Hatudu katak ita mak Kristu nia dixípulu neʼebé loos
Hatudu katak ita mak Kristu nia dixípulu neʼebé loos
“Ai hotu neʼebé diʼak fó fuan diʼak, no ai neʼebé aat fó fuan aat.”—MT 7:17.
1, 2. Oinsá mak ema kristaun loos la hanesan ho kristaun falsu, liuliu durante loron ikus sira-neʼe?
JESUS hatete katak ema sei hatene kristaun loos la hanesan ho kristaun falsu liuhusi sira-nia fuan, neʼe katak sira-nia hanorin no hahalok. (Mt 7:15-17, 20) Tuir loloos, buat neʼebé ema hatama iha sira-nia neon no laran mak book sira atu halo hahalok ruma. (Mt 15:18, 19) Ema sira neʼebé simu hanorin bosok “fó fuan aat”, maibé sira neʼebé simu hanorin neʼebé loos “fó fuan diʼak”.
2 Durante loron ikus sira-neʼe, ita bele haree ho klaru ai-fuan oin rua neʼe. (Lee Daniel 12:3, 10.) Ema kristaun falsu iha hanoin neʼebé la loos kona-ba Maromak no dala barak finje deʼit katak sira adora nia, maibé ema kristaun loos iha koñesimentu loos kona-ba Maromak no adora nia “tuir espíritu no lia-loos”. (Joao 4:24; 2 Tim 3:1-5) Sira hakaʼas an atu hatudu hahalok hanesan Kristu. Maibé oinsá ho ita ida-idak? Nuʼudar Ita estuda kona-ba hahalok lima neʼebé ema kristaun loos hatudu, husu Ita-nia an: ‘Haʼu-nia hahalok no buat neʼebé haʼu hanorin tuir Maromak nia Liafuan ka lae? Haʼu-nia hahalok no hanorin dada ema neʼebé buka lia-loos ka lae?’
Moris tuir Maromak nia Liafuan
3. Saida mak halo Maromak Jeová kontente? Ba ema kristaun loos, ida-neʼe envolve saida?
3 Jesus hatete: “Laʼós ema hotu neʼebé dehan mai haʼu: ‘Naʼi, Naʼi!’ sei tama iha reinu lalehan, maibé nia deʼit neʼebé halo tuir haʼu Aman iha lalehan nia hakarak.” (Mt 7:21) Sin, laʼós deʼit ema neʼebé hatete katak nia ema kristaun mak halo Maromak kontente, maibé ema neʼebé halo tuir buat neʼebé Maromak hakarak. Ba Kristu nia dixípulu neʼebé loos, ida-neʼe envolve sira-nia moris tomak, sira-nia hanoin kona-ba osan, serbisu, halimar, kostume no selebrasaun sira, ida-neʼe mós envolve sira-nia moris kaben nian no sira-nia relasaun ho ema seluk. Maibé, ema kristaun falsu simu mundu nia hanoin no hahalok neʼebé sai aat liután iha loron ikus sira-neʼe.—Sal 92:7.
4, 5. Oinsá mak ita bele halo tuir Maromak Jeová nia liafuan neʼebé hakerek iha Malaquias 3:18?
4 Tan neʼe mak profeta Malaquias hakerek: “No imi sei hatene filafali buat neʼebé la hanesan entre ida neʼebé loos no ida neʼebé aat, ida neʼebé serbí Maromak no ida neʼebé la serbí nia.” (Mal 3:18) Nuʼudar Ita hanoin kona-ba liafuan sira-neʼe, husu Ita-nia an: ‘Haʼu haleno mundu neʼe nia hahalok ka haʼu hatudu katak haʼu la hanesan mundu neʼe? Haʼu sempre koko atu sai hanesan haʼu-nia kolega sira iha eskola ka serbisu-fatin, ka haʼu sempre laran-metin ba Bíblia nia matadalan sira, no haʼu prontu atu defende haʼu-nia fiar kuandu presiza?’ (Lee 1 Pedro 3:15, 16.) Klaru katak ita lakohi hatudu katak ita mak ema neʼebé loos liu, maibé tanba ita hadomi Maromak Jeová ita tenke hatudu katak ita la hanesan ho sira neʼebé la hadomi no la serbí nia.
