Maromak Jeová nia dalan atu ukun mak diʼak liu hotu!
Maromak Jeová nia dalan atu ukun mak diʼak liu hotu!
“Ida neʼebé Aas Liu Hotu mak Ukun-Naʼin ba ema hotu.”—DAN 4:17.
1, 2. Tanbasá mak ema nia ukun la sai diʼak?
EMA nia ukun la sai diʼak duni! Kona-ba ida-neʼe ita la duvida. Razaun ida tansá ema nia ukun la sai diʼak mak ema la iha matenek atu ukun ho diʼak. Ohin loron ita bele haree katak ema nia ukun la lori buat diʼak tanba ukun-naʼin barak hatudu katak sira ‘hanoin deʼit sira an hodi buka osan, loko-an, foti-an, la hatene sadiʼa maluk no laran nakali, fuik no buat diʼak hotu nia funu-balun, traidór, bulak tan loko-an’.—2 Tim 3:2-4.
2 Kuandu ita-nia inan-aman primeiru la simu Maromak nia ukun, karik sira hanoin katak hodi halo nuneʼe sira bele ukun an rasik. Maibé tuir loloos, sira apoia mak Satanás nia ukun. Ema nia ukun durante tinan rihun neen, neʼebé Satanás nuʼudar “liurai mundu neʼe nian” mak kontrola, lori susar barak ba ema ohin loron. (Joao 12:30, 31) Livru The Oxford History of the Twentieth Century, neʼebé koʼalia kona-ba ema nia situasaun ohin loron, hatete katak saugati deʼit atu “buka mundu ida neʼebé perfeitu”. Livru neʼe mós esplika: “Laʼós deʼit katak la bele hetan, maibé ema nia hakaʼas an atu kria mundu hanesan neʼe hamosu fali susar, ukun neʼebé hanehan ema, no funu.” Ida-neʼe hatudu ho klaru katak ema nia ukun la lori buat diʼak!
3. Saida mak ita bele fiar kona-ba Maromak nia ukun se karik Adão no Eva la halo sala?
3 Tan neʼe, triste duni katak ita-nia inan-aman primeiru la simu Maromak nia ukun neʼebé diʼak liu hotu. Klaru katak ita la hatene loos iha dalan saida mak Maromak Jeová ukun mundu neʼe se karik Adão no Eva laran-metin nafatin ba nia. Maski nuneʼe, ita bele fiar katak se karik ema hotu simu Maromak nia ukun, ninia ukun sei ho domin no justisa. (Apos 10:34; 1 Joao 4:8) Tanba Maromak Jeová iha matenek, ita bele fiar katak se karik ema hotu simu Maromak nia ukun, ohin loron ita la hasoru susar hotu neʼebé ukun-naʼin sira hamosu. Se karik Maromak mak ukun husi tempu uluk, nia bele duni “halo kontente buat hotu neʼebé moris nia hakarak”. (Sal 145:16) Neʼe hotu hatudu katak Maromak nia ukun mak diʼak liu. (Deut 32:4) Sin, triste tebes katak ema la simu ida-neʼe!
4. Toʼo neʼebé mak Maromak husik Satanás atu ukun?
4 Diʼak mós atu hanoin-hetan katak maski Maromak Jeová husik ema atu ukun an rasik, maibé ida-neʼe laʼós katak nia lakon ninia direitu atu ukun ninia kriatura hotu. Rai-Babilónia nia liurai neʼebé forsa boot mós rekoñese Maromak nia direitu atu ukun, hodi hatete: “Ida neʼebé Aas Liu Hotu mak Ukun-Naʼin ba ema hotu.” (Dan 4:17) Tan neʼe, ikusmai Maromak nia Reinu sei halo Maromak nia hakarak sai loos. (Mt 6:10) Maibé, atubele rezolve lia sira neʼebé Satanás hasaʼe, Maromak Jeová husik Satanás atu ukun nuʼudar “maromak mundu neʼe nian” ba tempu uitoan. (2 Kor 4:4; 1 Joao 5:19) Maski nuneʼe, iha buat balu neʼebé Maromak Jeová la husik Satanás atu halo. (2 Crôn 20:6; kompara ho Jó 1:11, 12; 2:3-6.) No mós, sempre iha ema balu neʼebé hili atu apoia Maromak nia ukun maski sira hela iha mundu neʼebé Satanás mak ukun.
