Nafatin halo tuir Kristu nia hahalok
Nafatin halo tuir Kristu nia hahalok
“Buat neʼebé ema haree iha Kristu, halo ema haree mós iha imi.”—FLP 2:5.
1. Tanbasá mak ita tenke halo tuir Kristu?
“MAI besik haʼu.” Jesus Kristu fó konvite neʼe no nia hatutan: “Banati-tuir haʼu, tan haʼu laran-kmaus no haraik-an; no imi sei hetan hakmatek.” (Mt 11:28, 29) Liafuan sira-neʼe hatudu katak Jesus hadomi tebes ema. Nia mak fó ezemplu diʼak liu hotu kona-ba domin atu ita halo tuir. Maski Jesus mak Maromak nia Oan neʼebé iha kbiit boot, nia komprende ema nia sentimentu no hatudu laran-diʼak, liuliu ba ema neʼebé iha susar laran.
2. Jesus nia hahalok saida deʼit mak ita sei aprende?
2 Iha lisaun neʼe no mós iha lisaun rua tuirmai, ita sei aprende kona-ba oinsá ita bele haburas no hatudu nafatin hahalok hanesan Jesus no haleno “Kristu nia hanoin” iha ita-nia moris. (1 Kor 2:16) Ita sei estuda kona-ba hahalok lima neʼebé Jesus hatudu: laran-maus, haraik-an, laran-diʼak, halo tuir Maromak, aten-brani, no domin.
Aprende husi Kristu nia laran-maus
3. (a) Lisaun saida mak Jesus hanorin ba nia dixípulu sira? (b) Jesus halo saida kuandu nia dixípulu sira halo buat ruma neʼebé ladún diʼak?
3 Jesus, Maromak nia Oan neʼebé sala-laek, prontu atu mai iha rai atu halaʼo Maromak nia hakarak maski iha ema sala-naʼin nia leet. Ema sala-naʼin sira-neʼe balu ikusmai oho nia. Maski nuneʼe, Jesus sempre hatudu laran-ksolok no kontrola an. (1 Ped 2:21-23) “Hodi haree ba Jesus” nia ezemplu kona-ba ida-neʼe, bele ajuda ita atu halo tuir nia bainhira ema seluk nia sala ka toman ruma neʼebé la diʼak halo ita sente hirus. (Ebr 12:2) Jesus konvida ninia dixípulu sira atu banati-tuir nia hodi aprende husi nia. (Mt 11:29) Sira bele aprende saida? Buat neʼebé sira aprende husi Jesus mak nia laran-maus, no nia hatudu pasiénsia ba nia dixípulu sira maski sira halo buat ruma neʼebé ladún diʼak. Iha kalan antes Jesus mate, nia hanorin ninia dixípulu sira lisaun ida neʼebé sira sei nunka haluha, ida-neʼe mak kona-ba “haraik-an” hodi fase sira-nia ain. (Lee Joao 13:14-17.) Iha kalan neʼebá mós, kuandu Pedro, Tiago, no João la “matan-moris”, Jesus komprende sira-nia situasaun. Nia husu: “Ó toba, Simão?” No nia hatutan tan hodi dehan: “Hadeer no harohan bá atu imi labele monu ba tentasaun. Espíritu hakarak tebes, maibé isin kbiit-laek.”—Mc 14:32-38.
4, 5. Oinsá mak Jesus nia ezemplu ajuda ita kuandu ita-nia maluk hatudu hahalok ruma neʼebé ladún diʼak?
4 Karik ita-nia maluk kristaun ida hatudu hahalok ruma neʼebé ladún diʼak, hanesan hakarak atu sai diʼak liu ema seluk, sente an lalais, ka ladún hakarak atu halo tuir konsellu husi katuas sira ka husi atan “laran-metin no matenek”. Entaun, saida mak ita sei halo? (Mt 24:45-47) Karik ita la hakfodak se hahalok aat ruma mai husi ema iha Satanás nia mundu, maibé susar atu simu hahalok neʼebé ladún diʼak husi ita-nia maluk kristaun sira. Tan neʼe, se ema seluk nia hahalok halo ita hirus, ita presiza husu ba ita-nia an: ‘Oinsá mak haʼu bele haleno “Kristu nia hanoin”?’ Diʼak atu hanoin-hetan katak Jesus la hirus ninia dixípulu sira maski sira dala ruma la haleno “Kristu nia hanoin”.
