‘Haklaken Maromak nia Liafuan ho aten-brani’
‘Haklaken Maromak nia Liafuan ho aten-brani’
“Sira hotu sai nakonu ho espíritu santu. Sira haklaken Maromak futar-lia ho aten-barani.”—APOS 4:31.
1, 2. Tanbasá mak ita tenke hakaʼas an atu hetan rezultadu diʼak iha serbisu haklaken?
LORON tolu antes Jesus mate, nia hatete ba ninia dixípulu sira: “Lia-foun reinu nian neʼe, ema sei haklaken iha mundu tomak hodi fó sasin ba povu hotu. Iha oras neʼebá, buat hotu nia rohan sei toʼo mai.” Antes Jesus saʼe ba lalehan, nia haruka ninia dixípulu sira atu ‘bá hodi hanorin nasaun hotu-hotu kona-ba buat hotu neʼebé nia haruka ba sira’. Jesus promete ba sira katak nia sei hamutuk ho sira “toʼo mundu nia rohan”.—Mt 24:14; 26:1, 2; 28:19, 20.
2 Nuʼudar Testemuña ba Jeová, ita hola parte beibeik iha serbisu neʼebé hahú ona iha Jesus nia tempu. Serbisu haklaken no hanorin kona-ba Maromak nia Reinu mak importante liu hotu tanba bele salva ema nia moris. Tan neʼe, importante tebes atu ita hakaʼas an atu hetan rezultadu diʼak iha ita-nia serbisu haklaken! Iha lisaun neʼe, ita sei haree oinsá mak espíritu santu ajuda ita atu koʼalia ho aten-brani kuandu ita haklaken. Lisaun rua tuirmai, sei esplika oinsá mak Maromak Jeová nia espíritu bele ajuda ita atu hanorin ho matenek no atu haklaken nafatin.
Ita presiza aten-brani
3. Tanbasá mak presiza aten-brani atu haklaken Maromak nia Reinu?
3 Haklaken Maromak nia Reinu mak knaar espesiál neʼebé la bele kompara ho buat seluk. Maibé, dala ruma ida-neʼe la fasil. Maski ema balu simu lia-foun diʼak kona-ba Maromak nia Reinu, maibé ema barak hatudu hahalok hanesan ema iha Noé nia tempu. Jesus hatete: “Sira la hatene buat ida toʼo rai-nabeen mai no sira hotu mate.” (Mt 24:38, 39) Iha mós ema balu neʼebé kontra ka goza ita. (2 Ped 3:3) Dala ruma ukun-naʼin sira, kolega iha eskola ka serbisu-fatin, ka ita-nia família rasik mak kontra hasoru ita. Liután neʼe, ita rasik mós iha hahalok hanesan moe ka taʼuk katak ema la simu ita. Buat sira-neʼe hatudu katak iha buat barak neʼebé bele halo susar mai ita atu haklaken Maromak nia liafuan ho “aten-barani”. (Ef 6:19, 20) Maibé, ita presiza aten-brani hodi bele kontinua atu haklaken Maromak nia liafuan. Saida mak bele ajuda ita atu sai aten-brani?
4. (a) Aten-brani katak sá? (b) Oinsá mak apóstolu Paulo hetan aten-brani atu haklaken nafatin ba ema iha Tesalonika?
4 Lia-gregu neʼebé tradús nuʼudar “aten-brani” katak “koʼalia ho loloos no momoos, simples no klaru”. Liafuan neʼe mós iha arti “brani, fiar an, ka la taʼuk buat ida”. Aten-brani la dehan katak ita koʼalia ba ema iha dalan neʼebé la hatudu respeitu. (Kol 4:6) Maski ita hakarak sai aten-brani, maibé ita mós hakarak buka dame ho ema hotu. (Rom 12:18) No mós, kuandu ita haklaken lia-foun diʼak kona-ba Maromak nia Reinu ho aten-brani, ita mós presiza koʼalia ba ema ho respeitu hodi la hakanek sira-nia laran. Klaru katak atu hatudu aten-brani ita mós presiza hakaʼas an atu haburas hahalok seluk. Aten-brani la mosu husi ita-nia kbiit rasik. Kuandu ema hasara apóstolu Paulo no ninia maluk sira iha Filipe, oinsá mak sira hetan aten-brani atu haklaken nafatin ba ema iha Tesalonika? Apóstolu Paulo hakerek: “Maromak fó aten-barani.” (Lee 1 Tesalonika 2:2.) Maromak Jeová mós bele halakon ita-nia taʼuk no fó ita aten-brani.