5 Se ita iha hahalok ruma neʼebé presiza hadiʼa, diʼak atu halo orasaun kona-ba neʼe no buka atu hetan kbiit hodi estuda Bíblia beibeik, halo orasaun no tuir reuniaun sira. Kuandu ita halo tuir Maromak nia Liafuan, ita sei fó “fuan diʼak”, neʼe inklui “liafuan sira husi ibun” neʼebé fó sai Maromak nia naran.—Ebr 13:15.
Haklaken Maromak nia Reinu
6, 7. Kona-ba mensajen Reinu nian, saida mak la hanesan entre kristaun loos no kristaun falsu?
6 Jesus hatete: “Haʼu sei haklaken mós lia-foun diʼak Maromak nia reinu nian ba rai seluseluk; tan neʼe mak haʼu mai.” (Lc 4:43) Tanbasá mak Jesus haklaken liuliu kona-ba Maromak nia Reinu? Jesus hatene katak nuʼudar Liurai ba Reinu neʼe nia hamutuk ho nia alin kose-mina neʼebé sei moris hiʼas fali, sei halakon buat aat hotu nia hun neʼebé halo ema terus, neʼe mak sala no Diabu. (Rom 5:12; Apok 20:10) Tan neʼe, Jesus fó mandamentu ba ninia dixípulu atu haklaken Reinu neʼe toʼo mundu aat neʼe nia rohan. (Mt 24:14) Ema neʼebé dehan deʼit katak sira tuir Kristu la bele halo serbisu neʼe, tuir loloos sira la iha kbiit. Tanbasá? Tanba razaun tolu: Primeiru, sira la bele haklaken buat neʼebé sira la komprende. Segundu, sira barak la iha hahalok haraik-an no aten-brani atubele tahan kuandu ema goza no kontra sira tanba sira haklaken mensajen Reinu nian. (Mt 24:9; 1 Ped 2:23) No terseiru, ema kristaun falsu la iha Maromak nia espíritu santu.—Joao 14:16, 17.
7 Maibé, Jesus nia dixípulu loos hatene saida mak Maromak nia Reinu neʼe no saida mak Reinu neʼe sei halo. Liután neʼe, sira tau uluk iha sira-nia moris Maromak nia Reinu hodi haklaken kona-ba neʼe iha mundu tomak ho ajuda husi Maromak Jeová nia espíritu. (Zac 4:6) Ita hola parte beibeik iha serbisu neʼe ka lae? Ita hakaʼas an atu halo diʼak liután ita-nia serbisu nuʼudar haklaken-naʼin, karik hodi uza tempu barak liután atu halo serbisu haklaken ka lae? Ema balu hakaʼas an atu uza Bíblia diʼak liután kuandu sira haklaken. Apóstolu Paulo, neʼebé sai toman atu koʼalia husi Eskritura sira, hatete: “Maromak nia liafuan moris no book makaʼas.”—Ebr 4:12; Apos 17:2, 3.
8, 9. (a) Esperiénsia saida mak hatudu katak importante atu uza Bíblia kuandu haklaken? (b) Oinsá mak ita bele hatene uza Bíblia diʼak liután?
8 Kuandu haklaken uma ba uma, irmaun ida lee Daniel 2:44 ba mane katóliku ida no esplika kona-ba oinsá mak Maromak nia Reinu sei lori dame no hakmatek neʼebé loos. Mane neʼe hatán: “Haʼu agradese tebes tanba Ita loke Bíblia no hatudu ba haʼu buat neʼebé eskritura hatete duké temi deʼit ida-neʼe.” Kuandu irmaun ida lee eskritura ba feto ida husi relijiaun Ortodoksu Gregu, feto neʼe husu pergunta balu neʼebé hatudu katak nia iha interese. Iha situasaun neʼe mós irmaun neʼe ho nia feen, hatán hodi uza Bíblia. Tuirmai feto neʼe hatete: “Imi hatene tanbasá mak haʼu hakarak koʼalia ho imi? Tanba imi mai haʼu-nia uma lori Bíblia, no imi lee ba haʼu.”
