Sé mak hili relijiaun, haʼu ka inan-aman?

IHA rai-Polónia ema barak hatete ba Testemuña ba Jeová: “Haʼu moris mai ho haʼu-nia relijiaun, no haʼu sei mate ho haʼu-nia relijiaun.” Liafuan sira-neʼe hatudu katak ema kaer metin relijiaun neʼebé sira simu husi inan-aman no hanorin fali ida-neʼe ba sira-nia oan. Ema mós hanoin hanesan neʼe iha Ita-nia rai ka lae? Se nuneʼe, dala barak ema nia relijiaun sai buat neʼebé sira tenke tuir deʼit. Ida-neʼe mós bele akontese ba Testemuña ba Jeová sira neʼebé hetan lia-loos husi inan-aman ka avó sira ka lae?

Ba Timóteo, nia la hanesan neʼe. Timóteo nia inan no avó-feto hanorin nia atu tau fiar no hadomi Maromak. Maski nia hatene eskritura “hori kiʼik kedas”, Timóteo, hamutuk ho nia inan no avó, ikusmai sai ema kristaun tanba ema uza Eskritura sira atu hanorin lia-loos kona-ba Kristu, no lia-loos neʼe book nia laran. (2 Tim 1:5; 3:14, 15) Ida-neʼe hatudu katak maski inan-aman hakaʼas an atu ajuda sira-nia oan atu sai Maromak Jeová nia atan, oan rasik presiza haburas sira-nia hakarak atu serbí Aman Jeová.—Mc 8:34.

Atu ema ida bele serbí Maromak Jeová ho laran no atubele laran-metin nafatin iha situasaun naran deʼit, nia rasik presiza tau fiar ba buat neʼebé nia aprende husi Bíblia. Hodi halo nuneʼe, ninia fiar sei sai metin no iha abut neʼebé naruk.—Ef 3:17; Kol 2:6, 7.

Oan nia knaar

Mane ida naran Alberto * neʼebé sai boot ho nia família Testemuña, hatete: “Husi kiʼik kedas haʼu sente katak Testemuña ba Jeová mak relijiaun neʼebé loos, maibé susar ba haʼu atu simu relijiaun neʼe nia matadalan kona-ba oinsá atu halaʼo haʼu-nia moris.” Se Ita mak joven ida, karik Ita mós hanoin hanesan Alberto. Se nuneʼe, koko atu buka-hatene dalan neʼebé Maromak hakarak ita atu moris, no hakaʼas an atu halo ida-neʼe ho laran-kontente. (Sal 40:8) Alberto hatutan tan: “Haʼu koko atu halo orasaun. Foufoun, haʼu sente susar atu halo ida-neʼe, maibé haʼu hakaʼas an atu halo orasaun. Lakleur, haʼu sente katak Maromak bele hafolin haʼu se haʼu hakaʼas an atu halo buat neʼebé loos. Ida-neʼe fó forsa ba haʼu atu troka buat ruma iha haʼu-nia moris.” Hodi haburas Ita-nia relasaun ho Maromak Jeová, Ita sei kontente atu halo Maromak nia hakarak.—Sal 25:14; Tgo 4:8.

Hanoin toʼok kona-ba buat ida neʼebé Ita gosta halo, hanesan toka viola. Se Ita ladún hatene oinsá atu toka, karik Ita sai baruk. Maibé, se Ita hatene toka ho diʼak, Ita sei gosta toka beibeik, no karik sei buka tempu atu halo ida-neʼe. Hanesan neʼe mós ho atividade kristaun nian. Tan neʼe, buka tempu atu prepara no hola parte iha reuniaun sira. Maski Ita joven ka labarik, Ita-nia ezemplu diʼak bele fó laran-manas ba ema seluk!—Ebr 10:24, 25.

Ida-neʼe mós hanesan ho serbisu haklaken. Ita presiza halo serbisu neʼe tanba domin, laʼós tanba ema obriga Ita. Husu ba Ita-nia an pergunta tuirmai neʼe: ‘Tansá haʼu hakarak fó-hatene ba ema seluk kona-ba Maromak Jeová? Razaun saida mak haʼu iha atu hadomi Maromak?’ Ita presiza haree Maromak Jeová nuʼudar Aman neʼebé hadomi nia oan sira. Liuhusi Jeremias, Maromak hatete: “Imi sei buka haʼu no sei hetan haʼu, tanba imi buka haʼu ho imi-nia laran tomak.” (Jer 29:13, 14) Ida-neʼe book Ita atu halo saida? Joven ida naran Jacob hatete: “Husi kiʼik haʼu tenke tuir reuniaun sira no bá haklaken, maibé ida-neʼe sai hanesan toman deʼit. Haʼu tenke troka dalan neʼebé haʼu hanoin. Haʼu haburas haʼu-nia relasaun ho Aman Jeová no buka atu koñese nia diʼak liután. Ikusmai, ida-neʼe book haʼu atu hola parte iha atividade kristaun nian ho laran.”

