“Espíritu no noiva kontinua dehan: ‘mai!’”
“Espíritu no noiva kontinua dehan: ‘mai!’”
“Espíritu no noiva kontinua dehan: ‘Mai!’ . . . Ema hotu neʼebé hamrook mai; ema hotu neʼebé hakarak bele kuru bee moris nian, simu deʼit lalika selu.”—APOK 22:17, MF.
1, 2. Oinsá mak ita hatudu katak Maromak nia Reinu importante iha ita-nia moris? Tanbasá?
OINSÁ mak ita hatudu katak Maromak nia Reinu importante iha ita-nia moris? Jesus fó laran-manas ba ninia dixípulu sira atu “buka uluknanain Maromak nia reinu”, no atu fiar katak buat hotu seluk neʼebé sira presiza Maromak sei fó ba sira. (Mt 6:25-33) Jesus kompara Maromak nia Reinu ho fatuk-murak neʼebé folin-boot, hetan tiha ida-neʼe kontratu-naʼin ida “faʼan tiha buat hotu neʼebé nia iha hodi sosa fatuk murak neʼe”. (Mt 13:45, 46) Nuneʼe, serbisu atu haklaken Maromak nia Reinu no hanorin ema mak importante liu hotu, loos ka lae?
2 Hanesan ita estuda ona iha lisaun rua uluk, kuandu ita haklaken ho aten-brani no uza Maromak nia Liafuan ho matenek, ita hatudu katak ita husik Maromak nia espíritu santu hatudu dalan mai ita. Espíritu santu mós ajuda ita atubele hola parte beibeik iha serbisu haklaken. Mai ita haree oinsá.
Konvite ba ema hotu!
3. Ema hotu hetan konvite atu “mai” no hemu bee oin saida?
3 Ema hotu hetan konvite liuhusi espíritu santu. (Lee Apokalipse 22:17.) Konvite neʼe mak atu ema hotu “mai” no hemu bee neʼebé halo sira la hamrook tan, tanba bee neʼe espesiál no la hanesan bee baibain. Maski presiza bee baibain atu buat hotu iha rai bele moris, maibé kuandu Jesus koʼalia ba feto samaritana ida iha bee-matan, nia hanoin kona-ba bee oin seluk. Nia hatete: “Ema neʼebé hemu bee neʼebé haʼu sei fó sei la hamrook ba nafatin, maibé bee neʼebé haʼu fó ba nia sei sai nuʼudar bee-matan neʼebé suli ba moris rohan-laek iha nia laran.” (Joao 4:14) Bee espesiál neʼebé ema hotu hetan konvite atu hemu, fó moris rohan-laek.
4. Tanbasá mak ema presiza bee moris nian? Bee moris nian reprezenta saida?
4 Ema komesa atu presiza bee moris nian neʼe kuandu Adão hamutuk ho nia feen, Eva, la halo tuir Maromak Jeová neʼebé kria sira. (Gên 2:16, 17; 3:1-6) Tan neʼe, Maromak hasai sira husi sira-nia hela-fatin iha jardín Eden “atu [Adão] la lolo nia liman no loloos foti mós ai-fuan husi ai-hun moris nian no han no moris toʼo tempu neʼebé la bele sura”. (Gên 3:22) Nuneʼe, nuʼudar ema hotu nia beiʼala primeiru, Adão halo ema hotu hetan mate. (Rom 5:12) Bee moris nian reprezenta buat hotu neʼebé Maromak fó ba ema hotu neʼebé halo tuir nia, atu salva sira husi sala no mate no fó ba sira moris ba nafatin iha mundu foun. Maromak bele fó buat sira-neʼe tanba Jesus Kristu fó nia moris nuʼudar sakrifísiu.—Mt 20:28; Joao 3:16; 1 Joao 4:9, 10.
