Hametin liután ita-nia domin ba malu
Hametin liután ita-nia domin ba malu
“Laʼo iha domin, hanesan Kristu hanorin imi.”—EF 5:2.
1. Jesus hatete katak ninia dixípulu sira sei hatudu hahalok saida?
EMA barak hatene katak Testemuña ba Jeová sempre haklaken lia-foun diʼak kona-ba Maromak nia Reinu husi uma ba uma. Maibé, Kristu Jesus fó sai buat seluk neʼebé sai nuʼudar sinál atu hatene ninia dixípulu neʼebé loos. Nia hatete: “Haʼu fó ba imi ukun-fuan foun: imi sei hadomi malu; nuʼudar haʼu hadomi imi, nuneʼe mós imi sei hadomi malu. Nuneʼe mak ema hotu sei hatene katak imi haʼu-nia eskolante sira: wainhira imi hadomi malu.”—Joao 13:34, 35.
2, 3. Oinsá mak ita-nia domin ba malu book ema neʼebé tuir ita-nia reuniaun kristaun sira?
2 La iha ema seluk neʼebé hatudu domin neʼebé kleʼan hanesan ema kristaun loos hatudu ba malu. Hanesan besi-asu dada besi seluk, nuneʼe mós domin dada Maromak Jeová nia atan sira atu sai hamutuk ida deʼit, no mós dada ema seluk ba adorasaun neʼebé loos. Porezemplu, hanoin toʼok kona-ba mane ida husi rai-Kamaroins, naran Marcelino neʼebé sai matan-delek iha serbisu-fatin. Depois asidente neʼe, ema barak hatete katak nia sai matan-delek tanba nia mak ema matan-dook ida. Pastór no ema seluk husi ninia igreja la fó laran-kmaan ba nia, maibé sira duni sai nia husi igreja. Kuandu Testemuña ba Jeová konvida Marcelino atu tuir reuniaun, nia sente laran-rua. Nia lakohi ema duni sai nia tan.
3 Maibé, Marcelino hakfodak ho buat neʼebé akontese iha Salaun Reinu. Ema simu nia ho laran-diʼak, no hanorin husi Bíblia neʼebé nia rona halo nia sente kmaan. Nia hahú tuir reuniaun hotu, estuda Bíblia, no ikusmai nia hetan batizmu iha tinan 2006. Agora nia fahe lia-loos ba ninia família no ema seluk, no nia mós estuda Bíblia ho sira balu. Marcelino hakarak ema sira neʼebé estuda Bíblia ho nia atu mós sente domin neʼebé nia simu husi Maromak nia povu.
4. Tanbasá mak ita tenke halo tuir Paulo nia konsellu atu “laʼo iha domin”?
4 Domin ba malu halo ita kontente, maibé ita hotu tenke halo buat ruma atu domin neʼe iha nafatin. Neʼe hanesan ahi iha kalan malirin. Ema hotu hakarak atu haneruk ahi neʼe. Maibé, se la aumenta ai, ahi bele mate. Nuneʼe mós, se ema ida-idak iha kongregasaun laran la hametin liután domin ba malu, domin neʼe bele mate. Oinsá mak ita hametin domin neʼe? Apóstolu Paulo hatete: “Laʼo iha domin, hanesan Kristu hanorin imi, hodi saran nia an nuʼudar buat karan ida mai ita; sakrifísiu neʼebé morin liu ba Maromak.” (Ef 5:2) Nuneʼe ita hakarak husu ita-nia an: ‘Oinsá mak haʼu bele nafatin laʼo iha domin?’
“Loke imi-nia laran bá!”
5, 6. Tanbasá mak Paulo husu ema Korintu atu ‘loke sira-nia laran bá’?
