Tuir peskiza ida neʼebé halaʼo iha sidade Vankover, Kanadá hatudu katak ema neʼebé cek sira-nia e-mail loron ida dala tolu sente ladún estrese se kompara ho sira neʼebé cek beibeik sira-nia e-mail. Kostadin Kushlev neʼebé dirije estudu neʼe hatete: “Ema barak sente katak difisil tebes atu la cek sira-nia e-mail, maibé hodi la cek beibeik, neʼe bele ajuda duni sira atu hamenus estrese.”

HANOIN TOʼOK: Ita moris iha tempu neʼebé “mosu problema barak”, entaun ita hakarak duni buka dalan atu hamenus ita-nia estrese, loos ka lae?—2 Timóteo 3:1.

Peskiza ida husi Wildlife Conservation Society (WCS) kona-ba rai-Belize no área seluk iha Tasi Karibe, dehan: “Ikan no animál sira iha tasi laran hanesan sipu-tasi no boek boot nia populasaun aumenta fali iha área sira neʼebé governu proteje hodi bandu ema atu la kaer animál sira-neʼe. Husi tinan 1 toʼo 6 nia laran deʼit, animál sira neʼebé moris iha área sira-neʼe komesa sai barak fali, maibé sei presiza tinan barak liután atu área sira-neʼe bele sai diʼak fali hanesan uluk.” Diretór husi WCS hatete: “Neʼe hatudu katak ikan no animál sira bele aumenta fali iha área sira neʼebé governu proteje ona.”

HANOIN TOʼOK: Dalan neʼebé natureza bele hadiʼa an fali maski ema estraga tiha, hatudu katak iha duni Kriadór neʼebé matenek, loos ka lae?—Salmo (Mazmur) 104:24, 25.

Telejornál Agência Brasil fó sai katak violénsia aumenta ba beibeik iha rai-Brazíl. Tuir relatóriu husi Ministériu de Saúde iha tinan 2012, ema naʼin-56.000 liu mak mate tanba oho malu, neʼe barak liu fali tinan sira seluk. Matenek-naʼin ida kona-ba seguransa públiku naran Luís Sapori fiar katak ida-neʼe akontese tanba ema nia morál neʼebé sai aat ba daudaun. Nia dehan bainhira ema la respeitu tan lei sira, ema komesa uza violénsia atu hetan buat neʼebé sira hakarak.

ITA HATENE KA LAE? Bíblia fó-hatene nanis kona-ba tempu neʼebé ema nia domin “sei sai malirin” no ema neʼebé kontra lei sei aumenta ba beibeik.—Mateus 24:3, 12.