Labarik-feto neʼebé laran-luak

FOIN lalais, labarik-feto ida iha rai-Brazíl ho tinan sia, ho nia hakarak rasik, nia haketak ba parte rua osan neʼebé nia rai, parte ida hamutuk dolar 18, no parte ida seluk hamutuk dolar 25. Nia tau osan neʼebé kiʼik liu iha kaixa kontribuisaun iha ninia Salaun Reinu atu kongregasaun bele uza ba buat neʼebé presiza. Tuirmai, osan neʼebé boot liu nia haruka ba sukursál husi Testemuña ba Jeová, hamutuk ho karta badak ida. Iha nia karta, nia dehan: “Haʼu hakarak fó osan neʼe ba serbisu iha mundu tomak. Haʼu hakarak ajuda irmaun no irmán sira iha mundu tomak atubele haklaken lia-foun diʼak. Haʼu fó osan neʼe tanba haʼu hadomi tebes Maromak Jeová.”

Labarik-feto kiʼik neʼe nia inan-aman hanorin nia katak importante tebes atu nia rasik hola parte iha serbisu haklaken kona-ba Maromak nia Reinu. Ninia inan-aman mós hanorin nia katak nia presiza ‘hahiʼi Maromak Jeová ho ninia sasán neʼebé folin’. (Prov 3:9) Hanesan labarik-feto kiʼik neʼe, mai ita hotu hola parte ho laran-manas atu apoia serbisu Reinu nian, iha ita-nia kongregasaun rasik no iha mundu tomak!