“Imi haʼu-nia belun sira”
“Imi haʼu-nia belun sira”
“Imi haʼu-nia belun sira wainhira imi halo tuir buat neʼebé haʼu haruka ba imi.”—JOAO 15:14.
1, 2. (a) Oinsá mak Jesus nia belun sira-nia situasaun moris nian la hanesan? (b) Tanbasá mak importante tebes atu ita sai Jesus nia belun?
EMA sira neʼebé tuur hamutuk ho Jesus iha fatin ida iha andár leten atu selebra Páskua, mai husi situasaun moris neʼebé la hanesan. Maun-alin naʼin-rua, Pedro no André, uluk halo serbisu nuʼudar peskadór. Mateus uluk serbisu nuʼudar kobradór impostu, neʼe mak serbisu ida neʼebé ema judeu hakribi. Balu seluk, hanesan Tiago no João, karik hatene Jesus husi kiʼik kedas. Sira seluk tan, hanesan Natanael, karik foin hatene Jesus ba tinan balu deʼit. (Joao 1:43-50) Maibé, sira hotu neʼebé hamutuk ho Jesus iha kalan Páskua neʼe iha Jeruzalein, fiar katak Jesus mak Mesias neʼebé promete nanis ona, Maromak moris nia Oan. (Joao 6:68, 69) Sira sente Jesus nia domin kuandu sira rona nia hatete ba sira: “Haʼu bolu imi belun, tan haʼu fó-hatene ona ba imi lia hotu neʼebé haʼu rona husi Aman.”—Joao 15:15.
2 Liafuan sira-neʼe, neʼebé Jesus hatoʼo ba nia apóstolu sira iha tempu neʼebá mós aplika ba ema kristaun kose-mina sira ohin loron, no ikusmai aplika ba sira-nia maluk “bibi seluk”. (Joao 10:16) Maski ita mai husi situasaun moris neʼebé la hanesan, maibé ita iha oportunidade espesiál atu sai Jesus nia belun. Halo belun ho nia mak importante tebes tanba ida-neʼe halo ita mós sai belun ho Maromak Jeová. Tuir loloos, se ita la hakbesik uluk ba Kristu, ita la bele hakbesik ba Maromak Jeová. (Lee Joao 14:6, 21.) Entaun, saida mak ita tenke halo atu sai Jesus nia belun no atu nafatin sai ninia belun? Antes ita koʼalia kona-ba informasaun importante neʼe, mai ita haree Jesus rasik nia ezemplu kona-ba sai belun diʼak no haree mós saida mak ita bele aprende husi buat neʼebé ninia dixípulu halo tanba nia habelun ho sira.
Jesus nia ezemplu kona-ba sai belun diʼak
3. Ema koñese Jesus nuʼudar ema oinsá?
3 Liurai Salomão, neʼebé matenek, hakerek: “Ema riku iha belun barak.” (Prov 14:20) Liafuan sira-neʼe hatudu buat neʼebé ema sala-naʼin dala ruma halo, neʼe mak habelun ho ema hodi bele hetan buat ruma duké fó buat ruma. Jesus la hatudu hahalok hanesan neʼe. Nia la haree ba ema nia riku ka pozisaun. Loos katak Jesus iha domin ba naʼi-ulun ida neʼebé riku no konvida nia atu sai nia dixípulu. Maibé, Jesus hatete ba ema neʼe atu faʼan nia sasán no fó ba ema kiak. (Mc 10:17-22; Lc 18:18, 23) Ema koñese Jesus laʼós nuʼudar ema neʼebé habelun ho ema riku ka ema neʼebé iha pozisaun aas, maibé ema koñese nia nuʼudar ema neʼebé habelun ho ema kiak no ho sira neʼebé ema odi.—Mt 11:19.
4. Oinsá mak ita hatene katak Jesus nia belun sira halo sala?
4 Klaru katak Jesus nia belun sira halo sala. Pedro dala ruma la haree situasaun tuir Maromak nia haree. (Mt 16:21-23) Tiago no João hatudu katak sira hakarak atu buka buat diʼak ba sira-nia an hodi husu Jesus atu fó ba sira pozisaun diʼak iha Maromak nia Reinu. Sira-nia hahalok neʼe halo apóstolu sira seluk sai hirus, no sira hotu haksesuk malu beibeik kona-ba sé mak boot liu. Maski nuneʼe, Jesus ho pasiénsia hanorin sira atu hadiʼa sira-nia hanoin neʼebé sala no nia la sai hirus ho sira.—Mt 20:20-28.
5, 6. (a) Tanbasá mak Jesus habelun nafatin ninia apóstolu sira? (b) Tanbasá mak Jesus lakohi atu habelun tan ho Judas?
