Ajuda Ita-nia oan atu tahan hasoru susar oioin

ITA-NIA joven sira hasoru daudauk susar oioin iha sira-nia moris. Sira sempre hamutuk ho ema neʼebé haleno mundu aat neʼe nia hahalok no sira tenke luta hasoru sira rasik nia “hakarak foin-saʼe nian”. (2 Tim 2:22; 1 Joao 5:19) Liután neʼe, tanba sira hakaʼas an atu ‘hanoin-hetan sira-nia Kriadór Boot’, sira presiza tahan hasoru ema neʼebé hatún no goza sira. (Ecle 12:1) Irmaun ida naran Vincent hanoin-hetan kuandu nia sei joven, nia hatete: “Haʼu sempre hasoru ema neʼebé ameasa haʼu tanba haʼu Testemuña ba Jeová ida. Dala ruma sira goza demais toʼo haʼu lakohi bá eskola.” *

Ita-nia oan sira la hasoru deʼit susar husi ema seluk, sira mós tenke luta hasoru ho sira rasik nia hakarak atu sai hanesan joven sira seluk. Irmán joven ida naran Catalina hatete: “Haʼu la gosta ema haree haʼu la hanesan ema seluk.” Irmaun joven ida naran Alan hatete: “Haʼu-nia  kolega eskola konvida haʼu beibeik atu halimar ho sira iha findesemana, no haʼu gosta tebes atu bá.” No mós, joven barak hakarak hola parte iha desportu iha eskola, maski atividade neʼe halo sira ransu malu ho ema neʼebé la adora Maromak. Irmán joven seluk naran Tanya hatete: “Haʼu gosta tebes desportu, no treinadór sira iha eskola sempre husu haʼu atu tama iha sira-nia tim. Susar atu dehan haʼu lakohi.”

Oinsá mak Ita bele ajuda Ita-nia oan atu tahan hasoru susar oioin? Maromak Jeová fó responsabilidade ba inan-aman atu fó matadalan ba sira-nia oan. (Prov 22:6; Ef 6:4) Matadalan neʼe bele ajuda oan atu sira rasik bele haburas sira-nia hakarak atu halo tuir Maromak Jeová. (Prov 6:20-23) Hodi nuneʼe, oan sira bele tahan hasoru mundu aat neʼe maski inan-aman la besik ho sira.

Klaru katak la fasil ba inan-aman atu halaʼo sira-nia responsabilidade hotu, hanesan serbisu atu buka moris, haboot oan no halaʼo sira-nia responsabilidade iha kongregasaun. Sira balu halaʼo responsabilidade sira-neʼe mesak, no balu sira-nia feen ka laʼen la tuir lia-loos. Maski nuneʼe, Maromak Jeová hakarak inan-aman atu fahe sira-nia tempu hodi hanorin sira-nia oan. Nuneʼe, saida mak Ita bele halo atu ajuda Ita-nia oan hodi la monu ba tentasaun no tahan hasoru susar husi kolega neʼebé goza beibeik sira?

Relasaun besik ho Maromak Jeová

Ulukliu, joven sira presiza hatene Maromak Jeová nuʼudar Aman no belun ida. Inan-aman presiza ajuda sira atu “haree ida neʼebé matan la haree”. (Ebr 11:27) Vincent neʼebé temi uluk, hanoin-hetan oinsá nia inan-aman ajuda nia atu haburas relasaun ho Maromak Jeová. Nia hatete: “Sira hanorin haʼu katak halo orasaun importante tebes. Haʼu hanoin-hetan kuandu haʼu sei kiʼik haʼu halo orasaun ba Maromak Jeová kalan-kalan antes toba. Maromak Jeová hanesan Aman ida mai haʼu.” Inan-aman, imi iha toman atu halo orasaun ho imi-nia oan sira ka lae? Dala ruma diʼak mós atu rona kuandu sira halo orasaun ba Maromak Jeová. Sira koʼalia buat hanesan deʼit iha  orasaun ka lae? Ka sira fó sai buat neʼebé sira sente kona-ba Maromak Jeová? Hodi rona sira-nia orasaun, imi bele hatene se oan sira hametin sira-nia relasaun ho Maromak ka lae.

