“Laran-manas nafatin iha espíritu”
“Laran-manas nafatin iha espíritu”
“Keta baruk atu fó tulun, maibé laran-manas nafatin iha espíritu, serbí Naʼi bá.”—ROM 12:11.
1. Tanbasá mak ema Izraél hasaʼe sakrifísiu animál nian no buat-karan seluk?
MAROMAK JEOVÁ hafolin sakrifísiu neʼebé nia atan sira halo ho laran atu hatudu sira-nia domin ba nia no atu hatudu katak sira halo tuir nia hakarak. Iha tempu uluk, nia simu sakrifísiu animál nian no buat-karan seluk. Ema Izraél hasaʼe sakrifísiu sira-neʼe tuir Moisés nia Ukun-Fuan hodi bele hetan perdua ba sira-nia sala no atu hatudu agradese. Iha kongregasaun kristaun, Maromak Jeová la husu ita atu hasaʼe sakrifísiu animál ka buat seluk tan. Maibé, iha apóstolu Paulo nia karta ba ema kristaun iha Roma, iha kapítulu 12, nia hatudu katak Maromak hakarak nafatin atu ita halo sakrifísiu ruma. Mai ita haree oinsá.
Sakrifísiu moris nian
2. Nuʼudar ema kristaun, oinsá mak ita uza ita-nia moris? Halo ida-neʼe inklui saida?
2 Lee Roma 12:1, 2. Iha parte primeiru iha Paulo nia karta, nia hatudu ho klaru katak ema kristaun kose-mina hotu, ema judeu ka jentiu, bele sai ema loos iha Maromak nia oin hodi fiar, laʼós deʼit hodi hahalok. (Rom 1:16; 3:20-24) Iha kapítulu 12, Paulo esplika katak ita tenke hatudu agradese ba Maromak hodi uza ita-nia moris nuʼudar sakrifísiu. Atu halo nuneʼe, ita presiza hafoun ita-nia hanoin. Tanba ita hotu ema sala-naʼin, ita iha “ukun-fuan sala no mate nian” nia okos. (Rom 8:2) Entaun, ita presiza “hafoun [ita-nia] laran” hodi troka ita-nia hakarak neʼebé la loos. (Ef 4:23) Ita bele halo ida-neʼe ho Maromak nia ajuda no ninia espíritu. Ita mós presiza hakaʼas an hodi uza ita-nia kbiit atu hanoin. Neʼe katak ita hakaʼas an atu “keta halo tuir mundu ohin neʼe nian”, neʼebé iha morál neʼebé aat, iha atividade halimar nian neʼebé foʼer, no iha hanoin neʼebé la moos.—Ef 2:1-3.
3. Tanbasá mak ita serbí Maromak Jeová?
3 Paulo mós fó konsellu ba ema kristaun, hodi dehan: “Hafoun imi-nia hanoin, atu imi bele hatene loloos buat neʼebé Maromak hakarak, buat neʼebé diʼak, bele simu no loos.” Tanbasá mak ita presiza lee Bíblia loron-loron, hanoin kleʼan kona-ba buat neʼebé ita lee, halo orasaun, tuir reuniaun sira, no haklaken lia-foun diʼak kona-ba Maromak nia Reinu? Ita halo buat sira-neʼe tanba katuas sira mak haruka? Ita agradese duni tanba katuas sira fó-hanoin mai ita. Maibé, ita serbí Maromak Jeová tanba nia espíritu book ita atu hatudu domin ba nia. Liután neʼe, ita rasik fiar katak halo buat sira-neʼe mak Maromak nia hakarak ba ita. (Zac 4:6; Ef 5:10) Ita sente kontente atu hatene katak hodi halaʼo moris nuʼudar ema kristaun neʼebé loos, Maromak bele simu ita.
Kmanek oioin
4, 5. Oinsá mak katuas kristaun sira uza kmanek neʼebé sira iha?
