BÍBLIA NIA PRINSÍPIU: “Ema badinas nia planu sei hetan duni susesu, maibé ema hotu neʼebé ansi sei sai kiak duni.”​—Provérbios 21:5.

NEʼE KATAK SÁ: Se Ita halo planu no kumpre planu neʼe, Ita bele hetan susesu. Tan neʼe, halo planu antes atu gasta osan. Hanoin-hetan, Ita labele sosa buat hotu neʼebé Ita hakarak. Tan neʼe, uza Ita-nia osan ho matenek.

SAIDA MAK ITA BELE HALO:

• Deside nanis osan hira mak Ita sei gasta. Hakerek hotu osan hira mak Ita presiza gasta, no fahe ba kategoria balu, porezemplu hahán, roupa, selu aluga no seluk tan. Tuirmai deside osan hira mak Ita sei uza ba kategoria ida-idak. Se Ita presiza osan barak liu ba kategoria ida, foti fali osan balu husi kategoria seluk. Porezemplu, se Ita presiza osan barak liu atu sosa gazolina, bele foti fali osan balu husi kategoria seluk neʼebé ladún importante, hanesan han iha liʼur.

• Koko atu la debe. Duké debe, se bele, koko rai osan atu sosa buat neʼebé Ita presiza. Se Ita presiza duni debe osan, koko atu selu fali lalais atu nuneʼe Ita la monu ba debe neʼebé boot liu. Se Ita mak agora daudaun debe, halo planu oinsá Ita sei selu fali no halo tuir planu neʼe.

  Se ema ida gosta debe, neʼe bele book nia atu gasta osan barak liután. Tan neʼe, se Ita presiza duni atu debe, tenke hanoin uluklai.

BÍBLIA NIA PRINSÍPIU: “Ema baruk-teen la fila rai iha tempu malirin, tan neʼe nia sei husu ai-han durante tempu koʼa nian tanba nia la iha buat ida.”—Provérbios 20:4.

NEʼE KATAK SÁ: Hahalok baruk-teen bele halo Ita sai kiak. Tan neʼe, serbisu ho badinas, no koko atu uza osan ho matenek atu nuneʼe Ita bele iha osan iha futuru.

SAIDA MAK ITA BELE HALO:

• Serbisu badinas. Kuandu Ita serbisu ho badinas no kaer metin Ita-nia responsabilidade, ema sei gosta no hakarak Ita serbisu nafatin ba sira.

• Hatudu laran-moos. Keta naʼok husi patraun. Se Ita naʼok, ema sei hanoin nafatin kona-ba neʼe no lakohi fó serbisu ba Ita.

• La kaan-teen. Se Ita buka deʼit osan, neʼe bele estraga Ita-nia saúde no relasaun diʼak ho ema seluk. Hanoin-hetan, osan laʼós buat neʼebé importante liu iha moris.

KETA SOE TEMPU NO OSAN BA TOMAN AAT SIRA.

“Ema neʼebé lanu-teen no kaan-teen sei sai kiak, no ema neʼebé hakarak toba deʼit sei hatais hena bosan.”​—PROVÉRBIOS 23:21.

KETA HANOIN RESIN KONA-BA OSAN.

“Keta hanoin resin kona-ba imi-nia moris, atu han saida ka atu hemu saida, ka kona-ba imi-nia isin, atu hatais saida.”​—MATEUS 6:25.

HASEES AN HUSI HAHALOK KAAN-TEEN.

“Ema neʼebé kaan-teen hakarak tebes rikusoin, maibé nia la hatene katak kiak sei kaer toman nia.”​—PROVÉRBIOS 28:22.