Estuda Bíblia bele hafurak ita-nia orasaun
Estuda Bíblia bele hafurak ita-nia orasaun
“Ah, Jeová, favór ida, see tilun ba Ita-nia atan nia orasaun.”—NEEM 1:11.
1, 2. Tanbasá mak diʼak atu estuda orasaun balu neʼebé hakerek iha Bíblia laran?
ORASAUN no estuda Bíblia mak parte importante iha adorasaun neʼebé loos. (1 Tes 5:17; 2 Tim 3:16, 17) Maski Bíblia laʼós livru orasaun nian, maibé Bíblia iha orasaun barak, neʼe inklui orasaun sira iha livru Salmos.
2 Nuʼudar ita lee no estuda Bíblia, ita bele hetan orasaun neʼebé kona situasaun neʼebé ita hasoru. Tuir loloos, hodi uza liafuan ruma husi orasaun sira iha Bíblia laran bele hafurak ita-nia orasaun. Saida mak ita bele aprende husi sira neʼebé hetan ona ajuda tanba halo orasaun? No saida mak ita bele aprende husi buat neʼebé sira hatete iha orasaun?
Husu Maromak nia matadalan
3, 4. Knaar saida mak Abraão nia atan iha? Saida mak ita aprende husi dalan neʼebé Maromak Jeová hatán ninia orasaun?
3 Kuandu ita estuda Bíblia ita aprende katak ita tenke halo orasaun beibeik atu husu Maromak nia matadalan. Hanoin toʼok saida mak akontese kuandu Abraão haruka nia atan neʼebé katuas liu, karik Eliézer, atu bá rai-Mezopotámia hodi bele hetan feen ba Isaac, feen ida neʼebé taʼuk ba Maromak. Nuʼudar feto sira kuru bee iha bee-matan, atan neʼe halo orasaun: “Jeová . . . , ba feto neʼebé haʼu sei hatete ba nia: ‘Favór ida hatún lai ó-nia kusi hodi haʼu bele hemu’, no nia neʼebé dehan: ‘Hemu bá, no haʼu mós sei fó hemu Ita-nia kuda-kamelu sira’, feto neʼe mak ida neʼebé Ita sei fó ba Ita-nia atan, ba Isaac; no hodi nuneʼe halo haʼu hatene katak Ita hatudu domin ho laran-metin ba haʼu-nia naʼi.”—Gên 24:12-14.
4 Maromak hatán Abraão nia atan nia orasaun kuandu Rebeca fó hemu ba nia kuda-kamelu sira. Lakleur depois neʼe, Rebeca bá rai-Kanaán hamutuk ho nia no sai Isaac nia feen. Maski ita la hein katak Maromak sei fó ba ita sinál espesiál ida, maibé nia sei fó matadalan ba ita-nia moris se ita husu no hakaʼas an atu husik ninia espíritu hatudu dalan ba ita.—Gal 5:18.
Orasaun ajuda atu hamenus laran-susar
5, 6. Saida mak ita aprende husi Jacob nia orasaun neʼebé nia hatoʼo kuandu nia atu hasoru Esaú?
5 Orasaun bele hamenus laran-susar. Kuandu Jacob taʼuk ninia kaduak, Esaú, nia harohan: “Oh, Jeová, . . . haʼu la merese laran-diʼak neʼebé nakonu ho domin no laran-metin neʼebé Ita hatudu ona ba Ita-nia atan . . . Haʼu harohan ba Ita atu salva haʼu husi haʼu-nia maun nia liman, husi Esaú nia liman, tanba haʼu taʼuk nia, taʼuk katak nia atu mai no loloos ataka haʼu, inan sira hamutuk ho oan sira. No Ita, Ita rasik hatete ona: ‘Haʼu sei tau matan duni ba ó no haʼu sei halo ó-nia bei-oan sira sai hanesan rai-henek iha tasi, neʼebé la bele sura.’”—Gên 32:9-12.
