“Moris iha dame laran ho ema hotu-hotu”
“Moris iha dame laran ho ema hotu-hotu”
“Bele karik, husi imi-nia sorin, buka atu moris iha dame laran ho ema hotu-hotu.”—ROM 12:18.
1, 2. (a) Jesus fó avizu saida ba ninia dixípulu sira? (b) Iha neʼebé mak ita bele hetan konsellu neʼebé matenek kona-ba hasoru susar neʼe?
JESUS fó avizu ba ninia dixípulu sira katak sira sei hetan terus husi mundu neʼe, no iha kalan ikus antes nia mate, nia esplika tanbasá. Nia hatete ba nia apóstolu sira: “Imi mundu neʼe nian karik, mundu sei hadomi imi nuʼudar ninia an rasik; maibé, tan imi laʼós mundu neʼe nian, basá haʼu fihir ona imi husi mundu, tan neʼe mak mundu odi imi.”—Joao 15:19.
2 Buat neʼebé apóstolu Paulo hasoru iha ninia moris hatudu katak Jesus nia liafuan sira-neʼe mak loos duni. Iha Paulo nia karta segundu ba ninia maluk Timóteo, nia hatete: “Ó hatene ona buat neʼebé haʼu hanorin, haʼu moris, buat neʼebé haʼu hakaʼas an atu manán iha moris; haʼu-nia fiar, haʼu-nia pasiénsia, haʼu-nia domin; haʼu-nia laran-metin, no susar no terus neʼebé haʼu hetan.” Paulo hatutan tan hodi dehan: “Neʼe duni, ema neʼebé buka atu moris santu iha Kristu Jesus sei hetan susar.” (2 Tim 3:10-12) Iha kapítulu 12 husi Paulo nia karta ba ema kristaun iha Roma, nia fó konsellu neʼebé matenek kona-ba saida mak ita sei halo kuandu ema fó-terus ba ita. Ninia liafuan bele sai matadalan mai ita iha loron ikus sira-neʼe.
Halo “buat neʼebé loos”
3, 4. Oinsá mak ema kristaun bele halo tuir konsellu iha Roma 12:17 (a) iha família neʼebé iha fiar la hanesan? (b) iha sira-nia relasaun ho viziñu sira?
3 Lee Roma 12:17. Paulo esplika katak kuandu ema fó-terus mai ita, ita labele selu fali ho buat neʼebé aat. Halo tuir Paulo nia konsellu neʼe mak importante tebes, liuliu ba família sira neʼebé iha fiar neʼebé la hanesan. Laʼen ka feen kristaun tenke hakaʼas an atu la selu fali liafuan ka hahalok neʼebé la diʼak ba sira-nia kaben. Hodi “selu aat ho aat” sei la hadiʼa situasaun, maibé sei halo situasaun sai aat liután.
4 Paulo fó-hatene dalan neʼebé diʼak liu: “Buka buat neʼebé loos iha ema hotu-hotu nia oin.” Kuandu feen hatudu laran-diʼak ba nia laʼen maski nia laʼen koʼalia aat kona-ba nia fiar, sei hamenus diskute malu iha família laran. (Prov 31:12) Carlos, neʼebé agora serbí iha Betel, konta kona-ba saida mak nia inan halo kuandu nia aman fó-terus. Nia inan nafatin hatudu laran-diʼak no tau matan didiʼak ba família. “Haʼu-nia inan sempre fó-hanoin mai ami oan sira atu hatudu respeitu ba ami-nia aman. Nia husu haʼu beibeik atu halimar boules (jogu ida husi rai-Fransa) ho haʼu-nia aman maski haʼu ladún gosta. Maibé halo ida-neʼe halo nia kontente.” Neineik-neineik nia aman komesa estuda Bíblia no ikusmai hetan batizmu. Testemuña ba Jeová mós halo “buat neʼebé loos iha ema hotu-hotu nia oin”, hodi ajuda viziñu sira bainhira hetan dezastre, no ida-neʼe halo ema la hanoin aat tan kona-ba sira.
