Orasaun hatudu saida kona-ba ita-nia relasaun ho aman Jeová?
Orasaun hatudu saida kona-ba ita-nia relasaun ho aman Jeová?
“Oh, Ita neʼebé rona orasaun, ba Ita deʼit mak ema oioin sei mai.”—SAL 65:2.
1, 2. Maromak Jeová nia atan sira bele fiar saida kuandu sira halo orasaun ba nia?
MAROMAK JEOVÁ nunka taka tilun ba nia atan sira neʼebé laran-metin nia harohan. Ita bele fiar duni katak nia rona ba ita. Maski ema rihun ba rihun husi Testemuña ba Jeová halo orasaun iha tempu neʼebé hanesan, maibé Maromak rona sira ida-idak.
2 Tanba David fiar katak Maromak hatán ba ninia harohan, nia hakerek knananuk ida-neʼe: “Oh, Ita neʼebé rona orasaun, ba Ita deʼit mak ema oioin sei mai.” (Sal 65:2) Maromak hatán David nia orasaun tanba nia adora Maromak Jeová ho laran-metin. Tan neʼe, diʼak atu husu ba ita-nia an pergunta sira-neʼe: ‘Haʼu-nia orasaun hatudu katak haʼu tau fiar ba Maromak Jeová no katak adorasaun neʼebé loos mak importante tebes mai haʼu? Haʼu-nia orasaun hatudu saida kona-ba haʼu-nia relasaun ho Aman Jeová?’
Hakbesik ba Aman Jeová ho haraik-an
3, 4. (a) Kuandu halo orasaun, ita presiza hatudu hahalok saida? (b) Saida mak ita tenke halo se ita sente “neon-susar” kona-ba sala boot?
3 Se ita hakarak Maromak rona ita-nia orasaun, ita tenke halo ida-neʼe ho haraik-an. (Sal 138:6) Ita tenke husu Maromak Jeová atu haree ita-nia laran, hanesan David halo, nia dehan: “Oh, Maromak, buka didiʼak haʼu bá, no hatene haʼu-nia laran. Haree didiʼak bá, no hatene haʼu-nia neon-susar, no haree se iha haʼu-nia laran iha hahalok ruma neʼebé lori susar. No, lori haʼu ba iha dalan rohan-laek nian.” (Sal 139:23, 24) Kuandu ita halo orasaun laʼós deʼit atu husu, maibé ita mós hakarak simu konsellu husi Maromak nia Liafuan. Hodi halo nuneʼe, Maromak Jeová bele lori ita “iha dalan rohan-laek nian”, katak ajuda ita atu hetan moris rohan-laek.
4 Maibé, oinsá se ita sente “neon-susar” tanba halo sala boot? (Lee Salmo 32:1-5.) Kuandu ita koko atu subar ita-nia sala, ida-neʼe bele halo fraku ita, hanesan ai-hun neʼebé sai maran tanba rai-manas. Tanba David halo sala, ida-neʼe halakon ninia kontente no karik halo nia sai moras. Maibé, kuandu nia fó-hatene ninia sala ba Maromak, nia sente kmaan duni! Hanoin toʼok kona-ba David nia kontente kuandu nia sente katak Maromak Jeová perdua duni ninia sala. Bainhira ema fó-hatene ninia sala ba Maromak, ida-neʼe bele halo nia sente kmaan. No mós, hodi hetan ajuda husi katuas kristaun sira mak nia bele hetan fali ninia relasaun diʼak ho Maromak.—Prov 28:13; Tgo 5:13-16.
Harohan no fó-agradese ba Maromak
5. Harohan ba Maromak Jeová katak sá?
5 Se ita sente laran-susar kona-ba buat ruma, ita presiza halo tuir apóstolu Paulo nia konsellu tuirmai neʼe: “Imi keta laran-taridu kona-ba buat ruma. Iha buat hotu, harohan no hamulak bá hodi fó-agradese; hatoʼo imi-nia harohan ba Maromak.” (Flp 4:6) “Harohan” katak “husu ho haraik-an”. Liuliu kuandu ita hasoru perigu ka terus ruma, ita tenke husu Maromak Jeová nia matadalan no ajuda.