Maromak nia ukun ba Izraél
5. Saida mak ema Izraél promete ba Maromak?
5 Husi Abel nia tempu toʼo tempu neʼebé Maromak harii nasaun Izraél, iha ema laran-metin barak neʼebé adora Maromak Jeová no halo tuir ninia lei sira. (Ebr 11:4-22) Iha Moisés nia tempu, Maromak Jeová halo aliansa ho Jacob nia bei-oan sira, no sira sai nasaun Izraél. Iha tinan 1513 molok Kristu, ema Izraél promete katak sira no sira-nia bei-oan sei simu Maromak Jeová nuʼudar Ukun-Naʼin, hodi hatete: “Buat hotu neʼebé Jeová hatete ona, ami sei halo tuir duni.”—Êx 19:8.
6, 7. Buat diʼak saida deʼit mak ema Izraél hetan husi Maromak nia ukun?
6 Maromak Jeová iha planu ida kuandu nia hili ema Izraél atu sai ninia povu. (Lee Deuteronômio 7:7, 8.) Maski Maromak hanoin kona-ba ema Izraél nia diʼak kuandu nia hili sira, maibé nia mós hanoin kona-ba buat seluk neʼebé importante liu, neʼe mak ninia naran no ninia direitu atu ukun. Maromak Jeová hili ema Izraél atu sai nuʼudar testemuña atu hatudu katak nia mesak deʼit mak Maromak neʼebé loos. (Isa 43:10; 44:6-8) Tan neʼe, Maromak Jeová hatete ba sira: “Imi mak povu neʼebé santu ba Jeová imi-nia Maromak, no Jeová hili ona imi atu sai ninia povu, povu neʼebé espesiál, husi ema seluk hotu neʼebé moris iha rai leten.”—Deut 14:2.
7 Dalan neʼebé Maromak ukun ema Izraél hatudu katak nia komprende sira la perfeitu. Maski nuneʼe, ninia lei sira perfeitu no haleno ninia hahalok. Ukun-fuan sira neʼebé Maromak Jeová fó ba sira liuhusi Moisés hatudu ho klaru katak Maromak mak santu, hadomi justisa, prontu atu fó perdua, no katak nia iha pasiénsia. Iha Josué nia tempu, ema Izraél halo tuir Maromak Jeová nia lei sira, no tan neʼe sira haksolok ho dame no hetan bensaun barak. (Jos 24:21, 22, 31) Buat diʼak neʼebé ema Izraél hetan iha tempu neʼebá hatudu katak Maromak nia dalan atu ukun mak diʼak liu hotu.
Ema nia ukun lori susar
8, 9. Ikusmai, ema Izraél husu saida? Ida-neʼe lori saida ba sira?
8 Maibé, dala barak ema Izraél la simu Maromak nia ukun, no tan neʼe sira hetan terus no lakon Maromak nia protesaun. Ikusmai, liuhusi profeta Samuel, ema Izraél husu liurai ida neʼebé sira bele haree atu ukun sira. Maromak Jeová hatete ba Samuel atu fó buat neʼebé povu husu. Maibé, Maromak Jeová mós hatete: “Laʼós ó mak sira la simu, maibé haʼu mak sira la simu nuʼudar sira-nia liurai.” (1 Sam 8:7) Maski Maromak Jeová husik ema atu ukun Izraél nuʼudar liurai, maibé nia mós fó avizu ba sira katak ema nia ukun sei lori susar.—Lee 1 Samuel 8:9-18.
9 Istória hatudu katak avizu neʼebé Maromak Jeová fó, sai loos duni. Ema nia ukun lori problema barak ba ema Izraél, liuliu kuandu liurai la laran-metin ba Maromak. Kuandu ita hanoin kona-ba Izraél nia ezemplu, ida-neʼe ajuda ita atu komprende tansá mak ukun-naʼin sira neʼebé la hatene Maromak Jeová, la bele lori buat diʼak neʼebé ba nafatin. Loos katak ukun-naʼin balu husu Maromak nia bensaun ba sira-nia hakaʼas-an atubele ukun ho dame no hakmatek, maibé oinsá mak Maromak bele haraik bensaun ba sira neʼebé la simu ninia ukun?—Sal 2:10-12.
Nasaun foun neʼebé Maromak ukun
10. Tanbasá mak Maromak la simu tan nasaun Izraél?
10 Nasaun Izraél hatudu katak sira lakohi serbí Maromak Jeová ho laran-metin, no ikusmai sira la simu Mesias neʼebé Maromak foti ona. Nuneʼe, Maromak Jeová la simu tan sira no troka sira ho grupu ida neʼebé sai nasaun foun ida. Tan neʼe, iha tinan 33 Maromak Jeová harii kongregasaun kristaun ho ema kose-mina sira neʼebé adora nia. Kongregasaun neʼe mak sai nasaun foun neʼebé Maromak Jeová mak ukun. Apóstolu Paulo bolu nasaun neʼe nuʼudar “Izraél Maromak nian”.—Gal 6:16, MF.