Oinsá atu hasoru terus
5, 6. (a) Tau “ahi-klaak lakan” iha ita-nia inimigu nia ulun katak sá? (b) Konta toʼok esperiénsia husi Ita-nia rai kona-ba rezultadu diʼak neʼebé mosu tanba Ita halo tuir konsellu iha Roma 12:20.
5 Lee Roma 12:20. Kuandu Paulo hakerek liafuan iha eskritura neʼe, nia karik hanoin-hetan liafuan iha Provérbios 25:21, 22, neʼebé hatete: “Se ema neʼebé odi ó hamlaha, fó ba nia paun atu han; no se nia hamrook, fó ba nia bee atu hemu. Tanba ahi-klaak mak buat neʼebé ó tau hamutuk iha nia ulun leten, no Maromak Jeová rasik sei selu ó.” Tan neʼe, Paulo nia konsellu iha Roma kapítulu 12 kona-ba “tau ahi-klaak”, neʼe la dehan katak ita uza ahi-klaak atu kastigu ka hamoe ema neʼebé fó-terus mai ita. Maibé, liafuan iha Provérbios no mós Paulo nia liafuan iha nia karta hatudu katak dalan ida neʼebé ema iha tempu antigu uza atu halo nabeen fatuk neʼebé iha besi mak hodi uza ahi-klaak. Besik tinan atus rua liubá, ema matenek ida husi rai-Inglaterra naran Charles Bridges, hatete: “Ema tau besi neʼebé toos laʼós iha ahi leten deʼit maibé sira tau ahi-klaak barak iha ninia leten no mós haleʼu besi toos ho ahi-klaak. Maski ema iha laran neʼebé toos tebes, maibé kuandu ita hatudu pasiénsia, fó ajuda ho laran no hatudu domin neʼebé loos, hahalok sira-neʼe iha forsa makaʼas atubele halo nabeen ka troka sira barak nia laran.”
6 Hahalok diʼak neʼebé hanesan “ahi-klaak lakan”, bele halo ema nia laran sai nabeen maski uluk sira kontra beibeik ita. Hatudu laran-diʼak bele halo ema hanoin diʼak kona-ba Maromak Jeová nia povu no mensajen husi Bíblia neʼebé sira haklaken. Apóstolu Pedro hakerek: “Hatudu hahalok diʼak deʼit iha jentiu sira leet, atu wainhira sira koʼalia kona-ba imi nuʼudar ema aat, sira sei haree imi-nia hahalok diʼak hodi fó glória ba Maromak iha loron nia mosu mai.”—1 Ped 2:12.
“Moris iha dame laran ho ema hotu-hotu”
7. Saida mak dame neʼebé Kristu husik hela ba ninia dixípulu sira? No dame neʼe tenke book ita atu halo saida?
7 Lee Roma 12:18. Iha kalan ikus Jesus hamutuk ho ninia apóstolu sira, nia hatete ba sira: “Dame haʼu husik ba imi, haʼu-nia dame haʼu fó ba imi.” (Joao 14:27) Jesus husik dame ba nia dixípulu sira, neʼe katak sira sente dame iha laran tanba hatene katak Maromak Jeová no ninia Oan simu no hadomi sira. Dame iha ita-nia laran sei book ita atu buka dame ho ema seluk. Ema kristaun neʼebé loos gosta dame no hakaʼas an atu moris iha dame laran ho ema hotu.—Mt 5:9.