6 Jacob buka dalan atu rezolve problema entre nia no Esaú, no ikusmai sira hadame malu tanba Maromak hatán Jacob nia orasaun. (Gên 33:1-4) Lee didiʼak buat neʼebé Jacob husu, no ita sei haree katak Jacob laʼós husu deʼit ajuda, maibé nia hatudu katak nia tau fiar ba Maromak nia promesa kona-ba bei-oan no hatudu katak nia agradese Maromak nia laran-diʼak neʼebé nakonu ho domin. Ita mós iha “taʼuk iha laran” ka lae? (2 Kor 7:5) Se nuneʼe, buat neʼebé Jacob husu bele fó-hanoin ita katak halo orasaun bele hamenus laran-susar. Maski nuneʼe, kuandu ita halo orasaun ita labele husu deʼit, maibé ita tenke hatoʼo liafuan neʼebé hatudu katak ita iha fiar.
Harohan atu husu matenek
7. Tanbasá mak Moisés halo orasaun hodi husu matenek kona-ba Maromak Jeová nia dalan sira?
7 Ita harohan atu husu matenek tanba ita hakarak atu halo kontente Maromak Jeová. Moisés harohan atu hatene didiʼak kona-ba Maromak nia dalan sira. Nia husu: “Haree bá, Ita [Jeová] hatete ba haʼu: ‘Lori ema sira-neʼe sai [husi Ejitu]’ . . . No agora, se haʼu mak ida neʼebé monu loos ba Ita-nia laran, favór ida, halo haʼu hatene Ita-nia dalan sira, . . . hodi haʼu bele monu loos ba Ita-nia laran.” (Êx 33:12, 13) Maromak hatán Moisés nia orasaun hodi fó matenek kona-ba Ninia dalan sira, matenek neʼebé Moisés presiza duni atu lori Maromak Jeová nia povu.
8. Oinsá mak hanoin kleʼan kona-ba 1 Reis 3:7-14 bele ajuda ita?
8 David mós harohan: “Halo haʼu hatene Ita-nia dalan sira, Oh, Jeová.” (Sal 25:4) David nia oan, Salomão, husu Maromak atu fó matenek neʼebé nia presiza atubele halaʼo ninia serbisu nuʼudar liurai ba povu Izraél. Maromak Jeová kontente ho Salomão nia orasaun hodi fó nia laʼós deʼit matenek neʼebé nia husu, maibé fó mós rikusoin barak no naran-boot. (Lee 1 Reis 3:7-14.) Se ita simu knaar ruma iha kongregasaun no sente katak knaar neʼe todan tebes, harohan hodi husu matenek no hatudu hahalok haraik-an. Nuneʼe, Maromak sei ajuda ita atu hetan matenek hodi bele halaʼo ita-nia knaar iha dalan neʼebé loos no ho domin.
Halo orasaun husi laran
9, 10. Saida mak ita aprende husi orasaun neʼebé Salomão hatoʼo kuandu inaugura templu?
9 Atu Maromak rona ita-nia orasaun, ita tenke halo ida-neʼe husi laran. Iha 1 Reis kapítulu 8, hakerek kona-ba Salomão nia orasaun neʼebé nia hatoʼo husi laran iha povu nia oin, kuandu sira halibur hamutuk iha Jeruzalein atu inaugura Maromak Jeová nia templu iha tinan 1026 molok Kristu. Depois arka aliansa hatama ba Fatin neʼebé Santu Liu Hotu no Maromak Jeová halo kalohan taka templu laran, Salomão hahiʼi Maromak.
10 Lee toʼok Salomão nia orasaun iha 1 Reis kapítulu 8 no haree oinsá nia temi beibeik kona-ba ema nia laran. Salomão hatene katak Maromak Jeová deʼit mak hatene ema nia laran. (1 Reis 8:38, 39) Iha orasaun neʼe mós hatudu katak ema neʼebé halo sala bele fiar katak Maromak sei rona no perdua nia se nia ‘fila fali ba Maromak ho nia laran tomak’. Se inimigu sira kaer Maromak nia povu, Maromak sei rona sira-nia orasaun se sira ho laran tomak harohan ba Maromak Jeová. (1 Reis 8:48, 58, 61) Ida-neʼe hatudu katak ita-nia orasaun tenke mai husi laran.
Livru Salmos hafurak ita-nia orasaun
11, 12. Ita aprende saida husi ema levita nia orasaun kuandu nia la bele bá Maromak nia templu?
