Nafatin iha relasaun neʼebé diʼak nuʼudar belun
Nafatin iha relasaun neʼebé diʼak nuʼudar belun
“Haʼu haruka imi: hadomi malu.”—JOAO 15:17.
1. Tanbasá mak ema kristaun iha tempu uluk presiza nafatin besik ba malu nuʼudar belun?
IHA Jesus nia kalan ikus iha rai, nia fó laran-manas ba ninia dixípulu sira atu nafatin besik ba malu nuʼudar belun. Antes neʼe, Jesus mós hatete katak domin neʼebé sira hatudu ba malu sei sai nuʼudar sinál katak sira mak ninia dixípulu neʼebé loos. (Joao 13:35) Apóstolu sira presiza nafatin besik ba malu nuʼudar belun atu sira bele tahan susar sira neʼebé sei mosu no atubele kumpre serbisu neʼebé Jesus sei fó ba sira. Loloos, iha tempu neʼebá ema hatene katak ema kristaun laran-metin ba Maromak no ba sira-nia maluk.
2. (a) Saida mak ita hakarak duni atu halo? Tanbasá? (b) Ita sei koʼalia kona-ba pergunta saida deʼit?
2 Ohin loron, ita haksolok tebes atu sai parte iha organizasaun neʼebé ninia ema sira halo tuir ezemplu husi ema kristaun iha tempu uluk! Ita hakarak duni halo tuir Jesus nia mandamentu atu hatudu domin neʼebé loos ba malu. Maibé, iha loron ikus sira-neʼe ema barak la hatudu laran-metin no la hatudu domin ba malu. (2 Tim 3:1-3) Sira buka atu sai belun tanba hakarak deʼit atu hetan buat ruma. Atu ita hatudu nafatin katak ita ema kristaun loos, ita labele halo tuir hahalok sira-neʼe. Nuneʼe, mai ita koʼalia kona-ba pergunta sira tuirmai neʼe: Saida mak hun atu iha relasaun neʼebé diʼak nuʼudar belun? Oinsá mak bele hetan belun neʼebé diʼak? Bainhira mak tenke hakotu relasaun nuʼudar belun? No oinsá mak bele nafatin iha relasaun neʼebé diʼak nuʼudar belun?
Saida mak hun ba relasaun neʼebé diʼak nuʼudar belun?
3, 4. Saida mak hun atu ita iha relasaun neʼebé diʼak nuʼudar belun? Tanbasá?
3 Domin ba Maromak Jeová mak hun neʼebé importante liu atu ita iha relasaun neʼebé diʼak nuʼudar belun. Liurai Salomão hakerek: “Se ema ida bele manán hasoru ida deʼit, naʼin-rua hamutuk bele hamriik hasoru nia. No tali tolu neʼebé bobar hamutuk la bele kotu lalais.” (Ecle 4:12) Kuandu ita envolve Maromak Jeová iha ita-nia relasaun ho ema seluk nuʼudar belun, relasaun neʼe sei sai hanesan tali tolu neʼebé bobar hamutuk, no bele tahan ba tempu kleur.
4 Maski ema neʼebé la hadomi Maromak Jeová bele haburas relasaun nuʼudar belun ho ema seluk, maibé kuandu ema sai belun tanba sira hadomi Maromak, sira-nia relasaun neʼe sei sai metin liu. Se problema mosu, belun neʼebé loos sei rezolve problema neʼe iha dalan neʼebé halo kontente Maromak Jeová. Kuandu Maromak nia inimigu sira koko atu haketak nia povu, inimigu sira-neʼe haree katak ema kristaun loos iha relasaun neʼebé metin nuʼudar belun ho sira-nia maluk. Husi tempu uluk toʼo agora, Maromak Jeová nia atan sira hatudu ona katak sira prontu atu mate duké saran sira-nia maluk ba inimigu sira.—Lee 1 Joao 3:16.