4 Lee Roma 12:6-8, 11. Paulo esplika katak “ita iha kmanek oioin, ida-ida tuir buat neʼebé grasa fó mai ita”. Paulo temi kmanek balu neʼebé katuas kristaun sira iha, neʼe mak kmanek atu tau matan ba ema seluk no fó konsellu. Sira presiza halo ida-neʼe “ho badinas”.
5 Paulo hatete katak katuas sira hatudu sira-nia badinas kuandu sira “serbí ema seluk”, no kuandu hanorin Maromak nia Liafuan. Paulo nia liafuan kona-ba “serbí ema seluk” hatudu kona-ba serbí iha kongregasaun laran, neʼebé hanesan “isin-lolon ida”. (Rom 12:4, 5) Knaar atu serbí neʼe hanesan ho ida neʼebé hakerek iha Apostolu 6:4, neʼebé hatete: “Ami sei harohan no haklaken Maromak futar-lia.” Oinsá mak katuas sira serbí ema seluk? Katuas uza sira-nia kmanek atu hametin sira neʼebé iha kongregasaun laran. Sira hatudu katak sira “serbí duni” bainhira sira ho badinas fó matadalan neʼebé mai husi Maromak nia Liafuan. Sira bele halo ida-neʼe bainhira sira estuda didiʼak no buka informasaun liután, hanorin no fó laran-manas ba ema iha kongregasaun. Tan neʼe, katuas sira tenke uza didiʼak sira-nia kmanek no tau matan ba bibi sira “ho laran-ksolok”.—Rom 12:7, 8; 1 Ped 5:1-3.
6. Oinsá mak ita bele halo tuir konsellu neʼebé hakerek iha Roma 12:11?
6 Iha Roma 12:11, Paulo hatete liután: “Keta baruk atu fó tulun, maibé laran-manas nafatin iha espíritu, serbí Naʼi bá.” Se ita sente katak ita ladún laran-manas ona iha ita-nia serbisu haklaken, karik ita presiza hadiʼa ita-nia toman atu estuda no atu halo orasaun beibeik atu husu Maromak Jeová nia espíritu santu, tanba halo ida-neʼe bele ajuda ita atu hafoun ita-nia laran-manas. (Lc 11:9, 13; Apok 2:4; 3:14, 15, 19) Espíritu santu fó forsa ba ema kristaun iha tempu uluk atu bele koʼalia kona-ba “Maromak nia hahalok waʼin”. (Apos 2:4, 11) Nuneʼe mós espíritu santu bele book ita atu sai “laran-manas nafatin iha espíritu” hodi halaʼo serbisu haklaken.
Hatudu haraik-an
7. Tanbasá mak ita tenke serbí Maromak ho haraik-an?
7 Lee Roma 12:3, 16. Kmanek sira neʼebé ita iha mak tanba Maromak Jeová nia laran-diʼak. Iha eskritura seluk Paulo mós hatete: “Loloos buat neʼebé halo ami soʼi mai husi Maromak.” (2 Kor 3:5) Tan neʼe, ita labele foti-an kona-ba ita-nia knaar sira. Ho haraik-an ita presiza rekoñese katak rezultadu diʼak neʼebé ita hetan husi serbisu haklaken, laʼós tanba ita-nia matenek rasik, maibé bensaun husi Maromak. (1 Kor 3:6, 7) Kona-ba ida-neʼe, Paulo hatete: “Haʼu dehan ba imi hotu keta hanoin katak imi an diʼak liu fali buat neʼebé loos.” Maski diʼak duni atu hafolin ita-nia an no sente kontente ho ita-nia serbisu ba Maromak Jeová, maibé ita presiza hatudu haraik-an, ka hatene kona-ba buat neʼebé ita bele ka la bele halo, tanba ida-neʼe sei ajuda ita atu la foti-an. No ida-neʼe mós sei ajuda ita atu haburas “hanoin [neʼebé] loloos”.
