Buat sira neʼebé Josué hanoin-hetan

JEOVÁ hatete: “Haʼu-nia atan Moisés mate ona. Agora, ó no povu sira-neʼe hotu hamriik bá, hakur Mota Jordaun neʼe, no tama ba rai neʼebé haʼu sei fó ba povu Izraél.” (Josué 1:2) Knaar neʼe sei la fasil! Josué serbí ona nuʼudar Moisés nia ajuda-naʼin maizumenus ba tinan 40. No agora nia presiza troka ninia naʼi nia fatin no dirije ema Izraél neʼebé ulun-toos beibeik atu tama ba Rai neʼebé Maromak Promete.

Nuʼudar Josué hanoin kona-ba situasaun neʼebé nia sei hasoru, karik nia hanoin-hetan kona-ba susar sira neʼebé nia hasoru no manán ona. Klaru katak buat neʼebé nia hanoin-hetan ajuda tebes nia iha tempu neʼebá, no mós bele ajuda ema Kristaun ohin loron.

Husi atan sai fali xefe ba tropa

Buat neʼebé Josué hanoin-hetan inklui ninia esperiénsia nuʼudar atan durante tinan barak. (Éxodo 1:13, 14; 2:23) Bíblia la fó sai detalla kona-ba neʼe, maibé ita bele imajina ninia moris nuʼudar atan mak hanesan saida. Karik Josué aprende oinsá atu organiza ho didiʼak buat oioin durante nia sai atan iha rai-Ejitu, no karik nia ajuda organiza ema Izraél no mós “ema barak neʼebé laʼós ema Izraél” atu sai husi rai-Ejitu.​—Éxodo 12:38.

Josué mai husi família ida husi suku Efraim. Ninia avó-mane Elisama mak xefe ba suku Efraim no karik Elisama mós dirije tropa husi suku rua seluk, entaun suku tolu neʼe hamutuk iha tropa naʼin-108.100. (Números 1:4, 10, 16; 2:18-24; 1 Krónikas 7:20, 26, 27) Maski nuneʼe, bainhira ema Amalec mai no ataka ema Izraél lakleur depois sira sai husi rai-Ejitu, Moisés hili Josué atu organiza tropa sira. (Éxodo 17:8, 9a) Tanbasá Moisés hili Josué no laʼós Josué nia aman ka avó-mane? Matenek-naʼin ida esplika: “Josué mak xefe ba suku Efraim neʼebé importante, nia koñesidu nuʼudar mane neʼebé matenek atu organiza ema, no povu tau fiar ba nia, karik tan neʼe mak Moisés hili Josué atu hili no organiza tropa sira.”

Ita la hatene razaun ho loloos, maski nuneʼe kuandu Moisés hili Josué, Josué halo tuir buat hotu neʼebé Moisés haruka nia atu halo. Ema Izraél la iha esperiénsia atu halo funu, maibé Josué fiar metin katak Maromak sei ajuda sira. Entaun kuandu Moisés hatete ba nia katak “aban haʼu sei hamriik iha foho-oan nia tutun ho Maromak loos nia ai-tonka iha haʼu-nia liman”, liafuan sira-neʼe hametin duni Josué nia fiar. Klaru Josué hanoin-hetan katak Jeová foin halakon tropa boot liu iha mundu iha tempu neʼebá. Loron tuirmai, kuandu Moisés hiʼit ninia liman no hiʼit aas toʼo loro-matan monu, la iha inimigu neʼebé bele manán hasoru ema Izraél, no ikusmai ema Amalec lakon. Tuirmai Jeová haruka Moisés atu hakerek iha livru ida no konta fali ba Josué Jeová nia orden: “Haʼu sei halakon hotu ema Amalec husi mundu no ema sei haluha sira.” (Éxodo 17:9b-14) Loos duni, Jeová sei kumpre ninia liafuan tesi-lia neʼe.

Moisés nia ajuda-naʼin

Ita bele fiar katak funu hasoru ema Amalec ajuda Josué no Moisés nia relasaun sai metin liután. Josué iha priviléjiu atu serbí nuʼudar Moisés nia ajuda-naʼin ka “atan husi tempu joven kedas” toʼo Moisés mate, neʼe katak maizumenus ba tinan 40.​—Números 11:12.