5. Konvite atu mai no ‘kuru bee moris nian neʼebé lalika selu’, mai husi sé loos? Esplika toʼok.
5 Konvite atu mai no ‘kuru bee moris nian neʼebé lalika selu’, mai husi sé loos? Buat hotu neʼebé Maromak fó ba ema atu moris ba nafatin, nia sei fó liuhusi Jesus, bainhira Jesus ukun ba tinan rihun ida. No buat hotu neʼebé Maromak sei fó mak hanesan “mota bee moris nian, nabilan hanesan vidru”. Mota neʼe suli “sai husi Maromak no Bibi-Oan nia kadunan”. (Apok 22:1) Ida-neʼe hatudu katak Maromak Jeová nuʼudar Ida neʼebé Fó Moris mak Hun ba bee neʼebé fó moris. (Sal 36:9) Nia mak Ida neʼebé fó bee moris nian liuhusi “Bibi-Oan”, Jesus Kristu. (Joao 1:29) Mota neʼe reprezenta dalan neʼebé Maromak Jeová sei halakon buat aat hotu neʼebé mosu tanba Adão la halo tuir Maromak. Sin, Maromak Jeová mak Ida neʼebé Fó konvite ba ema hotu atu “mai”.
6. Horibainhira mak “mota bee moris nian” komesa atu suli?
6 Maski “mota bee moris nian” sei suli iha dalan kompletu durante Kristu nia ukun ba tinan rihun ida, maibé mota neʼe komesa suli iha “loron Naʼi nian”, iha tinan 1914, kuandu “Bibi-Oan” hahú ninia ukun iha lalehan. (Apok 1:10) Entaun, husi tempu neʼebá Maromak fó buat balu neʼebé ema presiza atubele moris ba nafatin. Neʼe envolve Maromak nia Liafuan, Bíblia, tanba Bíblia nia mensajen mak hanesan “bee”. (Ef 5:26) Ema hotu iha oportunidade atu simu konvite atu “kuru bee moris nian” hodi rona no simu lia-foun diʼak Reinu nian. Maibé tuir loloos, sé mak halo serbisu atu konvida ema iha loron Naʼi nian?
“Noiva” dehan: “Mai!”
7. Sé mak primeiru atu fó konvite iha “loron Naʼi nian”? Sira konvida sé?
7 Ema neʼebé sai parte ba grupu noiva, katak ema kristaun neʼebé kose-mina ho espíritu santu, sira mak primeiru atu fó konvite atu “mai”. Sira konvida sé? Klaru katak noiva la konvida nia an rasik hodi dehan: “Mai!” Maibé, nia konvida ema neʼebé iha esperansa atu hetan moris rohan-laek iha mundu foun bainhira “funu iha loron boot Maromak kbiit waʼin nian” hotu ona.—Lee Apokalipse 16:14, 16.
8. Saida mak hatudu katak ema kristaun kose-mina hatoʼo Maromak Jeová nia konvite husi tinan 1918?
8 Ema kristaun neʼebé kose-mina hatoʼo konvite neʼe husi tinan 1918. Iha tinan neʼebá, iha diskursu públiku ho tema: “Ema rihun ba rihun neʼebé moris agora, karik sei la mate.” Diskursu neʼe fó esperansa ba ema barak katak sira sei hetan moris rohan-laek iha mundu foun bainhira funu Armajedón hotu ona. Iha tinan 1922, Estudante Bíblia halaʼo reuniaun boot, iha Cedar Point, Ohio, Estadus Unidus, no iha reuniaun neʼe iha diskursu ida neʼebé fó laran-manas ba rona-naʼin sira atu ‘haklaken kona-ba Liurai no ninia reinu’. Halo ida-neʼe ajuda grupu noiva nian neʼebé sei hela iha rai atu hatoʼo konvite ba ema barak liután. Iha tinan 1929, livru The Watchtower, 15 Marsu, iha lisaun ida ho tema: “Konvite neʼebé kmanek”, lisaun neʼe esplika Apokalipse 22:17. Liafuan balu iha lisaun neʼe hatete: “Restu husi grupu laran-metin hamutuk [Ida neʼebé Aas Liu Hotu] atu hatoʼo konvite neʼebé kmanek no dehan: ‘Mai’. Mensajen neʼe atu haklaken ba ema neʼebé hakarak hetan justisa no lia-loos. Tenkesér halo ida-neʼe agora kedas.” Toʼo ohin loron, grupu noiva nian kontinua atu fó konvite neʼe.