8. Saida mak bele ajuda ita atu la “hanoin katak [ita] matenek liu fali ema seluk”?
8 Tuir loloos, buat diʼak hotu neʼebé mosu, neʼe tanba “Maromak deʼit mak halo moris”. (1 Kor 3:7) Tan neʼe, la diʼak duni atu gaba an kona-ba buat ruma neʼebé ita halo ho didiʼak. Paulo hatete katak Maromak haraik ba ema ida-idak iha kongregasaun laran “tuir sasukat fiar nian”. Duké hanoin katak ita mak diʼak liu ema seluk, ita tenke rekoñese katak buat neʼebé ema seluk halo mak tuir sira-nia fiar. Paulo mós fó konsellu ba ema kristaun sira atu “respeita malu”, no atu “keta loko an”. Iha ninia karta seluk, Paulo hatete: “Keta halo buat ida hodi hanoin deʼit imi an nia diʼak, eh hodi hakarak hetan naran boot, maibé haraik an ba malu, hodi hanoin katak ema seluk sira diʼak liu fali imi.” (Flp 2:3) Ita presiza iha haraik-an neʼebé loos no hakaʼas an atu rekoñese katak ita-nia irmaun-irmán ida-idak mak diʼak liu fali ita iha buat ruma. Haraik-an sei ajuda ita atu la “hanoin katak [ita] matenek liu fali ema seluk”. Maski hetan knaar espesiál iha Maromak nia serbisu halo ema seluk haree ita, maibé ita mós bele haksolok kuandu ita halo knaar simples neʼebé dala barak ema la haree.—1 Ped 5:5.
Unidade iha kongregasaun laran
9. Tanbasá mak Paulo kompara ema kristaun kose-mina sira ho isin-lolon?
9 Lee Roma 12:4, 5, 9, 10. Apóstolu Paulo kompara ema kristaun kose-mina sira ho isin-lolon neʼebé serbisu hamutuk nuʼudar ida deʼit iha Kristu nia okos nuʼudar sira-nia Ulun. (Kol 1:18) Nia fó-hanoin sira katak isin-lolon iha parte oioin no iha knaar neʼebé la hanesan, no mós katak “maski [sira] barak, [sira] isin-lolon ida deʼit iha Kristu”. Paulo mós fó konsellu ba ema kristaun kose-mina neʼebé hela iha Éfezu: “Ita moris karik tan lia-loos no domin, ita sei sai boot iha buat hotu iha Kristu, neʼebé Ulun. Nia mak halo isin-lolon tomak sai boot ba daudaun toʼo nia hetan nia ilas loloos iha domin; ba nia mak liman ain ida-ida serbisu hodi hametin an hamutuk.”—Ef 4:15, 16.
10. “Bibi seluk” tenke hakruʼuk an ba sé deʼit?
10 Maski “bibi seluk” laʼós parte husi Kristu nia isin-lolon, sira mós bele aprende buat barak husi Paulo nia ilustrasaun. (Joao 10:16) Paulo hatete katak Maromak Jeová “tau buat hotu-hotu iha [Kristu] nia ain okos, hodi halo nia sai Kreda nia ulun nuʼudar buat hotu-hotu nia ulun”. (Ef 1:22) Ohin loron, bibi seluk mak parte husi “buat hotu-hotu” neʼebé Maromak Jeová tau iha ninia Oan nia ukun nia okos. Sira mós parte husi “rikusoin” neʼebé Kristu fó ba atan “laran-metin no matenek” atu tau matan. (Mt 24:45-47) Nuneʼe, sira neʼebé iha esperansa atu moris iha rai tenke rekoñese Kristu nuʼudar sira-nia Ulun no hakruʼuk an ba atan laran-metin no matenek no ba ninia Grupu Administradór, no mós hakruʼuk an ba irmaun katuas sira iha kongregasaun. (Ebr 13:7, 17) Hodi halo buat sira-neʼe, sei haburas unidade iha kongregasaun laran.
