Ita “halo ita-nia abut naruk” hodi bele hamriik metin ka lae?

ITA haree tiha ona saida mak akontese kuandu anin boot doko ai-hun neʼebé boot? Maski anin doko makaʼas ai-hun neʼe, maibé nia hamriik metin nafatin. Tanbasá? Tanba ai-hun neʼe nia abut naruk no metin iha rai-okos. Ita mós bele sai hanesan ai-hun neʼe. Kuandu ita hasoru susar boot ruma iha ita-nia moris, ita mós bele tahan nafatin bainhira ita “halo ita-nia abut naruk” no metin iha ita-nia “hun”. (Ef 3:14-17) Maibé, saida mak “hun” neʼe?

Maromak nia Liafuan hatete katak “Kristu Jesus mak [kongregasaun] nia fatuk-inan”, katak hun. (Ef 2:20; 1 Kor 3:11) Ita nuʼudar ema kristaun presiza “hakaʼas an atu moris iha nia”, no “halo [ita-nia] abut naruk iha nia, harii [ita-nia] moris iha nia, no sai makaʼas liután iha [ita-nia] fiar”. Se ita halo ida-neʼe, ita bele tahan hasoru buat hotu neʼebé koko ita-nia fiar, ida-neʼe inklui mós ema neʼebé koko atu “lohi [ita] ho liafuan neʼebé mai husi matenek ema nian” maski sira “hatene koʼalia ho lia-midar”.—Kol 2:4-8.

“Hatene luan no naruk, aas no kleʼan”

Maibé, oinsá mak ita bele halo ita-nia “abut [sai] naruk” no “sai makaʼas liután iha [ita-nia] fiar”? Dalan importante ida atu halo ita-nia abut naruk no metin mak hodi estuda Bíblia ho badinas. Maromak Jeová hakarak ita atu “hetan kbiit hamutuk ho santu sira hotu atu hatene luan no naruk, aas no kleʼan” kona-ba lia-loos. (Ef 3:18) Tan neʼe, ema kristaun ida labele sente katak toʼo ona atu hatene ka komprende deʼit doutrina simples husi Maromak nia Liafuan. (Ebr 5:12; 6:1) Duké halo ida-neʼe, ita ida-idak presiza hakaʼas an atu halo kleʼan liután ita-nia matenek kona-ba lia-loos husi Bíblia.—Prov 2:1-5.

Ida-neʼe laʼós katak hatene deʼit buat barak mak bele halo ita-nia “abut [sai] naruk” hodi bele metin iha lia-loos. Satanás mós hatene kona-ba Bíblia. Maibé, ita mós presiza buat seluk tan, neʼe mak “hatene . . . Kristu nia domin, neʼebé aas liu matenek hotu”. (Ef 3:19) Maski nuneʼe, kuandu domin ba Maromak Jeová no domin ba lia-loos mak book ita atu estuda, ita sei halo kleʼan liu ita-nia koñesimentu, no ida-neʼe sei halo ita-nia fiar sai metin liután.—Kol 2:2.

 Koko Ita-nia matenek

Tansá Ita la koko agora atu haree se Ita komprende ka lae, lia-loos balu husi Bíblia neʼebé importante tebes? Halo ida-neʼe sei fó laran-manas ba Ita atu hakaʼas an liután atu estuda Bíblia. Porezemplu, lee toʼok versíkulu balu husi apóstolu Paulo nia karta ba ema kristaun iha Éfezu. (Haree kaixa  “Ba ema kristaun iha Éfezu”.) Depois lee hotu tiha, husu ba Ita-nia an: “Haʼu komprende liafuan sira neʼebé hakerek ho letra metan liu iha kaixa neʼe ka lae?” Mai ita haree liafuan ida-idak katak sá.