Atubele halaʼo serbisu haklaken ho kontente, Ita presiza ransu ho ema neʼebé bele ajuda Ita atu halo ida-neʼe. Maromak nia liafuan hatete: “Ema neʼebé laʼo hamutuk ho ema matenek sei sai matenek.” (Prov 13:20) Tan neʼe, buka kolega neʼebé tau uluk Maromak nia hakarak no serbí nia ho laran-kontente. Feto ida naran Jola, hatete: “Ransu malu ho joven sira neʼebé buka atu halo Maromak nia hakarak halo haʼu laran-manas. Ida-neʼe book haʼu atu hola parte iha serbisu haklaken beibeik ho laran-kontente.”

Inan-aman nia knaar

Jola hatutan tan: “Haʼu agradese ba haʼu-nia inan-aman tanba sira hanorin haʼu kona-ba Maromak Jeová.” Sin, inan-aman iha kbiit atu book sira-nia oan atu foti desizaun neʼebé diʼak. Apóstolu Paulo hakerek: “Aman inan sira,  . . . hanorin [imi-nia oan sira] dixiplina no Naʼi nia doutrina loloos.” (Ef 6:4) Konsellu neʼe hatudu ho klaru katak inan-aman iha responsabilidade atu hanorin oan sira Maromak Jeová nia matadalan, laʼós sira-nian. Tan neʼe diʼak liu ba inan-aman atu book oan sira-nia laran hodi sira rasik buka atu moris tuir Maromak nia hakarak, duké haruka oan sira atu halo tuir deʼit inan-aman nia hakarak.

Diʼak ba inan-aman atu hanorin oan sira Maromak Jeová nia liafuan, no halo ida-neʼe ‘kuandu imi tuur iha uma no kuandu laʼo iha dalan no kuandu atu toba no kuandu hadeer’. (Deut 6:6, 7) Ricardo no Eva, neʼebé iha oan-mane naʼin-tolu, hatete: “Nuʼudar família ami sempre koʼalia kona-ba serbí Maromak ba tempu tomak iha dalan oioin.” Rezultadu mak saida? Sira dehan: “Ida-neʼe book ami-nia oan sira atu tama Eskola Serbisu Teokrátiku maski sira sei tinan kiʼik, tuirmai sira sai haklaken-naʼin, no ikusmai, sira rasik foti desizaun atu hetan batizmu. Depois, sira serbí Maromak tempu tomak.”

Klaru, ezemplu diʼak husi inan-aman importante tebes. Ricardo dehan: “Ami hakaʼas an atu hatudu hahalok diʼak, laʼós iha kongregasaun deʼit maibé mós iha uma no iha buat hotu.” Entaun, inan-aman bele husu sira-nia an: ‘Haʼu-nia oan haree haʼu-nia hahalok oinsá? Sira haree katak haʼu hadomi Maromak Jeová ho laran ka lae? Sira haree ida-neʼe husi haʼu-nia orasaun no haʼu-nia toman atu estuda Bíblia ka lae? Husi buat hotu neʼebé haʼu halo, porezemplu, serbisu haklaken, halimar, haʼu-nia hanoin kona-ba buat materiál, no dalan neʼebé haʼu koʼalia kona-ba ema seluk iha kongregasaun, sira haree haʼu-nia domin ba Maromak ka lae?’ (Lc 6:40) La haluha katak oan sira haree oinsá ita halaʼo ita-nia moris loroloron nian no hatene se ita-nia liafuan la hanesan ho ita-nia hahalok.

Inan-aman mós presiza fó dixiplina ba oan sira. Maibé Maromak nia Liafuan hatete: “Hanorin labarik tuir dalan neʼebé diʼak ba nia.” (Prov 22:6) Eva no Ricardo dehan: “Ami fó tempu atu estuda Bíblia ho oan ida-idak.” Klaru katak inan-aman mak sei deside se oan ida-idak presiza estuda ketaketak ka lae. Buat neʼebé importante mak inan-aman tenke haree oan ida-idak nia presiza neʼebé la hanesan. Atu halo ida-neʼe presiza tetu didiʼak no uza matenek. Porezemplu, duké hatete deʼit ba oan katak múzika ruma mak aat, diʼak liu hanorin sira oinsá atu foti desizaun ho matenek, no oinsá atu halo tuir Bíblia nia matadalan.

