Oinsá mak teknolojia bele afeta Ita-nia oan sira?
Ema balu sente susar tebes atu aprende oinsá uza teknolojia, maibé labarik no joven sira matenek tebes atu uza teknolojia no neʼe sai parte ba sira-nia moris.
Iha tempu neʼebé hanesan, ema balu nota katak joven sira neʼebé gasta demais sira-nia tempu atu online sei . . .
-
depende ka sadere deʼit ba sira-nia telefone ka tablet.
-
abuza, ameasa, koʼalia aat, ka hatún ema seluk liuhusi média sosiál ka sira rasik sai vítima (cyberbulling).
-
haree pornografia maski ho neon ka la ho neon.
SAIDA MAK ITA PRESIZA HATENE
DEPENDÉNSIA
Dependénsia katak depende deʼit ka sai atan ba buat ruma. Tuir livru Reclaiming Conversation hatete katak ema halo aplikasaun sira hanesan game atu halo ita susar husik ita-nia telefone. Bainhira ita uza tempu barak atu haree aplikasaun komersiál, neʼe halo sira manán osan.
HANOIN TOʼOK: Susar loos ba Ita-nia oan atu husik sasán teknolojia ka lae? Oinsá mak Ita bele ajuda Ita-nia oan atu uza didiʼak sira-nia tempu?—ÉFESO 5:15, 16.
ABUZU ONLINE
Ema balu hatudu hahalok la respeitu kuandu sira online, neʼe katak sira mós la hanoin ema seluk nia sentimentu ka bele mós halo aat ba ema seluk.
Ema balu uza sala média sosiál tanba hakarak hetan atensaun barak husi ema seluk ka sira hakarak sai famozu. Ka iha mós ema neʼebé sente laran-kanek kuandu nia haree katak ema seluk iha festa maibé la konvida nia.
HANOIN TOʼOK: Ita-nia oan hatudu respeitu kuandu sira online ka lae? (Éfeso 4:31) Sira sente oinsá bainhira hatene katak ema la konvida sira?
PORNOGRAFIA
Internét halo fasil ba ema atu asesu ba buat neʼebé la morál. Inan-aman balu uza programa atu sira-nia oan la asesu ba buat sira-neʼe, maibé dala ruma neʼe la ajuda.
Sexting katak haruka ka simu foto ka vídeo privadu neʼebé la morál, baibain liuhusi telefone. Hahalok neʼe bele kontra lei. Depende ba lei governu no ema nia idade, envolve an iha sexting mak hahalok krime neʼebé sériu tanba fahe pornografia neʼebé envolve labarik.
HANOIN TOʼOK: Oinsá mak Ita bele ajuda Ita-nia oan atu hadook an husi tentasaun atu haree ka haruka buat neʼebé la morál liuhusi internét?—ÉFESO 5:3, 4.
SAIDA MAK ITA BELE HALO
TREINU ITA-NIA OAN SIRA
Fasil ba labarik no joven sira atu uza teknolojia, maibé sira presiza nafatin matadalan. Livru Indistractable hatete katak husik oan sira uza telefone no asesu internét maski sira seidauk hatene uza ho didiʼak mak hanesan ita “husik sira haksoit ba bee laran maski seidauk hatene nani”.
BÍBLIA NIA PRINSÍPIU: “Hanorin labarik atu laʼo iha dalan neʼebé diʼak ba nia; bainhira nia sai boot, nia sei la sees husi dalan neʼe.”—PROVÉRBIOS 22:6.
Haree sujestaun neʼebé Ita bele implementa, ka hakerek Ita-nia ideia.
-
Koʼalia ho oan kona-ba hatudu respeitu kuandu online
-
Ajuda oan atu la sente laran-kanek kuandu ema la konvida nia
-
Hakaʼas an atu proteje oan husi informasaun neʼebé la morál
-
Cek oan nia telefone kona-ba saida mak nia loke ka haree
-
Deside oan bele uza telefone loron ida oras hira
-
Keta husik oan uza telefone mesamesak, liuliu kalan atu toba
-
Halo regra atu la uza telefone bainhira han hamutuk
Karik Ita sei gosta
PERGUNTA HUSI JOVEN SIRA
Saida mak haʼu presiza hatene kona-ba sexting?
Ema ruma obriga Ita atu envolve an iha sexting ka lae? Saida mak konsekuénsia husi sexting? Neʼe mak buat neʼebé perigu ka lae?
MORIS KABEN NIAN NO FAMÍLIA
Haʼu-nia oan presiza telemovel ka lae?
Husu pergunta sira-neʼe ba Ita-nia an atu bele hatene se Ita no Ita-nia oan prontu ona atu kaer responsabilidade neʼe ka lae.
MORIS KABEN NIAN NO FAMÍLIA
Hanorin oan sira atu uza telemovel ho matenek
Maski oan sira matenek atu uza telemovel, maibé sira presiza ita-nia matadalan atu hatene oinsá atu uza ho didiʼak.