5 Apóstolu Paulo hakerek ba ema kristaun iha sidade Korintu: “Ami koʼalia momoos ba imi, Korintu oan sira: ami-nia fuan nakloke tebetebes. Ami la obriga imi; imi-nia hakarak rasik mak obriga imi. Atu selu haʼu ho buat ruma, (haʼu koʼalia hanesan ba haʼu-nia oan sira), haʼu husu imi: loke imi an bá! [loke imi-nia laran bá!, MF]” (2 Kor 6:11-13) Tanbasá mak Paulo husu ema Korintu atu loke sira-nia laran ba malu?
6 Hanoin toʼok oinsá kongregasaun iha Korintu hahú. Paulo toʼo sidade Korintu iha tinan 50 nia rohan. Maski ema balu kontra Paulo kuandu nia hahú haklaken iha neʼebá, maibé nia la para ninia haklaken. Iha tempu badak nia laran, ema barak iha sidade neʼe tau fiar ba lia-foun diʼak. Durante “tinan ida ho fulan neen” Paulo hanorin no hametin kongregasaun foun neʼe. Neʼe hatudu katak nia iha domin neʼebé kleʼan ba ema kristaun iha Korintu. (Apos 18:5, 6, 9-11) Tan neʼe, sira iha razaun barak atu hatudu domin ba nia. Maibé, sira balu iha kongregasaun neʼe hadook an husi nia. Karik sira balu la gosta tanba Paulo fó konsellu neʼebá la taka. (1 Kor 5:1-5; 6:1-10) Sira seluk karik rona ba lia-bosok husi “apóstolu boot sira”, katak apóstolu falsu sira. (2 Kor 11:5, 6) Paulo hakarak ninia maluk hotu atu hadomi nia. Tan neʼe, nia husu sira atu ‘loke sira-nia laran bá’ hodi hatudu domin ba nia no ba maluk iha kongregasaun.
7. Oinsá mak ita bele ‘loke ita-nia laran’ hodi hatudu domin ba malu?
7 Oinsá ho ita? Oinsá mak ita bele ‘loke ita-nia laran’ hodi hatudu domin neʼebé loos ba malu? Dala barak fasil ba ita atu hatudu domin ba sira neʼebé tinan besik hanesan ita, ka ba sira neʼebé mai husi rai neʼebé hanesan ita. No dala barak ita mós hakarak atu halibur hamutuk ho sira neʼebé gosta atu halo atividade halimar nian neʼebé ita mós gosta. Maibé, se ita ladún ransu ho maluk ida tanba razaun ruma, karik ita presiza loke ita-nia laran. Diʼak atu husu ita-nia an: ‘Iha irmaun ka irmán balu neʼebé haʼu ladún haklaken ka halimar ho sira ka lae? Iha Salaun Reinu, haʼu ladún koʼalia ho sira neʼebé foin tuir reuniaun tanba haʼu hanoin sira presiza tempu atu sai haʼu-nia belun ka lae? Haʼu kumprimenta ferik-katuas no joven sira iha kongregasaun ka lae?’
8, 9. Oinsá mak Paulo nia konsellu iha Roma 15:7 ajuda ita atu kumprimenta malu iha dalan neʼebé hametin liután ita-nia domin ba malu?
8 Paulo nia liafuan iha livru Roma kona-ba kumprimenta ita-nia maluk sira mós ajuda ita atu iha hanoin neʼebé loos kona-ba hatudu domin. (Lee Roma 15:7.) Lia-gregu neʼebé tradús nuʼudar “simu” iha versíkulu neʼe katak “simu ho laran-diʼak no laran-luak atu ema neʼe sai ita-nia belun”. Iha tempu Bíblia nian, kuandu uma-naʼin simu bainaka, uma-naʼin neʼe sempre fó-hatene katak nia kontente atu hasoru sira. Nuneʼe mós Kristu simu ita iha ninia kongregasaun kristaun, no nia hakarak ita atu simu maluk sira iha dalan neʼebé hanesan.