Knaar neʼe mak priviléjiu no mós responsabilidade. Porezemplu, bainhira Moisés, Arão, Arão nia oan-mane sira no katuas naʼin-70 saʼe ba Foho Sinai no haree Jeová nia glória, karik Josué mós hamutuk ho sira. Nuʼudar ajudante, Josué akompaña Moisés atu saʼe liután ba foho neʼe no karik nia tenke hamriik dook uitoan kuandu Moisés tama ba kalohan neʼebé reprezenta Jeová nia prezensa. Karik Josué mós hela iha foho leten durante loron 40 no kalan 40. Ho laran-metin, nia hein ninia naʼi fila, no kuandu Moisés komesa tun husi foho ho fatuk-belar rua Aliansa nian, Josué iha neʼebá atu hasoru nia.​—Éxodo 24:1, 2. 9-18; 32:15-17.

Depois ema Izraél halo no adora estátua karau-oan, Josué kontinua serbí nuʼudar Moisés nia ajudante iha tenda reuniaun nian, neʼebé dook uitoan husi ema Izraél nia hela-fatin. Iha neʼebá mak Jeová koʼalia ba Moisés oin ba oin. Maibé kuandu Moisés fila fali ba povu nia hela-fatin, Josué sei “la husik tenda neʼe”. Karik nia nafatin hein tenda atu hapara ema Izraél tama ba tenda laran kuandu sira la moos. Josué hatene katak knaar neʼe mak importante tebes!​—Éxodo 33:7, 11.

Matenek-naʼin naran Josefo fó sai katak Moisés mak tinan 35 boot liu fali Josué, no ita bele fiar katak tempu neʼebé sira gasta hamutuk hametin tebes Josué nia fiar. Matenek-naʼin sira dehan katak Josué no Moisés nia relasaun mak hanesan “mestre neʼebé maduru no estudante neʼebé joven”. Treinu neʼebé Josué simu ajuda nia hamriik metin no ema bele tau fiar ba nia. Ohin loron, la iha profeta neʼebé moris iha ita-nia leet, maibé iha kongregasaun husi Jeová nia povu iha ferik-katuas neʼebé iha esperiénsia no espirituál, no sira bele hametin no anima ema seluk. Ita hafolin sira ka lae? Ita hetan benefísiu husi sira hodi ransu ho sira?

Espiaun iha rai-Kanaan

Tempu importante iha Josué nia moris akontese lakleur depois ema Izraél simu Ukun-Fuan. Moisés hili Josué atu reprezenta ninia suku hodi bá hafuhu Rai neʼebé Maromak Promete. Istória neʼe famozu tebes. Espiaun naʼin-12 konkorda katak rai neʼe iha duni “susubeen no bani-been barak”, hanesan buat neʼebé Jeová promete. Maski nuneʼe, espiaun naʼin-10 neʼebé la iha fiar taʼuk katak ema Izraél sei labele manán hasoru ema neʼebé hela iha rai-Kanaan. Só Caleb no Josué deʼit mak anima povu atu la sai taʼuk no kontra Jeová tanba Jeová sei apoia sira. Maibé povu protesta no hakarak atu tuda mate Caleb no Josué. Karik povu sei oho duni sira se Jeová nia glória la mosu. Tanba povu la hatudu fiar, Maromak fó sai katak ema Izraél hotu neʼebé tinan 20 ba leten sei la tama ba rai-Kanaan. Só Josué, Caleb no ema Levi mak sei tama.​—Números 13:1-16, 25-29; 14:6-10, 26-30.