8. Oinsá mak ita bele buka dame iha família no iha kongregasaun laran?
8 Dalan ida atu buka dame iha família laran mak hakaʼas an atu rezolve lalais problema hotu, duké husik situasaun sai aat liután. (Prov 15:18; Ef 4:26) Ita tenke halo ida-neʼe mós iha kongregasaun laran. Apóstolu Pedro hatudu katak atu buka dame ita presiza kontrola ita-nia nanál. (1 Ped 3:10, 11) Tiago mós fó konsellu kona-ba uza didiʼak ita-nia nanál no hasees an husi laran-moras no haksesuk malu. Tuirmai nia hatete: “Matenek husi lalehan, uluknanain, mak moos, hadame malu, laran-kmaus, hanoin tuir buat neʼebé loos, laran-luak no fó fuan diʼak barak, koʼalia loloos no la halo ema bilán. Sira neʼebé buka dame kari ai-hun neʼebé sei fó fuan justisa nian.”—Tgo 3:17, 18.
9. Bainhira ita buka dame ho “ema hotu-hotu”, saida mak ita presiza hanoin nafatin?
9 Iha Paulo nia liafuan iha Roma 12:18, nia la koʼalia kona-ba buka deʼit dame iha família no kongregasaun laran, maibé atu ita buka dame ho “ema hotu-hotu”. Ida-neʼe inklui viziñu sira, maluk iha serbisu-fatin, maluk iha eskola, no ema neʼebé ita hasoru kuandu haklaken. Apóstolu Paulo halo klaru liután ninia konsellu hodi dehan: “Bele karik, husi imi-nia sorin, buka atu moris iha dame laran.” Neʼe katak ita halo buat neʼebé ita bele halo atu “moris iha dame laran ho ema hotu”, bainhira halo ida-neʼe la kontra Maromak nia matadalan.
Maromak Jeová mak sei selu aat ho aat
10, 11. “Saran buat hotu ba Maromak nia hirus” katak sá? Tanbasá mak ida-neʼe loos?
10 Lee Roma 12:19. Maski ita hasoru “ema neʼebé la fiar” ba mensajen neʼebé ita hatoʼo, inklui sira neʼebé kontra ita, ita tenke nafatin hatudu “pasiénsia barak” no hatudu “laran-kmaus”. (2 Tim 2:23-25) Paulo fó konsellu ba ema kristaun atu la selu fali aat ho aat, maibé “saran buat hotu ba Maromak nia hirus”. Nuʼudar ema kristaun ita hatene katak ita la iha direitu atu selu aat ho aat. Iha livru Salmos hatete: “Hadook an husi laran-hirus no husik tiha laran-nakali, keta sai laran-nakali hodi halo buat neʼebé aat.” (Sal 37:8) No Salomão mós fó konsellu ida-neʼe: “Keta hatete: ‘Haʼu sei selu aat ho aat!’ Sadere ba Maromak Jeová, no nia sei salva ó.”—Prov 20:22.
11 Se ema neʼebé kontra ita halo aat mai ita, dalan neʼebé diʼak liu mak husik ba Maromak Jeová atu fó kastigu ba sira kuandu Nia haree katak presiza halo nuneʼe. Paulo hatudu katak nia hatene kona-ba Maromak Jeová nia laran-hirus, hodi hatutan tan dehan: “Basá hakerek tiha: ‘Haʼu mak selu aat ba aat, Haʼu sei selu fali. Naʼi dehan nuneʼe.’” (Kompara ho Deuteronômio 32:35.) Se ita halo aat ba ema neʼebé halo aat ba ita, ita hatudu hahalok foti-an, tanba neʼe hanesan ita hadau Maromak Jeová nia direitu atu halo ida-neʼe. Liután neʼe, ita la hatudu fiar ba buat neʼebé Maromak Jeová promete: “Haʼu sei selu fali.”