Buat importante ida tan neʼebé bele ajuda joven sira atu hakbesik ba Maromak Jeová mak hodi lee beibeik Maromak nia Liafuan. Catalina neʼebé temi uluk hatete: “Kuandu haʼu sei kiʼik haʼu lee Bíblia tomak. Ida-neʼe ajuda haʼu no halo haʼu fiar katak maski ema bele halo susar mai haʼu, maibé Maromak Jeová sempre apoia haʼu.” Inan-aman, imi-nia oan mós iha programa rasik atu lee Bíblia ka lae?—Sal 1:1-3; 77:12.

Klaru katak oan ida-idak la hanesan, balu simu kedan hanorin husi inan-aman, balu presiza tempu uitoan. No mós, oinsá sira laʼo ba oin iha lia-loos karik depende ba sira-nia tinan. Maski nuneʼe, se inan-aman la hanorin, susar ba oan sira atu haburas sira-nia relasaun rasik ho Maromak Jeová. Inan-aman tenke hanorin beibeik Maromak nia Liafuan ba oan sira, atu nuneʼe oan sira bele hatene no halo tuir Maromak Jeová nia hakarak iha situasaun hotu. (Deut 6:6-9) Oan sira tenke fiar katak Maromak Jeová sempre tau matan ba sira ida-idak.

Koʼalia no rona didiʼak ba malu

Dalan ida seluk atu ajuda oan sira mak hodi koʼalia no rona didiʼak ba malu. Atu halo nuneʼe, inan-aman presiza husu pergunta no rona ho pasiénsia buat neʼebé oan hakarak koʼalia, maski dala ruma buat neʼebé sira hatete la tuir inan-aman nia hakarak. Anna, inan ida neʼebé iha oan-mane naʼin-rua, hatete: “Haʼu husu pergunta sira ba haʼu-nia oan toʼo haʼu komprende buat neʼebé sira hanoin no problema neʼebé sira hasoru.” Inan-aman, imi-nia oan sente katak imi prontu atu rona sira ka lae? Tanya neʼebé temi uluk hatete: “Haʼu-nia inan-aman rona didiʼak kuandu haʼu koʼalia, no sira la haluha buat neʼebé ami koʼalia hamutuk. Sira  hatene haʼu-nia kolega eskola nia naran. Sira husu kona-ba kolega sira no mós kona-ba buat neʼebé ami koʼalia uluk.” Hodi bele koʼalia ba malu ho didiʼak, importante atu rona no hanoin-hetan buat neʼebé oan sira koʼalia.

Ba família barak, tempu neʼebé diʼak atu koʼalia ba malu mak tempu han. Vincent hatete: “Ba haʼu-nia família, importante tebes atu han hamutuk. Inan-aman hakarak ami atu tuur hodi han hamutuk iha meza. Sira la husik ami atu haree televizaun, rona rádiu, ka lee livru sira durante tempu han. Tempu han halo haʼu sente kmaan, tanba ami gosta koʼalia halimar, no ida-neʼe ajuda haʼu loron-loron atu tahan hasoru susar iha eskola.” Nia hatutan tan: “Tanba haʼu toman atu koʼalia ho haʼu-nia inan-aman iha tempu han, neʼe mós ajuda haʼu la taʼuk atu koʼalia kona-ba haʼu-nia problema neʼebé sériu.”

Inan-aman, husu ba imi-nia an: ‘Nuʼudar família, ami han hamutuk dala hira iha semana ida nia laran?’ Imi bele halo buat ruma hodi imi bele koʼalia no rona diʼak liu ba imi-nia oan sira ka lae?