11, 12. Kona-ba tau matan povu, saida mak hanesan entre nasaun Izraél no “Izraél Maromak nian”?
11 Nasaun Izraél iha tempu uluk no “Izraél Maromak nian” iha buat neʼebé hanesan no la hanesan. Buat neʼebé la hanesan mak nasaun Izraél iha tempu uluk iha ema neʼebé ukun sira nuʼudar liurai, no sira presiza hasaʼe animál nuʼudar sakrifísiu ba sira-nia sala, maibé kongregasaun kristaun la iha. Buat neʼebé hanesan entre nasaun rua neʼe mak sira iha arranju kona-ba katuas neʼebé serbí povu. (Êx 19:3-8) Katuas sira iha kongregasaun kristaun la ukun ema, maibé sira tau matan no fó ezemplu diʼak kona-ba atividade kristaun nian. Sira tau matan ho domin ba ema ida-idak iha kongregasaun laran, no sira hatudu respeitu ba ema hotu.—2 Kor 1:24; 1 Ped 5:2, 3.
12 Hodi hanoin didiʼak kona-ba oinsá mak Maromak tau matan ba ema Izraél iha tempu uluk, ida-neʼe book “Izraél Maromak nian” no sira-nia maluk “bibi seluk” atu hafolin liután Maromak Jeová no ninia dalan atu ukun. (Joao 10:16) Porezemplu, istória hatudu katak ema neʼebé ukun nasaun Izraél dala ruma book povu atu halo buat diʼak ka aat. Ida-neʼe fó-hanoin sira neʼebé tau matan ba kongregasaun kristaun katak maski sira laʼós ukun-naʼin hanesan liurai sira iha tempu uluk, maibé sira tenke hatudu nafatin ezemplu diʼak kona-ba fiar.—Ebr 13:7.
Maromak Jeová nia ukun ohin loron
13. Buat importante saida mak akontese iha tinan 1914?
13 Ema kristaun ohin loron haklaken iha mundu tomak katak ema nia ukun besik ona atu ramata. Iha tinan 1914, Maromak Jeová harii nia Reinu iha lalehan neʼebé Jesus Kristu mak ukun nuʼudar Liurai. Iha tempu neʼebá Maromak fó kbiit ba Jesus “atu laʼo husi funu ba funu hodi manán hotu”. (Apok 6:2) Maromak hatete ba Liurai neʼe: “Bá iha ó-nia inimigu sira-nia leet hodi domina.” (Sal 110:2) Triste katak nasaun sira hatudu beibeik katak sira la simu Maromak Jeová nia ukun. Buat hotu neʼebé sira halo, sira halo hanesan “Maromak Jeová la iha”.—Sal 14:1.
14, 15. (a) Oinsá mak Maromak nia Reinu ukun ita ohin loron? Pergunta saida deʼit mak diʼak atu husu ita-nia an? (b) Saida mak hatudu katak Maromak nia dalan atu ukun diʼak liu hotu?
14 Ohin loron, ema kose-mina balu neʼebé parte husi “Izraél Maromak nian” sei moris hela iha rai, no nuʼudar Jesus nia alin, sira kontinua atu serbí nuʼudar “Kristu nia manu-ain [“embaixadór”, MF]”. (2 Kor 5:20) Sira serbí nuʼudar grupu atan laran-metin no matenek atu tau matan no fó hahán espirituál ba sira-nia maluk kose-mina no mós ba ema-lubun boot neʼebé iha esperansa atu moris ba nafatin iha rai. (Mt 24:45-47; Apok 7:9-15) Bensaun barak neʼebé Maromak nia atan sira hetan ohin loron hatudu katak Maromak Jeová apoia arranju neʼe.
15 Diʼak se ita ida-idak husu ita-nia an: ‘Haʼu simu ka lae, responsabilidade hotu neʼebé haʼu hetan iha kongregasaun kristaun? Haʼu apoia duni Maromak Jeová nia dalan atu ukun ka lae? Haʼu kontente ka lae, atu simu Maromak Jeová nia Reinu neʼebé ukun daudaun? Haʼu prontu atu kontinua hakaʼas an atu fó-hatene ema seluk kona-ba Maromak nia Reinu?’ Nuʼudar Maromak nia povu, ita simu ho laran matadalan neʼebé Grupu Administradór fó mai ita no apoia katuas sira iha kongregasaun. Hodi halo nuneʼe, ita hatudu katak ita simu Maromak nia dalan atu ukun. (Lee Ebreu 13:17.) Tanba ita simu Maromak nia ukun ho laran, ita nuʼudar Maromak nia povu haksolok ho unidade, maski mundu neʼe lae. Ita mós hetan dame no justisa no fó glória ba Maromak Jeová, no buat sira-neʼe hatudu katak Maromak nia dalan atu ukun mak diʼak liu hotu.