12. Bainhira mak Maromak sei hatudu nia laran-nakali? No oinsá?
12 Iha Paulo nia karta ba ema kristaun iha Roma, nia hatete: “Husi lalehan Maromak hatudu nia laran-nakali hasoru ema fiar-laek no laran-aat neʼebé, tan sira-nia laran-aat, halakon lia-loos.” (Rom 1:18) Husi lalehan Maromak Jeová sei hatudu nia laran-nakali liuhusi nia Oan iha tempu “terus makaʼas” nian. (Apok 7:14) Neʼe sei “hatudu katak Maromak tesi lia loloos”, hanesan Paulo esplika iha ninia karta seluk, nia mós hatete: “Maromak sei selu ho susar sira hotu neʼebé ohin halo imi hetan susar, no sei fó kolen ba imi neʼebé ohin terus ho dame neʼebé Nia sei haraik mai ami wainhira husi lalehan Naʼi Jesus mosu mai ho kbiit waʼin hamutuk ho nia anju sira. Nia sei mosu ho ahi neʼebé lakan makaʼas atu fó kastigu ba sira hotu neʼebé la simu Maromak no lakohi simu ita Naʼi Jesus Kristu nia evanjellu.”—2 Tes 1:5-8.
Manán buat aat ho buat neʼebé diʼak
13, 14. (a) Tanbasá mak ita la hakfodak kuandu ema fó-terus mai ita? (b) Oinsá mak ita fó rahun-diʼak ba ema neʼebé fó-terus ita?
13 Lee Roma 12:14, 21. Kuandu ita fiar duni katak Maromak Jeová sei halaʼo ninia hakarak, ita sei hakaʼas an atu halo serbisu neʼebé nia fó mai ita, neʼe mak haklaken “iha mundu tomak” kona-ba “lia-foun reinu nian”. (Mt 24:14) Ita hatene katak serbisu haklaken sei halo ita-nia inimigu sira hirus ho ita, tanba Jesus fó avizu: “Povu hotu sei odi imi tan haʼu-nia naran.” (Mt 24:9) Tan neʼe, ita la hakfodak ka laran-tun kuandu ema fó-terus mai ita. Apóstolu Pedro hatete: “Doben sira, keta hakfodak kona-ba terus boot neʼebé mai hasoru imi atu koko imi, hanesan buat ruma neʼebé oin-seluk liu mosu ba imi. Maibé, haksolok bá, basá imi halo parte iha Kristu nia terus.”—1 Ped 4:12, 13.
14 Duké sai hirus ba ema neʼebé fó-terus mai ita, buka atu halo sira komprende ita-nia fiar, tanba sira balu karik halo ida-neʼe tanba la hatene. (2 Kor 4:4) Tan neʼe, ita hakaʼas an atu halo tuir Paulo nia konsellu: “Dehan liafuan diʼak ba sira neʼebé halo aat imi; fó rahun-diʼak no keta fó-malisan ba sira.” (Rom 12:14) Dalan ida atu fó rahun-diʼak ba ema neʼebé fó-terus ita mak hodi halo orasaun kona-ba sira. Jesus hatete iha ninia diskursu iha foho: “Hadomi imi-nia funu-balun sira, halo diʼak ba sira neʼebé hirus imi; fó-bensa ba sira neʼebé fó-malisan ba imi, harohan ba sira neʼebé koʼalia aat imi.” (Lc 6:27, 28) Husi apóstolu Paulo nia esperiénsia rasik, nia hatene katak ema neʼebé haterus ita bele sai fali Kristu nia dixípulu neʼebé laran-metin no bele sai Maromak Jeová nia atan neʼebé laran-manas. (Gal 1:13-16, 23) Iha Paulo nia karta seluk, nia hatete: “Wainhira ema hasara ami, ami hateten diʼak ba sira; wainhira ema fó-terus, ami tahan deʼit; wainhira ema konta ami-nia vida, ami hatán ho laran-kmaus.”—1 Kor 4:12, 13.
