Ita sai Maromak Jeová ninian tanba nia laran-diʼak
Ita sai Maromak Jeová ninian tanba nia laran-diʼak
“Ita Naʼi [Jeová] ninian.”—ROM 14:8.
1, 2. (a) Ita iha oportunidade espesiál saida? (b) Ita sei koʼalia kona-ba pergunta saida deʼit?
NASAUN Izraél hetan oportunidade espesiál tebes kuandu Maromak Jeová hatete ba sira: “Imi sei sai duni povu neʼebé espesiál mai haʼu iha povu sira seluk nia leet.” (Êx 19:5) Ohin loron, ema iha kongregasaun kristaun mós iha oportunidade espesiál atu sai Maromak Jeová ninian. (1 Ped 2:9; Apok 7:9, 14, 15) Neʼe mak oportunidade neʼebé bele lori buat diʼak mai ita ba nafatin.
2 Maski nuneʼe, sai Maromak Jeová ninian mós lori responsabilidade. Ema balu karik hanoin: ‘Haʼu sei bele halo buat neʼebé Maromak Jeová hakarak haʼu atu halo ka lae? Se haʼu monu ba sala, nia sei simu haʼu nafatin ka lae? Se haʼu sai Maromak Jeová ninian, ida-neʼe sei halakon haʼu-nia liberdade ka lae?’ Diʼak atu ita hanoin kona-ba pergunta sira-neʼe. Maibé uluk, mai ita hanoin kona-ba pergunta ida seluk: Buat diʼak saida mak ema sei hetan hodi sai Maromak Jeová ninian?
Sai Maromak Jeová ninian halo ita haksolok
3. Tanbasá mak Raab nia desizaun atu serbí Maromak Jeová diʼak ba nia?
3 Ema neʼebé sai Maromak Jeová ninian hetan buat diʼak ka lae? Hanoin toʼok kona-ba Raab, feto-aat ida neʼebé hela iha sidade Jerikó. Tuir loloos, husi kiʼik kedas nia aprende atu halaʼo adorasaun neʼebé la loos ba maromak sira husi rai-Kanaán. Maibé, kuandu nia rona kona-ba oinsá Maromak Jeová ajuda ema Izraél atu manán inimigu sira, nia haree katak Jeová mak Maromak neʼebé loos. Tan neʼe, nia brani atu tau nia moris iha perigu laran atubele proteje Maromak nia povu, no nia tau ninia futuru iha sira-nia liman. Bíblia hatete: “Feto-aat Raab la hetan justisa husi hahalok wainhira nia simu manu-ain sira hodi haruka sira fila fali husi dalan seluk?” (Tgo 2:25) Hanoin toʼok buat diʼak neʼebé nia hetan tanba sai parte ba Maromak nia povu neʼebé halaʼo adorasaun loos, povu neʼebé simu hanorin husi Maromak nia Lei kona-ba dalan atu hatudu domin no justisa. Nia mós kontente duni tanba nia husik ona ninia moris uluk nian! Ikusmai, nia kaben ho ema Izraél ida, no haboot ninia oan Boaz atu sai ema diʼak neʼebé hamtaʼuk Maromak.—Jos 6:25; Rute 2:4-12; Mt 1:5, 6.
4. Buat diʼak saida mak Rute hetan tanba nia deside atu serbí Maromak Jeová?
4 Rute husi rai-Moab mós deside atu serbí Maromak Jeová. Nuʼudar labarik, karik nia mós adora maromak Camós no maromak sira seluk husi rai-Moab, maibé ikusmai nia hatene Maromak loos, Jeová, no nia kaben ho ema Izraél ida neʼebé buka protesaun iha ninia rai. (Lee Rute 1:1-6.) Depois, nuʼudar Rute no ninia kuñada Orpa bá hamutuk ho sira-nia banin, Noemi, ba Jeruzalein, Noemi obriga feto naʼin-rua neʼe atu bá fali sira-nia uma, tanba nia hatene katak sei susar ba sira atu hela iha Izraél. Orpa “fila fali ba ninia ema no ba ninia maromak sira”, maibé Rute lae. Nia hatudu ninia fiar no nia hatene ba sé mak nia hakarak atu sai ninian. Nia hatete ba Noemi: “Labele obriga haʼu atu husik Ita, atu fila fali hodi la laʼo hamutuk tan ho Ita; iha neʼebé Ita bá haʼu sei bá, no iha neʼebé Ita toba iha kalan haʼu mós sei toba. Ita-nia povu sei sai haʼu-nia povu, no Ita-nia Maromak, haʼu-nia Maromak.” (Rute 1:15, 16) Tanba Rute deside atu serbí Maromak Jeová, nia hetan buat diʼak husi Maromak nia Lei, neʼebé fó arranju espesiál atubele tulun feto-faluk, ema kiak no sira neʼebé la iha rai. Iha Maromak Jeová nia liras okos, nia hetan haksolok, protesaun, no sente seguru.