9 Kuandu ita hasoru ita-nia maluk sira iha reuniaun ka iha fatin seluk, dala ruma iha ema neʼebé ita la toman atu koʼalia ba sira ka neʼebé ita la hasoru ba tempu kleur uitoan. Diʼak se ita koko atu koʼalia ho sira balu, loos ka lae? Iha reuniaun tuirmai ita bele koʼalia ho sira balu seluk. Se ita halo nuneʼe, depois semana balu ita sei sente kontente tanba ita koʼalia ona ho irmaun-irmán hotu iha kongregasaun. Lalika hanoin barak se ita la bele koʼalia ho maluk hotu iha reuniaun ida deʼit. No ema ida labele laran-moras se ita la konsege koʼalia ho sira iha reuniaun hotu-hotu.
10. Ita hotu iha kongregasaun iha oportunidade saida? Nuneʼe ita hakarak halo saida?
10 Hodi kumprimenta mak hakat primeiru atu simu ema seluk. Tuirmai, ita bele koʼalia naruk ho ema neʼe no dala ruma ita sai belun diʼak ho ema neʼe. Porezemplu, iha reuniaun boot, ema ida kumprimenta no fó koñese nia an ba maluk ida, tuirmai sira koʼalia ba malu, no ikusmai sira hein tempu neʼebé sira bele hasoru malu fali. Baibain, irmaun-irmán neʼebé serbisu hamutuk atu harii Salaun Reinu, ka atu fó tulun iha tempu dezastre, sai belun diʼak tanba sira koñese malu diʼak no haree maluk nia hahalok diʼak. Tuir loloos, ita iha oportunidade barak atu hetan belun neʼebé diʼak iha Maromak Jeová nia organizasaun. Se ita ‘loke ita-nia laran’, ita sei iha belun barak liután, no ida-neʼe sei hametin liután domin neʼebé halo ita sai hamutuk ida deʼit iha adorasaun loos.
Fó tempu ba ema seluk
11. Jesus hatudu ezemplu saida iha Marcos 10:13-16?
11 Ema oioin la taʼuk atu hakbesik Jesus. Ita mós hakarak ema sente hanesan neʼe kona-ba ita. Hanoin toʼok kona-ba Jesus nia liafuan kuandu ninia dixípulu sira hapara inan-aman atu labele lori sira-nia oan ba Jesus. Nia hatete: “Husik labarik sira mai hakbesik haʼu; keta taka dalan ba sira. Loloos, reinu lalehan ba sira neʼebé hanesan neʼe.” Tuirmai, “nia hakoʼak labarik sira, tau liman ba sira hodi fó-bensa ba sira”. (Mc 10:13-16) Labarik sira-neʼe kontente tebes kuandu Mestre Boot, ho domin fó tempu ba sira, loos ka lae?
12. Toman saida mak bele hanetik ita atu koʼalia ho ema?
12 Ema kristaun ida-idak tenke husu nia an: ‘Haʼu toman atu fó tempu ba ema seluk ka haʼu sempre la iha tempu?’ Maski toman balu la sala, maibé toman sira-neʼe bele hanetik ema atu la koʼalia ho ita. Porezemplu, se ita uza beibeik ita-nia telefone, ka sempre uza buat ruma iha tilun atu rona ba múzika kuandu hamutuk ema seluk, ka uza beibeik komputadór kiʼik, karik ema hanoin katak ita la gosta atu koʼalia ho sira. Sin, iha “tempu atu nonook”. Maibé, kuandu hamutuk ho ema seluk, dala ruma neʼe mak “tempu atu koʼalia”. (Ecle 3:7) Dala ruma ema hatete: “Haʼu gosta liu atu mesak,” ka, “haʼu la gosta atu koʼalia ho ema iha dadeer-saan”. Maski nuneʼe, kuandu ita fó tempu ba ema seluk no koʼalia ba sira maski ita ladún gosta, ida-neʼe hatudu katak ita iha domin neʼebé ‘la buka ita rasik nia diʼak’.—1 Kor 13:5.