Treinu oan sira oinsá atu hasoru susar oioin

Adorasaun Família nian mós fó oportunidade ba família sira atu koʼalia nakloke ba malu no ajuda joven sira atu tahan hasoru problema neʼebé sira hetan. Alan neʼebé temi uluk hatete: “Haʼu-nia inan-aman uza estudu família nian nuʼudar oportunidade atu rona ami oan sira-nia hanoin no sentimentu, no sira hili informasaun neʼebé kona ami-nia problema.” Alan nia inan hatete: “Iha estudu família nian, ami mós uza tempu balu atu halo drama kiʼik hodi treinu ami-nia oan sira. Ida-neʼe ajuda sira hatene oinsá atu defende sira-nia fiar no esplika ba ema seluk. Drama kiʼik sira-neʼe mós ajuda sira sai aten-brani atu tahan hasoru susar iha sira-nia moris.”

Kuandu joven sira hasoru kolega neʼebé obriga sira atu halo buat neʼebé laloos, karik sira la simu no husik kolega neʼe, maibé dala ruma neʼe deʼit latoʼo. Sira presiza hatene esplika tanbasá mak sira labele halo tuir kolega nia hakarak. Sira mós tenke hatene oinsá atu hatán kuandu ema goza sira tanba sira-nia fiar. Se sira la  hatene oinsá atu defende sira-nia fiar, susar ba sira atu hamriik metin iha adorasaun neʼebé loos. Hodi halo drama kiʼik, inan-aman bele treinu sira-nia oan atu defende sira-nia fiar ho aten-brani.

Kuandu halaʼo Adorasaun Família nian, inan-aman bele uza situasaun balu husi The  lista iha pájina 18 atu halo drama kiʼik hodi treinu sira-nia oan. Inan-aman bele halo finje sai oan sira-nia kolega neʼebé goza no husu pergunta neʼebé susar ba oan atu hatán. No kuandu halo nuneʼe, diʼak mós ba família atu koʼalia hamutuk saida mak sira bele aprende husi ema balu nia ezemplu iha Bíblia. Treinu hanesan neʼe sei ajuda oan sira atu prepara an ba susar neʼebé sira hasoru iha eskola no iha fatin seluk.

Halo uma sai fatin neʼebé hakmatek

Kuandu imi-nia oan fila husi eskola, nia gosta bá uma ka lae? Se imi-nia uma mak fatin neʼebé halo oan sira sente hakmatek no kontente, ida-neʼe ajuda sira atu tahan hasoru susar loron-loron nian. Irmán ida neʼebé agora serbí iha Betel hatete: “Kuandu haʼu sei kiʼik, haʼu sempre sente hakmatek no seguru kuandu haʼu iha uma. Ida-neʼe ajuda haʼu atu tahan hasoru susar oioin iha liʼur. Maski haʼu hasoru situasaun susar tebes iha eskola, haʼu hatene katak buat hotu-hotu iha uma sempre diʼak.” Oinsá ho imi-nia uma? Imi-nia uma nakonu ho “hirus malu no istori malu”, ka nakonu ho “domin, ksolok, [no] dame”? (Gal 5:19-23) Se imi-nia uma ladún iha dame, diʼak atu hakaʼas an hodi halo imi-nia uma sai fatin neʼebé halo oan sira sente hakmatek.