5. Tanbasá mak Rute no Noemi nia relasaun nuʼudar belun tahan ba tempu kleur?
5 Klaru katak relasaun nuʼudar belun neʼebé bele lori haksolok liu ba ita mak kuandu ita habelun ho sira neʼebé hadomi Maromak Jeová. Haree ezemplu husi Rute no Noemi. Feto sira-neʼe nia relasaun nuʼudar belun mak istória neʼebé furak tebes, neʼebé hakerek iha Bíblia laran. Tanbasá mak sira-nia relasaun tahan ba tempu kleur? Rute hatudu ida-neʼe husi liafuan neʼebé nia koʼalia ba Noemi: “Ita-nia povu sei sai haʼu-nia povu, no Ita-nia Maromak, haʼu-nia Maromak. . . . Kala Maromak Jeová halo ba haʼu no liután ida-neʼe, se karik laʼós mate mak haketak haʼu husi Ita.” (Rute 1:16, 17) Ita bele haree katak Rute no Noemi iha domin neʼebé kleʼan ba Maromak, no sira husik domin neʼe atu book sira atu hatudu domin no hatudu laran-diʼak ba malu. Rezultadu mak feto naʼin-rua neʼe hetan Aman Jeová nia bensaun.
Oinsá atu hetan belun neʼebé diʼak
6-8. (a) Saida mak ajuda ita atu iha relasaun neʼebé metin nuʼudar belun? (b) Oinsá mak ita bele buka uluk atu sai belun?
6 Rute no Noemi nia ezemplu hatudu katak atu hetan belun diʼak laʼós buat neʼebé mosu derrepente deʼit. Hun mak domin ba Maromak Jeová. Maibé atu iha relasaun neʼebé metin nuʼudar belun, ita tenke hakaʼas an no la buka deʼit ita rasik nia diʼak. Maun-alin sira husi família neʼebé adora Maromak Jeová mós presiza hakaʼas an atu hametin nafatin sira-nia relasaun nuʼudar belun. Nuneʼe, oinsá mak ita bele hetan belun neʼebé diʼak?
7 Buka uluk atu sai belun. Apóstolu Paulo fó laran-manas ba ninia belun sira iha kongregasaun iha Roma atu “simu bá ema be laʼo rai”. (Rom 12:13) Atu simu ema ita presiza hatudu laran-luak. Hatudu laran-luak inklui halo hakat balu. Neʼe hanesan saʼe eskada hakat ba hakat. La iha ema seluk neʼebé bele halo ida-neʼe ba Ita. (Lee Provérbios 3:27.) Dalan ida ita bele hatudu laran-luak mak hodi konvida ema oioin husi ita-nia kongregasaun atu han hamutuk ho ita. Ita bele sai toman atu hatudu laran-luak ba ema iha ita-nia kongregasaun ka lae?
8 Dalan ida tan atu buka uluk atu hetan belun ho ema oioin mak hodi konvida sira atu bá haklaken hamutuk. Kuandu ita rona ita-nia maluk fahe ba ema seluk husi laran kona-ba nia domin ba Maromak Jeová, ida-neʼe sei ajuda ita atu hakbesik liután ba nia.
9, 10. Paulo hatudu ezemplu diʼak saida? Oinsá mak ita bele halo tuir?
9 Haluan ita-nia domin. (Lee 2 Korinto 6:12, 13.) Dala ruma Ita sente ka lae, katak la iha ema ida iha kongregasaun laran neʼebé bele sai Ita-nia belun? Karik ida-neʼe tanba Ita fihir demais kona-ba sé mak sei sai Ita-nia belun ka lae? Apóstolu Paulo hatudu ezemplu diʼak kona-ba oinsá bele haluan domin ba ema seluk. Antes nia sai apóstolu, nia nunka hanoin atu sai belun ho ema neʼebé laʼós judeu. Maibé ikusmai nia sai “apóstolu ba jentiu sira”.—Rom 11:13.
