Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Lisaun saida mak ita aprende husi Jesus nia hahalok kuandu nia salva Pedro neʼebé besik atu mout? (Mt 14:28-31)

Se ita haree ita-nia maluk ida nia fiar sai fraku, ita hakarak lolo ita-nia liman atu ajuda nia atu bele hametin nia fiar.—15/9, pájina 8.

• Maromak Jeová hanorin ema neʼebé hatudu hahalok saida?

Buat neʼebé importante liu mak ema neʼe tenke hatudu haraik-an. David hatete: “Laran-diʼak no laran-loos mak Jeová. . . . Nia sei hanorin ninia dalan ba ema neʼebé haraik-an.” (Sal 25:8, 9)—15/9, pájina 21.

• Sakrifísiu saida mak Maromak Jeová halo atu salva ita?

Maromak Jeová sente susar kuandu nia haree ema haterus no hasara nia Oan. No mós, buat neʼebé Abraão halo hodi prontu atu hasaʼe nia oan nuʼudar sakrifísiu hatudu katak Maromak Jeová sente susar kuandu nia haree ema oho nia Oan nuʼudar ema aat ida.—15/9, pájina 28-29.

• Provérbios 24:27 hanorin saida kona-ba ‘harii umakain’?

Mane ida neʼebé hakarak kaben presiza prepara nia an didiʼak ba responsabilidade neʼe. Ida-neʼe inklui prepara didiʼak atubele tau matan ba família no prontu atu sai família nia ulun kona-ba adorasaun ba Maromak.—15/10, pájina 12.

• Tanbasá mak halaʼo Adorasaun Família nian beibeik diʼak ba oan sira?

Hodi halo nuneʼe Ita-nia oan sira sei haburas sira-nia domin ba Maromak Jeová, no mós ida-neʼe bele hametin sira-nia relasaun ho Aman Jeová.—15/10, pájina 30-31.

• Iha reuniaun kongregasaun nian, ka reuniaun boot sira, irmán neʼebé tradús presiza taka ulun ka lae?

Kuandu irmán ida tradús diskursu sira, rona-naʼin sira bele haree ba ema neʼebé hatoʼo diskursu no rona nafatin ba ida neʼebé tradús. No mós, baibain irmán sira neʼebé tradús iha situasaun hanesan neʼe, la hamriik iha dalan neʼebé dada ema nia atensaun. Dala ruma, karik sira bele hili atu tuur deʼit no tradús, ka kuandu sira hamriik sira-nia oin presiza hateke ba irmaun neʼebé hatoʼo diskursu duké hateke ba rona-naʼin sira. Nuneʼe, irmán neʼebé tradús ba língua seluk la presiza taka ulun.—15/11, pájina 12.

• Iha dalan saida deʼit mak ita bele ‘loke ita-nia laran’ hodi hatudu domin ba malu?

Iha Salaun Reinu diʼak atu koʼalia ho sira neʼebé foin tuir reuniaun no kumprimenta ferik-katuas no joven sira. Diʼak atu koʼalia ba sira neʼebé ita la hasoru ba tempu kleur uitoan. Bainhira tuir reuniaun boot, diʼak mós atu kumprimenta no fó koñese ita-nia an ba ema seluk.—15/11, pájina 20-22.

• Oinsá mak Maromak Jeová no Jesus fó ezemplu diʼak mai ita kona-ba hatudu hahalok diʼak?

Maski Maromak Jeová iha pozisaun nuʼudar Ukun-Naʼin Boot Liu Hotu, maibé nia hatudu laran-diʼak no respeitu ba ema. Kuandu Maromak Jeová koʼalia ba Abraão no Moisés, nia uza lia-ebraiku neʼebé dala barak tradús nuʼudar “favór ida”. (Gên 13:14; Êx 4:6) Maromak mós rona ba ema neʼebé koʼalia ba nia. (Gên 18:23-32) Jesus mós halo hanesan, no nia sempre prontu atu ajuda ema no hatudu respeitu ba ema hodi uza sira-nia naran.—15/11, pájina 25.