Halaʼo ita-nia moris loron-loron nian ba Maromak nia glória

KUANDU David halo orasaun ba Maromak Jeová, nia husu: “Iha dadeer-saan halo haʼu rona Ita-nia laran-diʼak neʼebé nakonu ho domin . . . halo haʼu hatene dalan neʼebé haʼu sei laʼo.” (Sal 143:8) Loron-loron, kuandu Ita hadeer no fó-agradese ba Aman Jeová ba Ita-nia moris, Ita mós husu ajuda atu halaʼo Ita-nia moris ho matenek ba loron neʼe ka lae? Karik ita hotu halo hanesan neʼe.

Nuʼudar atan neʼebé dedika an ona ba Maromak Jeová, maski ita ‘han ka hemu, ka buat naran deʼit neʼebé ita halo’, ita hakaʼas an atu “halo buat hotu-hotu ba Maromak nia glória”. (1 Kor 10:31) Ita hatene katak ita-nia hahalok loron-loron bele fó glória ba Maromak Jeová, ka bele halo ninia naran foʼer. Ita mós hatene katak Satanás kesar Kristu nia alin sira “kalan-loron”, no tuir loloos, nia halo hanesan neʼe ba ema kristaun hotu neʼebé laran-metin ba Maromak. (Apok 12:10) Tan neʼe, ita hakarak duni atu fó resposta ba Satanás nia lia-bosok no halo Aman Jeová nia laran kontente hodi serbí Nia “kalan-loron”.—Apok 7:15; Prov 27:11.

Agora, mai ita hanoin kona-ba dalan rua oinsá mak ita bele halaʼo ita-nia moris loron-loron nian ba Maromak nia glória. Primeiru mak hodi tau uluk buat neʼebé importante liu iha ita-nia moris, no segundu mak hodi hanoin ema seluk nia diʼak.

Moris tuir ita-nia dedikasaun

Kuandu ita dedika ita-nia an ba Maromak Jeová, ita fó sai ita-nia hakarak atu serbí nia ho laran tomak. Ita mós promete katak ita sei moris tuir ninia matadalan sira “loron-loron”, sin, ba nafatin. (Sal 61:5, 8) Entaun, saida deʼit mak ita bele halo loron-loron atu moris tuir ita-nia dedikasaun no hatudu katak ita hadomi Maromak Jeová ho laran tomak?

Liuhusi Bíblia, ita bele hatene responsabilidade saida deʼit mak Maromak Jeová hakarak ita atu halo. (Deut 10:12, 13) Ezemplu balu hakerek iha kaixa iha pájina 22,  “Ita-nia responsabilidade ba Maromak”. Buat sira-neʼe importante tanba Maromak mak haruka. Maibé, se ita presiza halaʼo responsabilidade rua ka tolu iha tempu neʼebé hanesan, oinsá mak ita bele hatene responsabilidade ida neʼebé mak importante liu?

Ita tau uluk ita-nia adorasaun ba Maromak Jeová, hanesan estuda Bíblia, halo orasaun, tuir reuniaun, no haklaken. (Mt 6:33; Joao 4:34; 1 Ped 2:9) Maibé, ita hatene katak ita mós presiza halo buat seluk. Ita presiza serbisu hodi buka moris, halo serbisu iha uma, ka bá eskola. Maski nuneʼe, ita hakaʼas an atu la husik buat sira-neʼe hanetik ita-nia adorasaun ba Maromak, hanesan tuir reuniaun. Porezemplu, se ita hakarak bá feriadu, ita halo planu didiʼak hodi la foti feriadu iha tempu neʼebé halaʼo reuniaun boot sira ka kuandu irmaun neʼebé iha knaar atu vizita kongregasaun sira vizita ita-nia kongregasaun, loos ka lae? Dala ruma, ita bele halaʼo responsabilidade oioin iha tempu hanesan. Porezemplu, ita bele halo planu atu hamoos Salaun Reinu hamutuk nuʼudar família, ka ita bele uza ita-nia tempu deskansa iha eskola no serbisu-fatin hodi haklaken ba kolega sira. Sin, kuandu ita foti desizaun sira, hanesan buka serbisu ka eskola, no hili kolega, ita hakarak  hatudu katak ita tau uluk buat neʼebé importante liu, neʼe mak ita-nia adorasaun ba Aman Jeová.—Ecle 12:13.

Hanoin ema seluk nia diʼak

Maromak Jeová haruka ita atu hanoin no halo diʼak ba ema seluk. Maibé Satanás lakohi ita atu halo hanesan neʼe. Ninia mundu nakonu ho ema neʼebé “hanoin deʼit sira an”, buka deʼit “sira rasik nia ksolok”, no haburas “hakarak aat” isin nian. (2 Tim 3:1-5; Gal 6:8) Ema barak ladún hanoin oinsá sira-nia hahalok kona ema seluk. Ita haree ema barak neʼebé halo hahalok arbiru deʼit.—Gal 5:19-21.