5. Saida mak ita haree ona kona-ba ema neʼebé serbí Maromak Jeová ho laran-metin?
5 Karik ita koñese ema balu neʼebé dedika an ba Maromak Jeová tinan barak tiha ona maibé sira kontinua nafatin atu serbí Maromak ho laran-metin. Husu sira kona-ba buat diʼak saida mak sira hetan tanba serbí Maromak. Maski ema hotu hasoru susar, maibé iha buat barak neʼebé hatudu katak liafuan iha salmu neʼe mak loos: “Ksolok ba povu neʼebé nia Maromak mak Jeová!”—Sal 144:15.
Maromak Jeová hatene buat neʼebé ita bele halo
6. Tanbasá mak lalika taʼuk atu halo buat neʼebé Maromak hakarak ita atu halo?
6 Dala ruma, karik ita hanoin: “Haʼu sei bele halo buat neʼebé Maromak hakarak haʼu atu halo ka lae?” Fasil atu sente katak susar atu sai Maromak nia atan, atu moris tuir nia lei, no atu koʼalia hodi reprezenta nia naran. Porezemplu, Moisés sente katak nia ladún iha matenek kuandu Maromak haruka nia atu bá koʼalia ho ema Izraél no liurai iha rai-Ejitu. Maibé Maromak la husu nia atu halo buat neʼebé nia la bele halo. Maromak Jeová ‘hanorin nia saida mak nia atu halo’. (Lee Êxodo 3:11; 4:1, 10, 13-15.) Tanba Moisés simu ajuda neʼe, nia bele halo Maromak nia hakarak, no ida-neʼe halo nia sente kontente. Maromak Jeová mós nunka husu ita atu halo buat neʼebé ita la bele halo. Nia komprende katak ita mak ema sala-naʼin, no nia hakarak ajuda ita. (Sal 103:14) Serbí Maromak nuʼudar Kristu nia dixípulu mak buat neʼebé halo ita sente kmaan duké halo ita sente laran-susar, tanba moris hanesan neʼe mós lori buat diʼak ba ema seluk no halo Maromak Jeová nia laran kontente. Jesus hatete: “Mai besik haʼu, . . . haʼu sei fó kmaan ba imi. Simu haʼu-nia ukun bá hodi banati-tuir haʼu, tan haʼu laran-kmaus no haraik-an.”—Mt 11:28, 29.
7. Tanbasá mak ita bele fiar katak Maromak Jeová sei ajuda ita atu halo buat neʼebé nia hakarak?
7 Se ita sadere ba Maromak Jeová atu hetan kbiit, nia sempre fó aten-brani ba ita. Porezemplu, Jeremias la brani atu koʼalia. Tan neʼe, kuandu Maromak Jeová fó knaar ba nia atu sai profeta, Jeremias hatete: “Oh, Naʼi Jeová Ukun-Naʼin Boot Liu! Haʼu la iha matenek atu koʼalia, tanba haʼu mak joven deʼit.” Nia mós hatete: “Haʼu sei la koʼalia tan hodi nia naran.” (Jer 1:6; 20:9) Maibé, tanba Maromak Jeová fó aten-brani ba Jeremias, nia bele haklaken ba tinan 40 mensajen neʼebé ema barak lakohi rona. Dala barak Maromak Jeová hametin nia ho liafuan: “Haʼu hamutuk ho ó, atu salva ó no atu soi ó.”—Jer 1:8, 19; 15:20.