Karik Ita-nia oan hatene saida mak Ita hakarak sira atu halo no karik Ita haree sira halo tuir. Maibé importante atu book sira-nia laran. Bíblia hatete: “Planu iha ema nia laran hanesan bee neʼebé kleʼan, maibé ema neʼebé matenek mak ida neʼebé sei kuru nia.” (Prov 20:5) Tan neʼe, uza matenek hodi buka-hatene se Ita-nia oan iha problema ka lae, se iha, ajuda Ita-nia oan lalais. Hatudu katak Ita hanoin sira, husu pergunta iha dalan neʼebé la hamoe ka hatún sira, no kuidadu atu la husu pergunta barak liu. Hodi hatudu domin Ita sei book oan sira-nia laran no ajuda sira.

Kongregasaun nia knaar

Ita nuʼudar Maromak nia atan bele ajuda joven sira atu hafolin lia-loos neʼebé sira simu  nuʼudar prezente espesiál ka lae? Maski inan-aman nia responsabilidade atu fó treinu ba sira-nia oan, maibé ema seluk iha kongregasaun mós bele ajuda, liuliu katuas sira. Joven sira neʼebé aman ka inan la tama lia-loos presiza duni ajuda husi kongregasaun.

Oinsá mak sira neʼebé serbí nuʼudar katuas iha kongregasaun bele ajuda joven sira atu hadomi Aman Jeová no sente katak sira iha folin iha Maromak nia oin? Katuas ida iha rai-Polónia naran Marius hatete: “Katuas sira iha kongregasaun tenke koʼalia beibeik ho joven sira. Koʼalia ho sira laʼós kuandu sira iha problema deʼit, maibé mós iha tempu naran deʼit. Porezemplu, iha serbisu haklaken, kuandu reuniaun hotu, no iha tempu halimar.” Karik bele husu joven sira-nia hanoin no oinsá sira sente kona-ba kongregasaun? Pergunta hanesan neʼe bele book joven sira atu hakbesik liu ba kongregasaun no sei ajuda sira atu sente katak sira mós parte husi kongregasaun.

Se Ita mak katuas, Ita buka atu koñese joven sira iha Ita-nia kongregasaun ka lae? Alberto, neʼebé temi uluk, agora serbí ona nuʼudar katuas ida iha kongregasaun. Maibé kuandu nia sei joven nia hasoru susar oioin. Nia hatete: “Iha tempu neʼebá, haʼu presiza duni katuas sira atu fó laran-manas mai haʼu.” Katuas sira mós bele hatudu interese ba joven sira hodi halo orasaun atu joven sira bele hametin sira-nia relasaun ho Maromak.—2 Tim 1:3.

Atu joven sira la buka buat iha mundu nian, sira presiza hola parte iha atividade kongregasaun nian. Oinsá Ita bele ajuda sira? Ita ema neʼebé idade boot ona, bele haklaken hamutuk, no uza tempu atu halimar ho sira ka lae? Ida-neʼe halo sira sente katak Ita hakarak sai sira-nia kolega. Jola neʼebé temi uluk, hatete: “Maski uluk haʼu bá haklaken, maibé tanba irmán pioneiru ida hatudu interese ba haʼu mak haʼu foin sente katak haʼu hakarak bá haklaken.”

Ita rasik mak tenke hili

Joven sira husu imi-nia an: ‘Saida mak haʼu-nia planu sira? Porezemplu, haʼu neʼebé seidauk batizmu, haʼu planu ona atu hetan batizmu ka lae?’ Desizaun atu hetan batizmu tenkesér mai husi Ita-nia domin ba Maromak Jeová, laʼós tanba tuir família nia toman deʼit.

Sin, ita hotu hakarak Aman Jeová sai ita-nia belun neʼebé loos, no ita hakarak lia-loos sai nuʼudar ita-nia rikusoin. Maromak Jeová hatete liuhusi profeta Isaías: ‘Labele hateke bá-mai, tanba haʼu mak imi-nia Maromak.’ Aman Jeová sei hamutuk ho ita se ita hakarak sai nia belun ba nafatin. Maromak sei fó forsa mai ita no sei ‘kaer metin ita ho nia liman loos justisa nian’.—Isa 41:10.

[Nota–rodapé]

 [Dezeñu iha pájina 4]

Buka-hatene saida mak iha Ita-nia oan nia laran

[Dezeñu iha pájina 6]

Desizaun atu hetan batizmu tenkesér mai husi Ita-nia domin ba Maromak Jeová