15. Oinsá mak ita bele manán buat neʼebé aat ho buat neʼebé diʼak?
15 Nuneʼe, ema kristaun loos halo tuir konsellu husi versíkulu ikus husi Roma kapítulu 12: “Keta husik buat aat manán imi, maibé imi manán buat aat ho buat neʼebé diʼak.” Buat aat hotu nia hun mak mai husi Diabu Satanás. (Joao 8:44; 1 Joao 5:19) Iha apóstolu João nia vizaun, Jesus fó sai katak ninia alin kose-mina sira “manán [Satanás] hodi Bibi-Oan nia raan no ho sira-nia liafuan sasin nian”. (Apok 12:11) Ida-neʼe hatudu katak dalan diʼak liu hotu atu manán Satanás no buat aat iha mundu neʼe, neʼebé nia ukun, mak hodi halo buat neʼebé diʼak liuhusi haklaken lia-foun diʼak kona-ba Maromak nia Reinu.
Haksolok iha esperansa
16, 17. Saida mak Roma kapítulu 12 hanorin ita kona-ba (a) oinsá mak ita tenke uza ita-nia moris? (b) oinsá mak ita-nia hahalok iha kongregasaun laran? (c) oinsá mak ita-nia hahalok ba ema neʼebé kontra ita-nia fiar?
16 Hodi estuda kapítulu 12 husi Paulo nia karta ba ema kristaun iha Roma, ita aprende buat barak. Ita aprende katak nuʼudar atan neʼebé dedika an ona ba Maromak Jeová, ita tenke prontu atu halo sakrifísiu. Maromak nia espíritu book ita atu halo sakrifísiu ho laran tanba ita-nia kbiit atu hanoin halo ita fiar katak ida-neʼe mak Maromak nia hakarak. Ita laran-manas nafatin iha espíritu no uza ita-nia kmanek oioin ho badinas. Ita serbí Maromak ho haraik-an hodi halo buat hotu neʼebé ita bele hodi hametin unidade iha kongregasaun laran. Ita hatudu laran-luak no hatudu katak ita sente buat neʼebé ema seluk sente.
17 Roma kapítulu 12 mós fó konsellu barak kona-ba saida mak ita bele halo kuandu ema haterus ita. Ita labele selu aat ho aat. Ita tenke manán ida-neʼe hodi hatudu laran-diʼak. Ita presiza hakaʼas an atu moris iha dame laran ho ema hotu, bainhira halo ida-neʼe la kontra Bíblia nia matadalan. Ita halo ida-neʼe iha família laran, kongregasaun laran, ho viziñu, iha serbisu-fatin, iha eskola, no kuandu ita haklaken. Maski ema haterus ita, ita halo buat hotu neʼebé ita bele hodi manán buat aat ho buat diʼak, hodi hanoin katak Maromak Jeová mak iha direitu atu selu fali.
18. Roma 12:12 fó konsellu tolu saida tan?
18 Lee Roma 12:12. Liután konsellu diʼak sira-neʼe, Paulo fó konsellu tolu tan atu ita bele halo tuir. Se Maromak la ajuda ita karik, susar ba ita atu halo tuir buat hotu neʼe. Tan neʼe, apóstolu Paulo fó konsellu atu ita “la kole atu harohan”. Halo ida-neʼe sei ajuda ita atu halo tuir ninia konsellu seluk kona-ba “tahan iha terus laran”. Ikusliu, ita presiza hanoin nafatin kona-ba futuru neʼebé Maromak Jeová promete atu fó mai ita no atu “haksolok iha esperansa” atu moris ba nafatin, iha lalehan ka iha rai.
Hodi hanoin-hetan fali
• Ita tenke halo saida kuandu ema fó-terus ita?
• Iha dalan saida deʼit mak ita bele hakaʼas an atu buka dame?
• Tanbasá mak ita labele selu aat ho aat?
[Pergunta estudu nian]
[Dezeñu iha pájina 8]
Ajuda viziñu sira ho buat ruma bele halo sira la hanoin aat tan kona-ba ita
[Dezeñu iha pájina 9]
Ita hakaʼas an atu buka dame iha kongregasaun laran ka lae?