5 Hanoin toʼok kona-ba buat neʼebé akontese ho apóstolu Pedro. Kuandu Jesus bolu Pedro atu sai husi ró atu laʼo toʼo nia iha bee leten, Pedro laʼo duni iha bee leten. Maibé kuandu Pedro haree anin huu makaʼas, nia hahú mout. Maski nuneʼe, Jesus la sai hirus ho Pedro hodi hatete: “Ó merese ida-neʼe!” Maibé “Jesus lolo liman kedas ba nia hodi kaer nia dehan: ‘Ema fiar kiʼik, tansá ó laran-namlele?’” (Mt 14:28-31) Hanesan Jesus, kuandu ita-nia maluk ida nia fiar sai fraku, ita mós hakarak lolo ita-nia liman atu ajuda nia atu bele hametin nia fiar. Neʼe mak lisaun diʼak neʼebé ita aprende husi Jesus nia hahalok laran-maus neʼebé nia hatudu ba Pedro.
6. Saida mak Jesus hanorin ninia apóstolu sira kona-ba hakarak atu sai boot?
6 Pedro hamutuk ho apóstolu sira seluk mós haksesuk malu beibeik kona-ba sé mak boot liu iha sira-nia leet. Tiago no João hakarak atu tuur besik Jesus iha ninia Reinu, ida iha nia sorin loos no ida iha nia sorin karuk. Kuandu Pedro no apóstolu sira seluk rona kona-ba neʼe, sira sai hirus. Jesus hatene katak apóstolu sira hanoin hanesan neʼe tanba sira moris iha komunidade neʼebé hatudu hahalok sira-neʼe. Jesus bolu sira hodi dehan ba sira: “Imi hatene katak naʼi-ulun jentiu sira-nian ukun povu hodi kbiit. Imi sei la halo hanesan neʼe; maibé iha imi leet sé mak hakarak sai boot, nia sei sai imi-nia atan.” Tuirmai Jesus fó sai nia rasik nia ezemplu, hodi hatete: “Hanesan Oan-Mane mai, laʼós atu ema serbí nia, maibé atu serbí no saran nia moris atu soi ema barak.”—Mt 20:20-28.
7. Oinsá mak ita ida-idak bele haburas unidade iha kongregasaun?
7 Hodi hanoin didiʼak kona-ba Jesus nia hahalok haraik-an, bele ajuda ita atu halo ita-nia an sai “ida neʼebé kiʼik liu” iha ita-nia maluk nia leet. (Lc 9:46-48) Hodi halo nuneʼe ita haburas unidade iha ita leet. Hanesan aman ida neʼebé iha família boot, Maromak Jeová mós hakarak nia oan sira atu “hela hamutuk ho laran ida deʼit”, atu sira bele iha relasaun diʼak ba malu. (Sal 133:1) Jesus harohan ba nia Aman kona-ba ema kristaun loos hotu, hodi hatete: “Haʼu iha sira, no Ita iha haʼu; atu sira laran ida deʼit tebetebes, nuneʼe mak mundu sei hatene katak Ita mak haruka haʼu mai, no mós katak Ita hadomi sira nuʼudar Ita hadomi haʼu.” (Joao 17:23) Entaun, moris iha unidade bele hatudu katak ita mak ema kristaun loos. Maibé atu iha unidade, ita tenke perdua ema seluk nia hahalok neʼebé ladún diʼak hanesan Kristu perdua. Tuir loloos, Jesus mós hanorin katak hodi perdua malu mak ita bele hetan perdua.—Lee Mateus 6:14, 15.