11 Estuda livru Salmos ajuda ita atu hafurak ita-nia orasaun no ajuda ita atu hein Maromak atu hatán ita-nia orasaun. Hanoin toʼok kona-ba ema levita ida nia pasiénsia kuandu nia sai dadur. Maski nia la bele bá Maromak Jeová nia templu, nia fó-hanoin nia an hodi kanta: “Tansá mak ó hanoin barak, . . . no tansá mak ó la hakmatek? Hein ba Maromak, tanba haʼu sei hahiʼi nia nuʼudar Ida neʼebé fó salvasaun boot no nuʼudar haʼu-nia Maromak.”—Sal 42:5, 11; 43:5.
12 Saida mak ita aprende husi ema levita neʼe? Se Ita tama komarka tanba buat neʼebé loos, no tan neʼe la bele halibur hamutuk ho maluk fiar-naʼin sira atu adora Maromak, hein ho pasiénsia atu Maromak ajuda Ita. (Sal 37:5) Hanoin kona-ba ksolok neʼebé Ita hetan ona iha Maromak nia serbisu, no halo orasaun atubele tahan nuʼudar Ita “hein ba Maromak” atu halo Ita livre atubele halibur hamutuk fali ho ninia povu.
Halo orasaun hodi fiar
13. Tuir Tiago 1:5-8, tanbasá mak ita tenke halo orasaun hodi fiar?
13 Maski ita hasoru situasaun naran deʼit, diʼak atu sempre halo orasaun hodi fiar. Kuandu ita hasoru susar ruma neʼebé koko ita-nia laran-metin, diʼak atu halo tuir konsellu husi dixípulu Tiago. Hakbesik ba Maromak Jeová iha orasaun, no keta duvida katak nia bele fó ita matenek neʼebé ita presiza atu bele tahan hasoru ita-nia susar. (Lee Tiago 1:5-8.) Maromak hatene ita-nia neon-susar hotu neʼebé ita sente, no nia bele fó matadalan no fó kmaan ba ita liuhusi ninia espíritu. Fó-hatene buat hotu neʼebé ita sente iha laran hodi fiar, laʼós ho “laran namlele”, no simu matadalan husi ninia espíritu no simu konsellu husi ninia Liafuan.
14, 15. Oinsá mak ita hatene katak Ana hatoʼo orasaun hodi fiar?
14 Ana mak feen ida husi Elcana, ema levita ida, no Ana halo orasaun hodi fiar. Tanba Ana oan la iha, Elcana nia feen ida seluk naran Penina goza nia, tanba Penina rasik iha oan balu. Iha tabernákulu, Ana promete katak se nia koʼus oan-mane ida, nia sei entrega nia ba Maromak Jeová. Tanba ninia ibun-tutun deʼit mak book an kuandu nia halo orasaun, Amlulik Boot Eli hanoin katak nia lanu. Maibé, kuandu hatene katak nia la lanu, Eli hatete: “Maromak Izraél nian fó bá, buat neʼebé ó husu.” Maski Ana la hatene dalan oinsá mak Maromak sei hatán nia orasaun, maibé nia fiar katak Maromak sei hatán duni orasaun neʼe. Tan neʼe, “nia la hatudu tan oin triste”. Nia la laran-susar no la laran-tun tan.—1 Sam 1:9-18.
15 Depois Samuel moris no kuandu haketak ona susu, Ana fó nia ba Maromak Jeová hodi lori nia ba tabernákulu atubele serbí iha neʼebá. (1 Sam 1:19-28) Hodi uza tempu atu hanoin kleʼan kona-ba Ana nia orasaun, bele hafurak ita-nia orasaun rasik no bele ajuda ita atu hatene katak maski ita triste tanba problema ruma, ita bele sente kmaan se ita halo orasaun ba Maromak Jeová hodi fiar katak nia sei hatán ita-nia orasaun.—1 Sam 2:1-10.
16, 17. Saida mak akontese tanba Neemias halo orasaun hodi fiar?
16 Ema loos ida naran Neemias neʼebé moris tinan 500 molok Kristu halo orasaun hodi fiar. Nia husu: “Ah, Jeová, favór ida, see tilun ba Ita-nia atan nia orasaun no ba orasaun husi Ita-nia atan sira neʼebé haksolok atu taʼuk Ita-nia naran, no, favór ida, ohin halo buat hotu sai diʼak ba Ita-nia atan, no halo ema neʼe hanoin Ita-nia atan.” Sé mak “ema neʼe”? Nia mak Liurai Artaxerxes husi rai-Pérsia, neʼebé Neemias serbí nuʼudar ema neʼebé toma konta liurai nia hemu.—Neem 1:11.