10 Liután neʼe, Paulo la habelun deʼit ho ema sira neʼebé idade hanesan ho nia. Porezemplu, Paulo no Timóteo sai belun diʼak maski sira-nia tinan la hanesan no sira mós mai husi situasaun moris neʼebé la hanesan. Ohin loron, joven barak hafolin belun neʼebé sira halo ho ema neʼebé tinan boot liu sira iha kongregasaun laran. Vanessa, neʼebé tinan 20 liu, hatete: “Haʼu sai belun diʼak ho irmán ida neʼebé tinan 50 liu. Haʼu bele fó-hatene nia buat hotu neʼebé haʼu baibain fó-hatene ba haʼu-nia maluk neʼebé tinan hanesan haʼu. No nia hadomi tebes haʼu.” Oinsá mak atu hetan belun diʼak hanesan neʼe? Vanessa hatete: “Haʼu tenke hakaʼas an atu buka-hetan belun hanesan neʼe, laʼós hein deʼit.” Ita prontu atu habelun ho ema sira neʼebé tinan la hanesan ho ita ka lae? Se ita halo nuneʼe, Maromak Jeová sei haraik duni bensaun ba ita-nia hakaʼas-an.
11. Saida mak ita bele aprende husi David no Jónatas nia ezemplu?
11 Hatudu laran-metin. Salomão hakerek: “Belun neʼebé loos sempre hatudu domin, no nia mak maun neʼebé mosu mai iha tempu susar nia laran.” (Prov 17:17) Kuandu Salomão hakerek liafuan sira-neʼe, karik nia hanoin kona-ba ninia aman David nia relasaun nuʼudar belun ho Jónatas. (1 Sam 18:1) Liurai Saul hakarak nia oan Jónatas atu sai nuʼudar liurai ba Izraél. Maibé Jónatas hatene katak Maromak Jeová hili ona David atu sai liurai, no nia simu ida-neʼe. La hanesan Saul, Jónatas la laran-moras ba David. Nia la sai hirus kuandu rona ema gaba David, no nia mós la fiar kedas liafuan aat neʼebé Saul habelar kona-ba David. (1 Sam 20:24-34) Ita hanesan Jónatas ka lae? Kuandu ita-nia belun hetan knaar espesiál ruma, ita sai kontente kona-ba neʼe ka lae? Kuandu sira hasoru susar ruma, ita ajuda no fó kmaan ba sira ka lae? Se ita rona ema konta aat kona-ba ita-nia belun, ita fiar kedas ka lae? Ka Ita hanesan Jónatas neʼebé ho laran-metin defende nia belun?
Bainhira mak tenke hakotu relasaun nuʼudar belun
12-14. Estudante Bíblia balu hasoru susar saida? Oinsá mak ita bele ajuda sira?
12 Kuandu estudante Bíblia ida komesa atu troka ninia moris, karik susar ba nia atu halo desizaun atu hili belun. Karik nia iha ona belun, maibé belun sira-neʼe la moris tuir Bíblia nia matadalan kona-ba morál. Uluk, karik nia ransu beibeik ho ema sira-neʼe. Maibé agora, nia haree katak sira-nia hahalok bele book nia atu la halo tuir Maromak. Tan neʼe, nia sente katak nia presiza hadook an husi sira. (1 Kor 15:33) Maski nuneʼe, karik nia sente katak se nia la ransu tan hamutuk ho sira, nia la laran-metin tan ona ba sira.
13 Se ita mak ema ida neʼebé hasoru daudauk situasaun hanesan neʼe, hanoin-hetan katak belun neʼebé loos sei kontente atu haree katak ita hakaʼas an atu hadiʼa ita-nia moris. Karik sira mós hakarak atu hamutuk ho ita atu aprende kona-ba Maromak Jeová. Maibé iha parte seluk, belun neʼebé aat sei “hasara” ita, tanba ita “la tuir tan sira-nia hahalok aat”. (1 Ped 4:3, 4) Tuir loloos, belun hanesan neʼe mak ida neʼebé la laran-metin ba ita.
14 Kuandu estudante Bíblia ida nia belun sira neʼebé la hadomi Maromak husik nia, ema iha kongregasaun laran bele sai fali ninia belun. (Gal 6:10) Ita koñese didiʼak estudante Bíblia sira neʼebé tuir ita-nia reuniaun ka lae? Dala ruma ita bele ransu hamutuk ho sira ida ka lae?