Maibé ema neʼebé simu ajuda husi Maromak Jeová nia espíritu santu la hanesan neʼe. Sira hatudu domin, laran-diʼak, no laran-luak ba ema seluk. (Gal 5:22) Maromak nia Liafuan haruka ita atu hanoin uluk ema seluk nia diʼak. Tan neʼe, ita sempre hanoin ema seluk hodi buka oportunidade atu ajuda sira, maibé iha tempu hanesan ita kuidadu atu la atrapalla sira-nia moris. (1 Kor 10:24, 33; Flp 2:3, 4; 1 Ped 4:15) Ita hakarak ajuda liuliu ita-nia maluk kristaun sira, maibé ita mós hakaʼas an atu ajuda ema neʼebé seidauk hatene lia-loos. (Gal 6:10) Ita bele buka oportunidade atu hatudu laran-diʼak ba ema neʼebé Ita hasoru loron-loron  ka lae?—Haree kaixa iha pájina 23,  “Hatudu interese ba ema seluk”.

Atu hatudu laran-diʼak ba ema seluk, ita la presiza hein toʼo loron espesiál. (Gal 6:2; Ef 5:2; 1 Tes 4:9, 10) Loron-loron, ita hakarak hanoin ema seluk no sai prontu atu ajuda sira kuandu presiza, maski dala ruma ida-neʼe susar ba ita. Ita hakarak hatudu laran-luak hodi fahe buat neʼebé ita iha, hanesan ita-nia tempu, osan ka sasán, ka ita-nia esperiénsia. Ita fiar Maromak Jeová nia promete, katak se ita hatudu laran-luak ba ema seluk, Nia mós sei hatudu laran-luak mai ita.—Prov 11:25; Lc 6:38.

Serbí Maromak “kalan-loron”

Ita bele halaʼo serbisu ba Maromak Jeová “kalan-loron” ka lae? Bele, hodi sai badinas atu halaʼo ita-nia adorasaun ho laran tomak. (2 Tim 1:3) Ita bele halo nuneʼe hodi lee no hanoin didiʼak Maromak nia Liafuan loron-loron, halo orasaun beibeik, hakaʼas an atu tuir reuniaun hotu, no sempre buka oportunidade atu fó sasin kona-ba lia-loos.—Sal 1:2; Lc 2:37; Apos 4:20; 1 Tes 3:10; 5:17.

Oinsá ho Ita? Ita mós halaʼo Ita-nia adorasaun ba Maromak ho laran tomak ka lae? Se ita halo nuneʼe, liuhusi ita-nia moris loron-loron nian, ita hatudu katak ita hakarak duni halo Maromak Jeová kontente no hakarak fó resposta ba Satanás nia lia-bosok. Ita hakaʼas an atu fó glória ba Maromak Jeová iha buat hotu neʼebé ita halo. Ita-nia hahalok hotu, inklui dalan neʼebé ita koʼalia, no ita-nia desizaun hotu, hatudu katak ita halo tuir Maromak nia hakarak. Ita mós hatudu katak ita agradese ba Maromak nia domin no ninia ajuda hodi tau fiar ba nia no uza buat neʼebé ita iha atu serbí nia. No kuandu ita halo buat ruma neʼebé la tuir ninia hakarak tanba ita sala-naʼin, ita prontu atu simu ninia konsellu no dixiplina.—Sal 32:5; 119:97; Prov 3:25, 26; Kol 3:17; Ebr 6:11, 12.

Mai ita halaʼo ita-nia moris loron-loron nian hodi fó glória ba Maromak. Hodi halo nuneʼe, ita sei sente kmaan tanba hatene katak ita-nia Aman iha lalehan hadomi ita nafatin.—Mt 11:29; Apok 7:16, 17.

[Kaixa/Dezeñu iha pájina 22]

 Ita-nia responsabilidade ba Maromak

• Harohan beibeik.—Rom 12:12.

• Lee no estuda Bíblia, no halo tuir.—Sal 1:2; 1 Tim 4:15.

• Adora Maromak Jeová iha kongregasaun.—Sal 35:18; Ebr 10:24, 25.

• Fó buat neʼebé família presiza iha sira-nia moris, no ajuda sira atu iha relasaun diʼak ho Maromak.—1 Tim 5:8.

• Haklaken lia-foun diʼak Reinu nian no hanorin lia-loos.—Mt 24:14; 28:19, 20.

• Tau matan ba Ita-nia saúde, neʼe inklui mós uza tempu atu halo atividade halimar nian, no mós mantein Ita-nia relasaun ho Maromak.—Mc 6:31; 2 Kor 7:1; 1 Tim 4:8, 16.

• Halaʼo ita-nia responsabilidade iha kongregasaun.—Apos 20:28; 1 Tim 3:1.

• Tau matan ita-nia uma no Salaun Reinu.—1 Kor 10:32.

[Kaixa/Dezeñu iha pájina 23]

 Hatudu interese ba ema seluk

• Irmaun ka irmán neʼebé ferik-katuas ona.—Lev 19:32.

• Sira neʼebé moras ka triste.—Prov 14:21.

• Irmaun ka irmán neʼebé presiza ita-nia ajuda.—Rom 12:13.

• Ita-nia família rasik.—1 Tim 5:4, 8.

• Maluk kristaun neʼebé faluk.—1 Tim 5:9.

• Katuas neʼebé serbisu badinas iha kongregasaun.—1 Tes 5:12, 13; 1 Tim 5:17.