Hafolin ita-nia irmaun no irmán sira neʼebé tilun-diuk!

HUSI tempu antigu toʼo ohin loron Maromak nia povu mak hanesan família boot ida. Família neʼe nia beiʼala inklui Samuel, David, Sansão, Raab, Moisés, Abraão, Sara, Noé, no Abel. Maromak Jeová nia atan neʼebé fiar-metin ohin loron mós inklui ema balu neʼebé tilun-diuk. Porezemplu, ema primeiru neʼebé sai Testemuña ba Jeová iha rai-Mongólia mak kaben-naʼin neʼebé tilun-diuk. No mós, tanba ita-nia maluk kristaun neʼebé tilun-diuk iha rai-Rúsia hatudu nafatin laran-metin, ita manán kazu ida iha Tribunál Europeu ba Direitus Umanus.

Ohin loron, ‘atan laran-metin no matenek’ hasai vídeo no DVD ho língua neʼebé uza deʼit sinál ho liman, no halo reuniaun iha kongregasaun no mós reuniaun boot sira ho língua neʼebé uza deʼit sinál ho liman. (Mt 24:45) Buat sira-neʼe ajuda duni ema neʼebé tilun-diuk. * Maibé dala ruma ita hanoin kona-ba oinsá mak ema tilun-diuk iha tempu uluk aprende lia-loos kona-ba Maromak, no oinsá sira laʼo ba oin iha lia-loos maski sira seidauk iha buat sira-neʼe? Dala ruma ita hanoin kona-ba oinsá mak ita bele ajuda ema tilun-diuk neʼebé hela iha ita-nia leet?

Kuandu seidauk iha vídeo no DVD

Se ita husu irmaun ka irmán neʼebé tilun-diuk neʼebé ferik-katuas ona kona-ba oinsá mak sira aprende lia-loos iha tempu uluk, sira sei hatán saida? Karik sira sei esplika saida mak sira sente kuandu sira foin aprende katak Maromak iha naran no oinsá ida-neʼe troka sira-nia moris no ajuda sira atu laran-metin nafatin, maski seidauk iha vídeo no DVD neʼebé esplika lia-loos neʼebé kleʼan liu. Karik sira bele esplika kona-ba oinsá sira sente kuandu tuir reuniaun maibé la iha ema neʼebé tradús ba sira. Iha tempu neʼe, irmaun ka irmán ida tuur iha sira-nia sorin no hakerek nota badak hodi sira bele komprende uitoan, maski sira ladún hatene liafuan hotu neʼebé ema hakerek. Irmaun ida neʼebé tilun-diuk aprende lia-loos iha dalan hanesan neʼe ba tinan hitu antes iha ema neʼebé tradús ba nia.

Irmaun neʼebé tilun-diuk neʼebé katuas ona esplika oinsá mak nia haklaken ba ema neʼebé bele rona. Iha nia liman ida, nia kaer surattahan neʼebé hakerek buat neʼebé nia hakarak hatete. No, nia liman sorin kaer Menara Pengawal no Sedarlah! Susar mós ba nia atu estuda Bíblia ho ema seluk neʼebé tilun-diuk hodi uza livru sira, tanba livru sira-neʼe ema tilun-diuk ladún komprende. Irmaun-irmán tilun-diuk neʼebé ferik-katuas ona hanoin-hetan katak uluk sira sente estrese tanba susar ba sira atu koʼalia ba ema kona-ba lia-loos husi Bíblia. Sira mós komprende oinsá mak ema ida sente kuandu nia hadomi Maromak Jeová, maibé susar ba nia atu hatudu sai ninia domin. Tanbasá susar ba sira? Tanba sira duvida se sira komprende lia-loos ruma iha dalan neʼebé loos ka lae.