8. Ita bele aprende saida husi maluk kristaun sira neʼebé halo tuir Kristu ba tinan barak ona?
8 Hodi halo tuir ita-nia maluk kristaun sira neʼebé halo tuir Kristu ba tinan barak ona, ita mós bele aprende buat barak. Hanesan Jesus, sira hatudu katak sira komprende ema maski ema halo buat ruma neʼebé ladún diʼak. Sira aprende katak hodi hatudu laran-sadiʼa hanesan Kristu ajuda sira atu hatudu “pasiénsia ba ema kbiit-laek nia sala” no bele mós haburas unidade. Liután neʼe, hatudu laran-sadiʼa bele book maluk kristaun hotu iha kongregasaun laran atu haleno Kristu nia hanoin. Sira hakarak sira-nia maluk atu hetan buat neʼebé hanesan ho apóstolu Paulo nia hakarak ba ema kristaun iha Roma: “Maromak pasiénsia no ksolok nian tulun imi moris hodi buka dame ho maluk sira, tuir Kristu Jesus, atu ho neon ho laran ida deʼit, imi bele hahiʼi ho lia ida deʼit, Maromak no ita Naʼi Jesus Kristu nia Aman.” (Rom 15:1, 5, 6) Sin, ita-nia adorasaun ho laran ida deʼit fó glória ba Maromak Jeová.
9. Tanbasá mak ita presiza espíritu santu atubele halo tuir Jesus nia ezemplu?
9 Jesus hatudu katak “haraik-an” inklui mós hatudu laran-maus, hahalok ida neʼebé espíritu santu lori mai. Nuneʼe, atubele halo tuir loloos Jesus nia ezemplu, ita presiza estuda ninia ezemplu, no ita mós presiza Maromak Jeová nia espíritu santu. Ita tenke halo orasaun hodi husu Maromak nia espíritu santu no hakaʼas an atu haburas hahalok hanesan “domin, ksolok, dame, pasiénsia, laran-diʼak, laran-luak, fiar malu [“fiar”, MF], laran-kmaus no ukun an [“kontrola an”, MF]”. (Gal 5:22, 23) Hodi tuir ezemplu neʼebé Jesus fó kona-ba haraik-an no laran-maus, ita sei halo kontente ita-nia Aman Jeová iha lalehan.
Jesus hatudu laran-diʼak ba ema seluk
10. Oinsá mak Jesus hatudu laran-diʼak?
10 Laran-diʼak mós hahalok ida neʼebé espíritu santu lori mai. Jesus sempre hatudu laran-diʼak ba ema seluk. Jesus simu ho laran-diʼak ema hotu neʼebé buka nia ho laran-moos. (Lee Lucas 9:11.) Saida mak ita bele aprende husi hahalok laran-diʼak neʼebé Jesus hatudu? Ema neʼebé laran-diʼak prontu atu simu ema, hatudu laran-maus, no hanoin ema. Jesus hatudu duni hahalok sira-neʼe. Nia hanoin tebetebes ema “basá sira kole no neon nakraik, hanesan bibi sira neʼebé bibi-atan la iha”.—Mt 9:35, 36.
11, 12. (a) Konta toʼok ezemplu ida neʼebé hatudu katak Jesus hanoin ema. (b) Saida mak ita bele aprende husi Jesus nia ezemplu neʼe?
11 Jesus mós hatudu katak nia hanoin ema hodi ajuda sira. Hanoin toʼok ezemplu tuirmai neʼe. Feto ida terus durante tinan 12 tanba moras raan suli. Nia hatene katak tuir Moisés nia Ukun-Fuan, ninia moras halo nia isin sai lamoos hodi nia labele halo adorasaun hamutuk ho ema seluk, no halo ema ruma neʼebé kona nia mós sai lamoos. (Lev 15:25-27) Maski nuneʼe, Jesus nia naran diʼak no hahalok diʼak halo feto neʼe fiar katak Jesus bele no hakarak kura nia. Nia dehan ba nia an rasik: “Haʼu kona deʼit karik nia hena, haʼu sei hetan isin-diʼak.” Ho aten-brani feto neʼe halo nuneʼe duni no sente kedas nia hetan isin-diʼak.
