Hafolin ita-nia serbisu iha kongregasaun kristaun
Hafolin ita-nia serbisu iha kongregasaun kristaun
“Maromak tau liman ain sira ida-ida iha isin-lolon nuʼudar Nia hakarak.”—1 KOR 12:18.
1, 2. (a) Saida mak hatudu katak ita ida-idak iha serbisu iha Maromak nia uma-laran neʼebé ita bele hafolin? (b) Pergunta saida deʼit mak ita sei estuda?
HUSI tempu Izraél antigu toʼo agora, Maromak Jeová uza kongregasaun atu tau matan no fó matadalan ba ninia povu. Porezemplu, depois ema Izraél manán sidade Ai, Josué “lee ho lian makaʼas liafuan hotu kona-ba lei, kona-ba bensaun no malisan, tuir buat hotu neʼebé hakerek iha livru lei nian . . . iha ema Izraél hotu nia oin”.—Jos 8:34, 35.
2 Apóstolu Paulo hakerek ba katuas kristaun ida, naran Timóteo, no nia hatete katak kongregasaun kristaun mak “Maromak nia uma-laran”, neʼebé “tahan lia-loos no rai nia didiʼak”. (1 Tim 3:15) Ohin loron, Maromak nia “uma-laran” mak ema kristaun loos neʼebé hanesan família ida iha mundu tomak. Iha kapítulu 12 husi Paulo nia karta primeiru ba ema kristaun iha Korintu, nia kompara kongregasaun kristaun iha mundu tomak ho ema nia isin-lolon. Nia hatete katak maski parte ida-idak isin nian halo serbisu neʼebé la hanesan, maibé sira hotu mak importante. Paulo hatete: “Maromak tau liman ain sira ida-ida iha isin-lolon nuʼudar Nia hakarak.” Nia mós hatete tan katak ‘sira neʼebé ita hanoin katak kmanek ladún iha, ita haleʼu ho kmanek boot liu’. (1 Kor 12:18, 23) Tan neʼe, maski ema ida-idak nia serbisu iha Maromak nia uma-laran la hanesan, maibé ema laran-loos ida nia serbisu iha folin hanesan ho ema kristaun seluk neʼebé laran-metin nia serbisu. Entaun, oinsá mak ita bele halo didiʼak ita-nia serbisu iha Maromak nia uma-laran, no oinsá atu hafolin serbisu neʼe? Saida deʼit mak bele kona serbisu neʼebé ita halo iha Maromak nia uma-laran? No mós, oinsá mak ita bele hatudu ba ema hotu katak ita “laʼo ba oin”?—1 Tim 4:15.
Oinsá atu hafolin ita-nia serbisu?
3. Saida mak dalan ida atu ita halo didiʼak ita-nia serbisu iha kongregasaun no atu hatudu katak ita hafolin serbisu neʼe?
3 Dalan ida atu ita bele halo didiʼak ita-nia serbisu iha kongregasaun no atu hatudu katak ita hafolin serbisu neʼe mak hodi halo tuir matadalan hotu husi atan “laran-metin no matenek” no ninia Grupu Administradór neʼebé reprezenta atan neʼe. (Lee Mateus 24:45-47.) Ita presiza husu ita-nia an atu bele hatene se ita halo tuir ka lae matadalan sira neʼebé grupu atan neʼe fó mai ita. Porezemplu, dala barak ona ita simu matadalan kona-ba hatais no hadiʼa an, kona-ba atividade halimar nian, no kona-ba uza ínternet. Ita halo tuir matadalan diʼak neʼe hodi ita bele iha nafatin relasaun diʼak ho Maromak ka lae? Oinsá ho konsellu atu halaʼo adorasaun família nian? Ita halo tuir ona konsellu neʼe no uza tempu balu iha kalan ida atubele halaʼo adorasaun neʼe? Se ita seidauk kaben, ita uza tempu neʼe atu estuda Bíblia mesak? Maromak Jeová sei haraik bensaun ba ita ida-idak no ba ita-nia família se ita halo tuir matadalan husi grupu atan neʼe.