9 Maski ita-nia livru sira importante atu fahe kuandu ita haklaken, maibé Bíblia mak buat neʼebé importante liu hotu atu ita uza. Tan neʼe, se ita seidauk toman atu uza Bíblia beibeik kuandu ita haklaken, diʼak atu ita hakaʼas an atu halo ida-neʼe. Karik ita bele hili eskritura balu neʼebé esplika kona-ba Maromak nia Reinu no oinsá mak Reinu neʼe sei rezolve problema sira neʼebé ema iha ita-nia área hasoru. Depois bainhira haklaken uma ba uma lee eskritura neʼe ba sira.
Uza Maromak nia naran
10, 11. Kona-ba uza Maromak nia naran, saida mak la hanesan entre Jesus no ema barak neʼebé hatete katak sira tuir nia?
10 “‘Imi mak haʼu-nia testemuña sira,’ neʼe mak Jeová hatete, ‘no haʼu mak Maromak.’” (Isa 43:12) Maromak Jeová nia Testemuña ida neʼebé importante liu, Jesus Kristu, sente katak uza no fó-hatene Maromak nia naran ba ema seluk mak knaar ida neʼebé espesiál tebes. (Lee Êxodu 3:15; Joao 17:6; Ebreu 2:12.) Tuir loloos, tanba Jesus fó sai ninia Aman nia naran, Bíblia bolu nia nuʼudar “sasin neʼebé laran-metin”.—Apok 1:5; Mt 6:9.
11 Maibé, ema barak neʼebé hatete katak sira reprezenta Maromak no ninia Oan la hatudu respeitu ba Maromak nia naran, sira mós hasai Maromak nia naran husi Bíblia neʼebé sira tradús. Lei neʼebé foin lalais hatoʼo ba bispu katóliku sira mós hatudu hahalok hanesan neʼe. Lei neʼe hatete katak “Maromak nia naran neʼebé hakerek ho tetragrammaton YHWH labele uza no temi” bainhira halaʼo adorasaun. * Neʼe mak hahalok neʼebé aat tebetebes!
12. Iha tinan 1931, oinsá mak Maromak nia atan sira hatudu katak sira hakarak ema atu koñese sira tuir sira-nia Maromak nia naran?
12 Hodi halo tuir Kristu no “sasin lubuk” neʼebé iha antes Kristu mai, ema kristaun loos mós la moe atu uza Maromak nia naran. (Ebr 12:1) Tuir loloos, iha tinan 1931, Maromak nia atan sira hatudu katak sira hakarak ema atu koñese sira tuir sira-nia Maromak nia naran, tan neʼe sira simu atu uza naran Testemuña ba Jeová. (Lee Isaías 43:10-12.) Nuneʼe mak Kristu nia dixípulu loos sai ‘povu ida neʼebé bolu hodi Maromak nia naran’.—Apos 15:14, 17.
13. Oinsá mak ita ida-idak bele moris tuir naran Testemuña ba Jeová?
13 Oinsá mak ita ida-idak bele moris tuir naran Testemuña ba Jeová? Buat ida neʼebé ita tenke halo mak laran-metin atu haklaken kona-ba Maromak. Apóstolu Paulo hakerek: “‘Ema hotu-hotu neʼebé bolu Naʼi nia naran sei hetan maksoin.’ Maibé oinsá sira bele bolu Nia neʼebé sira la fiar? No oinsá sira bele fiar iha Nia wainhira sira seidauk rona kona-ba Nia? No oinsá sira bele rona wainhira la iha ema atu haklaken? No oinsá ema bele haklaken wainhira ema [la] haruka sira?” (Rom 10:13-15) Ho respeitu ita mós tenke fó sai relijiaun falsu nia hanorin neʼebé la loos kona-ba ita-nia Kriadór, hanesan doutrina kona-ba infernu, neʼebé tuir loloos duun katak Maromak neʼebé domin iha hahalok aat hanesan Diabu.—Jer 7:31; 1 Joao 4:8; kompara ho Marcos 9:17-27.