Hanesan ho Josué, Jeová nia povu hotu haree Jeová nia hahalok kmanek iha rai-Ejitu. Entaun saida mak ajuda Josué atu fiar metin katak Jeová sei ajuda sira, maski ema barak mak duvida? Klaru katak Josué hanoin beibeik kona-ba buat neʼebé Jeová promete no halo ona, no nia medita buat sira-neʼe. Tinan barak liutiha, nia bele hatete katak “[Jeová] nia liafuan hotu neʼebé nia hatete ona sai loos duni. Ninia promesa diʼak hotu sai loos ba imi. Husi liafuan sira-neʼe hotu, la iha liafuan ida mak la sai loos.” (Josué 23:14) Tan neʼe Josué fiar katak Jeová nia promesa hotu kona-ba futuru mós sei sai loos. (Ebreu 11:6) Entaun diʼak atu husu ba Ita-nia an: ‘Oinsá ho haʼu? Tempu neʼebé haʼu uza atu estuda no medita kona-ba Jeová nia promesa sira ajuda haʼu fiar metin katak haʼu bele duni tau fiar ba Jeová ka lae? Haʼu fiar katak Maromak bele proteje haʼu hamutuk ho ninia povu durante terus boot neʼebé lakleur tan sei akontese ka lae?’

Josué laʼós deʼit hatudu fiar, maibé nia mós aten-brani atu halo buat neʼebé loos. Josué no Caleb deʼit mak tau fiar ba Jeová, no povu tomak hakarak tuda mate sira. Se Ita iha situasaun neʼe, Ita sei sente oinsá? Ita sei sente taʼuk ka lae? Josué la taʼuk. Nia no Caleb ho aten-brani fó sai sira-nia fiar. Loron ida, atu hatudu laran-metin ba Jeová, karik ita tenke halo buat neʼebé hanesan.

Istória kona-ba espiaun sira mós hanorin ita katak Josué nia naran troka. Foufoun ninia naran mak Oseias neʼebé signifika “Salvasaun”. Maibé Moisés aumenta sílaba ida neʼebé refere ba Maromak nia naran no bolu nia Jeosué ka Josué neʼebé signifika “Jeová mak fó salvasaun”. Septuajinta tradús ninia naran nuʼudar “Jesus”. (Números 13:8, 16, nota) Josué moris tuir ninia naran nia signifikadu no ho aten-brani fó sai katak Jeová mak fó salvasaun. Moisés la troka arbiru deʼit, nia hanoin kleʼan antes troka Josué nia naran. Neʼe hatudu katak Moisés komprende didiʼak Josué nia hahalok no naran neʼe mós liga ho priviléjiu neʼebé Josué sei simu atu dirije jerasaun foun hodi tama ba Rai neʼebé Maromak Promete.

Ema Izraél laʼo rai iha rai-fuik durante tinan 40, toʼo sira-nia aman hotu mate. Bíblia la temi buat ruma kona-ba Josué durante tempu neʼe. Maibé ita bele fiar katak Josué aprende buat barak durante tempu neʼe. Karik nia haree rasik oinsá Jeová tesi-lia ba kontradór sira, hanesan Kora, Datan, Abiram no ema neʼebé apoia sira no mós ema neʼebé adora Baal husi Peor. Karik Josué mós triste kuandu rona katak Moisés sei la tama ba Rai neʼebé Maromak Promete tanba la halo santu Jeová iha bee Meribá nian.—Números 16:1-50; 20:9-13; 25:1-9.

Hetan knaar atu troka Moisés

Bainhira Moisés besik atu mate, nia husu Maromak atu hili ema ruma atu troka nia hodi nuneʼe ema Izraél la sai “hanesan bibi neʼebé bibi-atan la iha”. Saida mak Jeová halo? Jeová haruka Moisés atu hili Josué neʼebé matenek, no Moisés fó knaar ba nia iha povu hotu nia oin. Povu tenke rona ba nia. Klaru katak Jeová kontente ho Josué! Jeová haree ona oinsá Josué hatudu fiar no matenek. Josué kumpre duni kritéria atu bele dirije ema Izraél. (Números 27:15-20) Maski nuneʼe, Moisés hatene katak Josué sei hasoru susar boot oioin. Tan neʼe, Moisés anima Josué atu “sai aten-brani no sai forte bá” tanba Jeová sei kontinua hamutuk ho Josué.​—Deuteronómio 31:7, 8.