8. Oinsá mak ita hatudu katak ita fiar Maromak Jeová?
8 Hanesan Maromak Jeová hametin Moisés no Jeremias, nia mós bele ajuda ita atu halo buat neʼebé nia hakarak ema kristaun atu halo ohin loron. Buat neʼebé importante liu mak sadere ba Maromak. Bíblia hatete: “Fiar ba Maromak Jeová ho laran tomak no labele sadere ba ó-nia matenek rasik. Iha ó-nia dalan hotu fó atensaun ba nia, no nia rasik sei halo ó-nia dalan sai loos.” (Prov 3:5, 6) Ita hatudu katak ita fiar Maromak Jeová kuandu ita simu ajuda neʼebé Maromak fó mai ita liuhusi ninia Liafuan no liuhusi kongregasaun. Se ita husik Maromak Jeová hatudu dalan mai ita iha ita-nia moris, sei la iha buat ida neʼebé bele hapara ita atu laran-metin nafatin ba nia.
Maromak Jeová tau matan ita ida-idak
9, 10. Protesaun saida mak Salmo 91 promete?
9 Ema balu neʼebé hanoin atu dedika an ba Maromak Jeová, karik taʼuk katak sira sei halo sala, no tan neʼe la merese atu sai Maromak Jeová ninian, no katak Nia sei la simu sira ona. Maibé ita haksolok tebes tanba Maromak Jeová fó buat hotu neʼebé ita presiza atubele proteje ita-nia relasaun diʼak ho nia. Mai ita haree oinsá mak Salmo 91 hatudu ida-neʼe.
10 Salmo neʼe komesa ho liafuan: “Ema naran deʼit neʼebé hela iha fatin segredu husi Ida neʼebé Aas Liu Hotu, nia sei hetan fatin ida ba nia an atu hela iha Ida neʼebé Forsa Boot Liu Hotu nia mahon. Haʼu sei dehan ba Maromak Jeová: ‘Ita mak haʼu-nia mahon no haʼu-nia abrigu, haʼu-nia Maromak neʼebé haʼu fiar.’ Tanba nia rasik sei salva ó husi ida neʼebé kasa manu, ninia lasu.” (Sal 91:1-3) Liafuan sira-neʼe hatudu katak Maromak promete atu proteje sira neʼebé hadomi nia no tau fiar ba nia. (Lee Salmo 91:9, 14.) Nia sei fó protesaun saida? Porezemplu, Maromak Jeová proteje ninia atan balu iha tempu uluk atu labele mate, no iha situasaun balu nia halo ida-neʼe tanba nia hakarak atu sira bele sai Mesias nia beiʼala. Maibé, iha ema laran-metin barak seluk neʼebé sai dadur, hetan terus tanba ema baku sira, no mate tanba Diabu koko atu halakon sira-nia fiar ba Maromak. (Ebr 11:34-39) Sira sai aten-brani atu tahan tanba Maromak Jeová proteje sira husi perigu neʼebé bele halakon sira-nia laran-metin ba nia. Tan neʼe mak ita bele komprende katak Salmo 91 koʼalia kona-ba protesaun neʼebé Maromak promete atu fó hodi ema bele iha nafatin relasaun diʼak ho nia.
11. Saida mak “fatin segredu husi Ida neʼebé Aas Liu Hotu”? Sé mak Maromak proteje?
11 Liafuan “fatin segredu husi Ida neʼebé Aas Liu Hotu” iha salmu neʼe reprezenta protesaun neʼebé Maromak fó atu ita bele iha relasaun diʼak nafatin ho nia. Iha fatin neʼe, sira neʼebé hela ho Maromak nuʼudar ninia bainaka hetan protesaun husi buat naran deʼit no husi ema naran deʼit neʼebé koko atu halakon sira-nia fiar no sira-nia domin ba Maromak. (Sal 15:1, 2; 121:5) Ida-neʼe fatin segredu tanba ema neʼebé la fiar Maromak Jeová la hatene kona-ba neʼe. Iha fatin neʼe mak Maromak Jeová proteje ema neʼebé hatete: ‘Ita mak haʼu-nia Maromak neʼebé haʼu fiar.’ Se ita hela nafatin iha fatin seguru neʼe, ita la presiza taʼuk katak ita sei lakon Maromak nia laran-diʼak no monu ba Satanás nia lasu, “ida neʼebé kasa manu”.
