Badinas no kontente iha Maromak nia serbisu

MAROMAK JEOVÁ hakarak Ita atu moris kontente. (Sal 100:2) Nuʼudar Maromak nia atan, karik Ita mós iha buat barak neʼebé halo Ita okupadu. Karik, uluk kuandu Ita foin dedika Ita-nia an ba Maromak, Ita ladún okupadu. Maibé agora, serbisu hodi buka moris no mós Ita-nia responsabilidade ba Maromak halo Ita okupadu liu. Karik Ita sente triste kuandu Ita la bele halo buat hotu neʼebé Ita planu ona atu halo. Oinsá mak Ita bele fahe didiʼak Ita-nia tempu no sente nafatin “Maromak Jeová nia ksolok”?—Neem 8:10.

Tanba Ita moris iha tempu neʼebé iha susar barak, Ita presiza uza Ita-nia tempu ho diʼak. Kona-ba neʼe, apóstolu Paulo fó konsellu neʼebé diʼak, nia dehan: “Neʼe duni, haree oinsá imi moris. Keta moris hanesan ema beik, maibé hanesan ema matenek. Uza buat hotu neʼebé diʼak, basá loron sira-neʼe aat.”—Ef 5:15, 16.

Entaun, oinsá mak Ita bele moris hanesan ema matenek hodi uza Ita-nia tempu ho diʼak? Oinsá mak Ita bele halo planu kona-ba uza tempu atu estuda mesak, tau matan ba família, serbisu haklaken, serbisu atu manán osan, no atu halo buat seluk tan?

Ita hanoin-hetan kuandu Ita dedika Ita-nia an ba Maromak no hetan batizmu, Ita kontente tebes, loos ka lae? Ita kontente tanba Ita aprende kona-ba Maromak Jeová no ninia hakarak. Karik Ita gasta tempu barak atu estuda Bíblia ho badinas, maibé neʼe la saugati deʼit. Liuhusi estudu neʼe, Ita hadiʼa Ita-nia moris no sai kontente liu.

Atu nafatin kontente, Ita presiza kontinua simu ai-han espirituál. Se susar ba Ita atu buka tempu hodi estuda Bíblia, hanoin fali oinsá Ita uza Ita-nia tempu loroloron. Maski Ita uza minutu balu deʼit loroloron atu estuda no hanoin kleʼan kona-ba buat neʼebé Ita estuda, ida-neʼe sei ajuda Ita atu hametin Ita-nia relasaun ho Maromak Jeová no halo Ita kontente.

Baibain, ita bele hetan tempu atu halo buat neʼebé importante liu hodi hamenus tempu ba buat neʼebé ladún importante. Husu ba Ita-nia an: ‘Haʼu uza tempu hira atu haree televizaun, rona múzika, lee jornál, no halimar seluk?’ Atividade sira-neʼe bele halo ita kontente, maibé ita presiza kuidadu atu la halo demais. (1 Tim 4:8)  Se Ita sente katak Ita la uza Ita-nia tempu ho diʼak, hakaʼas an atu halo mudansa ruma ba Ita-nia moris.

Adão, neʼebé serbí nuʼudar katuas iha kongregasaun no iha oan naʼin-tolu, esplika saida mak ajuda nia: “Haʼu hakaʼas an atu moris simples. Haʼu sees an husi halimar no sasán neʼebé han tempu barak. Laʼós katak haʼu la gosta atu halimar, maibé haʼu kontente ho halimar neʼebé simples deʼit.”

Hodi hanoin oinsá mak Ita-nia desizaun sira neʼebé Ita foti ona lori rezultadu diʼak, ida-neʼe ajuda Ita atu sente kontente no la hanoin barak. Porezemplu, katuas ida naran Marius neʼebé iha oan naʼin-tolu, hatete: “Kuandu haʼu komesa estuda Bíblia, haʼu komesa iha esperansa kona-ba futuru. Dala ruma haʼu hasoru susar neʼebé Maromak Jeová deʼit mak hatene, maibé ho nia ajuda, haʼu sente kontente nafatin ho esperansa ba futuru.”

Hanesan ho Marius, esperansa kona-ba futuru la bele halakon ita-nia susar hotu. Maibé ida-neʼe ajuda ita atu sente kmaan no tahan hasoru susar iha ita-nia moris. Bíblia hatete: “Ema neʼebé iha terus laran, nia loron hotu aat; maibé ema neʼebé laran-haksolok sempre iha festa.” (Prov 15:15) Hanoin mós kona-ba domin neʼebé Maromak hatudu ona ba ita. Hodi halo nuneʼe, ita bele haburas ita-nia domin ba Maromak no sente haksolok neʼebé mai husi Maromak.—Mt 22:37.

Liután neʼe, se família tau uluk Maromak Jeová no ninia hakarak iha sira-nia moris, sira bele sai kontente liu. Hatudu hahalok nuʼudar ema kristaun bele hamenus problema iha uma-laran, halo família sai besik malu. Nuneʼe, ita-nia uma sei sai fatin neʼebé nakonu ho dame.—Sal 133:1.

Família sira neʼebé hola parte hamutuk iha atividade atu serbí Maromak aumenta sira-nia haksolok. Marius hatete: “Tempu neʼebé ami hamutuk nuʼudar família, importante tebes mai haʼu. Haʼu-nia feen sempre apoia haʼu. Kuandu haʼu halo buat ruma hanesan bá haklaken ka bá hamoos salaun atu uza ba reuniaun boot, nia hakaʼas an atu tuir haʼu. No nia sempre hamutuk ho haʼu kuandu haʼu bá kongregasaun seluk atu hatoʼo diskursu. Ida-neʼe fó laran-manas mai haʼu.”