Maromak fihir ona “molok atu hakiak mundu”

Paulo hakerek ba nia maluk fiar-naʼin: “[Maromak] fihir ona ita horiuluk kedas atu moris nuʼudar nia oan hakiak hodi Kristu.” Liafuan sira-neʼe hatudu katak Maromak Jeová deside atu hili ema balu husi rai atu sai ninia oan hakiak, atu sai parte husi ninia família iha lalehan. Maromak nia oan hakiak sira-neʼe sei ukun nuʼudar liurai no amlulik hamutuk ho Kristu. (Rom 8:19-23; Apok 5:9, 10) Kuandu Satanás hasaʼe lia kona-ba Maromak Jeová nia direitu atu ukun, Satanás hakarak hatudu katak Maromak nia kriatura, katak ema, la laʼo diʼak. Tan neʼe, loos ba Maromak Jeová atu hili ema husi rai atu hola parte atu halakon buat aat hotu husi rai, no inklui mós halakon Diabu Satanás! Maibé, ida-neʼe laʼós katak Maromak Jeová hili nanis sé mak nia sei hakiak nuʼudar ninia oan. Maromak deside katak sei iha grupu ida husi ema neʼebé sei ukun hamutuk ho Kristu iha lalehan.—Apok 14:3, 4.

Kuandu Paulo hakerek ba nia maluk kristaun sira, nia hatete katak Maromak hili sira nuʼudar grupu ida “molok atu hakiak  mundu”. Saida mak “mundu” neʼe? Paulo la koʼalia kona-ba tempu neʼebé Maromak seidauk kria rai ka ema, tanba ida-neʼe kontra Maromak nia justisa. Oinsá mak Maromak tesi lia ba Adão ho Eva tanba sira-nia hahalok se nia deside tiha ona katak sira sei halo sala antes nia kria sira? Se nuneʼe, bainhira mak Maromak deside atu hadiʼa situasaun neʼebé mosu tanba Adão no Eva hamutuk ho Satanás kontra hasoru Maromak nia ukun? Tuir loloos, Maromak Jeová deside atu halo ida-neʼe depois Adão ho Eva kontra nia. Iha tempu neʼebá seidauk iha “mundu” ka ema sala-naʼin neʼebé bele hetan salvasaun.

Tanba Maromak nia “rikusoi grasa nian”

Iha kapítulu primeiru husi livru Efeso, tanbasá mak Paulo temi liafuan “rikusoi grasa nian”? Ida-neʼe hatudu katak tuir loloos Maromak Jeová la presiza atu salva ema, maibé nia deside atu halo ida-neʼe tanba nia “grasa” ka laran-diʼak.

Loloos, la iha ema ida neʼebé merese atu hetan salvasaun. Maibé, tanba Maromak Jeová hadomi tebes ema hotu, nia halo arranju espesiál atu salva ita. Kuandu ita hanoin kona-ba ita-nia situasaun nuʼudar ema sala-naʼin, ita foin komprende katak ita hetan salvasaun neʼe tanba deʼit Maromak nia grasa ka laran-diʼak neʼebé ita la merese.

Mistériu kona-ba Maromak nia hakarak

Maromak la fó sai kedas oinsá nia sei hadiʼa buat aat neʼebé Satanás halo. Tan neʼe mak ida-neʼe sai hanesan “mistériu” ida. (Ef 3:4, 5) Maibé, kuandu kongregasaun kristaun harii tiha ona, Maromak Jeová fó sai kona-ba oinsá mak nia sei halo ninia hakarak uluk nian sai loos ba ema hotu no ba rai. Paulo esplika katak “wainhira tempu toʼo ona”, Maromak halo arranju atu neineik-neineik halo nia kriatura hotu sai nuʼudar ida deʼit.