Dalan ida seluk atu ajuda oan sira atu tahan hasoru susar mak hodi fó oportunidade ba sira atu ransu malu ho irmaun-irmán sira neʼebé laʼo ba oin iha lia-loos. Porezemplu, kuandu imi halo planu atu halo atividade halimar nian, imi bele konvida irmaun-irmán balu neʼebé tau uluk Maromak nia hakarak ka lae? Karik imi bele konvida pioneiru sira ka katuas neʼebé iha knaar atu vizita kongregasaun sira atu han hamutuk iha imi-nia uma? Se imi koñese misionáriu ka irmaun ruma neʼebé serbí iha Betel, nia bele sai imi-nia oan sira-nia kolega ka lae? Maski sira la bele hasoru malu beibeik, maibé sira bele kontaktu malu liuhusi surat ka telefone. Halo hanesan neʼe bele ajuda oan sira atu laʼo iha dalan neʼebé loos no haburas sira-nia hakarak atu serbí Maromak hanesan irmaun sira-neʼe. Hanoin toʼok oinsá mak apóstolu Paulo nia ezemplu book joven Timóteo. (2 Tim 1:13; 3:10) Tanba Timóteo ransu beibeik ho Paulo, ida-neʼe ajuda nia atu hakaʼas an nafatin atu halaʼo ninia knaar ba Maromak.—1 Kor 4:17.

Gaba Ita-nia oan

Maromak Jeová kontente atu haree joven sira neʼebé laran-metin nafatin maski hasoru susar barak husi Satanás nia mundu. (Sal 147:11; Prov 27:11) Sin, ita hotu mós kontente atu haree ita-nia joven sira hili atu tuir dalan neʼebé loos. (Prov 10:1) Inan-aman, fó-hatene oan sira katak imi kontente ho sira, no sempre buka oportunidade atu gaba sira. Maromak Jeová hatudu ezemplu diʼak ba inan-aman sira. Kuandu Jesus hetan batizmu, Maromak Jeová hatete ba nia: “Ó haʼu-nia Oan doben. Haʼu haksolok tebetebes iha ó.” (Mc 1:11) Klaru katak Jesus sente kontente tebes ho nia Aman nia liafuan neʼe, no ida-neʼe ajuda nia atu tahan susar barak neʼebé nia sei hasoru! Inan-aman, buka atu halo tuir Maromak nia ezemplu, hatete ba imi-nia oan katak imi hadomi sira, no gaba buat diʼak neʼebé sira halo.

Tuir loloos, ita la bele proteje ita-nia oan husi susar hotu neʼebé sira hasoru iha liʼur. Maski nuneʼe, ita bele halo buat barak atu ajuda sira. Ita bele halo saida deʼit? Ajuda sira atu haburas relasaun besik ho Maromak Jeová. Halo sira sente katak kuandu sira hakarak koʼalia, ita prontu atu rona sira. Uza Adorasaun Família nian atu fó treinu ba oan sira, no halo ita-nia uma sai fatin neʼebé hakmatek. Hodi halo buat hotu neʼe, ita bele ajuda oan sira atu tahan hasoru susar oioin.

[Nota–rodapé]

[Kaixa/Dezeñu iha pájina 18]

 HALO DRAMA KIʼIK

Lista tuirmai mak situasaun balu neʼebé ita-nia joven sira hasoru. Kuandu halaʼo Adorasaun Família nian, ita bele halo drama kiʼik hodi hili situasaun ida ka rua husi lista neʼe.

▸ Treinadór iha eskola husu Ita-nia oan-feto atu tama iha nia tim.

▸ Kolega iha eskola fó sigarru ba Ita-nia oan-mane.

▸ Joven sira ameasa atu baku Ita-nia oan-mane se sira haree nia haklaken.

▸ Ita-nia oan-feto hasoru kolega eskola kuandu nia haklaken husi uma ba uma.

▸ Iha klase, mestre husu Ita-nia oan-feto tansá nia la fó sinál respeitu nian ba bandeira.

▸ Joven husi eskola goza beibeik Ita-nia oan-mane tanba nia Testemuña ba Jeová.

[Dezeñu iha pájina 17]

Ita-nia oan mós iha programa rasik atu lee Bíblia ka lae?

[Dezeñu iha pájina 19]

Ita bele uza tempu hamutuk ho irmaun-irmán neʼebé tau uluk Maromak nia hakarak ka lae?