Fó ho laran-haksolok

KONA-BA fó kontribuisaun, apóstolu Paulo hakerek: “Ida-ida sei halo nuʼudar nia deside ona,” no nia mós aumenta tan dehan: “La hodi laran-susar ka obriga an, basá Maromak hadomi ema neʼebé fó ho laran-haksolok.” (2 Kor 9:7) Maromak Jeová la obriga ema atu fó apoiu ba adorasaun neʼebé loos. Nia husik nia atan sira atu hatudu sira-nia laran-metin hodi fó kontribuisaun tanba hakarak no ho laran-haksolok. Husi tempu uluk toʼo agora, Maromak nia povu sempre fó ho laran-haksolok. Mai ita haree ezemplu tolu.

Depois Maromak Jeová lori ema Izraél sai husi rai-Ejitu, nia haruka atu sira harii tabernákulu. Tanba presiza sasán atu bele harii tabernákulu neʼe, Maromak Jeová husu ema Izraél atu fó kontribuisaun. Tan neʼe, “ema hotu neʼebé nia laran book nia”, fó osan-mean no osan-mutin, korrente, kadeli, no sasán sira seluk tan. Povu laran-luak tebetebes toʼo Moisés husu sira atu para ona atu fó kontribuisaun.—Êx 35:5, 21; 36:6, 7.

 Tinan atus balu liu tiha, kuandu atu harii templu, Maromak nia povu iha tan oportunidade atu apoia adorasaun neʼebé loos. Liurai David rasik fó kontribuisaun neʼebé barak tebes no husu ema seluk atu fó mós kontribuisaun ba serbisu neʼe. Sira fó tanba sira rasik nia hakarak. Tan neʼe, osan-mean no osan-mutin neʼebé sira fó, iha folin dolar 100.000.000.000 liu! Povu haksolok tanba bele fó kontribuisaun ba Maromak Jeová.—1 Crôn 29:3-9; 2 Crôn 5:1.

Jesus Kristu nia dixípulu sira iha tempu uluk mós fó kontribuisaun ho laran-haksolok. Iha loron Pentekostes iha tinan 33, maizumenus ema naʼin-3.000 mak hetan batizmu, sira barak la hela iha Jeruzalein. Atu ajuda sira neʼebé ladún iha osan atu hela iha Jeruzalein atubele aprende liután kona-ba fiar neʼebé sira foin simu, ema kristaun sira tau hamutuk sira-nia rikusoin. Sira faʼan buat neʼebé sira iha no fó osan neʼe ba apóstolu sira atu ajuda sira neʼebé presiza. Maromak Jeová kontente duni kuandu haree sira hatudu fiar no domin hanesan neʼe!—Apos 2:41-47.

Ohin loron, ema kristaun kontinua atu apoia adorasaun neʼebé loos hodi fó sira-nia tempu, forsa, no osan ho laran-luak no laran-haksolok. Iha kaixa tuirmai hatudu dalan balu kona-ba oinsá Ita mós bele halo ida-neʼe.

[Kaixa iha pájina 18, 19]

Dalan balu atu fó kontribuisaun

KONTRIBUISAUN BA SERBISU IHA MUNDU TOMAK

Ema barak rai osan uitoan atu tau iha kaixa kontribuisaun ho naran “Serbisu iha Mundu Tomak”.

Fulan-fulan, kongregasaun sira haruka osan sira-neʼe ba sukursál husi Testemuña ba Jeová neʼebé tau matan ba serbisu iha sira ida-idak nia rai. Osan kontribuisaun mós bele haruka ba Associação Watchtower, Caixa Postal 248, Dili, Timor-Leste, ka ba sukursál husi Testemuña ba Jeová neʼebé tau matan ba Ita-nia rai. (Buat seluk neʼebé temi iha kraik neʼebé Ita bele fó nuʼudar kontribuisaun mós bele haruka ba sukursál husi Testemuña ba Jeová neʼebé tau matan ba Ita-nia rai.) Xeke ruma neʼebé haruka ba diresaun iha leten tenke hakerek ho klaru katak selu ba “Watchtower”. Kadeli, korrente, ka buat seluk tan neʼebé iha folin, bele mós fó nuʼudar kontribuisaun. Bainhira haruka sasán sira-neʼe, presiza mós haruka karta ida atu dehan katak sasán sira-neʼe mak prezente neʼebé Ita fó husi Ita-nia hakarak rasik.

ARRANJU KONA-BA HUSIK ORGANIZASAUN UZA ITA-NIA OSAN

Ita bele fó Ita-nia osan atu Associação Watchtower bele uza ba serbisu iha mundu tomak. Maibé, kuandu Ita husu fali osan neʼe, sei fó fali ba Ita. Atu hetan informasaun liután, bele hakerek karta ba diresaun iha leten ka bele telefone ba númeru (670) 331-2321.

PLANU KONA-BA FÓ KONTRIBUISAUN

Maski Ita bele fó osan nuʼudar kontribuisaun, maibé iha dalan seluk tan atu Ita bele fó kontribuisaun ba serbisu iha mundu tomak. Dalan sira-neʼe mak:

Konta banku nian: Konta banku nian, ka konta banku nian ba pensaun, Ita bele fó autorizasaun ba Associação Watchtower atu uza, ka bele hakerek ho klaru katak sei fó ba Associação Watchtower bainhira Ita mate, tuir kritériu banku nian.

Uma ka rai: Uma ka rai neʼebé bele faʼan, bele fó nuʼudar prezente neʼebé Ita fó husi Ita-nia hakarak rasik. Se Ita iha uma ida Ita bele halo kontratu atubele kontinua hela nafatin toʼo mate. Kontaktu sukursál iha Ita-nia rai antes atu fó dokumentu ruma.

Osan tinan-tinan: Arranju neʼe mak atu fó osan ba asosiasaun ida neʼebé Testemuña ba Jeová uza. Maibé, Ita ka ema neʼebé Ita hili sei simu fali osan ho valór neʼebé Ita konkorda ona tinan-tinan toʼo mate.

Testamentu: Liuhusi surat legál neʼebé Ita asina bainhira sei moris Ita bele fó sai Ita-nia hakarak atu fó rai, uma ka osan ba Associação Watchtower bainhira Ita mate. No mós se Ita fó Ita-nia osan atu Associação Watchtower bele uza ba serbisu iha mundu tomak, Ita bele halo testamentu atu fó sai katak bainhira Ita mate buat sira-neʼe mak Associação Watchtower nian ona.

Osan fulan-fulan: Bíblia hatete: “Hahiʼi Maromak Jeová ho ó-nia sasán neʼebé folin no ho fuan primeiru husi ó-nia toʼos.” (Provérbios 3:9) Ema neʼebé serbisu ka fila-liman, mós bele halo planu atu rai osan uitoan fulan-fulan hodi bele tau iha kaixa kontribuisaun ba “Serbisu iha Mundu Tomak”.

Atu hetan informasaun liután, Ita bele kontaktu Testemuña ba Jeová iha Timor-Leste, liuhusi telefone ka bele hakerek karta ba diresaun iha kraik:

Testemuña ba Jeová iha Timor-Leste

Associação Watchtower

Caixa Postal 248

Dili, Timor-Leste

Númeru telefone: (670) 331-2321