15, 16. (a) Ita tenke halo saida se ita-nia belun la serbí tan Maromak Jeová? (b) Oinsá mak ita hatudu katak ita loloos hadomi Maromak?
15 Maibé, oinsá se ita-nia belun ida husi kongregasaun deside atu fila kotuk ba Maromak Jeová, no karik presiza hasai husi kongregasaun? Susar tebes kuandu ita hasoru situasaun hanesan neʼe, loos ka lae? Kuandu irmán ida nia belun ida la serbí tan Maromak Jeová, irmán neʼe hatete: “Haʼu sente triste tebes tanba haʼu hanoin katak haʼu-nia belun metin iha lia-loos, maibé haʼu-nia hanoin sala. Haʼu hanoin katak karik nia serbí Maromak Jeová atu halo kontente ninia família. Ida-neʼe book haʼu atu hanoin kona-ba tansá haʼu serbí Maromak. Haʼu serbí Maromak tanba haʼu hadomi nia ka lae?” Oinsá mak irmán hasoru situasaun neʼe? Nia hatete: “Haʼu saran haʼu-nia laran-todan ba Maromak Jeová. Haʼu hakarak duni atu hatudu ba Maromak Jeová katak haʼu hadomi nia laʼós deʼit tanba nia fó haʼu belun iha ninia organizasaun laran, maibé tanba haʼu hadomi duni nia.”
16 Se ita hamutuk nafatin ho ema neʼebé hili atu habelun ho mundu neʼe, ita la bele sai nafatin Maromak nia belun. Dixípulu Tiago hakerek: “Imi la hatene katak wainhira imi habelun ho mundu, imi halo funu hasoru Maromak? Neʼe duni, ema neʼebé hakarak habelun mundu halo nia an Maromak nia funu-balun.” (Tgo 4:4) Ita bele hatudu katak ita hadomi Maromak kuandu ita fiar katak se ita laran-metin ba Nia, Nia sei ajuda ita atu tahan bainhira ita lakon belun ida. (Lee Salmo 18:25.) Irmán neʼebé temi uluk hatete: “Haʼu aprende katak ita la bele obriga ema ida atu hadomi Maromak Jeová ka hadomi ita. Loloos ida-neʼe mak ema ida-idak nia desizaun.” Maibé, saida mak ita bele halo atu iha nafatin relasaun diʼak nuʼudar belun ho ema neʼebé iha kongregasaun laran?
Oinsá atu nafatin iha relasaun neʼebé diʼak nuʼudar belun
17. Belun neʼebé diʼak koʼalia ba malu oinsá?
17 Koʼalia beibeik ba malu bele ajuda belun sira atu sente besik ba malu. Hanesan ita lee iha Bíblia laran kona-ba Rute no Noemi, David no Jónatas, Paulo no Timóteo, ita bele haree katak belun neʼebé diʼak presiza koʼalia nakloke ba malu ho respeitu. Kona-ba ida-neʼe Paulo hatete: “Koʼalia ho laran-diʼak bá, hodi tau masin uitoan.” Paulo koʼalia kona-ba oinsá ita tenke koʼalia ba “sira neʼebé husi liʼur”, neʼe mak sira neʼebé laʼós ita-nia irmaun-irmán. (Kol 4:5, 6) Entaun, se ho ema iha liʼur deʼit ita presiza koʼalia ho respeitu, sá tan ho ita-nia maluk iha kongregasaun laran!
18, 19. Oinsá mak ita tenke sente kona-ba konsellu neʼebé belun ida fó ba ita? Ezemplu saida mak katuas sira iha Éfezu hatudu mai ita?
