Haʼu hetan ona moris neʼebé iha folin duni

Esperiénsia husi Gaspar Martínez

Tuir loloos, haʼu-nia istória mak istória simples kona-ba labarik kiak husi foho neʼebé ikusmai sai riku iha sidade. Maibé Ita sei hatene katak rikusoin neʼebé haʼu hetan laʼós buat neʼebé ulukliu haʼu hakarak.

MAIZUMENUS tinan 80 liubá, haʼu sai boot iha rai kiak dook husi sidade, iha distritu Rioja, parte norte husi rai-España. Kuandu haʼu tinan sanulu deʼit haʼu sai husi eskola, maibé haʼu hatene ona atu lee no hakerek. Hamutuk ho haʼu-nia maun-alin naʼin-neen, loron-loron haʼu serbisu iha toʼos no tau matan ba ami-nia bibi iha ami-nia rai neʼebé kiʼik.

Tanba ami kiak, ami hanoin katak osan no sasán importante duni. Ami sente laran-moras kuandu haree ema seluk neʼebé iha sasán barak. Maibé, ami-nia bispu hatete katak ami-nia knua mak “knua neʼebé metin liu iha ninia dioseze”. Iha tempu neʼebá nia la hatene katak, ikusmai, ema barak husi knua neʼe sei husik relijiaun katólika.

Buka buat neʼebé diʼak liu

Haʼu kaben ho feto ida husi haʼu-nia rai, naran Mercedes. Lakleur, ami iha oan-mane ida. Iha tinan 1957, ami muda ba sidade Logroño, neʼebé besik ami-nia knua. Neineik-neineik, ami-nia família hotu muda ba sidade neʼe. Maibé tanba haʼu eskola kiʼik, haʼu la bele hetan serbisu diʼak, no ami-nia osan sempre la toʼo. Haʼu sai bilán kona-ba buka matadalan ba haʼu-nia moris. Nuneʼe, haʼu buka informasaun husi livru ruma iha biblioteka, maibé haʼu sente bilán hela.

Loron ida, haʼu rona husi rádiu kona-ba kursu atu aprende Bíblia liuhusi karta. Haʼu foti kursu neʼe no kuandu ramata, ema balu husi protestante evanjéliku konvida haʼu atu tuir sira-nia igreja. Haʼu bá, maibé lakleur haʼu haree katak sira-nia ema-boot laran-moras ba malu. Tan neʼe haʼu la bá tan, no haʼu hanoin katak relijiaun hotu hanesan deʼit.

Ikan nia kulit monu husi haʼu-nia matan

Iha tinan 1964, mane-klosan ida naran Eugenio vizita ami-nia uma. Nia hatete katak nia ema Testemuña ba Jeová. Maski haʼu seidauk rona kona-ba relijiaun neʼe, maibé haʼu kontente atu koʼalia ho nia kona-ba Bíblia. Haʼu hanoin katak haʼu hatene ona kona-ba Bíblia, no haʼu temi eskritura balu neʼebé haʼu aprende ona husi kursu neʼebé uluk haʼu tuir. Maski haʼu koko atu defende protestante nia doutrina, maibé tuir loloos, iha haʼu-nia laran haʼu la fiar ba doutrina sira-neʼe.

 Eugenio vizita haʼu dala rua no ami koʼalia kleur. Haʼu hakfodak tebes tanba nia hatene loke eskritura sira no esplika mai haʼu, maski nia eskola kiʼik liu. Eugenio esplika husi Bíblia katak ita moris iha loron ikus sira, no katak lakleur Maromak nia Reinu sei halo mundu tomak sai fali hanesan jardín Eden. Haʼu hakfodak no hakarak hatene barak liután.—Sal 37:11, 29; Isa 9:6, 7; Mt 6:9, 10.

Haʼu komesa estudu Bíblia ho laran-kontente. Buat hotu neʼebé haʼu aprende mak foun no kona haʼu-nia laran. Haʼu komesa hetan futuru foun neʼebé iha folin duni. Agora haʼu la hanoin ona atu sai ema riku, no mós la hanoin barak ona kona-ba buka serbisu. Se Maromak bele halakon moras no mate, sá tan ho problema seluseluk? Haʼu hetan duni moris neʼebé iha folin.—Isa 33:24; 35:5, 6; Apok 21:4.

Kuandu haʼu aprende lia-loos, haʼu koʼalia kedas ba haʼu-nia família. Ho laran-manas, haʼu fó-hatene sira katak Maromak promete atu halo mundu foun no ema neʼebé fiar-metin sei hetan moris rohan-laek.

Haʼu-nia família simu lia-loos

Lakleur, ami maizumenus naʼin-12 komesa halibur hamutuk iha haʼu-nia tiu nia uma atu koʼalia kona-ba Bíblia nia promesa. Ami halo hanesan neʼe domingu-domingu durante oras rua ka tolu. Kuandu Eugenio haree katak haʼu-nia família barak gosta atu aprende Bíblia, nia halo arranju atu umakain ida-idak bele estuda Bíblia ho Testemuña ba Jeová.

Haʼu-nia família balu hela iha sidade kiʼik Durango, maizumenus kilómetru 120 husi ami. Iha neʼebá Testemuña ba Jeová la iha. Tan neʼe, haʼu foti feriadu husi serbisu loron balu no bá vizita sira atu esplika haʼu-nia fiar neʼebé foun. Loraik-loraik haʼu koʼalia ba ema maizumenus naʼin-sanulu toʼo kalan-boot, no sira hotu kontente tebes atu rona. Kuandu haʼu atu fila, haʼu fó Bíblia no livru balu ba sira. Depois neʼe, ami kontinua kontaktu ba malu.