11. Atu iha unidade, saida mak importante? Paulo fó konsellu saida kona-ba neʼe?
11 Ita bele haburas unidade neʼe kuandu iha domin, tanba domin mak “kesi metin sira seluk atu sai buat furak ida deʼit”. (Kol 3:14) Iha Roma kapítulu 12, Paulo hatudu katak ida-neʼe importante hodi dehan katak ita tenke hatudu “domin [neʼebé] la bele bosok” no katak ita tenke “hadomi malu ho domin loos”. Ida-neʼe bele ajuda ita atu hatudu respeitu ba malu. Paulo hatete: “Buka atu sai uluk atu hamtaʼuk maluk sira.” Sin, domin neʼebé loos kleʼan liu duké hatudu sentimentu deʼit. Tan neʼe, ita tenke halo buat neʼebé ita bele atu halo kongregasaun moos nafatin. Kuandu Paulo fó konsellu kona-ba domin, nia hatutan tan: “Hadook buat aat husi imi-nia laran; kaer metin buat neʼebé diʼak.”
Hatudu laran-luak
12. Saida mak ita bele aprende husi ema kristaun iha Masedónia?
12 Lee Roma 12:13. Domin ba ita-nia maluk sei book ita atu fó ajuda tuir ita-nia forsa “wainhira santu sira kuran buat ruma”. Maski ita ladún iha sasán barak, ita bele fahe buat neʼebé ita iha. Kuandu Paulo hakerek kona-ba ema kristaun iha Masedónia neʼebé hetan terus, nia hatete: “Sira-nia ksolok naresin no sira hatudu katak maski sira kiak, sira-nia laran-luak tebetebes. Tuir sira-nia kbiit, haʼu bele fó sasin, no liu fali sira-nia kbiit, ho laran, sira husu ami makaʼas atu sira bele halo parte iha serbisu ba santu sira [iha Judeia].” (2 Kor 8:2-4) Maski ema kristaun iha Masedónia kiak, maibé sira hatudu laran-luak tebes. Sira haree oportunidade neʼe nuʼudar knaar espesiál atu ajuda sira-nia maluk neʼebé hela iha Judeia.
13. Liafuan “simu bá ema be laʼo-rai” katak sá?
13 Liafuan “simu bá ema be laʼo-rai” kuandu tradús husi lia-gregu katak buka atu hatudu laran-luak ba ema seluk. The New Jerusalem Bible tradús ida-neʼe nuʼudar “buka oportunidade atu hatudu laran-luak”. Ita bele hatudu laran-luak hodi konvida ema atu han hamutuk, no diʼak tebes kuandu ita halo ida-neʼe tanba domin. Maibé, se ita hakarak duni atu hatudu laran-luak, ita sei buka dalan oioin atu halo nuneʼe. Porezemplu, se ita ladún iha forsa ka sasán atu konvida ema seluk atu han hamutuk, ita bele hatudu nafatin laran-luak hodi konvida sira atu hemu kafé, xá, ka buat ruma seluk hamutuk.
14. (a) Iha lia-gregu, liafuan “simu bá ema be laʼo-rai” mós katak sá? (b) Oinsá mak ita hatudu laran-luak ba ema husi raiseluk kuandu haklaken?
14 Hatudu laran-luak depende oinsá ita hanoin kona-ba ema seluk. Liafuan “simu bá ema be laʼo-rai” kuandu tradús husi lia-gregu mós katak hatudu “domin ba ema laʼo-rai”. Oinsá mak ita sente kona-ba ema laʼo-rai ka ema neʼebé mai husi raiseluk? Dalan ida atu ita hatudu laran-luak mak hodi hakaʼas an atu aprende língua seluk atubele haklaken lia-foun diʼak ba ema husi raiseluk neʼebé hela iha ita-nia haklaken-fatin. Maski ita barak nia situasaun la fó ita oportunidade atu aprende língua seluk, maibé ita hotu bele ajuda ema husi raiseluk hodi uza didiʼak livru kiʼik Kabar Baik Bagi Segala Bangsa, neʼebé iha mensajen husi Bíblia iha língua oioin. Ita hetan ona rezultadu diʼak kuandu uza livru neʼe iha serbisu haklaken ka lae?