18 Belun diʼak hafolin ninia belun nia hanoin, nuneʼe sira presiza koʼalia nakloke ba malu ho laran-diʼak. Liurai Salomão neʼebé matenek hakerek: “Mina no insensu mak halo laran haksolok, nuneʼe mós midar husi belun ida mak konsellu neʼebé fó ho laran.” (Prov 27:9) Ita sente hanesan neʼe kuandu ita simu konsellu ruma husi ita-nia belun ka lae? (Lee Salmo 141:5.) Se ita-nia belun fó-hatene ninia hanoin kona-ba ita-nia hahalok ruma neʼebé ladún loos, saida mak ita sei halo? Ita sei sente katak nia halo ida-neʼe tanba nia hatudu laran-diʼak, ka ita sai hirus ho nia?
19 Apóstolu Paulo haksolok ho ninia relasaun nuʼudar belun ho katuas sira iha kongregasaun iha Éfezu. Karik nia koñese sira balu kuandu sira foin sai ema kristaun. Maski nuneʼe, kuandu nia hasoru sira ba dala ikus, nia fó konsellu hodi koʼalia la taka. Sira sente oinsá? Paulo nia belun sira la sai hirus. Duké halo ida-neʼe, sira hafolin Paulo nia laran-diʼak, no sira mós tanis tanba sira sei la haree tan nia.—Apos 20:17, 29, 30, 36-38.
20. Belun neʼebé diʼak sei halo saida?
20 Belun diʼak la simu deʼit konsellu, maibé mós fó konsellu ba malu. Klaru katak ita presiza hatene bainhira mak atu fó konsellu, tanba tuir loloos ita tenke “haree kona-ba [ita] rasik nia moris”. (1 Tes 4:11) No ita mós presiza hanoin-hetan katak ita “ida-ida sei hatán kona-ba nia an ba Maromak”. (Rom 14:12) Maibé kuandu presiza, belun neʼebé diʼak sei fó-hanoin ba nia maluk ho laran-diʼak kona-ba Maromak Jeová nia matadalan sira. (1 Kor 7:39) Porezemplu, se ita haree katak ita-nia belun neʼebé sei klosan komesa namora ho ema ida neʼebé laʼós fiar-naʼin, ita sei halo saida? Ita sei dada an atu fó-hatene ita-nia hanoin tanba taʼuk atu lakon ita-nia belun ka lae? Ka, se ita-nia belun lakohi simu ita-nia konsellu, ita sei halo saida? Belun neʼebé diʼak sei husu katuas sira atu ajuda ninia belun neʼebé karik laʼo iha dalan neʼebé sala. Presiza aten-brani atu halo ida-neʼe. Maibé, se hun ba ita-nia relasaun nuʼudar belun mak domin ba Maromak Jeová, relasaun neʼe sei tahan ba tempu kleur.
21. Dala ruma ita hotu halo saida? Tanbasá mak ita presiza hametin nafatin ita-nia relasaun nuʼudar belun iha kongregasaun laran?
21 Lee Koloso 3:13, 14. Dala ruma ita halo ka hatete “buat ruma hasoru” ita-nia belun, no sira mós dala ruma halo buat ruma neʼebé halo ita sai hirus. Tiago hatete: “Ita hotu halo sala barak.” (Tgo 3:2) Atu sai belun diʼak, neʼe la depende ba dala hira mak ita halo sala, maibé ida-neʼe depende ba oinsá mak ho laran tomak ita fó perdua ba ita-nia belun. Importante duni atu koʼalia nakloke ba malu no perdua malu hodi bele hametin relasaun nuʼudar belun! Se ita hatudu domin ba malu, domin neʼe sei sai nuʼudar ida neʼebé “kesi metin sira seluk atu sai buat furak ida deʼit”.
Oinsá Ita hatán?
• Oinsá mak ita bele hetan belun neʼebé diʼak?
• Bainhira mak ita tenke hakotu relasaun nuʼudar belun?
• Oinsá mak ita bele nafatin iha relasaun neʼebé diʼak nuʼudar belun?
[Pergunta estudu nian]
[Dezeñu iha pájina 18]
Saida mak hun ba Rute no Noemi nia relasaun nuʼudar belun?
[Dezeñu iha pájina 19]
Ita toman atu hatudu laran-luak ka lae?