5 Jesus habelun ho ema sira-neʼe laʼós katak nia simu sira-nia hahalok aat ka matan delek ba sira-nia sala. Maibé, nia haree ba buat diʼak iha sira-nia laran no sira-nia hahalok diʼak. Porezemplu, kuandu Jesus atu hasoru situasaun neʼebé susar tebes, Pedro, Tiago no João toba dukur deʼit duké apoia nia. Jesus sente triste kona-ba ida-neʼe. Maski nuneʼe, nia haree katak sira iha hakarak neʼebé diʼak, hodi dehan: “Espíritu hakarak, maibé isin kbiit-laek.”—Mt 26:41.
6 Maibé ho Judas Iscariotes, Jesus lakohi atu habelun tan ho nia. Maski Judas hatudu katak nia habelun hela ho Jesus, maibé Jesus hatene katak nia finje deʼit. Tanba Judas habelun ona ho mundu, nia husik nia laran sai aat, no nia halo nia an sai Maromak nia inimigu. (Tgo 4:4) Tan neʼe, depois Jesus haruka Judas sai tiha husi sira-nia leet, mak nia foin fó sai ba ninia apóstolu naʼin-11 katak sira mak ninia belun neʼebé loos.—Joao 13:21-35.
7, 8. Oinsá mak Jesus hatudu nia domin ba nia belun sira?
7 Jesus la hanoin nafatin ba nia belun sira-nia hahalok neʼebé ladún diʼak, no nia mós halo buat neʼebé diʼak ba sira. Porezemplu, nia halo orasaun ba nia Aman atu proteje sira durante tempu susar. (Lee Joao 17:11.) Jesus hatudu katak nia hatene buat neʼebé sira bele no la bele halo. (Mc 6:30-32) Nia lakohi deʼit atu fó-hatene buat neʼebé nia hanoin, maibé nia mós hakarak rona no komprende buat neʼebé sira hanoin no sente.—Mt 16:13-16; 17:24-26.
8 Jesus moris no mate ba nia belun sira. Sin, nia hatene katak nia tenke saran nia moris hodi bele kumpre ninia Aman nia justisa. (Mt 26:27, 28; Ebr 9:22, 28) Maibé, Jesus mós fó nia moris atu hatudu nia domin ba ema. Jesus hatete: “Ema ida la bele hadomi liu fali ema neʼebé saran nia moris tan nia belun sira.”—Joao 15:13.
Saida mak dixípulu sira halo tanba Jesus habelun ho sira?
9, 10. Saida mak ema halo tanba Jesus hatudu laran-luak?
9 Jesus hatudu laran-luak hodi fó nia tempu, domin, no fó buat seluk neʼebé nia iha. Tanba neʼe, ema gosta atu hakbesik ba nia no kontente atu hatudu laran-luak fali ba nia. (Lc 8:1-3) Husi Jesus nia esperiénsia rasik, nia bele dehan: “Fó bá, no imi sei simu; ema sei tau ba imi-nia liman buat diʼak barak, hanehan tun, doko tan toʼo naresin. Basá imi sura oinsá ba ema, nuneʼe mós ema sei sura ba imi.”—Lc 6:38.
10 Ema balu hakarak sai kolega ho Jesus tanba deʼit sira hakarak atu hetan buat ruma husi nia. Belun falsu sira-neʼe husik Jesus kuandu sira la komprende buat ruma neʼebé nia hatete. Duké tau fiar ba Jesus, sira hanoin sala kona-ba nia no fila kotuk ba nia. Maibé, apóstolu sira la hanesan neʼe, sira laran-metin nafatin. Nuʼudar Kristu nia belun, sira hetan susar oioin, maibé sira hakaʼas an atu halo buat neʼebé sira bele atu apoia nia iha tempu neʼebé diʼak no iha tempu neʼebé susar. (Lee Joao 6:26, 56, 60, 66-68.) Iha kalan ikus iha Jesus nia moris iha rai, nia hatudu katak nia hafolin sira nuʼudar belun, hodi hatete: “Imi laran-metin ona ba haʼu iha haʼu-nia susar oioin.”—Lc 22:28.
11, 12. Saida mak Jesus fó sai fali ba ninia dixípulu sira? Saida mak sira halo?
11 Lakleur depois Jesus gaba nia dixípulu sira tanba sira laran-metin, sira hotu husik hela nia. Ba tempu uitoan, sira husik taʼuk ba ema sai boot liu fali sira-nia domin ba Kristu. Dala ida tan, Jesus fó perdua ba sira. Depois nia mate no moris hiʼas, nia mosu fali ba sira hodi fó sai fali katak nia nafatin sira-nia belun. No mós, nia fó fiar ba sira atu halo serbisu importante ida, neʼe mak halo ema husi “nasaun hotu-hotu” sai dixípulu no atu fó sasin kona-ba nia “toʼo rai nia rohan”. (Mt 28:19; Apos 1:8) Saida mak dixípulu sira halo?