12 Jesus hatene katak ema ida kona nia hena, no nia hateke haleʼu atu haree sé mak halo buat neʼe. Feto neʼe, karik taʼuk atu ema siʼak nia tanba nia kontra ona Ukun-Fuan. Nuneʼe, nia nakdedar hodi hakneʼak iha Jesus nia ain no dehan sai lia-loos hotu. Jesus siʼak feto neʼe ka lae? Lae duni! Jesus ho laran-diʼak hatete ba nia: “Haʼu oan-feto, . . . ó-nia fiar mak soi ó. Laʼo bá iha dame laran.” (Mc 5:25-34) Liafuan sira-neʼe halo feto neʼe sente kmaan duni, loos ka lae?
13. (a) Oinsá mak Jesus nia hahalok la hanesan ho ema farizeu sira? (b) Oinsá mak Jesus haree labarik sira?
13 La hanesan ho ema farizeu sira neʼebé laran-toos, Kristu nunka uza ninia kbiit atu hatodan ema. (Mt 23:4) Duké hatodan ema, Jesus hanorin Maromak Jeová nia dalan sira ho laran-diʼak no pasiénsia. Jesus hatudu nafatin domin no laran-diʼak ba nia dixípulu sira hodi sai sira-nia belun neʼebé loos. (Prov 17:17; Joao 15:11-15) Labarik sira mós la taʼuk atu hakbesik ba Jesus, no nia mós sente kontente hamutuk ho sira. Maski nia okupadu, maibé nia fó tempu ba labarik kiʼikoan sira. Loron ida, Jesus nia dixípulu neʼebé sei haburas hakarak atu sai ema boot hanesan ulun-naʼin relijiaun sira, koko atu hanetik ema lori sira-nia oan ba Jesus atu nia tau liman ba sira. Maibé, Jesus la kontente ho ida-neʼe. Nia hatete ba sira: “Husik labarik sira mai hakbesik haʼu; keta taka dalan ba sira. Loloos, reinu lalehan ba sira neʼebé hanesan neʼe.” Tuirmai, hodi uza labarik sira-neʼe, nia hanorin ninia dixípulu sira lisaun importante ida, nia dehan: “Tebes haʼu dehan ba imi: Ema neʼebé la simu Maromak nia reinu hanesan labarik oan ida, nia sei la tama iha neʼebá.”—Mc 10:13-15.
14. Labarik sira bele hetan buat diʼak saida kuandu ema hatudu interese ba sira?
14 Hanoin toʼok kona-ba labarik sira-neʼe nia sentimentu kuandu sira sai boot ona, no sira hanoin-hetan tempu neʼebé Jesus Kristu ‘hakoʼak sira no fó bensa ba sira’. (Mc 10:16) Ohin loron mós kuandu irmaun katuas no irmaun seluk neʼebé hatudu interese no laran-diʼak ba labarik sira, sira sei hanoin-hetan fali ba tempu neʼe ho laran-ksolok. Maibé, buat neʼebé importante liu mak hodi hatudu interese ba labarik sira, sira bele aprende husi kiʼik kedas katak Maromak Jeová nia espíritu hamutuk ho ninia povu.
Hatudu laran-diʼak iha mundu neʼebé aat
15. Tanbasá mak ohin loron ema barak la hatudu laran-diʼak?
15 Ohin loron ema barak sente katak hatudu laran-diʼak ba ema seluk ladún importante. Tan neʼe mak loron-loron Maromak Jeová nia povu hasoru ema neʼebé la hatudu laran-diʼak iha eskola, serbisu-fatin, kuandu halo viajen, ka halo serbisu haklaken. Maski dala ruma ita sente la diʼak kuandu ema halo hahalok aat, maibé ita la hakfodak. Maromak Jeová haleno apóstolu Paulo atu fó avizu nanis ba ita katak moris iha “loron ikus sira” sei nakonu ho susar tanba ema kristaun loos sei hasoru ema neʼebé “sei hanoin deʼit sira an, . . . la hatene sadiʼa maluk”.—2 Tim 3:1-3.