13. Paulo fó-hanoin ba Timóteo atu hatudu hahalok saida ba irmaun-irmán kristaun sira?
13 Paulo fó-hanoin ba Timóteo neʼebé klosan atu hatudu respeitu ba ema hotu iha kongregasaun laran. (Lee 1 Timoteo 5:1, 2.) Ita mós tenke koʼalia ho ema kristaun neʼebé idade boot liu ita hanesan ita koʼalia ba ita-nia aman ka inan, no ba sira neʼebé idade kiʼik liu nuʼudar ita rasik nia alin sira. Kuandu ita hatudu hahalok diʼak hanesan neʼe, ita-nia irmaun-irmán sira hotu sei sente katak ita mak sira-nia belun loos.
14. Rezultadu diʼak saida mak ita hetan hodi koʼalia ho ema seluk?
14 Nuʼudar ita koʼalia kona-ba buat neʼebé diʼak ba malu, ita ajuda irmaun-irmán atu sente kontente no sente besik ba Maromak no ninia organizasaun. Irmaun ida neʼebé serbisu iha sukursál ida hanoin-hetan kuandu nia foin tama iha Betel. Nia kontente tebes kuandu irmaun balu neʼebé idade ona uza tempu atu koʼalia ho nia, no ida-neʼe halo nia sente katak nia parte husi família Betel. Agora nia koko atu halo tuir sira hodi koʼalia ho maluk iha Betel.
Haraik-an ajuda ita atu buka dame
15. Oinsá mak ita hatene katak problema bele mosu entre ema kristaun neʼebé loos?
15 Feto kristaun naʼin-rua husi sidade Filipe antigu naran Evódia no Síntique sente susar atu rezolve problema neʼebé mosu entre sira. (Flp 4:2, 3) Ema barak hatene kona-ba diskute malu entre apóstolu Paulo no Barnabé, no ida-neʼe halo sira naʼin-rua haketak malu hodi laʼo ba fatin neʼebé la hanesan ba tempu uitoan. (Apos 15:37-39) Istória sira-neʼe hatudu katak dala ruma problema bele mosu entre ema kristaun neʼebé loos. Maromak Jeová fó ajuda atu ita bele rezolve problema ruma no hadiʼa fali relasaun nuʼudar belun. Maibé, nia mós hakarak ita atu halo buat ruma.
16, 17. (a) Tanbasá haraik-an importante atu rezolve problema entre maluk sira? (b) Oinsá mak istória kona-ba Jacob no Esaú hatudu katak importante atu hatudu haraik-an?
16 Hanoin toʼok Ita ho Ita-nia kolega atu bá fatin ida hamutuk iha karreta ida. Antes Ita komesa, Ita tenke hatama xave atu halo karreta moris. Atu rezolve problema mós komesa hodi uza xave ida. Xave neʼe mak haraik-an. (Lee Tiago 4:10.) Ezemplu husi Bíblia tuirmai, hatudu katak rezolve problema entre maluk sira komesa ho uza xave neʼe. Tuirmai, ema neʼebé iha problema bele halo tuir Bíblia nia matadalan seluk atu rezolve problema.
17 Tanba Esaú la simu bensaun nuʼudar oan-boot nia sai hirus ba nia kaduak Jacob, toʼo nia hakarak oho Jacob. Tinan ruanulu tuirmai, Jacob atu fila fali no hasoru Esaú. “Jacob sente taʼuk tebetebes no komesa hanoin barak” kona-ba neʼe. Nia hanoin katak karik Esaú sei ataka nia. Maibé, kuandu sira hasoru malu, Jacob halo buat ruma neʼebé halo Esaú hakfodak. Jacob “hahú hakruʼuk toʼo rai” nuʼudar nia hakbesik ba Esaú. Tuirmai, saida mak akontese? “Esaú halai hasoru nia no nia komesa hakoʼak nia no reʼi nia, no sira naʼin-rua tanis hamutuk.” Problema uluk nian la iha tan. Jacob nia haraik-an halakon Esaú nia laran-hirus, neʼebé karik nia rai ba tinan barak.—Gên 27:41; 32:3-8; 33:3, 4.
18, 19. (a) Kuandu problema mosu, tanbasá mak ita la presiza hein ba ema seluk atu ulukliu halo tuir Bíblia nia konsellu? (b) Kuandu ita koko atu buka dame, tanbasá mak ita keta lakon esperansa maski ema lakohi simu kedas?