4. Ita tenke hanoin kona-ba saida deʼit bainhira halo desizaun ruma?
4 Ema balu karik hanoin katak sira iha direitu atu halo desizaun rasik kona-ba atividade halimar nian, kona-ba hatais no hadiʼa an. Maibé, ba ema neʼebé dedika an ona neʼebé hafolin ninia serbisu iha kongregasaun, diʼak atu labele hanoin deʼit kona-ba ninia direitu kuandu halo desizaun ruma. Importante atu hanoin liuliu kona-ba Maromak Jeová nia hanoin neʼebé nia fó sai iha ninia Liafuan, Bíblia. Ninia Liafuan tenke sai nuʼudar ‘lampu ba ita-nia ain, no naroman ba ita-nia dalan’. (Sal 119:105) Ita mós presiza hanoin kona-ba oinsá mak desizaun neʼebé ita halo kona ita-nia serbisu haklaken no kona ema seluk iha kongregasaun laran no liʼur.—Lee 2 Korinto 6:3, 4.
5. Tanbasá mak ita tenke kuidadu atu labele hanoin katak ita la presiza ajuda ka konsellu?
5 “Espíritu neʼebé book an iha ema ulun-toos sira-nia laran” sai barak hanesan anin neʼebé ita presiza atu dada iis. (Ef 2:2) Espíritu neʼe bele book ita atu hanoin katak ita la presiza matadalan husi Maromak Jeová nia organizasaun. Ita hotu lakohi atu sai hanesan Diótrefes, neʼebé ‘la rona apóstolu João nia liafuan’. (3 Joao 9, 10) Ita tenke kuidadu atu labele hanoin katak ita la presiza ajuda ka konsellu. Liuhusi ita-nia liafuan no hahalok, diʼak atu ita nunka hatudu ka hatete buat ruma neʼebé kontra organizasaun neʼebé Maromak Jeová uza ohin loron atu tau matan ba ita. (Núm 16:1-3) Maibé, ita tenke hafolin ita-nia oportunidade atu serbisu hamutuk ho grupu atan laran-metin no matenek. No ita mós tenke hakaʼas an atu halo tuir no hakruʼuk an ba irmaun sira neʼebé tau matan ba ita-nia kongregasaun.—Lee Ebreu 13:7, 17.
6. Tanbasá mak ita tenke hanoin didiʼak kona-ba ita rasik nia situasaun?
6 Dalan ida seluk tan atu hatudu katak ita hafolin ita-nia serbisu iha kongregasaun kristaun mak hodi hanoin kona-ba ita rasik nia situasaun, no hakaʼas an atu halo buat hotu neʼebé ita bele atu hafolin ita-nia serbisu haklaken hodi fó hahiʼi ba Maromak Jeová. (Rom 11:13) Ema balu serbí nuʼudar pioneiru regulár. Ema balu seluk serbí nuʼudar misionáriu, serbí nuʼudar katuas neʼebé iha knaar atu vizita kongregasaun sira, ka serbí iha Betel. Irmaun-irmán seluk fali ajuda atu harii Salaun Reinu. Sin, Maromak Jeová nia atan barak hakaʼas an atu halo buat hotu neʼebé sira bele atu ajuda sira-nia família atu kontinua serbí Maromak, no atu hola parte iha serbisu haklaken semana-semana. (Lee Koloso 3:23, 24.) Ita bele fiar duni katak se ita hakaʼas an atu serbí Maromak ho laran tomak, Maromak nafatin sei uza ita iha nia kongregasaun kristaun.
Saida deʼit mak kona ita-nia serbisu iha kongregasaun kristaun?