5. Oinsá mak Maromak Jeová fó aten-brani ba Pedro, João, dixípulu sira seluk?
5 Kuandu “naʼi-ulun sira, katuas no eskriba sira” koʼalia hasoru apóstolu Pedro no João, apóstolu sira hatán: “Imi hanoin bá: iha Maromak futar oin, ami halo tuir imi-nia haruka hodi la halo tuir Maromak, neʼe loos ka lae! Ami labele nonook deʼit kona-ba buat neʼebé ami haree no rona.” Duké husu Maromak atu hapara ema neʼebé haterus sira, sira no sira-nia maluk harohan hodi dehan: “Naʼi, haree sira-nia ameasa, no tulun Ita atan sira atubele haklaken ho aten-barani Ita futar-lia.” (Apos 4:5, 19, 20, 29) Oinsá mak Maromak Jeová hatán sira-nia orasaun? (Lee Apostolu 4:31.) Maromak Jeová ajuda sira atu aten-brani liuhusi ninia espíritu santu. Maromak nia espíritu mós bele ajuda ita atu sai aten-brani. Nuneʼe, oinsá mak ita bele simu Maromak nia espíritu atu ajuda ita iha ita-nia serbisu haklaken?
Oinsá atu sai aten-brani
6, 7. Saida mak dalan atu ita bele simu Maromak nia espíritu santu? Fó toʼok ezemplu.
6 Dalan ida atu ita bele simu Maromak nia espíritu santu mak hodi husu ba nia. Jesus hatete: “Neʼe duni, maski imi ema laran-aat hatene fó buat diʼak ba imi-nia oan sira, oinsá liután mak imi-nia Aman iha lalehan sei haraik espíritu santu ba sira neʼebé husu ba Nia?” (Lc 11:13) Tan neʼe, ita tenke halo orasaun beibeik hodi husu espíritu santu. Se ita taʼuk atu haklaken iha dalan balu, hanesan haklaken iha estrada, iha loja ka iha dalan seluk tan, ita bele husu Maromak Jeová atu fó ba ita ninia espíritu santu no husu nia atu ajuda ita sai aten-brani.—1 Tes 5:17.
7 Ida-neʼe mak irmán ida naran Rosa halo. * Loron ida kuandu irmán Rosa iha nia serbisu-fatin, nia rona nia maluk mestra ida lee relatóriu ida husi eskola seluk kona-ba haterus labarik sira. Tanba mestra neʼe neon-susar tebes kona-ba buat neʼebé nia lee, nia hatete: “Tansá mundu sai hanesan neʼe?” Rosa lakohi lakon oportunidade neʼe atu fó sasin. Saida mak nia halo atu sai aten-brani atu fó sasin? Nia hatete: “Haʼu halo orasaun ba Maromak Jeová no husu ninia espíritu santu atu ajuda haʼu.” Tanba nia halo ida-neʼe, nia bele fó sasin ho diʼak no halo planu atu koʼalia liután ba ninia maluk iha tempu seluk. Hanoin mós ezemplu ida tan husi labarik ida naran Milani, neʼebé hela iha sidade Novaiorke. Milani hatete: “Antes haʼu bá eskola, haʼu no haʼu-nia amá sempre halo orasaun ba Aman Jeová.” Sira halo orasaun kona-ba saida? Sira husu Maromak hodi fó Milani aten-brani, atu nia bele hamriik metin no la taʼuk atu koʼalia kona-ba ninia Maromak! Milani nia inan hatete: “Ida-neʼe ajuda Milani atu esplika tansá mak nia labele hola parte iha festa halo-tinan no loron-boot seluk.” Ezemplu sira-neʼe hatudu duni katak atu sai aten-brani ita presiza halo orasaun!
8. Saida mak ajuda profeta Jeremias atu sai aten-brani?
8 Hanoin mós kona-ba saida mak ajuda profeta Jeremias atu sai aten-brani. Kuandu Maromak hili Jeremias atu sai profeta ida ba nasaun sira, nia hatete: “Haʼu la iha matenek atu koʼalia, tanba haʼu mak joven deʼit.” (Jer 1:4-6) Maski nuneʼe, Jeremias hakaʼas an nafatin atu halo serbisu haklaken toʼo ema koñese nia nuʼudar ida neʼebé haklaken kona-ba kastigu. (Jer 38:4) Ba tinan 65 liu, nia ho aten-brani haklaken kona-ba Maromak nia loron tesi-lia nian. Tan neʼe mak tinan 600 liutiha ema barak iha Izraél hatene Jeremias nuʼudar ema neʼebé la taʼuk no brani atu haklaken. Nuneʼe, kuandu Jesus haklaken ho aten-brani, ema balu fiar katak Jeremias moris fali ona. (Mt 16:13, 14) Saida mak fó forsa ba profeta Jeremias atu la sente moe tan? Nia hatete: “Iha haʼu-nia laran, ida-neʼe [Maromak nia liafuan] sai hanesan ahi neʼebé lakan, neʼebé metin iha haʼu-nia ruin sira; no haʼu sai kole atu tahan neʼe.” (Jer 20:9) Sin, Maromak Jeová nia liafuan fó forsa ba Jeremias no book nia atu koʼalia.