“Ema hotu neʼebé rona hatán bá: ‘Mai!’”
9, 10. Ema neʼebé rona konvite atu “mai” presiza mós atu halo saida?
9 Oinsá ho ema neʼebé rona konvite atu “mai”? Sira presiza simu konvite neʼe hodi dehan fali ba ema seluk: “Mai!” Porezemplu, iha livru The Watchtower, 1 Agostu 1932, iha pájina 232, hatete: “Diʼak atu ema kose-mina fó laran-manas ba ema hotu atu hola parte atu haklaken lia-foun diʼak reinu nian. Sira neʼebé hola parte la presiza sai Naʼi nia ema neʼebé kose-mina atubele haklaken Naʼi nia mensajen. Testemuña ba Jeová sente laran-kmaan duni atu hatene katak sira mós bele lori bee moris nian ba ema ohin loron neʼebé karik sei liu Armajedón no hetan moris rohan-laek iha rai.”
10 Hodi hatudu katak ema neʼebé rona konvite iha responsabilidade atu dehan: “Mai!”, livru The Watchtower, 15 Agostu 1934, iha pájina 249, hatete: “Maski ema husi grupu Jonadab laʼós ema kose-mina, sira tenke hamutuk ho ema husi grupu Jeú, katak ema kose-mina, hodi haklaken mensajen reinu nian.” Iha tinan 1935, sai klaru sé mak “ema-lubun boot” neʼebé temi iha Apokalipse 7:9-17. Husi tempu neʼebá, ema-lubun boot neʼebé adora Maromak iha dalan neʼebé loos, neʼebé simu konvite neʼe, kontinua atu aumenta ba beibeik, sira agora naʼin-7.000.000 liu. Tanba sira hafolin mensajen neʼebé sira rona, sira dedika an ba Maromak, hetan batizmu, no ho laran-manas sira hamutuk ho grupu noiva nian kontinua atu konvida ema seluk atu ‘mai no hemu bee moris nian neʼebé lalika selu’.
“Espíritu” dehan: “Mai!”
11. Iha apóstolu sira-nia tempu, oinsá mak espíritu santu ajuda atu halo serbisu haklaken?
11 Kuandu Jesus haklaken iha sinagoga ida iha Nazaré, nia loke livru profeta Isaías nian no lee: “Naʼi [Jeová] nia espíritu iha haʼu, basá nia foti tiha haʼu atu haklaken lia-foun diʼak ba kiak sira; nia haruka haʼu atu haklaken maksoin ba dadur sira no halo matan-delek sira haree; atu soi sira neʼebé ema hanehan, hodi haklaken Naʼi nia tinan rahun-kmanek nian.” Tuirmai, Jesus aplika liafuan sira-neʼe ba nia an, hodi dehan: “Ohin halo tuir loos duni liafuan Eskritura nian neʼebé imi foin rona.” (Lc 4:17-21) Antes Jesus saʼe ba lalehan, nia hatete ba ninia dixípulu sira: “Wainhira espíritu santu tun ba imi, imi sei simu kbiit; imi sei sai haʼu-nia sasin . . . toʼo rai nia rohan.” (Apos 1:8) Ida-neʼe hatudu katak iha apóstolu sira-nia tempu, espíritu santu mak ajuda atu halo serbisu haklaken.