14. Oinsá mak ema balu sente kuandu sira foin hatene Maromak nia naran?
14 Ita sente kontente atu uza ita-nia Aman iha lalehan nia naran ka lae? Ita ajuda ema seluk atu hatene kona-ba naran santu neʼe ka lae? Feto ida iha Paris, iha rai-Fransa, rona katak Testemuña ba Jeová hatene Maromak nia naran, nuneʼe nia husu ba Testemuña neʼebé nia hasoru atu hatudu Maromak nia naran ba nia husi ninia Bíblia rasik. Kuandu feto neʼe lee Salmo 83:18, ida-neʼe kona duni nia laran. Nia komesa estuda Bíblia no agora nia sai irmán ida neʼebé laran-metin no serbí iha rai seluk. Kuandu feto katóliku ida neʼebé hela iha rai-Austrália foin haree Maromak nia naran iha Bíblia, nia tanis tanba kontente tebes. Agora nia serbí nuʼudar pioneiru regulár ba tinan barak ona. Foin lalais, kuandu Testemuña sira iha rai-Jamaika hatudu ba feto ida Maromak nia naran husi ninia Bíblia rasik, feto neʼe nia matabeen tun tanba kontente tebes. Nuneʼe, labele moe atu fó sai Maromak nia naran no, hodi halo tuir Jesus, mai ita fó sai naran neʼe ba ema hotu.
“Keta hadomi mundu”
15, 16. Saida mak ema kristaun loos nia hanoin kona-ba mundu neʼe? Pergunta saida mak ita presiza husu ba ita-nia an?
15 “Keta hadomi mundu ka buat naran deʼit neʼebé mundu neʼe nian. Ema neʼebé hadomi mundu, nia la hadomi Aman.” (1 Joao 2:15) Mundu neʼe no ninia hakarak isin nian la tuir duni Maromak Jeová nia hakarak no ninia espíritu santu. Tan neʼe, Kristu nia dixípulu neʼebé loos laʼós parte husi mundu neʼe. Sira mós lakohi hadomi mundu tanba, hanesan dixípulu Tiago hatete: “Imi habelun ho mundu, imi halo funu hasoru Maromak.”—Tgo 4:4.
16 Dala ruma susar atu halo tuir Tiago nia liafuan tanba mundu iha buat barak neʼebé koko ita-nia fiar. (2 Tim 4:10) Tan neʼe mak Jesus halo orasaun kona-ba ninia dixípulu sira: “Haʼu la husu atu Ita hasai sira husi mundu, maibé atu Ita hadook sira husi aat-naʼin. Sira laʼós mundu neʼe nian nuʼudar haʼu mós laʼós mundu neʼe nian.” (Joao 17:15, 16) Husu Ita-nia an: ‘Haʼu hakaʼas an atu la sai parte husi mundu neʼe ka lae? Ema seluk hatene ka lae, haʼu-nia hanoin kona-ba selebrasaun ka kostume sira neʼebé la tuir Bíblia ka neʼebé haleno mundu nia hahalok?’—2 Kor 6:17; 1 Ped 4:3, 4.
17. Saida mak book ema laran-moos atu hakarak serbí Maromak Jeová?
17 Tuir loloos, maski mundu sei la gosta ita kuandu ita halo tuir Bíblia, maibé ida-neʼe bele book ema laran-moos atu hakarak hatene kona-ba ita-nia fiar. Kuandu ema sira-neʼe haree katak ita-nia fiar nia hun mak Bíblia no envolve ita-nia moris tomak, ida-neʼe bele book sira atu halo tuir, neʼe hanesan sira hatete ba ema kose-mina: “Ami sei bá hamutuk ho imi, tanba ami rona ona katak Maromak hamutuk ho imi.”—Zac 8:23.
Hatudu domin neʼebé loos
18. Hatudu domin ba Maromak Jeová no ba ema seluk envolve saida?
18 Jesus hatete: “Ó sei hadomi Naʼi, ó-nia Maromak ho neon ho laran, ho ó-nia klamar tomak,” no “ó sei hadomi ema seluk hanesan ó-nia an rasik”. (Mt 22:37, 39) Domin neʼe (lia-gregu agape) mak domin neʼebé ema hatudu tanba hakarak halo tuir obrigasaun, halo tuir buat neʼebé loos, no tanba hatene katak ida-neʼe mak loos atu halo, maibé inklui mós sentimentu husi laran. (1 Ped 1:22) Domin la hanesan ho hanoin an deʼit, tanba domin hatudu liuhusi liafuan no hahalok.—Lee 1 Korinto 13:4-7.
