• Ó-nia apá troka serbisu no família tomak tenke hela iha sidade seluk.

• Ó-nia kolega diʼak ida muda ba fatin dook.

• Ó-nia maun ka biin sai husi uma atu kaben.

Fasil ba ó atu simu mudansa hanesan neʼe ka lae?

Bainhira ó hasoru situasaun foun neʼebé ó la bele kontrola, ó presiza aprende atu hatoman an ho ida-neʼe. Hodi halo nuneʼe, ó bele sai hanesan ai-hun ida neʼebé book an bá-mai atu la tohar bainhira anin-boot huu.

Ita-nia moris sempre iha mudansa. Bíblia dehan katak ‘situasaun neʼebé mosu derrepente deʼit kona ita hotu’. (Eclesiastes [Pengkhotbah] 9:11) Neʼe mak realidade. Maibé neʼe la dehan katak mudansa hotu mak ladiʼak. Karik, foufoun ita la kontente ho mudansa balu, maibé ikusmai ita sei hatene katak mudansa neʼe mak diʼak. Maski nuneʼe, baibain susar duni ba ita atu hatoman an ho situasaun foun.

Liuliu susar ba joven sira atu hatoman an. Tanbasá? Mane joven ida naran Alex a esplika: “Ami joven hakaʼas an daudauk atu sai toman ho mudansa isin nian, tan neʼe ami sei sai estrese liután se ami-nia situasaun troka derrepente.”

Razaun ida seluk mak: Ema neʼebé idade liu iha ona esperiénsia barak no toman ona atu tahan hasoru mudansa iha sira-nia moris. Maibé joven sira ladún iha esperiénsia hanesan neʼe.

Ita bele duni adapta ho situasaun foun. Hodi aprende atu adapta ita-nia an, neʼe bele ajuda ita atu haree mudansa ruma nuʼudar oportunidade foun, laʼós deʼit nuʼudar todan ruma neʼebé ita tenke tahan. Joven sira neʼebé toman ona atu adapta ho situasaun foun, baibain sira la uza droga ka hemu tua bainhira sira sente estrese.

Simu realidade. Maski ita hakarak atu kontrola situasaun hotu, maibé neʼe sei nunka akontese. Ita-nia kolega ka maun-alin sira sei muda ba fatin seluk ka kaben; no dala ruma situasaun obriga ita atu muda ba fatin seluk. Tan neʼe, diʼak liu atu simu realidade duké husik situasaun foun halo ita estrese.—Bíblia nia matadalan: Eclesiastes (Pengkhotbah) 7:10.

Hanoin kona-ba futuru. Hanoin beibeik kona-ba tempu neʼebé liu ona mak hanesan ho lori karreta maibé hateke deʼit ba espellu atu haree ba kotuk. Dala ruma ita presiza duni hateke ba kotuk, maibé ita tenkesér hateke nafatin ba oin. Nuneʼe mós ho ó-nia moris, bainhira iha mudansa ruma, koko toʼok atu hanoin liu kona-ba futuru. (Provérbios [Amsal] 4:25) Porezemplu, ó bele halo planu saida ba fulan oinmai, ka fulan neen nia laran?

Hanoin pozitivu. Joven ida naran Laura dehan: “Atu bele adapta ho situasaun foun, neʼe depende ba ita-nia hanoin. Koko toʼok atu hanoin kona-ba buat neʼebé diʼak iha situasaun neʼebé ita hasoru daudaun.” Ó bele hetan buat diʼak ida iha ó-nia situasaun foun ka lae?—Bíblia nia matadalan: Eclesiastes (Pengkhotbah) 6:9.

Vitoria mós konta kona-ba tempu neʼebé ninia kolega diʼak hotu muda ba fatin seluk. Nia dehan: “Haʼu sente mesamesak tebes, no haʼu la gosta mudansa neʼe. Maibé ikusmai, haʼu komesa troka haʼu-nia hanoin hodi simu realidade, katak nuʼudar ita sai boot ba daudaun, ita hotu presiza iha mudansa. No mudansa neʼe mós loke dalan ba haʼu atu hetan kolega foun sira.”—Bíblia nia matadalan: Provérbios (Amsal) 27:10.

Ajuda ema seluk. Bíblia dehan: “Keta buka deʼit imi rasik nia diʼak, maibé buka mós ema seluk nia diʼak.” (Filipe 2:4) Hodi ajuda ema seluk neʼebé mós hasoru susar, neʼe bele ajuda ita atu tahan ita-nia susar. Ana, ho tinan 17, dehan: “Haʼu sente kontente bainhira haʼu bele ajuda ema seluk neʼebé mós hasoru hela situasaun neʼebé hanesan, ka situasaun neʼebé susar liu fali haʼu-nian.”