12. Oinsá mak Maromak nia espíritu santu ajuda atu hatoʼo konvite ba ema ohin loron?
12 Oinsá mak Maromak nia espíritu santu ajuda atu hatoʼo konvite ba ema ohin loron? Espíritu santu mai husi Maromak Jeová. Nia uza ninia espíritu atu ajuda grupu noiva nian hodi loke sira-nia hanoin no laran atu komprende ninia Liafuan, Bíblia. Espíritu book sira atu hatoʼo konvite no esplika lia-loos husi Bíblia ba sira neʼebé iha esperansa atu moris ba nafatin iha mundu foun. Maibé, oinsá ho sira neʼebé simu konvite, neʼebé sai Jesus Kristu nia dixípulu, no neʼebé konvida fali ema seluk? Espíritu santu mós ajuda sira. Hodi hetan batizmu iha ‘espíritu santu nia naran’, sira sadere no husik espíritu santu ajuda sira. (Mt 28:19) Hanoin mós kona-ba mensajen neʼebé ema kose-mina no ema-lubun boot haklaken. Mensajen neʼe mai husi Bíblia, no Bíblia mak livru neʼebé Maromak leno liuhusi ninia espíritu santu. Ida-neʼe hatudu ho klaru katak espíritu santu mak hatudu dalan no ajuda ita atu hatoʼo konvite neʼe. Oinsá mak ida-neʼe book ita atu uza ita-nia tempu barak liután atu hola parte iha serbisu atu konvida ema?
Sira “kontinua dehan: ‘Mai!’”
13. Liafuan “espíritu no noiva kontinua dehan: ‘Mai!’” katak sá?
13 “Espíritu no noiva” la dehan: “Mai!” ba dala ida deʼit. Liafuan neʼebé uza iha-neʼe husi lia-gregu hatudu hahalok neʼebé halo beibeik. Tan neʼe mak Bíblia Tradusaun Mundu Foun hatete: “Espíritu no noiva kontinua dehan: ‘Mai!’” Ida-neʼe hatudu katak Maromak nia konvite neʼe presiza hatoʼo beibeik ba ema. Oinsá ho ema neʼebé rona no simu konvite neʼe? Sira mós presiza dehan fali: “Mai!” Bíblia koʼalia kona-ba ema-lubun boot neʼebé adora Maromak iha dalan neʼebé loos, hodi dehan katak sira ‘serbí Jeová kalan loron iha nia santuáriu’. (Apok 7:9, 15) ‘Serbí kalan loron’ katak sá? (Lee Lucas 2:36, 37; Apostolu 20:31; 2 Tesalonika 3:8.) Ezemplu husi profeta Ana no husi apóstolu Paulo hatudu katak atu ‘serbí kalan loron’ ita presiza hakaʼas an nafatin hodi la para atu halo serbisu haklaken.
14, 15. Oinsá mak Daniel hatudu katak importante atu adora beibeik Maromak?
14 Profeta Daniel mós hatudu katak importante atu halaʼo adorasaun beibeik ba Maromak. (Daniel 6:4-10, 16) Ba fulan ida deʼit mós nia la muda ninia toman atu adora Maromak, hanesan halo orasaun ba Maromak “dala tolu iha loron ida . . . nuʼudar nia halo beibeik ona”, maski hodi halo ida-neʼe ema soe nia ba leaun kuak. Ninia hahalok hatudu ho klaru ba ema katak la iha buat ida neʼebé importante liu fali adora beibeik Maromak Jeová!—Mt 5:16.
15 Depois Daniel hela kalan tomak iha leaun kuak, liurai hakbesik ba leaun kuak hodi dehan: “Oh, Daniel, Maromak moris nia atan, ó-nia Maromak neʼebé ó serbí nafatin bele salva ó husi leaun sira ka lae?” Daniel hatán kedas hodi dehan: “Oh, liurai, moris bá toʼo tempu neʼebé la iha rohan. Haʼu rasik nia Maromak haruka ninia anju no taka leaun sira-nia ibun, tan neʼe, sira la halo aat mai haʼu, tanba iha nia oin haʼu la iha sala ida, no mós iha Ita-Boot nia oin, oh, liurai, haʼu nunka halo hahalok aat ida.” Tanba Daniel “serbí nafatin” Maromak Jeová, Maromak haraik bensaun ba nia.—Dan 6:19-22.