19, 20. Konta toʼok esperiénsia neʼebé hatudu katak domin kristaun iha kbiit duni.
19 Tanba domin mak buat ida neʼebé Maromak nia espíritu santu lori mai, ida-neʼe ajuda ema kristaun loos atu halo buat neʼebé ema seluk la bele halo, hanesan la hili ema tanba rasa, kultura, ka rai la hanesan. (Lee Joao 13:34, 35; Gal 5:22) Kuandu ema neʼebé hanesan bibi-malae haree domin hanesan neʼe, ida-neʼe sei book sira-nia laran. Porezemplu, kuandu mane joven judeu ida iha rai-Izraél tuir reuniaun kristaun ba dala primeiru, nia hakfodak atu haree ema judeu no ema arabi adora Maromak Jeová hamutuk. Tanba ida-neʼe, nia komesa atu tuir reuniaun beibeik no hakarak atu estuda Bíblia. Ita hatudu domin hanesan neʼe ho laran ba Ita-nia irmaun-irmán sira ka lae? No Ita hakaʼas an atu fó benvindu ba ema neʼebé foin tuir reuniaun maski sira-nia rai, kulit, no pozisaun ka riku la hanesan Ita-nian?
20 Nuʼudar ema kristaun loos, ita hakaʼas an atu hatudu domin ba ema hotu. Iha rai-Salvadór, haklaken-naʼin joven ida estuda Bíblia ho feto katóliku neʼebé tinan 87, feto neʼe fiar metin ba ninia relijiaun. Loron ida, feto neʼe sai moras tebes no baixa iha ospitál. Kuandu nia fila fali ba uma, Testemuña sira vizita atu haree se nia iha ai-han ka lae. Sira halo ida-neʼe durante fulan ida. La iha ema ida husi ninia relijiaun neʼebé bá vizita nia. Tanba ida-neʼe, nia soe ninia imajen sira, hasai nia naran husi igreja, no komesa fali atu estuda Bíblia. Sin, domin kristaun iha kbiit duni! Domin bele book ema nia laran liu fali liafuan.
21. Oinsá mak ita bele halo ita-nia futuru sai seguru liu?
21 Lakleur tan, Jesus sei hatete ba ema kristaun falsu sira: “Haʼu la hatene imi; hadook an tiha husi haʼu, imi sira neʼebé halo aat.” (Mt 7:23) Nuneʼe, mai ita fó fuan diʼak hodi hatudu hahalok neʼebé hahiʼi Aman Jeová no ninia Oan. Jesus hatete: “Ema neʼebé rona haʼu-nia liafuan hirak-neʼe hodi moris tuir, nia hanesan ema matenek neʼebé harii nia uma iha fatuk leten.” (Mt 7:24) Sin, se ita hatudu katak ita Kristu nia dixípulu neʼebé loos, Maromak sei simu ita, no ita-nia futuru sei seguru liu, hanesan harii iha fatuk leten!
[Nota–rodapé]
^ par. 11 Livru Katóliku balu iha lia-inglés, inklui mós The Jerusalem Bible, hakerek tetragrammaton nuʼudar “Yahweh”.
Ita hanoin-hetan?
• Oinsá mak ema kristaun loos la hanesan ho kristaun falsu?
• “Fuan” saida deʼit mak ema kristaun loos hatudu?
• Saida mak ita bele halo atu fó fuan diʼak nuʼudar ema kristaun loos?
[Pergunta estudu nian]
[Dezeñu iha pájina 13]
Ita toman atu uza Bíblia beibeik kuandu Ita haklaken ka lae?
[Dezeñu iha pájina 15]
Ema seluk hatene Ita-nia hanoin kona-ba selebrasaun sira neʼebé la tuir Bíblia ka lae?