Pergunta husi lee-naʼin

Lisaun saida mak ita aprende husi Provérbios 24:27?

Ema neʼebé hakerek Provérbios fó konsellu ida-neʼe ba mane joven ida: “Prepara bá ó-nia serbisu iha uma liʼur, no prontu bá atu halo ida-neʼe iha toʼos. Depois neʼe ó tenke harii ó-nia umakain.” Saida mak eskritura neʼe hanorin ita? Neʼe katak ema tenke prepara didiʼak antes nia kaben no harii ninia umakain rasik, no hatene responsabilidade neʼebé nia sei hetan kuandu kaben.

Uluk, esplikasaun kona-ba eskritura neʼe dehan katak maski laʼen ka aman presiza halo serbisu atu buka osan, maibé nia mós tenke hakaʼas an atu harii, ka hametin ninia família, porezemplu hodi hanorin sira kona-ba Maromak no kona-ba Bíblia. Maski ida-neʼe loos no husi Bíblia, maibé eskritura neʼe la koʼalia kona-ba buat sira-neʼe. Tanbasá? Mai ita haree razaun rua.

Razaun primeiru mak versíkulu neʼe la koʼalia kona-ba hametin família neʼebé harii tiha ona tanba tuir loloos ida-neʼe kona-ba harii uma ida. Liafuan “harii” mós bele hatudu katak ida-neʼe kona-ba harii umakain, neʼe katak atu kaben no iha oan.

Razaun segundu mak versíkulu neʼe hatudu katak importante atu halo buat hotu hakat ba hakat, hodi hanoin kona-ba saida mak tenkesér halo uluk no saida mak tenke halo tuirmai. Entaun, eskritura neʼe dehan katak ita-nia responsabilidade atu serbisu hodi buka osan tenkesér halo ulukliu fali ita-nia responsabilidade ba Maromak ka lae? Lae duni!

Iha tempu Bíblia, se mane ida hakarak atu “harii [ninia] umakain”, ka harii família hodi kaben, nia tenke husu uluk ba nia an: ‘Haʼu prepara haʼu-nia an tiha ona atubele tau matan ba feen ka ba oan neʼebé sei moris ka lae?’ Antes atu harii família, nia tenke serbisu makaʼas, tau matan ba ninia toʼos sira ka ai-fuan sira. Tan neʼe mak Bíblia Todayʼs English Version tradús eskritura neʼe hanesan neʼe: “Keta harii ó-nia uma no harii família se ó-nia toʼos seidauk prontu, no se ó seidauk hatene oinsá ó bele buka moris.” Ita bele halo tuir konsellu neʼe ohin loron ka lae?

Bele. Mane ida neʼebé hakarak kaben presiza prepara nia an didiʼak ba responsabilidade neʼe. Se nia isin diʼak, nia tenke serbisu. Maibé, serbisu makaʼas atu tau matan ba ninia família laʼós deʼit kona-ba tau matan ba família nia presiza isin nian. Maromak nia Liafuan hatudu katak ema neʼebé la tau matan ba ninia família hodi fó buat neʼebé sira presiza ba isin, la hatudu domin ba sira, no la ajuda sira atu adora Maromak, nia aat liu fali ema neʼebé fiar-laek! (1 Tim 5:8) Nuneʼe, mane joven neʼebé hakarak atu kaben no atu iha oan presiza husu ba nia an pergunta balu hanesan: ‘Haʼu prepara didiʼak ona atubele harii umakain no tau matan ba família ka lae? Haʼu prontu atu sai família nia ulun kona-ba adorasaun ba Maromak ka lae? Haʼu sei kaer didiʼak haʼu-nia responsabilidade atu estuda Bíblia beibeik hamutuk ho haʼu-nia kaben no oan sira ka lae?’ Maromak nia Liafuan hatudu katak responsabilidade sira-neʼe importante tebes.—Deut 6:6-8; Ef 6:4.

Tan neʼe, mane joven neʼebé buka atu kaben tenke hanoin didiʼak kona-ba matadalan neʼebé hakerek iha Provérbios 24:27. Nuneʼe mós feto joven tenke husu ba nia an se nia prepara nia an ona atu kaer responsabilidade nuʼudar feen no inan. Ema joven neʼebé kaben ona mós bele husu pergunta hanesan sira-neʼe ba sira-nia an bainhira hanoin kona-ba atu iha oan. (Lc 14:28) Hodi moris tuir matadalan hanesan neʼe bele ajuda Maromak nia povu atu hadook an husi problema neʼebé halo sira laran-susar no atu haksolok hodi moris kontente nuʼudar família.

[Liafuan neʼebé foti husi pájina 12]

Mane joven neʼebé hakarak kaben tenke husu ba nia an pergunta saida deʼit?