16. Hodi hanoin kona-ba Daniel nia ezemplu, diʼak atu husu ba ita-nia an pergunta saida?
16 Daniel prontu atu mate duké husik ninia toman atu halaʼo adorasaun ba Maromak Jeová. Oinsá ho ita? Saida mak ita prontu atu husik hodi bele hola parte beibeik atu haklaken lia-foun diʼak kona-ba Maromak nia Reinu? Diʼak atu ita la husik fulan ida liu hodi la koʼalia ba ema seluk kona-ba Maromak Jeová! Se bele, ita hakarak hakaʼas an atu hola parte iha serbisu haklaken semana-semana. Maski ita haklaken ba minutu 15 deʼit iha fulan ida nia laran tanba ita moras, ita presiza hakerek oras neʼe iha relatóriu. Tanbasá? Tanba ita hakarak duni apoia espíritu santu no noiva, hodi kontinua dehan: “Mai!” Sin, ita hakarak halo buat hotu neʼebé ita bele atu haklaken beibeik no la husik fulan ida liu hodi la hatama relatóriu haklaken nian.
17. Oportunidade saida deʼit mak ita presiza uza atu hatoʼo Maromak Jeová nia konvite?
17 Ita presiza uza oportunidade hotu atu hatoʼo Maromak nia konvite. Ita iha knaar espesiál tebes atu konvida ema neʼebé hamrook atu ‘mai kuru bee moris nian neʼebé lalika selu’. Ita bele halo ida-neʼe laʼós deʼit kuandu ita tuir grupu haklaken, maibé mós iha tempu seluk, hanesan kuandu ita bá loja, kuandu halo viajen, kuandu feriadu, no mós iha serbisu-fatin, ka iha eskola! Maski ukun-naʼin sira bandu ita-nia serbisu haklaken, ita kontinua halaʼo serbisu neʼe ho kuidadu no matenek, karik hodi haklaken ba uma balu deʼit iha bairru ida, depois muda fali ba fatin seluk, ka hodi aumenta ita-nia serbisu haklaken iha situasaun seluk.
Kontinua dehan: “Mai!”
18, 19. Oinsá mak ita hatudu katak ita hafolin oportunidade espesiál atu sai Maromak nia maluk serbisu-naʼin?
18 Ba tinan sianulu liu, espíritu no noiva kontinua dehan: “Mai!” ba ema hotu neʼebé hamrook ba bee moris nian. Ita rona ona sira-nia konvite kmanek neʼe? Se nuneʼe, diʼak atu ita hatoʼo fali konvite neʼe ba ema seluk.
19 Ita la hatene toʼo bainhira mak Maromak Jeová sei kontinua atu hatoʼo ninia konvite neʼe, maibé simu ninia konvite hodi dehan fali: “Mai!”, neʼe halo ita sai nuʼudar Maromak nia maluk serbisu-naʼin. (1 Kor 3:6, 9) Ida-neʼe mak oportunidade neʼebé espesiál tebes! Mai ita hatudu katak ita hafolin oportunidade neʼe no “hasaʼe nafatin sakrifísiu hahiʼi rohan-laek nian” hodi haklaken beibeik. (Ebr 13:15) Hamutuk ho grupu noiva nian, mai ita neʼebé iha esperansa atu moris iha mundu foun kontinua atu dehan: “Mai!” Hodi nuneʼe, ema barak liután sei bele kuru bee moris nian neʼebé lalika selu!
Saida mak Ita aprende?
• Konvite atu “mai” hatoʼo ba sé?
• Saida mak hatudu katak konvite atu “mai” mak husi Maromak Jeová?
• Oinsá mak espíritu santu ajuda atu hatoʼo konvite atu “mai”?
• Tanbasá mak ita presiza hakaʼas an atu haklaken beibeik?
[Pergunta estudu nian]
[Tabela/Dezeñu iha pájina 16]
(Atu hetan format kompletu, haree livru)
Kontinua dehan: “Mai!”
1914
Haklaken-naʼin 5.100
1918
Ema barak sei hetan moris rohan-laek iha mundu foun
1922
“Haklaken, haklaken, haklaken, kona-ba Liurai no ninia reinu”
1929
Restu husi ema kose-mina dehan: “Mai!”
1932
Konvite laʼós deʼit hatoʼo ba ema kose-mina
1934
Grupu Jonadab simu konvite atu haklaken
1935
Hatene ona sé mak “ema-lubun boot”
2009
Haklaken-naʼin 7,313,173