Maromak Jeová nia ukun manán
16. Desizaun saida mak ema hotu tenke halo?
16 Lakleur tan, lia neʼebé Satanás hasaʼe iha jardín Eden sei rezolve hotu. Nuneʼe, agora mak tempu ba ema atu halo desizaun. Ema ida-idak tenke foti desizaun kona-ba simu Maromak Jeová nia dalan atu ukun ka kaer metin nafatin ba ema nia ukun. Ita iha oportunidade espesiál atu ajuda ema laran-maus atu halo desizaun neʼebé loos. Iha Armajedón, Maromak Jeová nia ukun sei halakon ba nafatin ema nia governu hotu neʼebé iha Satanás nia kbiit okos. (Dan 2:44; Apok 16:16) Ema nia ukun sei la iha tan, no Maromak nia Reinu mak sei ukun mundu tomak. Sin, Maromak Jeová sei hatudu katak ninia dalan atu ukun mak diʼak liu hotu.—Lee Apokalipse 21:3-5.
17. Atu ema laran-maus bele halo desizaun neʼebé loos kona-ba ukun, sira tenke hanoin kona-ba saida deʼit?
17 Ema neʼebé seidauk halo desizaun neʼebé metin atu apoia Maromak Jeová tenke halo orasaun no hanoin didiʼak kona-ba buat diʼak neʼebé Maromak nia ukun sei lori ba ema hotu. Ema nia ukun la bele rezolve problema kona-ba krime, inklui mós terrorizmu, maibé Maromak nia ukun sei halakon buat aat hotu husi rai. (Sal 37:1, 2, 9) Ema nia ukun sempre hamosu funu, maibé Maromak nia ukun “sei hapara funu toʼo rai nia rohan”. (Sal 46:9) Maromak nia ukun mós sei lori fali dame entre ema no animál sira! (Isa 11:6-9) Iha ema nia ukun okos sempre iha kiak no hamlaha, maibé Maromak nia ukun sei halakon buat sira-neʼe hotu. (Isa 65:21) Maski ema balu neʼebé ukun hakaʼas an atu fó buat diʼak ba sira-nia povu, sira la bele halakon moras no mate, maibé iha Maromak nia ukun okos, ferik-katuas no ema moras sei haksolok tanba sira sei sai joven no diʼak fali. (Jó 33:25; Isa 35:5, 6) Loos duni, mundu tomak sei sai paraízu no ema mate mós sei moris hiʼas fali.—Lc 23:43; Apos 24:15.
18. Oinsá mak ita bele hatudu katak Maromak nia dalan atu ukun mak diʼak liu hotu?
18 Sin, Maromak nia ukun sei halakon buat aat hotu neʼebé Satanás hamosu kuandu nia halo ita-nia inan-aman primeiru fila kotuk ba sira-nia Kriadór. Hanoin mós kona-ba ida-neʼe, durante tinan 6.000 ona Satanás halo buat aat barak, maibé liuhusi Kristu, Maromak sei halakon buat aat hotu neʼe iha tinan 1.000 nia laran deʼit! Ida-neʼe hatudu ho klaru katak Maromak nia dalan atu ukun mak diʼak liu hotu! Nuʼudar Maromak nia Testemuña sira, ita simu nia nuʼudar ita-nia Ukun-Naʼin. Tan neʼe, loron-loron mai ita hatudu iha ita-nia moris katak ita adora Maromak Jeová, katak ita simu ninia Reinu, no katak ita kontente duni atu sai ninia Testemuña. No mós, mai ita uza oportunidade hotu atu fó-hatene ba ema seluk katak Maromak Jeová nia dalan atu ukun mak diʼak liu hotu.
Saida mak ita aprende kona-ba Maromak nia ukun kuandu lee . . .
• Ebreu 13:17?
[Pergunta estudu nian]
[Dezeñu iha pájina 29]
Maromak Jeová nafatin iha direitu atu ukun
[Dezeñu iha pájina 31]
Simu ho laran Maromak Jeová nia dalan atu ukun lori unidade ba ninia povu iha mundu tomak