ANIMÁL barak neʼebé moris iha bee malirin iha bokur barak iha sira-nia isin-kulit atu ajuda sira labele sente malirin demais. Maibé animál ida naran lontra-mariña iha fulun neʼebé mahar atu la sente malirin.

Hanoin toʼok: Lontra-mariña iha fulun neʼebé mahar no barak liu fali animál sira seluk, toʼo maizumenus 155.000 kada sentímetru kuadradu. Bainhira lontra-mariña tama ba bee laran, bee malirin kona sira-nia fulun, maibé la kona sira-nia isin-kulit tanba fulun neʼebé mahar halo anin neʼebé besik sira-nia isin labele sai. Anin neʼe ajuda duni atu bee malirin la kona sira-nia isin.

Sientista sira fiar katak sira bele aprende buat barak husi lontra-mariña nia fulun. Sira koko atu inventa produtu ho modelu oioin neʼebé atu hanesan ho lontra-mariña nia fulun. Ikusmai, sira aprende katak “produtu ho fulun neʼebé naruk no mahar bele maran nafatin maski bee kona.” Neʼe katak lontra-mariña nia fulun mak diʼak tebes atu tahan bee malirin.

Sientista sira hein katak sira-nia estudu kona-ba lontra-mariña sei ajuda atu dezenvolve teknolojia kona-ba halo produtu husi hena espesiál neʼebé maran nafatin maski kona bee. Imajina toʼok, ema neʼebé luku iha tasi malirin hatais roupa neʼebé iha fulun mahar, hanesan lontra-mariña nian!

Tuir Ita-nia hanoin oinsá? Lontra-mariña nia fulun neʼe mosu mesak deʼit? Ka Maromak mak kria?