12. Perigu saida deʼit mak bele halakon ita-nia relasaun diʼak ho Maromak?
12 Perigu saida deʼit mak bele halakon ita-nia relasaun diʼak ho Maromak? Iha salmu neʼe fó-hatene kona-ba perigu balu, sira balu mak “moras-peste neʼebé laʼo iha nakukun laran, . . . [no] buat neʼebé sobu atu halakon iha meiudia”. (Sal 91:5, 6) “Ida neʼebé kasa manu” halo ema barak monu ona ba lasu liuhusi hakarak atu sai livre. (2 Kor 11:3) Nia mós halo ema seluk monu liuhusi haburas hakarak karak-teen, foti-an, no buka rikusoin deʼit. No ema balu seluk tan, nia lohi liuhusi filozofia oioin, hanesan domin ba nasaun, evolusaun, no relijiaun falsu. (Kol 2:8) No ema barak nia lohi ba lasu kona-ba relasaun seksuál ho ema neʼebé laʼós sira-nia kaben. Buat hirak-neʼe neʼebé hanesan moras-peste mak halo ema rihun ba rihun lakon sira-nia domin ba Maromak.—Lee Salmo 91:7-10; Mt 24:12.
Proteje ita-nia domin ba Maromak
13. Oinsá mak Maromak Jeová proteje ita husi perigu sira neʼebé bele halakon ita-nia domin ba nia?
13 Oinsá mak Maromak Jeová proteje nia povu husi perigu sira-neʼe? Salmu neʼe hatete: “Nia sei haruka nia anju sira, atu hein ó iha ó-nia dalan hotu.” (Sal 91:11) Anju sira hatudu dalan mai ita no proteje ita atubele haklaken lia-foun diʼak. (Apok 14:6) Katuas kristaun sira mós proteje ita husi hanorin falsu neʼebé bele lohi ita tanba sira kaer metin ba Bíblia kuandu sira hanorin. Sira bele ajuda ema neʼebé hasoru susar kona-ba halakon hahalok no hanoin neʼebé mundu nian. (Tito 1:9; 1 Ped 5:2) Atan “laran-metin no matenek” mós hanorin lia-loos husi Bíblia atu proteje ita husi hanorin kona-ba evolusaun, husi hakarak atu halo sala-foʼer, no husi buka rikusoin no pozisaun boot, no husi hakarak aat no buat aat barak seluk tan neʼebé book ita. (Mt 24:45) Saida mak ajuda ona Ita atubele sees husi perigu sira-neʼe?
14. Atubele hetan protesaun husi Maromak, ita presiza halo saida deʼit?
14 Saida mak ita presiza halo atubele hela nafatin iha Maromak nia “fatin segredu” hodi hetan protesaun? Hanesan ita kontinua atu proteje ita-nia an husi perigu ruma hanesan asidente, krime, ka moras aat, nuneʼe mós ita tenke kontinua proteje ita-nia an husi perigu neʼebé bele estraga ita-nia relasaun ho Maromak. Tan neʼe, ita tenke simu matadalan sira neʼebé Maromak Jeová fó mai ita liuhusi livru sira no reuniaun sira. Ita mós presiza buka konsellu husi katuas sira. No ita-nia irmaun-irmán sira-nia hahalok diʼak oioin mós bele ajuda ita atu hetan buat diʼak. Loos duni, hamutuk beibeik ho kongregasaun ajuda ita atu sai matenek!—Prov 13:20; lee 1 Pedro 4:10.
15. Tanbasá mak ita bele fiar katak Maromak Jeová bele proteje ita husi buat naran deʼit neʼebé bele halakon ita-nia relasaun ho nia?
15 Tuir loloos, ita bele fiar katak Maromak Jeová bele proteje ita husi buat naran deʼit neʼebé bele halakon ita-nia relasaun ho nia. (Rom 8:38, 39) Nia proteje tiha ona kongregasaun kristaun husi relijiaun falsu nia kbiit no mós husi ukun-naʼin sira neʼebé hakarak atu haketak ita husi ita-nia Maromak neʼebé santu. Buat neʼebé Maromak Jeová promete tuirmai neʼe sai loos tiha ona: “Kroʼat naran deʼit neʼebé ema halo atu hasoru ó sei la manán.”—Isa 54:17.
Sé mak fó ita liberdade?