Bíblia haruka ema kristaun atu tau matan ba família nia presiza. (1 Tim 5:8) Maibé, se Ita-nia serbisu uza tempu barak no halo Ita sempre kole, susar ba Ita atu serbí Maromak ho kontente. Se nuneʼe, halo orasaun ba Maromak Jeová kona-ba neʼe. (Sal 55:22) Irmaun balu buka serbisu seluk hodi sira bele tau uluk Maromak nia Reinu. Maski Ita bele manán osan barak, maibé labele husik serbisu neʼe hanetik Ita atu halo buat neʼebé importante liu, neʼe mak Ita-nia responsabilidade sira nuʼudar ema kristaun.—Prov 22:3.

Atu halo desizaun ho matenek, karik Ita bele hakerek buat neʼebé diʼak no ladiʼak kona-ba serbisu neʼebé Ita iha ka serbisu neʼebé Ita buka hela. Sin, ita hotu hakarak serbisu neʼebé diʼak no manán osan barak. Maibé serbisu neʼebé Ita halo daudauk fó tempu ba Ita atu ajuda Ita-nia família haburas sira-nia relasaun ho Maromak ka lae? Hanoin didiʼak kona-ba neʼe, no foti desizaun neʼebé bele ajuda Ita tau uluk Ita-nia relasaun ho Maromak Jeová.

Se serbisu neʼebé Ita halo daudauk halo susar ba Ita atu laʼo ba oin iha lia-loos, Ita presiza troka Ita-nia situasaun. Ema kristaun barak troka sira-nia serbisu hodi sira bele iha tempu barak liu atu serbí Maromak. Irmaun ida husi rai-Polónia, hatete: “Uluk haʼu la iha tempu ba buat espirituál no mós ba família tanba haʼu-nia serbisu sempre bá fatin dook. Tan neʼe, haʼu hili atu husik serbisu neʼe.” Agora, irmaun neʼe halo serbisu neʼebé la uza nia tempu barak no la halo nia kole demais.

Sai kontente hodi ajuda ema seluk

Jesus hatete: “Diʼak liu fó liu fali simu.” (Apos 20:35) Ema kristaun iha oportunidade barak atu halo ida-neʼe. Porezemplu, hodi hatudu oin-midar, kaer liman, ka fó obrigadu ba irmaun ka irmán nia serbisu badinas ba Maromak, neʼe bele halo sira no mós Ita sai kontente.

Apóstolu Paulo fó-hanoin nia maluk kristaun sira atu “fó aten-brani ba sira neʼebé taʼuk; tau matan ba sira neʼebé kbiit-laek”. (1 Tes 5:14, 15)  Ema neʼebé “taʼuk”, ka laran-tun, sente katak ninia forsa latoʼo atu tahan problema neʼebé nia hasoru. Ita bele ajuda ema hanesan neʼe ka lae? Se Ita haree katak Ita-nia irmaun ka irmán ruma ladún kontente ona atu serbí Maromak Jeová, koko atu ajuda nia. Hodi halo nuneʼe, Ita mós bele sai kontente. Dala ruma problema neʼebé ita-nia maluk hasoru, ita ema la bele rezolve. Maski nuneʼe, ita bele hatudu katak ita hanoin nia, no fó laran-manas ba nia atu sadere ba Maromak Jeová, neʼebé sempre ajuda ninia atan. Sira neʼebé tau fiar ba Maromak Jeová sempre hetan kmaan.—Sal 27:10; Isa 59:1.

Buat seluk tan neʼebé ita bele halo mak konvida ita-nia maluk neʼebé laran-tun atu haklaken hamutuk. Kuandu Jesus haruka nia dixípulu naʼin-70 atu bá haklaken, nia haruka “sira rua-rua”. (Lc 10:1) Ita bele fiar katak Jesus halo nuneʼe atu sira bele fó laran-manas ba malu, loos ka lae? Ohin loron ita mós bele ajuda ita-nia maluk atu sai kontente fali hodi haklaken hamutuk.

Loos, ita-nia moris iha buat barak neʼebé bele halo ita laran-susar. Maski nuneʼe, apóstolu Paulo fó konsellu mai ita: “Haksolok iha Naʼi nafatin, dala ida tan haʼu dehan: Haksolok bá!” (Flp 4:4) Tanba ita hadomi no halo tuir Maromak, no mós badinas atu halaʼo knaar neʼebé nia haraik ba ita, ita-nia moris iha folin, no halo ita kontente. Liután neʼe, Maromak Jeová sempre ajuda ita atu tahan susar neʼebé ita hasoru.—Rom 2:6, 7.

Ita fiar duni katak mundu foun neʼebé Maromak Jeová promete, besik ona. No iha tempu neʼebá ita sei simu bensaun barak tebetebes! (Sal 37:34) Laʼós neʼe deʼit, agora Maromak Jeová haraik bensaun barak ba ita hotu. Tan neʼe, ita bele “serbí Maromak Jeová ho laran-haksolok”.—Sal 100:2.

[Diagrama iha pájina 8]

(Atu hetan format kompletu, haree livru)

Atu nafatin kontente, Ita presiza fahe didiʼak Ita-nia tempu

ATIVIDADE HALIMAR NIAN

TAU MATAN UMA no FAMÍLIA

SERBISU

REUNIAUN KRISTAUN

ESTUDA MESAK

HAKLAKEN

[Dezeñu iha pájina 10]

Ita bele ajuda ema seluk atu sai kontente fali ka lae?