Maromak rasik repete liafuan neʼebé hanesan ba Josué no hatete: “Halo tuir ho didiʼak Ukun-Fuan hotu neʼebé haʼu-nia atan Moisés fó sai ona ba ó. Keta laʼo sees ba liman-loos ka liman-karuk, atu nuneʼe ó bele hatudu matenek iha buat hotu neʼebé ó halo. Livru Ukun-Fuan nian neʼe tenke nafatin iha ó-nia ibun, no ó tenke lee no medita loron no kalan, atu nuneʼe ó bele halo tuir ho didiʼak liafuan hotu neʼebé hakerek iha laran; hodi halo nuneʼe mak ó sei hetan susesu iha ó-nia dalan sira no ó sei hatudu hahalok neʼebé matenek. Haʼu fó ona mandamentu ba ó, loos ka lae? Sai aten-brani no sai forte bá. Keta nakdedar ka taʼuk, tanba Jeová, ó-nia Maromak, mak hamutuk ho ó iha fatin hotu neʼebé ó sei bá.”​—Josué 1:7-9.

Kuandu Josué hanoin-hetan Jeová nia liafuan no buat hotu neʼebé akontese ona iha ninia moris, Josué la duvida katak Jeová sei ajuda nia. Nia sei manán duni rai neʼebé Maromak promete. Klaru katak sei mosu susar oioin, porezemplu sira presiza hakur Mota Jordaun iha tempu neʼebé mota neʼe suli makaʼas. Maski nuneʼe Jeová haruka sira: “Hamriik bá, hakur Mota Jordaun neʼe.” Ho Jeová nia ajuda, sira bele liu susar naran deʼit.​—Josué 1:2.

Akontesimentu oioin iha Josué nia moris, hanesan manán sidade Jerikó, manán ema Izraél nia inimigu sira, no fahe rai neʼebé promete ona, hatudu katak Josué nunka haluha Jeová nia promesa sira. Kuandu Josué idade ona no Jeová ajuda ona Izraél manán sira-nia inimigu, Josué halibur ema Izraél atu fó-hanoin sira kona-ba buat hotu neʼebé Jeová halo ona ba sira no anima sira atu serbí Jeová ho laran tomak. Rezultadu mak sira repete fali sira-nia promesa ba Jeová, no tanba hetan anima husi Josué nia ezemplu, “ema Izraél kontinua serbí Jeová durante Josué nia moris tomak”.​—Josué 24:16, 31.

Josué hatudu ezemplu diʼak ba ita. Ema Kristaun ohin loron hasoru susar oioin neʼebé bele koko sira-nia fiar. Ita presiza laran-metin nafatin ba Jeová durante susar sira-neʼe atu bele halo Jeová nia laran kontente no ikusmai atu bele haree ninia promesa sira sai loos. Josué susesu tanba nia iha fiar neʼebé metin. Klaru katak ita la haree Maromak nia hahalok kmanek hanesan ho Josué, no se ita duvida, livru Josué iha Bíblia fó sai liafuan husi ema sira neʼebé haree rasik ona oinsá Jeová kumpre ninia promesa sira. Hanesan ho Josué, ita bele sai matenek no hetan susesu se ita lee Bíblia loroloron no hakaʼas an atu aplika ida-neʼe iha ita-nia moris.

Dala ruma Ita laran-kanek tanba maluk Kristaun ida nia hahalok ka lae? Se nuneʼe, hanoin kona-ba Josué nia ezemplu. Maski nia halo tuir Jeová, maibé nia mós presiza laʼo iha rai-fuik durante tinan 40 hamutuk ho ema Izraél neʼebé la iha fiar. Dala ruma Ita sente susar atu defende Ita-nia fiar ka lae? Hanoin-hetan buat neʼebé Josué no Caleb halo. Tanba hatudu fiar no halo tuir, sira simu bensaun neʼebé espesiál. Josué fiar metin duni katak Jeová sei kumpre ninia promesa hotu. Mai ita hotu mós halo buat neʼebé hanesan.​—Josué 23:14.

[Dezeñu]

Josué no Caleb tau fiar ba Jeová nia kbiit

[Dezeñu]

Josué nia relasaun diʼak ho Moisés ajuda hametin ninia fiar

[Dezeñu]

Josué nia ezemplu anima povu atu kontinua serbí Jeová