16. Tanbasá mak mundu neʼe la bele fó ita liberdade?
16 Sai Maromak Jeová ninian halakon ita-nia liberdade ka lae? Lae duni! Maibé sai mundu ninian mak halakon ita-nia liberdade. Mundu neʼe dook husi Maromak, no ida neʼebé ukun mundu neʼe mak maromak neʼebé la iha domin no hakarak atu halo ema sai atan. (Joao 14:30) Porezemplu, Satanás nia mundu halo susar ba ema kona-ba ekonomia, no ida-neʼe halo ema lakon sira-nia liberdade. (Kompara ho Apokalipse 13:16, 17.) Sala, mós iha kbiit atu lohi ema atu sai atan. (Joao 8:34; Ebr 3:13) Tan neʼe, maski ema neʼebé la fiar Maromak Jeová promete atu fó liberdade hodi fó sai dalan moris nian neʼebé la tuir Maromak nia hanorin, ema neʼebé rona ba sira ikusmai sai atan ba hakarak sala no ba moris neʼebé la lori ksolok.—Rom 1:24-32.
17. Maromak Jeová sei halo ita livre husi saida?
17 Maibé, Maromak Jeová la hanesan neʼe, se ita entrega ita-nia an ba nia, nia sei halo ita livre husi buat naran deʼit neʼebé bele halo aat ita. Situasaun neʼe hanesan ho ema moras neʼebé tau fiar ba doutór neʼebé matenek atu halo operasaun ba moras boot, nia hatene katak doutór neʼe bele halo nia livre husi ninia moras. Ita hotu mós iha moras boot, neʼe mak sala neʼebé ita simu husi ita-nia beiʼala. Kuandu ita entrega ita-nia moris ba Maromak Jeová, liuhusi Kristu nia sakrifísiu, ita bele iha esperansa katak ita sei sai livre husi buat aat hotu neʼebé sala lori mai no sei moris ba nafatin. (Joao 3:36) Hanesan ema nia fiar ba doutór sai boot liután kuandu sira hatene doutór nia hahalok, nuneʼe mós ita-nia fiar ba Maromak Jeová sai boot liután kuandu ita kontinua atu aprende kona-ba nia. Nuneʼe, mai ita kontinua atu lee Maromak nia Liafuan tanba ida-neʼe sei ajuda ita atu hadomi nia hodi la taʼuk atu sai ninian.—1 Joao 4:18.
18. Ema neʼebé sai Maromak Jeová ninian sei hetan buat diʼak saida?
18 Maromak Jeová fó ema hotu liberdade atu hili. Ninia Liafuan hatete: “Ó tenke hili moris atu ó bele moris nafatin, ó no ó-nia oan sira, hodi hadomi Jeová ó-nia Maromak.” (Deut 30:19, 20) Maromak hakarak ita atu hatudu domin ba nia hodi halo desizaun ho hakarak rasik atu serbí nia. Kuandu ita hili atu sai Maromak ninian tanba ita hadomi nia, ida-neʼe sei la halo ita lakon liberdade, maibé sei halo ita kontente duni.
19. Tanbasá mak sai Maromak Jeová ninian mak buat ida neʼebé ita la merese?
19 Tanba ita mak ema sala-naʼin, ita la merese atu sai Maromak ninian. Maibé, tanba Maromak nia laran-diʼak deʼit mak ita bele sai ninian. (2 Tim 1:9) Tan neʼe, Paulo hatete: “Basá, ita moris karik, ita moris ba Naʼi, no mate karik, ita mate ba Naʼi; neʼe duni, ita moris ka mate, ita Naʼi [Jeová] ninian.” (Rom 14:8) Tebes duni, ita sei nunka sente katak ita hili sala se ita foti desizaun atu sai Maromak Jeová ninian.
Oinsá ita hatán?
• Buat diʼak saida mak ita hetan tanba sai Maromak Jeová ninian?
• Tanbasá mak ita bele duni halo buat neʼebé Maromak hakarak?
• Oinsá mak Maromak Jeová fó protesaun ba ninia atan sira?
[Pergunta estudu nian]
[Dezeñu iha pájina 8]
Husu ema seluk kona-ba buat diʼak neʼebé sira hetan tanba sai Maromak Jeová ninian
[Dezeñu iha pájina 10]
Iha dalan balu saida deʼit mak Maromak Jeová proteje ita?