7. Esplika toʼok oinsá mak ita-nia situasaun bele kona buat neʼebé ita bele halo iha kongregasaun.
7 Importante duni atu ita haree didiʼak ita-nia situasaun, tanba dala ruma ida-neʼe bele kona buat neʼebé ita bele halo iha kongregasaun laran. Porezemplu, serbisu neʼebé irmaun sira halo iha kongregasaun dala ruma la hanesan ho irmán sira. Ita-nia idade, saúde, no situasaun seluk bele kona buat neʼebé ita bele halo iha Maromak Jeová nia serbisu. Provérbios 20:29 hatete: “Buat furak ba mane joven mak sira-nia forsa no buat furak ba katuas mak sira-nia fuuk mutin.” Joven sira iha kongregasaun laran karik bele halo buat barak liu tanba sira iha forsa, maibé ema neʼebé ferik-katuas bele ajuda kongregasaun tanba sira-nia matenek no esperiénsia. Ita mós tenke hanoin-hetan katak buat hotu neʼebé ita halo iha Maromak Jeová nia organizasaun mak depende ba Maromak nia laran-diʼak.—Apos 14:26; Rom 12:6-8.
8. Oinsá mak ita-nia hakarak kona buat neʼebé ita bele halo iha kongregasaun laran?
8 Iha mós buat ida tan neʼebé kona buat neʼebé ita bele halo iha kongregasaun laran. Porezemplu, hanoin toʼok ilustrasaun kona-ba biin-alin naʼin-rua neʼebé iha situasaun hanesan. Sira-nia inan-aman sempre fó laran-manas ba sira naʼin-rua atu foti pioneiru regulár bainhira sira ramata eskola. Sira naʼin-rua foin ramata eskola sekundária. Maibé, ida husi sira komesa serbí nuʼudar pioneiru, no ida seluk komesa atu serbisu atu manán osan. Saida mak halo sira-nia desizaun la hanesan? Sira-nia hakarak. Ikusmai, sira ida-idak halo buat neʼebé sira hakarak. Ita barak mós gosta atu halo buat neʼebé ita hakarak, loos ka lae? Maibé, ita tenke hanoin didiʼak kona-ba buat neʼebé ita hakarak halo iha Maromak nia serbisu. Bele ka lae, ita aumenta ita-nia tempu iha serbisu haklaken, maski atu halo ida-neʼe ita presiza halo mudansa ruma iha ita-nia moris?—2 Kor 9:7.
9, 10. Saida mak ita tenke halo se ita ladún iha hakarak atu halo buat barak liután iha Maromak Jeová nia serbisu?
9 Maibé, oinsá se ita ladún iha hakarak atu aumenta ita-nia tempu iha Maromak Jeová nia serbisu no hakarak atu halo buat uitoan deʼit? Iha Paulo nia karta ba ema iha Filipe, nia hatete: “Maromak mak halo imi [ka, book imi], laʼós deʼit atu hakarak, maibé mós atu halo duni buat neʼebé monu loos ba nia laran.” Loos duni, Maromak Jeová bele book ita-nia hahalok no hakarak.—Flp 2:13; 4:13.
10 Tan neʼe, importante atu husu Maromak Jeová atu book ita atu iha hakarak atu halo tuir ninia hakarak. Liurai David iha Izraél antigu halo ida-neʼe. Nia harohan: “Halo haʼu hatene Ita-nia dalan sira, Oh, Jeová; hanorin haʼu Ita-nia dalan. Halo haʼu laʼo iha Ita-nia lia-loos no hanorin haʼu, tanba Ita mak haʼu-nia Maromak neʼebé salva haʼu. Ba Ita deʼit mak haʼu tau haʼu-nia esperansa iha loron hotu iha haʼu-nia moris.” (Sal 25:4, 5) Ita mós bele halo tuir hodi husu katak Maromak Jeová book ita atu iha hakarak atu halo buat neʼebé halo nia kontente. Kuandu ita hanoin kleʼan kona-ba oinsá mak Maromak Jeová no ninia Oan sente kona-ba buat neʼebé ita halo iha ita-nia serbisu ba sira, ita-nia laran sei sai nakonu ho domin. (Mt 26:6-10; Lc 21:1-4) Domin neʼe bele book ita atu husu Maromak Jeová atu ajuda ita hodi iha hakarak atu halo buat barak liután iha ninia serbisu. Profeta Isaías fó ezemplu diʼak ida neʼebé ita presiza halo tuir. Kuandu nia rona Maromak Jeová nia lian neʼebé husu: “Sé mak haʼu sei haruka, no sé mak sei bá atu reprezenta ami?” Isaías hatán: “Haʼu mak neʼe! Haruka haʼu bá.”—Isa 6:8.