17 Ba loron barak Neemias halo orasaun hodi fiar, tanba nia rona katak ema judeu sira neʼebé livre ona husi dadur iha rai-Babilónia hasoru “situasaun neʼebé aat no ema hamoe sira, no moru Jeruzalein nian naksobu hela”. (Neem 1:3, 4) Maromak hatán Neemias nia orasaun kuandu Liurai Artaxerxes husik nia bá Jeruzalein atubele harii fali moru iha neʼebá. (Neem 2:1-8) Lakleur depois neʼe, moru hotu ramata atu hadiʼa. Maromak hatán Neemias nia orasaun tanba nia halo orasaun hodi fiar no kona-ba adorasaun loos. Ita-nia orasaun mós hanesan neʼe ka lae?
Hahiʼi no hatoʼo agradese
18, 19. Maromak Jeová nia atan sira iha razaun saida deʼit atu hahiʼi no hatoʼo agradese ba nia?
18 Iha ita-nia orasaun keta haluha atu hahiʼi no hatoʼo agradese ba Maromak Jeová. Iha razaun barak tebes atu halo nuneʼe! Porezemplu, David hakarak duni atu hahiʼi Maromak Jeová nia ukun. (Lee Salmo 145:10-13.) Ita-nia orasaun mós hatudu katak ita hafolin knaar espesiál atu fó sai Maromak Jeová nia Reinu, ka lae? Liafuan sira iha livru Salmos mós bele ajuda ita atu hatoʼo agradese ba Maromak kona-ba reuniaun kristaun sira, no kona-ba reuniaun boot sira.—Sal 27:4; 122:1.
19 Hafolin ita-nia relasaun diʼak ho Maromak bele book ita atu hatoʼo orasaun husi laran, hanesan liafuan tuirmai neʼe: “Haʼu sei hahiʼi Ita iha povu sira leet, Oh, Jeová; haʼu sei hananu knananuk ida ba Ita iha nasaun sira leet. Tanba Ita-nia laran-diʼak neʼebé nakonu ho domin sai boot toʼo lalehan, no Ita-nia lia-loos sai boot toʼo kalohan leten. Halo Ita-nia an aas liu lalehan, Oh, Maromak; halo Ita-nia glória aas liu rai hotu.” (Sal 57:9-11) Liafuan sira-neʼe book tebes ita, loos ka lae? Tuir ita-nia hanoin, liafuan sira-neʼe bele hafurak ita-nia orasaun ka lae?
Husu Maromak ho respeitu
20. Oinsá mak Maria hatudu katak nia hamtaʼuk Maromak?
20 Iha ita-nia orasaun, ita presiza hatudu katak ita hamtaʼuk no respeitu Maromak. Maria nia orasaun neʼebé nia hatoʼo bainhira nia hatene katak nia sei sai inan ba Mesias, besik hanesan ho orasaun neʼebé Ana hatoʼo kuandu nia lori Samuel kiʼik atu serbí iha tabernákulu. Maria nia liafuan sira hatudu katak nia hamtaʼuk duni Maromak, nia hatete: “Haʼu klamar hahiʼi Naʼi, haʼu neon-haksolok iha Maromak haʼu Maksoin.” (Lc 1:46, 47) Ita mós bele hafurak ita-nia orasaun hodi fó sai sentimentu hanesan neʼe ka lae? Tanba Maria hamtaʼuk Maromak mak Maromak hili nia atu sai Mesias nia inan!
21. Oinsá mak Jesus nia orasaun hatudu katak nia hamtaʼuk no fiar ba Maromak?
21 Jesus halo orasaun hodi fiar tomak. Porezemplu, antes Jesus halo Lázaro moris hiʼas, nia foti matan ba lalehan, hodi dehan: “Aman, haʼu fó-agradese ba Ita-Boot tan Ita rona haʼu. Haʼu hatene nanis ona katak Ita rona haʼu nafatin.” (Joao 11:41, 42) Iha ita-nia orasaun ita mós hatudu katak ita hamtaʼuk no iha fiar ba Maromak ka lae? Hodi estuda kona-ba orasaun Ami Aman neʼebé Jesus hanorin, ita sei haree katak buat importante liu mak halo santu Maromak Jeová nia naran, atu nia Reinu mai, no atu halo nia hakarak iha rai. (Mt 6:9, 10) Hanoin toʼok kona-ba ita-nia orasaun rasik. Ita-nia orasaun hatudu katak ita hafolin Maromak Jeová nia Reinu, ninia hakarak, no atu nia naran sai santu, ka lae? Ita-nia orasaun tenke nuneʼe duni.
