Ita sente hanesan foin horiseik mak Ita-nia oan moris, maibé loloos nia tinan sanulu ona. Nia sei labarik hela, maibé Ita haree katak nia besik ona atu tama ba tempu puberdade, katak ninia isin komesa halo mudansa.

Mudansa neʼe dala ruma halo joven sira sente bilán no taʼuk. Oinsá mak Ita bele ajuda Ita-nia oan-mane no oan-feto atu prepara an no simu mudansa neʼe?

Labarik ida-idak la hanesan. Labarik balu komesa iha mudansa ba sira-nia isin maski sira sei tinan kiʼik hanesan tinan 8, maibé balu demora liu hanesan tinan 15 ka 16. Tuir livru ida (Letting Go With Love and Confidence), “tinan neʼebé labarik tama ba tempu puberdade depende ba sira ida-idak nia kondisaun”.

Tempu puberdade halo joven sira sente an. Mane joven ida naran Jared * hatete: “Haʼu sente an tebes kona-ba oinsá ema seluk haree haʼu. Haʼu hanoin: ‘Karik ema sei hamnasa haʼu tanba haʼu oin-seluk.’” Borbullus bele halo joven sira sente moe liután. Feto joven ida ho tinan 17, naran Kellie hatete: “Bainhira borbullus mosu iha haʼu-nia oin, neʼe halo haʼu hanoin barak no tanis hodi dehan haʼu-nia oin aat ona.”

Labarik sira neʼebé tama tempu puberdade sedu liu bele hetan susar boot. Liuliu feto joven sira, tanba ema seluk goza sira kona-ba mudansa isin nian. Livru ida (A Parent’s Guide to the Teen Years) hatete: “Mudansa neʼe bele dada mane joven sira-nia atensaun.”

Mudansa isin nian la dehan katak joven neʼe nia hanoin mós derrepente sai hanesan ema boot. Provérbios (Amsal) 22:15 dehan: “Hahalok beik mak metin iha joven ida nia laran.” Tuir livru ida (You and Your Adolescent), sai matenek kona-ba foti desizaun, kontrola an, no mós hatudu hahalok diʼak hanesan ema boot, neʼe la depende ba mudansa isin nian.

Fó-hatene nanis kona-ba puberdade antes sira tama ba tempu neʼe. Esplika didiʼak kona-ba buat neʼebé sei akontese ba sira-nia isin, liuliu kona-ba mens (ba feto) no kona-ba mehi neʼebé halo esperma sai durante toba-dukur hela (ba mane), tanba buat sira-neʼe akontese derrepente deʼit no bele halo sira sente bilán no taʼuk. Esplika katak ita-nia isin kria iha dalan neʼebé kapás no neʼe mak hakat normál ida atu sai ema boot.—Bíblia nia matadalan: Salmo (Mazmur) 139:14.

Esplika ho didiʼak no klaru. Joven ida naran João hatete: “Bainhira haʼu-nia inan-aman esplika kona-ba neʼe, sira koʼalia la klaru. Haʼu hakarak sira koʼalia nakloke atu haʼu bele hatene ho loloos.” Feto joven ida ho tinan 17 naran Alana mós hatete: “Haʼu-nia amá esplika deʼit kona-ba mudansa ba haʼu-nia isin, maibé diʼak se nia mós esplika kona-ba mudansa ba haʼu-nia emosaun.” Liafuan sira-neʼe hatudu saida? Maski inan-aman sente moe uitoan atu koʼalia, maibé importante atu esplika ho klaru kona-ba tempu puberdade.—Bíblia nia matadalan: Apóstolu 20:20.

Husu pergunta neʼebé book oan sira atu fó sai sira-nia hanoin. Atu sira labele sente moe, koko toʼok atu koʼalia uluk kona-ba ema seluk. Porezemplu, Ita bele husu ba oan-feto: “Ó-nia maluk eskola koʼalia ona kona-ba mens ka lae?” “Labarik sira goza feto sira neʼebé iha mudansa ba isin ka lae?” Ba oan-mane sira, Ita bele husu: “Ó-nia kolega sira goza labarik balu neʼebé nia isin seidauk iha mudansa ka lae?” Bainhira oan sira koʼalia kona-ba ema seluk, neʼe bele halo fasil ba sira atu fó sai sira rasik nia hanoin. Kuandu sira koʼalia, halo tuir Bíblia nia matadalan hodi sai ‘lalais atu rona no neineik atu koʼalia’.—Tiago 1:19.

Ajuda joven sira atu aumenta “matenek no kbiit atu hanoin”. (Provérbios [Amsal] 3:21) Puberdade laʼós deʼit kona-ba mudansa isin nian no emosaun nian, maibé sira mós aumenta sira-nia kbiit atu hanoin hodi sira bele halo desizaun diʼak nuʼudar ema boot. Tan neʼe, uza tempu neʼe atu hanorin morál neʼebé diʼak.—Bíblia nia matadalan: Ebreu 5:14.

Keta rende an. Bainhira inan-aman koʼalia kona-ba puberdade, joven barak hatudu hahalok hanesan baruk no la interese, maibé keta rende an. Livru ida (You and Your Adolescent) dehan: “Joven sira neʼebé haree hanesan baruk atu rona, karik sira rona ho loloos no hanoin-hetan liafuan hotu neʼebé Ita hatete.”