Oinsá atu halo buat barak liután?
11. (a) Saida mak hatudu katak presiza irmaun barak atu tau matan ba kongregasaun? (b) Oinsá mak irmaun ida bele hetan knaar iha kongregasaun?
11 Iha tinan 2008, iha mundu tomak ema naʼin-289.678 mak hetan batizmu, ida-neʼe hatudu katak presiza duni irmaun barak tan atu tau matan ba kongregasaun. Saida mak irmaun ida presiza halo hodi bele ajuda? Nia presiza hakaʼas an atu kumpre kritériu husi Bíblia atu sai atan ministeriál no sai katuas ida. (1 Tim 3:1-10, 12, 13; Tito 1:5-9) Oinsá mak irmaun ida bele kumpre kritériu husi Bíblia? Hodi hola parte beibeik iha serbisu haklaken, hodi badinas tau matan ba ninia knaar sira iha kongregasaun, hodi hakaʼas an atu halo ninia komentáriu sai diʼak liután, no hodi hanoin kona-ba ninia maluk kristaun seluk nia diʼak. Hodi halo ida-neʼe, nia hatudu katak nia hafolin duni ninia serbisu iha kongregasaun kristaun.
12. Saida mak joven sira bele halo atu hatudu sira-nia laran-manas ba lia-loos?
12 Saida mak irmaun joven sira bele halo atu laʼo ba oin iha kongregasaun laran? Sira bele hakaʼas an atu “hatene loloos buat neʼebé Nia [Maromak] hakarak” hodi hatene Bíblia diʼak liután. (Kol 1:9) Sira bele halo ida-neʼe hodi estuda Bíblia ho badinas no hodi hola parte beibeik iha reuniaun. Joven sira mós bele hakaʼas an hodi bele tama ‘odamatan luan atu bele serbisu’ nuʼudar pioneiru, ka iha Betel. (1 Kor 16:9) Atu halo serbisu tempu tomak iha Maromak Jeová nia organizasaun mak dalan moris nian neʼebé kontente no lori bensaun barak.—Lee Eclesiastes 12:1.
13, 14. Iha dalan saida deʼit mak irmán sira hatudu katak sira hafolin sira-nia serbisu iha kongregasaun?
13 Irmán sira mós bele hatudu katak sira hafolin oportunidade espesiál atu hola parte atu kumpre Salmo 68:11, neʼebé hatete: “Maromak Jeová rasik mak hatete liafuan sira-neʼe; feto sira neʼebé fó sai lia-foun diʼak mak tropa neʼebé boot.” Sin, dalan importante ida atu irmán sira hatudu katak sira hafolin sira-nia serbisu iha kongregasaun kristaun mak hodi hola parte iha serbisu atu halo dixípulu. (Mt 28:19, 20) Tan neʼe, hodi hola parte beibeik iha serbisu haklaken no hodi prontu atu halo sakrifísiu ba serbisu neʼe, irmán sira hatudu katak sira hafolin sira-nia serbisu iha kongregasaun laran.
14 Paulo hakerek ba Tito hodi dehan: “Ferik sira sei moris nuʼudar ema neʼebé hamtaʼuk Maromak; . . . sai mestra diʼak bá, atu sira bele hanorin feto foin-saʼe sira atu hadomi sira-nia kaben no sira-nia oan sira, atu sai matenek no laran-loos, hatene serbisu, laran-diʼak, halo tuir sira laʼen nia hakarak; nuneʼe ema labele hateten aat Maromak nia liafuan.” (Tito 2:3-5) Irmán sira neʼebé iha esperiénsia kona-ba lia-loos bele book ema iha kongregasaun laran atu halo hahalok diʼak. Hodi hatudu respeitu ba irmaun sira neʼebé tau matan ba kongregasaun no hodi halo desizaun neʼebé loos kona-ba hatais no hadiʼa an no kona-ba atividade halimar nian, sira hatudu ezemplu neʼebé diʼak ba ema seluk no hatudu katak sira hafolin sira-nia serbisu iha kongregasaun kristaun.