Sente buat neʼebé ema sente
15. Oinsá mak Jesus nia ezemplu hanesan ho konsellu iha Roma 12:15?
15 Lee Roma 12:15. Paulo nia konsellu iha versíkulu neʼe hatudu katak importante atu ita sente buat neʼebé ema seluk sente. Ita presiza aprende atu komprende no atu sente buat neʼebé ema sente, se nia kontente ka triste. Se ita laran-manas iha espíritu, ita sei hatudu katak ita sente haksolok neʼebé ema seluk sente ka sente hanoin ba ema nia terus. Kuandu Kristu nia dixípulu naʼin-70 fila fali ho laran-haksolok husi serbisu haklaken no konta kona-ba rezultadu diʼak neʼebé sira hetan, Jesus mós “haksolok tebetebes ho espíritu santu”. (Lc 10:17-21) Nia sente sira-nia haksolok. Iha situasaun seluk, Jesus “tanis ho sira neʼebé tanis” kuandu ninia belun Lázaro mate.—Joao 11:32-35.
16. Oinsá mak ita bele hatudu katak ita sente buat neʼebé ema seluk sente? Liuliu sé mak tenke halo ida-neʼe?
16 Ita hakarak atu halo tuir Jesus nia ezemplu kona-ba sente buat neʼebé ema seluk sente. Kuandu ita-nia maluk ida kontente, ita mós hakarak hatudu katak ita sente hanesan nia. Nuneʼe mós, bainhira ita-nia maluk ida laran-tun tanba hasoru susar ka terus ruma, ita mós presiza hatudu katak ita sente buat neʼebé nia sente. Dala barak, ita bele fó kmaan ba ita-nia maluk sira neʼebé iha susar laran hodi fó tempu atu rona didiʼak ba sira. No dala ruma mós, buat neʼebé sira sente bele book ita-nia laran atu hatudu domin ho matabeen. (1 Ped 1:22) Liuliu katuas kristaun sira tenke halo tuir Paulo nia konsellu kona-ba sente buat neʼebé ema seluk sente.
17. Saida mak ita aprende tiha ona husi Roma kapítulu 12? Saida mak ita sei estuda iha lisaun tuirmai?
17 Versíkulu sira neʼebé ita foin estuda iha Roma kapítulu 12 fó mai ita konsellu neʼebé diʼak atu halo tuir iha ita-nia moris nuʼudar ema kristaun no ba ita-nia relasaun ho ita-nia maluk. Iha lisaun tuirmai, ita sei estuda versíkulu sira seluk iha kapítulu neʼe, neʼebé sei koʼalia kona-ba oinsá ita tenke hanoin no hahalok saida mak ita tenke hatudu ba ema neʼebé laʼós iha kongregasaun laran, inklui ema sira neʼebé kontra ka haterus ita.
Hodi hanoin-hetan fali
• Oinsá mak ita hatudu katak ita “laran-manas iha espíritu”?
• Tanbasá mak ita tenke serbí Maromak ho haraik-an?
• Iha dalan saida deʼit mak ita bele hatudu katak ita sente buat neʼebé ema seluk sente?
[Pergunta estudu nian]
[Dezeñu iha pájina 4]
Tanbasá mak ita halo atividade kristaun sira-neʼe?
[Dezeñu iha pájina 6]
Oinsá mak ita ida-idak bele ajuda ema husi raiseluk atu hatene kona-ba Maromak nia Reinu?