6, 7. Iha ita-nia orasaun ba Maromak, ita tenke fó-agradese kona-ba saida deʼit?
6 Maibé, se ita halo orasaun tanba deʼit ita presiza buat ruma, ida-neʼe sei hatudu saida kona-ba ita-nia relasaun ho Maromak Jeová? Paulo hatete katak ita tenke harohan ba Maromak “hodi fó-agradese”. Ita iha razaun barak atu sente hanesan David sente kuandu nia dehan: “Ita-nian, Oh, Jeová, mak kbiit no forsa no furak no kmanek no respeitu; tanba buat hotu neʼebé iha lalehan no rai mak Ita-nian. Reinu, mak Ita-nian, Oh, Jeová, Ida neʼebé halo Ita-nia an nuʼudar ulun ba buat hotu. . . . Oh, ami-nia Maromak, ami fó-agradese ba Ita no hahiʼi Ita-nia naran neʼebé furak.”—1 Crôn 29:11-13.
7 Jesus fó obrigadu ba hahán, ba paun no tua-uvas iha Naʼi nia Han-Kalan. (Mt 15:36; Mc 14:22, 23) Laʼós deʼit fó-agradese kona-ba hahán, maibé ita mós tenke “fó-agradese ba Maromak Jeová” tanba “ninia serbisu diʼak sira neʼebé nia halo ba ema”, tanba nia “tesi lia iha dalan neʼebé loos”, no tanba ninia liafuan neʼebé hakerek iha Bíblia laran.—Sal 107:15; 119:62, 105.
Halo orasaun ba ema seluk
8, 9. Tanbasá mak ita tenke halo orasaun kona-ba ita-nia irmaun-irmán sira?
8 Diʼak katak ita hakarak halo orasaun kona-ba ita-nia an, maibé diʼak atu ita mós halo orasaun kona-ba ema seluk, inklui sira neʼebé ita la hatene sira-nia naran. Maski apóstolu Paulo ladún koñese ema kristaun hotu iha Kolosos, maibé nia hakerek: “Ami fó-agradese nafatin ba Maromak, Naʼi Jesus Kristu nia Aman, wainhira ami reza hodi hanoin imi, basá ami rona kona-ba imi-nia domin ba Maromak nia povu tomak.” (Kol 1:3, 4) Paulo mós halo orasaun kona-ba ema kristaun iha Tesalonika. (2 Tes 1:11, 12) Orasaun sira hanesan neʼe bele hatudu buat barak kona-ba ita no hatudu mós oinsá ita-nia hanoin kona-ba ita-nia irmaun-irmán sira.
9 Ita-nia orasaun kona-ba ema kristaun kose-mina sira no sira-nia maluk “bibi seluk”, hatudu katak ita hanoin kona-ba Maromak nia organizasaun. (Joao 10:16) Paulo husu ninia maluk fiar-naʼin sira atu halo orasaun ba nia atu nia “bele koʼalia ho aten-barani hodi fó sai buat hotu neʼebé subar hela iha evanjellu”. (Ef 6:17-20) Ita halo orasaun kona-ba ema kristaun seluk iha dalan hanesan neʼe ka lae?
10. Halo orasaun kona-ba ema seluk bele book ita atu halo saida?
10 Halo orasaun kona-ba ema seluk bele ajuda ita atu iha hanoin neʼebé diʼak kona-ba sira. Se halo orasaun ba ema neʼebé ita ladún gosta, ida-neʼe bele ajuda ita atu hatudu laran-diʼak ba nia. (1 Joao 4:20, 21) Halo orasaun hanesan neʼe bele haburas unidade iha ita-nia maluk sira leet. Liután neʼe, orasaun hanesan neʼe hatudu katak ita iha domin hanesan Kristu. (Joao 13:34, 35) Domin mak parte ida husi hahalok neʼebé Maromak nia espíritu lori mai. Ita rasik husu Maromak Jeová nia espíritu santu atu ajuda ita atu hatudu hahalok neʼebé espíritu lori mai, hanesan domin, ksolok, dame, pasiénsia, laran-diʼak, laran-luak, fiar, laran-maus no kontrola an, ka lae? (Lc 11:13; Gal 5:22, 23) Se nuneʼe, ita-nia liafuan no hahalok sei hatudu katak ita laʼo tuir espíritu.—Lee Galasia 5:16, 25.
