponja neʼebé xupa buat hotu neʼebé ita halo no hatete, no sira sei korrije ita se ita-nia hahalok kontra malu ho buat neʼebé ita hanorin.”​—David.

BÍBLIA NIA PRINSÍPIU: “Ó dehan: ‘Keta naʼok’, maibé ó rasik naʼok ka lae?”​—Roma 2:21.

Maski Ita-nia oan sei kiʼik ka joven, sira lalais atu banati-tuir Ita-nia ezemplu duké ema seluk nian. Neʼe katak Ita mak ida neʼebé diʼak liu atu hanorin Ita-nia oan hodi laʼo iha dalan neʼebé loos, maibé Ita rasik presiza aplika buat neʼebé Ita hanorin.

“Dala barak ita hanoin katak ita-nia oan la rona buat neʼebé ita koʼalia, maibé bainhira ita la halo tuir ita-nia liafuan rasik, oan sira sei hasé ita. Oan sira haree buat hotu neʼebé ita halo maski karik ita sente katak sira la haree ida-neʼe.”​—Nicole.

BÍBLIA NIA PRINSÍPIU: “Matenek husi lalehan . . . la laran-makerek.”​—Tiago 3:17.

Hanoin didiʼak kona-ba Ita-nia moris. Ita haree filme ka programa televizaun hanesan saida? Oinsá mak Ita trata Ita-nia kaben no oan sira? Ita habelun ho ema hanesan saida? Ita hanoin ema seluk ka lae? Ita rasik hatudu hahalok sira neʼebé Ita hakarak Ita-nia oan sira hatudu ka lae?

“Haʼu no haʼu-nia laʼen la haruka ami-nia oan atu halo buat neʼebé ami rasik la halo.”​—Christine.

Husu deskulpa bainhira halo sala. Ita-nia oan sira hatene katak Ita la perfeitu. Hodi husu deskulpa ba Ita-nia kaben no oan bainhira Ita halo sala, neʼe sei hanorin Ita-nia oan lisaun importante kona-ba laran-moos no haraik an.

“Bainhira ita halo sala, ita-nia oan presiza rona katak ita rekoñese ita-nia sala no husu deskulpa. Se ita la halo nuneʼe, sira mós sei la rekoñese sira-nia sala.”​—Robin.