Maibé, ita-nia irmaun ka irmán neʼebé tilun-diuk, hatudu laran-metin nafatin maski sira hasoru susar sira-neʼe. (Jó 2:3) Ho pasiénsia sira hein ba Maromak Jeová nia ajuda. (Sal 37:7) No Maromak fó bensaun duni ba sira, agora sira simu bensaun neʼebé uluk sira hanoin sira la bele simu.

Hanoin toʼok kona-ba aman ida neʼebé tilun-diuk. Kuandu vídeo ba tilun-diuk sira seidauk iha, nia hatudu laran-metin hodi dirije estudu família nian. Nia oan-mane ida hatete:  “Estudu família nian sempre susar ba ami-nia apá tanba nia uza deʼit livru ba sira neʼebé bele lee atu estuda ho ami. Dala barak nia la komprende liafuan iha livru neʼebé ami estuda. Ami, ninia oan sira, halo susar liután ba nia. Ami lalais atu fó-hatene nia kuandu nia esplika buat ruma sala. Maski susar, ami-nia apá nafatin dirije estuda família nian. Maski dala ruma nia sente moe tanba ladún hatene lia-inglés neʼebé hakerek iha livru, maibé nia hanoin katak hanorin ami kona-ba Maromak Jeová mak importante liu.”

Iha mós ezemplu seluk tan husi irmaun Richard, nia tinan 70, nia tilun-diuk no matan-delek husi nia moris mai. Nia hela iha Novaiorke, Estadus Unidus Amérika. Ema hatene Richard, nia ema neʼebé la falta reuniaun sira. Atu tuir reuniaun, nia tenke saʼe komboiu. Atu hatene nia tun iha neʼebé nia sura dala hira mak komboiu neʼe para. Loron ida, irmaun sira la halo reuniaun tanba anin-fuik no jelu barak. Sira fó-hatene nanis irmaun-irmán sira hotu, maibé tanba razaun ruma sira haluha atu fó-hatene Richard. Bainhira irmaun sira hanoin-hetan Richard, sira bá kedan atu buka nia. Ikusmai, sira hetan nia hamriik iha Salaun Reinu nia oin hodi hein ho pasiénsia ba ema ida atu loke odamatan. Irmaun sira husu nia tansá mak nia sai uma maski iha anin-fuik, no nia hatán: “Haʼu hadomi Aman Jeová.”

Saida mak Ita bele halo?

Iha ema neʼebé tilun-diuk iha Ita-nia área ka lae? Ita bele aprende atu koʼalia ho sira hodi uza sinál ho liman ka lae? Baibain ema tilun-diuk hatudu laran-diʼak no pasiénsia kuandu sira hanorin sira-nia língua ba ema seluk. Karik ita hasoru ema neʼebé tilun-diuk iha haklaken ka iha fatin seluk. Saida mak ita bele halo? Koko atu koʼalia ho sira hodi uza sinál, hakerek liafuan ruma, no halo dezeñu. Maski ema neʼebé tilun-diuk neʼe ladún hatudu interese ba lia-loos, maibé fó-hatene ba irmaun ka irmán ida neʼebé tilun-diuk ka irmaun ka irmán neʼebé hatene atu koʼalia ho sira hodi uza sinál. Dala ruma ema neʼebé tilun-diuk sei hatudu interese liu kuandu ema hatoʼo lia-foun diʼak iha nia rasik nia língua.

Karik Ita aprende daudaun língua neʼebé uza deʼit sinál ho liman no tuir kongregasaun neʼebé uza língua ema tilun-diuk nian. Oinsá mak Ita bele koʼalia no komprende sira-nia língua diʼak liután? Maski iha reuniaun ema balu bele rona, maibé hakaʼas an atu koʼalia hodi uza sinál deʼit. Ida-neʼe sei ajuda Ita atu hanoin no koʼalia hanesan ema tilun-diuk sira. Kuandu Ita halo nuneʼe, dala ruma Ita hakarak koʼalia ho lian duké koʼalia hodi uza sinál. Maibé, kuandu Ita aprende língua seluk, Ita tenke hakaʼas an atubele koʼalia língua neʼe ho moos.