Hakat primeiru atu halo ida-neʼe komesa iha Pentekostes 33 kuandu Maromak Jeová komesa atu halibur ema sira neʼebé sei ukun hamutuk ho Kristu iha lalehan. (Apos 1:13-15; 2:1-4) Hakat segundu mak atu halibur ema sira neʼebé sei moris iha rai paraízu iha Kristu nia ukun nia okos. (Apok 7:14-17; 21:1-5) Iha Efeso 1:9, 10 koʼalia kona-ba Maromak nia arranju atu “halo tuir loloos” ninia hakarak, maibé ida-neʼe laʼós kona-ba Reinu neʼebé Kristu mak ukun, tanba Reinu neʼe harii iha tinan 1914. Arranju ida-neʼe mak kona-ba dalan neʼebé Maromak organiza buat hotu atu halo tuir ninia hakarak hodi bele halo ninia kriasaun sai fali ida deʼit.

“Sai ema boot bá iha imi-nia hanoin”

Ita hatene katak iha toman diʼak atu estuda Bíblia sei ajuda ita atu “hatene luan no naruk, aas no kleʼan” kona-ba lia-loos. Maski nuneʼe, ita mós hatene katak kuandu ita okupadu demais ho buat barak iha ita-nia moris, ida-neʼe bele loke dalan ba Satanás atu halo fraku ka halakon ita-nia toman atu estuda. Labele husik nia halo ida-neʼe. Importante atu ita uza “matenek” neʼebé Maromak fó ona mai ita atu sai “ema boot iha [ita-nia] hanoin”. (1 Joao 5:20; 1 Kor 14:20) Ita presiza komprende tanbasá mak ita fiar buat neʼebé ita fiar, no ita mós presiza hatene oinsá mak ita bele “hatán ba ema neʼebé husu kona-ba [ita-nia] esperansa”.—1 Ped 3:15.

Hanoin toʼok katak ita mós iha Éfezu iha tempu neʼebé ema foin lee Paulo nia karta. Se karik ita rona ninia liafuan iha tempu neʼebá, ida-neʼe sei book ita atu hakarak sai boot “iha matenek kona-ba Maromak nia Oan-Mane”, loos ka lae? (Ef 4:13, 14) Loos duni! Tan neʼe, mai ita husik Paulo nia liafuan book ita ohin loron. Hodi halo kleʼan liután ita-nia domin ba Maromak Jeová no hodi aumenta ita-nia koñesimentu loos kona-ba ninia Liafuan, ida-neʼe sei ajuda ita atu “halo ita-nia abut naruk” no atu metin iha Kristu nuʼudar ita-nia “hun”. Hanesan neʼe, ita sei metin nafatin atubele tahan susar naran deʼit neʼebé Satanás hamosu kontra ita antes mundu aat neʼe ramata.—Sal 1:1-3; Jer 17:7, 8.

[Kaixa/Dezeñu iha pájina 7]

 Ba ema kristaun iha Éfezu

“Rahun-diʼak ba Maromak, Naʼi Jesus Kristu nia Aman. Husi lalehan tutun, hodi Kristu, Maromak haraik bensa oioin mai ita. Molok atu hakiak mundu, Maromak fihir kedas ita atu moris nuʼudar ema santu, nuʼudar ema sala-laek no moris iha domin iha Nia futar oin. Tuir nia laran-luak, Nia fihir ona ita horiuluk kedas atu moris nuʼudar nia oan hakiak hodi Kristu; ba glória nia grasa nian, neʼebé Nia fakar mai ita iha nia Oan doben. Iha Kristu, ho nia raan, ita hetan maksoin no perdua ba ita-nia sala. Neʼe mak rikusoi grasa nian neʼebé Nia haraik mai ita iha nia matenek no laran hatene. Nia fó-hatene mai ita Nia hakarak nia mistériu, neʼebé subar hela, neʼebé Nia halo iha Kristu horiuluk kedas, atu Nia sei halo tuir loloos wainhira tempu toʼo ona nia rohan, katak, atu halibur no tau iha Kristu nia liman atu ukun buat hotu iha lalehan no iha rai, ho Kristu nuʼudar sira hotu nia ulun.”—Ef 1:3-10.