11. Tanbasá mak diʼak atu husu ema seluk atu halo orasaun ba ita?
11 Se ita hatene katak ita-nia oan iha hakarak atu bosok iha ninia ezame, ita tenke halo orasaun kona-ba nia no mós hatudu ba nia matadalan husi Bíblia neʼebé sei ajuda nia atu nafatin laran-moos no atu nia la halo hahalok ruma neʼebé sala. Paulo hatete ba ema kristaun iha Korintu: “Ami harohan ba Maromak atu imi labele halo buat aat.” (2 Kor 13:7) Orasaun ho haraik-an iha dalan hanesan neʼe halo Maromak Jeová kontente, no ida-neʼe mós hatudu buat barak kona-ba ita. (Lee Provérbios 15:8.) Ita mós bele husu ema seluk atu halo orasaun ba ita, hanesan apóstolu Paulo halo. Nia hakerek: “Ami hatene loloos katak ami rasik nia laran moos, no ami hakarak duni atu moris ho laran moos iha buat hotu neʼebé ami halo. Haʼu husu imi-nia orasaun ho laran-manas.”—Ebr 13:18, 19.
Ita-nia orasaun hatudu buat seluk tan
12. Buat saida deʼit mak importante atu ita hatoʼo iha ita-nia orasaun?
12 Ita-nia orasaun hatudu katak ita mak Maromak Jeová nia Testemuña neʼebé kontente no laran-manas ka lae? Kuandu ita harohan ita hatudu katak ita harohan tuir Maromak nia hakarak, katak ita hafolin serbisu haklaken, katak ita hakarak defende Maromak Jeová nia direitu atu ukun, no katak ita hakarak Maromak nia naran sai santu, ka lae? Kona-ba buat sira-neʼe mak importante atu ita hatoʼo iha ita-nia orasaun. Orasaun neʼebé Jesus hanorin hahú ho liafuan tuirmai neʼe: “Ami Aman iha lalehan, halo Ita naran sai santu. Halo Ita-nia reinu toʼo mai ami; halo tuir Ita-nia hakarak ba iha rai nuʼudar iha lalehan.”—Mt 6:9, 10.
13, 14. Ita-nia orasaun hatudu saida kona-ba ita?
13 Ita-nia orasaun ba Maromak hatudu kona-ba ita-nia hakarak, no buat neʼebé ita gosta. Maromak Jeová hatene ita-nia laran. Provérbios 17:3 hatete: “Sanan atu halo nabeen mak uza ba osan-mutin no fornu mak uza ba osan-mean, maibé Maromak Jeová mak ida neʼebé buka-hatene ema nia laran.” Sin, Maromak haree saida mak iha ita-nia fuan. (1 Sam 16:7) Nia hatene kona-ba oinsá ita sente kona-ba ita-nia reuniaun sira, kona-ba ita-nia serbisu haklaken, no kona-ba ita-nia irmaun-irmán sira. Maromak Jeová hatene saida mak ita-nia hanoin kona-ba Kristu nia “alin kiʼik sira”. (Mt 25:40) Nia hatene saida loos mak ita hakarak iha ita-nia orasaun ka se ita repete deʼit ita-nia orasaun. Jesus hatete: “Wainhira imi reza, keta koʼalia barak hanesan jentiu sira; sira hanoin katak ho sira-nia liafuan barabarak, Naʼi sei rona sira.”—Mt 6:7.
