BA TEMPU kleur, ema hanoin katak manu-andoriña ártika sira semo maizumenus kilómetru 35.200 atu halo viajen bá-mai husi área Ártika toʼo Antártida. Maibé peskiza foun hatudu katak tuir loloos manu neʼe semo dook liután.

Sientista sira tau mákina kiʼikoan ida naran geolocadór ba manu-andoriña ártika balu atu buka-hatene manu sira-neʼe semo bá neʼebé. Mákina kiʼik neʼe hatudu katak manu-andoriña ártika sira semo bá-mai maizumenus hamutuk kilómetru 90.000, neʼe dook liu fali animál seluk. Manu ida husi manu-andoriña ártika sira-neʼe semo dook toʼo besik kilómetru 96.000!

Bainhira manu-andoriña ártika halo sira-nia viajen, sira la semo loos deʼit. Hanesan dezeñu iha leten hatudu, bainhira manu-andoriña ártika semo, sira-nia dalan atu semo mak hanesan letra S. Tanbasá? Tanba sira iha matenek atu aproveita anin neʼebé huu.

Manu-andoriña ártika bele moris toʼo tinan 30 no durante sira-nia moris tomak, sira bele semo hamutuk kilómetru 2.400.000 liu. Neʼe mak distánsia bá-mai husi mundu ba fulan, dala tolu ka haat! Matenek-naʼin ida dehan: “Buat neʼebé úniku tebes mak manu-andoriña ártika nia todan maizumenus grama 100 deʼit. Maski nuneʼe, sira bele halo viajen hanesan neʼe.” Livru ida (Life on Earth: A Natural History) mós esplika katak iha tinan ida nia laran manu-andoriña ártika kona loro-matan barak liu fali animál seluk.