12 Ho laran tomak, dixípulu sira hakaʼas an atu halo buat hotu neʼebé sira bele halo atu habelar mensajen Reinu nian. Ho ajuda husi Maromak nia espíritu santu, sira lalais deʼit halo nakonu Jeruzalein ho sira-nia hanorin. (Apos 5:27-29) Maski ema ameasa atu oho sira, maibé sira la para atu halo tuir Jesus nia mandamentu atu halo dixípulu. Maizumenus tinan 30 liu tiha neʼe, apóstolu Paulo hakerek katak lia-foun diʼak haklaken ona ba kriasaun hotu “iha lalehan okos”. (Kol 1:23) Klaru, dixípulu sira-neʼe hatudu duni katak sira hafolin sira-nia relasaun ho Jesus nuʼudar belun!
13. Oinsá mak Jesus nia dixípulu sira halo tuir ninia hanorin iha sira-nia moris tomak?
13 Sira neʼebé sai Jesus nia belun mós halo tuir Jesus nia hanorin iha sira-nia moris tomak. Ba sira barak, sira tenke troka sira-nia hahalok. Antes sai ema kristaun, sira balu halo hahalok hanesan, halo sala-foʼer, halo sala-foʼer mane ho mane ka feto ho feto, hemu lanu, ka naʼok. (1 Kor 6:9-11) Ema balu seluk tenke troka sira-nia hanoin neʼebé sala kona-ba ema husi rasa seluk. (Apos 10:25-28) Maibé, sira nafatin halo tuir Jesus. Sira husik tiha hahalok tuan nian no tau fali ema foun. (Ef 4:20-24) Sira hatene no halo tuir “Kristu nia hanoin”.—1 Kor 2:16.
Habelun ho Kristu ohin loron
14. Jesus promete katak antes “mundu neʼe atu hotu” nia sei halo saida?
14 Ema kristaun balu iha tempu uluk haree Jesus kuandu nia sei moris hela ka haree nia depois nia moris hiʼas, maibé ita lae. Entaun, oinsá mak ita bele sai Kristu nia belun? Dalan ida mak hodi halo tuir matadalan hotu neʼebé nia fó liuhusi grupu atan laran-metin no matenek, katak Jesus nia alin kose-mina sira neʼebé sei moris hela iha rai. Jesus promete katak antes “mundu neʼe atu hotu”, nia sei hili atan neʼe atu tau matan ba “nia rikusoin tomak”. (Mt 24:3, 45-47) Ohin loron, ema barak neʼebé buka atu sai belun ho Kristu laʼós ema husi grupu atan neʼe. Oinsá mak simu matadalan husi grupu atan laran-metin hatudu katak ita hafolin ita-nia relasaun ho Kristu nuʼudar belun?
15. Saida mak hatudu katak ema ida mak hanesan bibi-malae ka bibi-timor?
15 Lee Mateus 25:31-40. Jesus bolu sira neʼebé sai grupu atan laran-metin nuʼudar ninia alin sira. Iha Jesus nia ai-knanoik kona-ba haketak bibi-malae husi bibi-timor, nia hatudu ho klaru katak nia haree buat neʼebé ita halo ba ninia alin sira hanesan halo ba nia. Tuir loloos, Jesus dehan katak buat neʼebé sei hatudu katak ema ida hanesan bibi-malae ka bibi-timor mak buat neʼebé ema neʼe halo ba ninia “alin kiʼik sira-neʼe ida”. Nuneʼe, dalan neʼebé importante liu ba ema neʼebé iha esperansa atu moris iha rai atu sai belun ho Kristu mak hodi apoia grupu atan laran-metin neʼe.
16, 17. Oinsá mak ita hatudu katak ita hakarak habelun ho Kristu nia alin sira?
16 Se Ita iha esperansa atu moris iha rai neʼebé Maromak nia Reinu mak ukun, oinsá mak Ita hatudu katak Ita habelun ho Kristu nia alin sira? Mai ita haree dalan tolu. Dalan primeiru mak hodi hola parte iha serbisu haklaken ho laran tomak. Kristu haruka ninia alin sira atu haklaken lia-foun diʼak iha mundu tomak. (Mt 24:14) Maibé, Kristu nia alin sira neʼebé ohin loron sei hela iha rai la bele halaʼo responsabilidade neʼe se la hetan apoiu husi sira-nia maluk bibi seluk. Tuir loloos, kuandu ema husi grupu bibi seluk hola parte iha serbisu haklaken, sira ajuda Kristu nia alin sira atu halaʼo serbisu neʼebé importante neʼe. Kristu no grupu atan laran-metin no matenek hafolin tebetebes apoiu husi sira-nia maluk bibi seluk neʼebé hatudu katak sira mak belun neʼebé loos.