14 Buat neʼebé ita hatoʼo iha ita-nia orasaun mós bele hatudu se ita loloos sadere ba Maromak ka lae. David hatete: “Ita [Jeová] hatudu ona nuʼudar fatin seguru ba haʼu, fatin aas neʼebé metin kuandu inimigu hasoru haʼu. Haʼu sei sai bainaka iha Ita-nia tenda toʼo tempu neʼebé la bele sura; haʼu sei buka protesaun iha Ita-nia liras nia okos.” (Sal 61:3, 4) Kuandu Maromak nia tenda fó mahon mai ita, ita sente seguru no haksolok tanba nia “tau matan” mai ita. (Apok 7:15) Ita haksolok atu hakbesik ba Aman Jeová iha orasaun tanba ita fiar katak nia sei ‘iha ita-nia sorin’ kuandu buat ruma koko ita-nia fiar!—Lee Salmo 118:5-9.
15, 16. Oinsá mak orasaun bele ajuda ita atu hatene tanbasá mak ita hakarak atu hetan knaar ruma iha kongregasaun?
15 Hodi koʼalia nakloke ba Maromak Jeová kona-ba ita-nia hakarak bele ajuda ita atu hatene ho klaru se hakarak ida-neʼe diʼak ka lae. Porezemplu, ita hakarak atu hetan knaar atu tau matan ba Maromak nia povu tanba ita hakarak serbí ho haraik-an no atu halo buat hotu neʼebé ita bele iha Maromak nia serbisu ka lae? Ka, karik ita hakarak serbí tanba ita hakarak ‘buka deʼit ita-nia an’ ka “ukun ho kroʼat” ba ema seluk? Maromak Jeová la gosta hahalok sira-neʼe. (Lee 3 Joao 9, 10; Lucas 22:24-27.) Kuandu iha hakaak neʼebé sala, koʼalia nakloke ba Maromak Jeová iha orasaun mak bele ajuda ita atu hatene no troka hahalok sira-neʼe antes sai metin no susar liu atu halakon.
16 Feen kristaun sira karik hakarak sira-nia laʼen serbí nuʼudar atan ministeriál no ikusmai serbí nuʼudar katuas. Karik irmán sira-neʼe halo tuir sira-nia orasaun hodi hakaʼas an atu hatudu ezemplu diʼak. Ida-neʼe importante tanba koʼalia no hahalok husi irmaun ida nia família bele kona oinsá ema iha kongregasaun haree irmaun neʼe.
Orasaun iha ema barak nia oin
17. Tanbasá mak ita presiza buka tempu atu halo orasaun mesamesak?
17 Dala barak Jesus hadook an husi ema barak hodi nia bele halo orasaun mesamesak ba nia Aman. (Mt 14:13; Lc 5:16; 6:12) Ita mós presiza buka tempu atu halo orasaun mesamesak. Halo orasaun iha situasaun neʼebé hakmatek, bele ajuda ita atu halo desizaun neʼebé halo kontente Aman Jeová no ajuda ita atu hamriik metin iha ita-nia adorasaun ba nia. Maibé, Jesus mós halo orasaun iha ema barak nia oin. Tan neʼe, diʼak atu ita hanoin kona-ba oinsá mak ita bele halo ida-neʼe iha dalan neʼebé diʼak.
18. Saida mak irmaun sira presiza hanoin-hetan kuandu halo orasaun iha ema barak nia oin?
18 Iha ita-nia reuniaun sira, irmaun sira neʼebé laran-metin mak reprezenta kongregasaun atu halo orasaun. (1 Tim 2:8) Kuandu irmaun ida halo orasaun, ema hotu presiza dehan “amen”, katak “loos duni” iha orasaun nia rohan. Maibé, atu halo ida-neʼe, sira presiza komprende no simu buat neʼebé hatoʼo iha orasaun neʼe. Iha orasaun Ami Aman, Jesus la temi buat neʼebé halo ema hakfodak ka hakanek ema nia laran. (Lc 11:2-4) Liután neʼe, Jesus la temi ema ida-idak nia presiza ka problema neʼebé rona-naʼin ida-idak hasoru. Buat neʼebé rona-naʼin ida-idak presiza ka sira ida-idak nia problema bele hatoʼo deʼit iha orasaun mesamesak, laʼós iha ema barak nia oin. No mós, kuandu ita reprezenta grupu ida iha orasaun, ita labele dehan sai buat ruma neʼebé ema seluk la presiza hatene.