Ita hatudu domin no respeitu ba ita-nia irmaun-irmán sira neʼebé tilun-diuk kuandu ita hakaʼas an atu koʼalia ho sira hodi uza sinál. Hanoin toʼok estrese neʼebé ema tilun-diuk sira sente loron-loron tanba sira la bele komprende ema seluk iha serbisu-fatin ka iha eskola. Irmaun ida neʼebé tilun-diuk hatete:  “Loron-loron ema hotu neʼebé haleʼu haʼu koʼalia ho lian. Dala barak haʼu sente laran-tun tanba haʼu la bele koʼalia ho sira. Ida-neʼe halo haʼu sente estrese no dala ruma hirus. La iha liafuan neʼebé bele esplika buat neʼebé haʼu sente.” Ita-nia reuniaun sira tenke sai hanesan fatin furak ba ita-nia irmaun-irmán sira neʼebé tilun-diuk. Fatin neʼebé sira bele simu ai-han espirituál no sente besik ho maluk kristaun sira.—Joao 13:34, 35.

Iha mós kongregasaun balu neʼebé inklui grupu tilun-diuk. Atu ema neʼebé tilun-diuk bele komprende buat neʼebé hatoʼo husi plataforma, kongregasaun arranja irmaun-irmán sira-neʼe atu tuur iha oin. Hodi nuneʼe, sira bele haree ema ida neʼebé tradús ba sira, no mós haree irmaun neʼebé hatoʼo diskursu. Irmaun-irmán sira seluk sai toman lalais ho arranju neʼe no neʼe la dada sira-nia atensaun. Iha reuniaun boot balu mós iha ema neʼebé tradús ba ema tilun-diuk sira, no sira mós halo tuir arranju neʼe. Ita hakarak gaba irmaun-irmán sira neʼebé tradús tanba sira hakaʼas an atu hatoʼo informasaun ho klaru, iha dalan neʼebé fasil ba ema tilun-diuk sira atu komprende.

Karik Ita-nia kongregasaun inklui grupu tilun-diuk ka ema tilun-diuk balu. Saida mak Ita bele halo atu hatudu interese ba sira? Konvida sira balu ba Ita-nia uma. Se bele, aprende atu koʼalia uitoan ho sira hodi uza sinál. Maski susar atu koʼalia ho sira, maibé keta husik ida-neʼe hapara Ita. Ita sei hetan susesu duni, no hodi hatudu domin Ita sei aumenta Ita-nia esperiénsia. (1 Joao 4:8) Ita-nia irmaun-irmán sira neʼebé tilun-diuk bele halo ita sente kontente no bele ajuda ita tanba karik sira hatene buat ruma neʼebé ita seidauk hatene. Sira gosta atu koʼalia ho ema seluk no sira gosta atu hamnasa. Irmaun ida neʼebé iha inan-aman neʼebé tilun-diuk, hatete: “Durante haʼu-nia moris tomak haʼu sempre hamutuk ho ema neʼebé tilun-diuk, no sira ajuda haʼu barak liu fali haʼu ajuda sira. Ita bele aprende buat barak husi ita-nia irmaun no irmán neʼebé tilun-diuk.”

Maromak Jeová hadomi fiar-naʼin sira hotu, inklui mós sira neʼebé tilun-diuk. Sira-nia ezemplu kona-ba hatudu fiar no tahan maski hasoru problema oioin halo Maromak Jeová nia organizasaun sai riku liu. Nuneʼe, mai ita hafolin ita-nia irmaun no irmán sira neʼebé tilun-diuk!

[Nota–rodapé]

[Dezeñu iha pájina 31]

Dala ruma ema neʼebé tilun-diuk sei hatudu interese liu kuandu ema hatoʼo lia-foun diʼak iha nia rasik nia língua

[Dezeñu iha pájina 32]

Irmaun-irmán sira neʼebé tilun-diuk sente besik ho maluk kristaun sira kuandu tuir reuniaun