15. Saida mak irmán ida neʼebé la kaben bele halo atu tahan kuandu sente mesak?
15 Dala ruma susar ba irmán sira neʼebé seidauk kaben atu hatene saida mak sira bele halo iha kongregasaun kristaun. Irmán ida neʼebé uluk sente hanesan neʼe hatete: “Moris nuʼudar ema neʼebé la kaben, dala ruma halo ita sente mesak.” Oinsá mak nia tahan hasoru situasaun neʼe? Nia hatete: “Halo orasaun no estuda Bíblia ajuda haʼu atu fiar katak haʼu iha serbisu neʼebé haʼu bele halo iha kongregasaun. Haʼu estuda kona-ba oinsá Aman Jeová nia haree ba haʼu. Depois haʼu hakaʼas an atu ajuda ema seluk iha kongregasaun. Halo ida-neʼe ajuda haʼu atu la hanoin kona-ba haʼu-nia an deʼit.” Tuir Salmo 32:8, Maromak Jeová hatete ba David: “Haʼu sei fó konsellu hodi tau matan ba ó.” Sin, Maromak Jeová hanoin kona-ba ninia atan ida-idak, inklui mós irmán neʼebé la kaben, no nia sei ajuda sira hotu atu hatene saida mak sira bele halo iha kongregasaun kristaun.
Nafatin halo ita-nia serbisu!
16, 17. (a) Tanbasá mak simu Maromak Jeová nia konvite atu sai parte iha ninia kongregasaun mak desizaun ida neʼebé diʼak liu hotu neʼebé ita halo? (b) Oinsá mak ita bele nafatin hafolin ita-nia serbisu iha Maromak Jeová nia kongregasaun?
16 Maromak Jeová ho domin dada ninia atan ida-idak atu iha relasaun diʼak ho nia. Jesus hatete: “Ema ida la bele hakbesik haʼu wainhira haʼu Aman neʼebé haruka haʼu mai la dada nia.” (Joao 6:44) Husi ema rihun ba rihun iha mundu tomak, ita mak Maromak Jeová konvida atu sai parte iha ninia kongregasaun. Simu konvite neʼe mak desizaun ida neʼebé diʼak liu hotu neʼebé ita halo. Ida-neʼe halo ita-nia moris kontente no iha esperansa. No ita haksolok duni tanba ita bele halo serbisu iha kongregasaun kristaun!
17 Ema neʼebé hakerek salmu ida hatete: “Jeová, haʼu gosta tebes uma neʼebé Ita hela . . . Haʼu-nia ain sei hamriik duni iha fatin neʼebé tetuk, iha ema-lubun boot neʼebé halibur hamutuk nia leet, haʼu sei hahiʼi Maromak Jeová.” (Sal 26:8, 12) Maromak neʼebé loos hakarak ita ida-idak atu halo serbisu iha ninia organizasaun. Hodi kontinua atu halo tuir matadalan husi Maromak no hodi badinas iha ninia serbisu, ita hatudu katak ita nafatin hafolin ita-nia serbisu iha Maromak Jeová nia kongregasaun.
Ita hanoin-hetan?
• Saida mak hatudu katak ita ida-idak iha serbisu iha kongregasaun kristaun?
• Oinsá mak ita hatudu katak ita hafolin ita-nia serbisu iha Maromak nia organizasaun?
• Saida deʼit mak kona ita-nia serbisu iha kongregasaun kristaun?
• Oinsá mak joven no ema boot bele hatudu katak sira hafolin sira-nia serbisu iha Maromak nia kongregasaun?
[Pergunta estudu nian]
[Dezeñu iha pájina 16]
Oinsá mak irmaun sira bele hakaʼas an atu hetan knaar iha kongregasaun?
[Dezeñu iha pájina 17]
Oinsá mak irmán sira hatudu katak sira hafolin sira-nia serbisu iha kongregasaun kristaun?