19. Oinsá mak ita-nia hahalok durante orasaun iha kongregasaun?
19 Kuandu irmaun ida reprezenta ita iha orasaun, ita presiza hatudu katak ita “hamtaʼuk Maromak”. (1 Ped 2:17) Iha hahalok ruma neʼebé la sala atu halo iha tempu seluk ka fatin seluk, maibé ita labele halo hahalok sira-neʼe iha reuniaun kristaun. (Ecle 3:1) Porezemplu, karik ema ida hakarak atu ema hotu iha liña ida kaer liman durante orasaun. Ida-neʼe bele halo ema balu sente la diʼak ka dada sira-nia atensaun, inklui sira neʼebé tuir reuniaun maibé seidauk sai Testemuña ida. Kaben-naʼin balu bele kaer liman iha dalan neʼebé la dada atensaun, maibé se sira hakoʼak malu durante orasaun, ida-neʼe bele halo sidi ema neʼebé karik haree hahalok neʼe. Karik ema hanoin katak kaben-naʼin neʼe hanoin liu kona-ba sira-nia relasaun nuʼudar feen-laʼen duké hatudu hamtaʼuk ba Maromak Jeová. Nuneʼe, mai ita “halo buat hotu-hotu ba Maromak nia glória” tanba ita respeitu nia no hakarak hasees an husi hahalok neʼebé bele dada ema nia atensaun, halo ema hakfodak, ka halo sidi ema ruma.—1 Kor 10:31, 32; 2 Kor 6:3.
Halo orasaun kona-ba saida?
20. Esplika toʼok Roma 8:26, 27.
20 Dala ruma, ita la hatene saida mak ita hakarak hatoʼo iha ita-nia orasaun mesak. Paulo hatete: “Ita la hatene harohan loloos, maibé espíritu [santu] rasik harohan hodi tanis hakilar makaʼas hanesan liafuan la bele hatoʼo. No [Maromak] Ida neʼebé hatene momoos ema nia fuan hatene buat neʼebé iha espíritu nia laran.” (Rom 8:26, 27) Maromak Jeová book ema atu hakerek orasaun barak iha Bíblia laran. No mós, Maromak simu orasaun sira-neʼe nuʼudar orasaun neʼebé ita halo kuandu ita la hatene saida mak ita bele hatete iha orasaun. Maromak hatene ita, no nia hatene orasaun neʼebé ninia espíritu book ema atu hakerek iha Bíblia. Maromak Jeová hatán ba buat neʼebé ita husu kuandu espíritu santu rasik “harohan” ba ita. Maibé, nuʼudar ita hatene diʼak liután kona-ba Maromak nia Liafuan, sei fasil liu ba ita atu hatene saida mak ita bele hatete iha orasaun.
21. Saida mak ita sei estuda iha lisaun tuirmai?
21 Hanesan buat neʼebé ita aprende tiha ona, ita-nia orasaun hatudu buat barak kona-ba ita. Porezemplu, orasaun bele hatudu se ita-nia relasaun ho Maromak Jeová besik liu, no se ita hatene didiʼak ninia Liafuan ka lae. (Tgo 4:8) Iha lisaun tuirmai, ita sei estuda kona-ba orasaun balu neʼebé hakerek iha Bíblia laran. Oinsá mak haree didiʼak ba informasaun neʼe sei ajuda ita kuandu ita hakbesik ba Maromak iha orasaun?
[Oinsá Ita hatán?
• Kuandu halo orasaun, ita presiza hatudu hahalok saida?
• Tanbasá mak ita tenke halo orasaun kona-ba ita-nia irmaun-irmán sira?
• Ita-nia orasaun hatudu saida kona-ba ita no ita-nia hakarak?
• Oinsá mak ita-nia hahalok durante orasaun iha kongregasaun?
[Pergunta estudu nian]
[Dezeñu iha pájina 4]
Ita fó obrigadu no hahiʼi beibeik Maromak Jeová ka lae?
[Dezeñu iha pájina 6]
Ita-nia hahalok durante orasaun tenke hatudu katak ita hamtaʼuk Maromak Jeová