18 Bíblia fó konsellu neʼebé diʼak tebes kona-ba rezolve problema entre ema. (Mt 5:23, 24; 18:15-17; Ef 4:26, 27) * Maibé, se ita la haraik an hodi halo tuir konsellu sira-neʼe, susar atu buka dame. Ita la bele rezolve problema kuandu ita hein ba ema seluk atu hatudu uluk haraik-an, tanba ita mós bele hatudu haraik-an.
19 Se ita koko atu buka dame ho ema maibé nia lakohi simu, keta lakon esperansa. Karik ema neʼe presiza tempu atu hanoin didiʼak kona-ba nia rasik nia sentimentu. José nia maun sira halo aat ba nia. Ba tempu kleur sira la haree José no sira la hatene katak nia sai primeiru ministru iha rai-Ejitu. Ikusmai, sira hakribi sira-nia sala, no kuandu sira hasoru nia, sira ho laran husu perdua. José fó perdua, no Jacob nia oan sira sai nasaun neʼebé lori Maromak Jeová rasik nia naran. (Gên 50:15-21) Entaun, kuandu ita koko atu buka dame ho irmaun-irmán sira seluk, ita hametin unidade no aumenta haksolok iha kongregasaun laran.—Lee Koloso 3:12-14.
Mai ita hadomi malu “ho hahalok no lia-loos”
20, 21. Jesus fase apóstolu sira-nia ain atu hanorin lisaun saida?
20 La kleur antes Jesus mate, nia hatete ba ninia apóstolu sira: “Haʼu fó ezemplu ba imi, atu, nuʼudar haʼu foin halo ba imi, imi mós banati-tuir.” (Joao 13:15) Nia foin fase apóstolu naʼin-12 nia ain. Neʼe laʼós atu tuir lisan deʼit, no neʼe mós laʼós atu hatudu laran-diʼak deʼit. Apóstolu João hakerek katak Jesus “hadomi tiha nia doben sira neʼebé hela iha mundu, nia hadomi sira toʼo rohan”. (Joao 13:1) Nuneʼe, domin mak book Jesus atu fase ninia dixípulu sira-nia ain, serbisu neʼebé baibain atan mak halo. Jesus hatudu katak dixípulu sira mós presiza hatudu domin liuhusi hahalok. Sin, domin loos tenke book ita atu hanoin no ajuda ita-nia irmaun-irmán hotu.
21 Maromak nia Oan fase apóstolu Pedro nia ain, no nia komprende duni lisaun neʼebé Jesus hanorin. Pedro hakerek: “Tanba imi hamoos tiha imi-nia moris hodi halo tuir lia-loos, imi hadomi imi-nia maluk ho loloos, nuneʼe hadomi malu bá ho laran.” (1 Ped 1:22, MF) Jesus mós fase apóstolu João nia ain, no João hakerek: “Haʼu-nia oan sira, keta hadomi ho liafuan deʼit; maibé ho hahalok no lia-loos.” (1 Joao 3:18) Mai ita hotu hatudu katak ita hadomi ho laran ita-nia maluk sira liuhusi ita-nia hahalok.
[Nota–rodapé]
^ par. 18 Haree livru Diorganisasi untuk Melakukan Kehendak Yehuwa, pájina 144-150.
Ita hanoin-hetan?
• Iha dalan saida deʼit mak ita bele ‘loke ita-nia laran’ hodi hatudu domin ba malu?
• Saida mak sei ajuda ita atu fó tempu ba ema seluk?
• Tanbasá mak haraik-an ajuda ita atu buka dame?
• Saida mak book ita atu hanoin no ajuda ita-nia maluk kristaun?
[Pergunta estudu nian]
[Dezeñu iha pájina 21]
Simu maluk kristaun ho laran-diʼak
[Dezeñu iha pájina 23]
Buka oportunidade atu fó tempu ba ema seluk