16. Iha kongregasaun laran, oinsá mak ita hatudu laran-diʼak hanesan Kristu?
16 La hanesan ho mundu aat neʼe, iha kongregasaun kristaun ema hatudu laran-diʼak ba malu. Hodi halo tuir Jesus, ita ida-idak bele halo parte atu halo kongregasaun sai fatin neʼebé halo ita hotu sente kmaan. Oinsá mak ita bele halo ida-neʼe? Iha ema barak iha kongregasaun laran neʼebé presiza ita atu fó laran-manas no ajuda ba sira tanba sira hasoru problema saúde nian ka problema sira seluk. Maski iha “loron ikus” sira-neʼe problema aumenta ba beibeik, maibé problema sira-neʼe laʼós buat neʼebé foun tanba iha apóstolu sira-nia tempu mós ema kristaun hasoru problema neʼebé hanesan. Tan neʼe mak ema kristaun sira presiza ajuda no fó laran-manas ba malu hanesan iha tempu uluk. Porezemplu, Paulo fó laran-manas ba ema kristaun atu “fó aten-brani ba sira neʼebé taʼuk; tau matan ba sira neʼebé kbiit-laek, no pasiénsia ba ema hotu”. (1 Tes 5:15) Atu halo ida-neʼe ita presiza hatudu laran-diʼak hanesan Kristu.
17, 18. Oinsá mak ita bele halo tuir Jesus nia laran-diʼak?
17 Ita ema kristaun iha responsabilidade atu ho laran-diʼak simu ita-nia maluk, atu hatudu hahalok hanesan Jesus nian, no atu hatudu interese ba sira neʼebé ita koñese ba tinan barak no ba sira neʼebé ita foin hasoru. (3 Joao 5-8) Jesus mak ulukliu hatudu laran-sadiʼa ba ema, entaun ita mós tenke hatudu uluk laran-sadiʼa ba ema seluk no halo sira sente kmaan.—Isa 32:2; Mt 11:28-30.
18 Ita ida-idak bele hatudu laran-diʼak hodi buka oportunidade atu ajuda ita-nia maluk. Entaun, lolo liman bá atu ajuda malu! Paulo hatete: “Hadomi malu ho domin loos; buka atu sai uluk atu hamtaʼuk maluk sira.” (Rom 12:10) Neʼe katak ita halo tuir Kristu nia ezemplu, hatudu laran-diʼak ba ema seluk, no hakaʼas an atu hatudu “domin neʼebé la bosok”. (2 Kor 6:6) Paulo esplika kona-ba domin hanesan Kristu nian, hodi hatete: “Domin pasiénsia, domin laran-diʼak. Domin la laran-moras, domin la loko an; domin la buka oin.” (1 Kor 13:4) Duké rai odi ba ita-nia irmaun no irmán sira, diʼak atu ita halo tuir konsellu neʼe: “Simu malu didiʼak, tahan malu wainhira imi iha buat ruma hasoru ema seluk. Imi sei perdua malu nuʼudar Naʼi fó perdua ona ba imi.”—Kol 3:13.
19. Hatudu laran-diʼak hanesan Kristu lori rezultadu diʼak saida deʼit?
19 Kuandu ita hakaʼas an atu haburas no hatudu laran-diʼak hanesan Kristu iha situasaun hotu, ida-neʼe sei lori rezultadu diʼak. Maromak Jeová nia espíritu sei ajuda ita hotu iha kongregasaun laran atu haburas hahalok neʼebé espíritu lori mai. Liután neʼe, hodi halo tuir Jesus nia ezemplu no ajuda ema seluk atu halo hanesan, ita-nia adorasaun sei halo ho laran ida deʼit no sei halo kontente Maromak. Tan neʼe, mai ita hakaʼas an nafatin atu hatudu ba ema seluk laran-maus no laran-diʼak hanesan Jesus.
Ita bele hatán?
• Oinsá mak Jesus hatudu katak nia “laran-kmaus no haraik-an”?
• Oinsá mak Jesus hatudu laran-diʼak?
• Iha dalan saida deʼit mak ita bele hatudu laran-maus no laran-diʼak hanesan Jesus?
[Pergunta estudu nian]
[Dezeñu iha pájina 8]
Kuandu ita-nia maluk nia fiar sai fraku hanesan Pedro, ita sei lolo liman atu ajuda nia ka lae?
[Dezeñu iha pájina 10]
Oinsá mak ita ida-idak bele hola parte atu haburas laran-diʼak iha kongregasaun laran?