Kuandu Testemuña sira foin tama iha Durango, sira hanoin katak ema ida seidauk haklaken iha neʼebá. Maibé, sira hetan ema naʼin-18 neʼebé hein hela atu estuda Bíblia, no sira kontente tebes atu arranja estuda Bíblia ho sira.

Foufoun Mercedes lakohi atu estuda, liuliu tanba nia taʼuk ba ema. Iha tempu neʼebá, governu España bandu Testemuña ba Jeová, tan neʼe nia taʼuk katak governu sei hasai ami-nia oan naʼin-rua husi eskola no ema sei la gosta ami. Maibé kuandu nia haree katak família hotu simu lia-loos husi Bíblia, ikusmai nia mós hakarak atu estuda.

Iha tinan rua nia laran, ema naʼin-40 husi haʼu-nia família dedieka sira-nia an ba Maromak Jeová no hetan batizmu. Sin, haʼu-nia família mós hetan moris neʼebé iha folin, no ida-neʼe halo haʼu kontente tebes. Ami hetan bensaun no rikusoin espirituál barak tebes.

Sai riku liután

Tempu neʼebé haʼu no Mercedes foin muda ba Logroño, populasaun iha sidade neʼe mak maizumenus ema naʼin-100.000, no iha Testemuña naʼin-20 deʼit. Lakleur, haʼu hetan knaar oioin iha kongregasaun laran. Ba tinan 20 haʼu hakaʼas an atu haboot haʼu-nia oan-mane naʼin-rua no halo serbisu barak iha kongregasaun.

Kuandu haʼu tinan 56, fatin neʼebé haʼu serbisu taka derrepente no haʼu lakon serbisu. Tanba uluk kedan haʼu hakarak sai pioneiru, haʼu hanoin ida-neʼe mak oportunidade diʼak atu halo nuneʼe. Ami-nia moris sai susar tanba pensaun neʼebé haʼu simu uitoan deʼit. Mercedes halo serbisu hamoos uma. Maski nuneʼe, ami la kuran buat ida neʼebé ami presiza. Haʼu kontinua nuʼudar pioneiru, no Mercedes mós gosta tebes atu haklaken no dala ruma nia foti pioneiru ausiliár.

 Tinan balu liubá, Mercedes lori beibeik livru fulan-fulan nian ba feto ida naran Merche. Kuandu Merche sei kiʼik, nia estuda Bíblia ho Testemuña. Merche gosta lee ita-nia livru sira, no Mercedes hanoin katak iha Merche nia laran, nia hafolin nafatin lia-loos husi Bíblia. Ikusmai, nia komesa estudu Bíblia no laʼo ba oin iha lia-loos. Maibé nia laʼen, Vicente, ema tua-teen no serbisu la metin. Tan neʼe, nia la fó osan ba nia feen, no sira-nia moris kaben nian besik atu naksobu.

Haʼu-nia feen fó-hatene Merche katak diʼak se Vicente koʼalia ho haʼu, no ikusmai Vicente halo nuneʼe. Haʼu vizita nia dala balu, no nia mós komesa estudu Bíblia. Vicente komesa troka ninia moris hodi la hemu tan. Ulukliu nia la hemu ba loron ida ka loron balu. Neineik-neineik nia la hemu ba semana ida ka semana balu. Ikusmai, nia la hemu tan ona. Ema hotu haree katak nia sai ema neʼebé kalma no kontente, no nia família sai dame fali. Agora, nia hamutuk ho nia feen no oan-feto hela iha Nusar Kanária, no sira hotu ajuda kongregasaun kiʼik iha neʼebá.

Haree fali ba haʼu-nia moris neʼebé kontente

Husi haʼu-nia família neʼebé ulukliu estuda Bíblia, balu mate tiha ona. Maibé sira iha oan no bei-oan, no ami-nia família sai boot. Maromak fó bensaun barak mai ami. (Prov 10:22) Haʼu sente kontente tanba sira barak liu neʼebé komesa estuda Bíblia iha tinan 40 liubá serbí nafatin Maromak Jeová ho laran-metin hamutuk ho sira-nia oan no bei-oan!

Sin, haʼu-nia família barak sai Testemuña ba Jeová, no sira barak sai katuas, atan ministeriál, no pioneiru. Haʼu-nia oan-mane boot no nia feen serbí iha sukursál husi Testemuña ba Jeová iha Madríd, España. Kuandu haʼu foin sai Testemuña, ami naʼin-3.000 deʼit iha rai-España. Maibé agora ami hamutuk naʼin-100.000 liu. Haʼu haksolok tebes atu kontinua haʼu-nia serbisu nuʼudar pioneiru, no haʼu fó-agradese ba Maromak tanba haʼu kontente hodi halaʼo ninia serbisu. Maski haʼu eskola kiʼik deʼit, dala ruma haʼu lori katuas neʼebé vizita kongregasaun sira nia fatin.

Tinan balu liubá, haʼu rona katak agora ema uitoan deʼit mak hela iha knua neʼebé uluk kiʼik haʼu hela bá. Tanba sira kiak, ema barak husi knua neʼe husik deʼit sira-nia uma no rai, no muda ba fatin seluk atu buka moris diʼak. Haʼu kontente tebes tanba sira barak husi knua neʼe, inklui mós haʼu, hetan ona rikusoin espirituál. Ami hatene ona katak ami-nia moris iha folin duni, no katak serbí Maromak Jeová mak lori haksolok neʼebé boot liu hotu ba ami-nia moris.

[Dezeñu iha pájina 32]

Ema balu husi Irmaun Martínez nia família neʼebé iha lia-loos