22. Tanbasá mak ita bele fiar katak Maromak Jeová sei fó ita aten-brani atu haklaken lia-foun diʼak?
22 Tanba susar no terus neʼebé ita hasoru, ita presiza husu Maromak Jeová atu ajuda ita atu serbí nia ho aten-brani. Kuandu Sinédriu bandu Pedro no João “atu labele hanorin no koʼalia hodi Jesus nia naran”, apóstolu sira-neʼe ho aten-brani lakohi halo tuir bandu neʼe. (Apos 4:18-20) Depois husik tiha sira, sira fó-hatene ba sira-nia maluk buat neʼebé akontese. Tuirmai sira hotu halo orasaun hamutuk hodi husu Maromak nia ajuda atu sira bele haklaken ninia liafuan ho aten-brani. Sira sente kontente kuandu Maromak hatán sira-nia orasaun, tanba sira hotu ‘nakonu ho espíritu santu, sira haklaken Maromak futar-lia ho aten-barani’! (Lee Apostolu 4:24-31.) Rezultadu mak ema barak komesa adora Maromak Jeová. Orasaun mós bele ajuda ita atu haklaken lia-foun diʼak ho aten-brani.
Kontinua hafurak ita-nia orasaun
23, 24. (a) Fó toʼok ezemplu seluk neʼebé hatudu katak estuda Bíblia bele hafurak ita-nia orasaun. (b) Saida mak ita sei halo atu hafurak ita-nia orasaun?
23 Iha ezemplu barak tan neʼebé hatudu katak lee no estuda Bíblia bele hafurak ita-nia orasaun. Porezemplu, hanesan Jonas, kuandu ita halo orasaun ita mós hakarak hatete liafuan ruma neʼebé hatudu katak ita rekoñese katak “salvasaun mai husi Maromak Jeová”. (Jonas 2:1-10) Se ita hanoin barak kona-ba sala boot ruma neʼebé ita halo, maski ita buka tiha ona ajuda husi katuas sira, karik sentimentu neʼebé David hatoʼo iha ninia orasaun bele ajuda ita atu ita mós hatete ba Maromak katak ita hakribi ita-nia sala. (Sal 51:1-12) Ita mós bele halo orasaun atu hahiʼi Maromak Jeová, hanesan Jeremias. (Jer 32:16-19) Se hakarak kaben, diʼak atu estuda orasaun iha Esdras kapítulu 9, no mós halo ita rasik nia orasaun. Buat rua neʼe bele hametin ita-nia hakarak atu halo tuir Maromak atu kaben “iha Naʼi”.—1 Kor 7:39; Esd 9:6, 10-15.
24 Kontinua atu lee no estuda Bíblia. Buka ba informasaun neʼebé ita bele uza iha ita-nia orasaun. Karik ita bele uza ida-neʼe iha ita-nia orasaun bainhira ita husu buat ruma, bainhira hatoʼo agradese no hahiʼi Maromak. Nuʼudar ita hafurak ita-nia orasaun hodi estuda Bíblia, ita bele fiar katak ita sei hakbesik liután ba Maromak Jeová.
Oinsá Ita hatan?
• Tanbasá mak ita tenke husu Maromak nia matadalan?
• Saida mak tenke book ita atu harohan atu husu matenek?
• Oinsá mak livru Salmos bele hafurak ita-nia orasaun?
• Tanbasá mak ita tenke halo orasaun hodi fiar no respeitu?
[Pergunta estudu nian]
[Dezeñu iha pájina 8]
Abraão nia atan husu Maromak nia matadalan. Ita mós halo ida-neʼe ka lae?
[Dezeñu iha pájina 10]
Adorasaun Família nian bele hafurak ita-nia orasaun