17 Dalan segundu ba grupu bibi seluk atu ajuda Kristu nia alin sira mak fó osan atu apoia serbisu haklaken. Jesus hatete ba ninia dixípulu sira atu halo belun ho nia no Maromak Jeová hodi uza osan. (Lc 16:9) Neʼe laʼós katak ita bele sosa sira atu sai ita-nia belun. Maibé, hodi uza sasán neʼebé ita iha atu apoia serbisu haklaken iha mundu tomak, ita hatudu ita-nia domin no katak ita hakarak habelun sira, laʼós deʼit ho liafuan, maibé “ho hahalok no lia-loos”. (1 Joao 3:16-18) Ita fó apoiu ida-neʼe kuandu ita bá haklaken, kuandu ita fó osan atu harii no tau matan ba ita-nia reuniaun-fatin, no kuandu ita fó osan ba serbisu haklaken iha mundu tomak. Maski buat neʼebé ita fó uitoan ka barak, Maromak Jeová no Jesus hafolin buat neʼebé ita fó ho laran-haksolok.—2 Kor 9:7.
18. Tanbasá mak ita tenke halo tuir matadalan neʼebé katuas sira fó, neʼebé mai husi Bíblia?
18 Dalan terseiru atu ita hatudu katak ita Kristu nia belun mak hodi halo tuir buat neʼebé katuas sira iha kongregasaun hatete ba ita atu halo. Irmaun sira-neʼe hetan knaar nuʼudar katuas tanba Kristu hili sira liuhusi espíritu santu. (Ef 5:23) Apóstolu Paulo hatete: “Rona imi-nia naʼi-ulun sira no halo tuir buat neʼebé sira dehan ba imi.” (Ebr 13:17) Maibé, dala ruma ita sente katak susar atu halo tuir matadalan neʼebé katuas sira fó neʼebé mai husi Bíblia. Karik ita hatene kona-ba sira-nia fraku, no ida-neʼe karik halo ita hanoin sala kona-ba sira-nia konsellu. Maibé, Kristu nuʼudar Ulun ba kongregasaun, hakarak uza sira maski sira sala-naʼin. Nuneʼe, dalan neʼebé ita simu ka la simu sira-nia pozisaun nuʼudar katuas bele kona ita-nia relasaun ho Kristu nuʼudar belun. Kuandu ita la haree deʼit ba katuas sira-nia sala, maibé ho laran-kontente halo tuir buat neʼebé sira hatete, ita hatudu ita-nia domin ba Kristu.
Bele hetan belun loos iha neʼebé?
19, 20. Saida mak ita bele hetan iha kongregasaun laran? Saida mak ita sei haree iha lisaun tuirmai?
19 Jesus kontinua tau matan ba ita laʼós deʼit liuhusi bibi atan sira neʼebé tau matan ita ho domin, maibé nia mós halo ida-neʼe liuhusi ema iha kongregasaun laran neʼebé hanesan inan, maun-alin ka biin-alin. (Lee Marcos 10:29, 30.) Kuandu Ita foin halibur hamutuk ho Maromak Jeová nia organizasaun, oinsá mak Ita-nia família sente? Karik, sira apoia Ita-nia hakaʼas-an atu hakbesik ba Maromak no Kristu. Maibé, Jesus fó avizu katak dala ruma “ema nia parente sira rasik sai ninia funu-balun”. (Mt 10:36) Ita kontente tebes atu hatene katak iha kongregasaun laran ita bele hetan ema neʼebé sei sai ita-nia belun neʼebé besik liu duké ita-nia maun-alin rasik!—Prov 18:24.
20 Kumprimentus neʼebé Paulo hatoʼo iha parte ikus iha nia karta ba ema kristaun iha Roma, hatudu katak nia habelun ho ema barak. (Rom 16:8-16) Apóstolu João ramata nia karta terseiru ho liafuan: “Kumprimenta belun sira ida-ida.” (3 Joao 15) Ida-neʼe hatudu katak nia mós habelun ho ema barak. Oinsá mak ita bele halo tuir Jesus no ninia dixípulu sira-nia ezemplu kona-ba habelun ho ita-nia irmaun no irmán sira no nafatin sai sira-nia belun? Iha lisaun tuirmai ita sei haree resposta ba pergunta neʼe.
Oinsá Ita hatán?
• Jesus hatudu ezemplu saida kona-ba sai belun diʼak?
• Saida mak apóstolu halo tanba Jesus habelun ho sira?
• Oinsá mak ita hatudu katak ita Kristu nia belun?
[Pergunta estudu nian]
[Dezeñu iha pájina 14]
Jesus hakarak hatene buat neʼebé nia belun sira hanoin no sente
[Dezeñu iha pájina 16]
Oinsá mak ita hatudu katak ita hakarak sai Kristu nia belun?