9. Oinsá mak Maromak nia liafuan bele book ita hanesan Jeremias?
9 Iha apóstolu Paulo nia karta ba ema ebreu, nia hakerek: “Maromak nia liafuan moris no book makaʼas, kroʼat liu fali surik ida ho kroʼat rua, neʼebé bele tesi ketak klamar no espíritu, ruin no bokur, no bele hatene loloos buat neʼebé ema hanoin no hakarak iha nia fuan.” (Ebr 4:12) Maromak nia liafuan, ka mensajen, bele book ita hanesan Jeremias. Hanoin-hetan katak maski Maromak uza ema atu hakerek Bíblia, maibé ida-neʼe laʼós livru sira kona-ba ema nia matenek tanba Maromak mak leno Bíblia. Iha 2 Pedro 1:21, hatete: “Liafuan profeta nian ida la sai husi ema nia hakarak, maibé tanba ema sira neʼebé espíritu santu leno daudaun fó sai husi Maromak.” Kuandu ita uza tempu mesak atu estuda Bíblia ho didiʼak, ita halo nakonu ita-nia neon ho mensajen neʼebé espíritu santu mak leno. (Lee 1 Korinto 2:10.) Mensajen ida-neʼe bele sai hanesan “ahi neʼebé lakan” iha ita-nia laran, toʼo ita la bele tahan atu rai hela ida-neʼe ba ita-nia an.
10, 11. (a) Iha dalan saida mak ita tenke estuda Bíblia atu ita bele koʼalia ho aten-brani? (b) Saida mak Ita rasik bele halo atu hadiʼa dalan neʼebé Ita estuda Bíblia?
10 Kuandu ita estuda Bíblia mesak, ita tenke estuda iha dalan neʼebé Bíblia nia mensajen bele tama toʼo iha ita-nia laran atu bele book ita. Porezemplu, iha profeta Ezequiel nia vizaun ida, Maromak haruka nia atu han livru ida neʼebé iha mensajen neʼebé nia tenke hatoʼo ba ema sira neʼebé lakohi rona. Ezequiel tenke hatama mensajen neʼe iha ninia laran atu book nia hahalok. Hodi halo nuneʼe, mensajen neʼebé nia hatoʼo bele sai midar hanesan bani-been.—Lee Ezequiel 2:8; 3:2-4. *
11 Ita mós hasoru situasaun hanesan Ezequiel. Ohin loron, ema barak lakohi rona mensajen husi Bíblia. Atu ita bele kontinua nafatin atu koʼalia kona-ba Maromak nia liafuan, importante atu ita estuda Bíblia iha dalan neʼebé ajuda ita atu komprende didiʼak buat neʼebé Bíblia hatete. Ita tenke sai toman atu estuda Bíblia beibeik, laʼós dala ruma deʼit. Ita-nia hakarak tenke sai hanesan ema neʼebé hakerek salmu ida, neʼebé hatete: “Haʼu hein katak liafuan husi haʼu-nia ibun no hanoin iha haʼu-nia laran sai buat neʼebé monu loos ba Ita, oh, Jeová, haʼu-nia Fatuk no haʼu-nia Naʼi neʼebé Sosa Fali haʼu.” (Sal 19:14) Importante tebes atu ita uza tempu atu hanoin kleʼan kona-ba buat neʼebé ita lee, hodi nuneʼe lia-loos husi Bíblia bele tama toʼo ita-nia fuan. Loos duni, ita tenke hakaʼas an atu hadiʼa dalan neʼebé ita estuda Bíblia mesak. *
12. Tanbasá mak reuniaun kristaun sira importante atu hetan ajuda husi espíritu santu?
12 Dalan seluk tan atu hetan ajuda husi Maromak Jeová nia espíritu santu mak hodi “hanoin oinsá ita bele hakaʼas malu atu hadomi no halo hahalok diʼak, hodi la haluha atu halibur an”. (Ebr 10:24, 25) Hodi hakaʼas an atu tuir reuniaun kristaun sira beibeik, rona didiʼak, no halo tuir buat neʼebé ita aprende mak dalan diʼak atu husik Maromak nia espíritu hatudu dalan mai ita. Tuir loloos, liuhusi kongregasaun mak Maromak Jeová nia espíritu fó matadalan mai ita.—Lee Apokalipse 3:6.
Sai aten-brani fó buat diʼak
13. Saida mak ita bele aprende husi ema kristaun iha tempu uluk neʼebé haklaken ho susesu?
13 Espíritu santu mak forsa neʼebé boot liu hotu no bele fó kbiit ba ema atu halo Maromak Jeová nia hakarak. Ho espíritu santu nia ajuda, ema kristaun iha tempu uluk bele halo serbisu haklaken ho susesu. Sira haklaken lia-foun diʼak “ba sasán [“kriasaun”, MF] hotu iha lalehan okos”. (Kol 1:23) Ema kristaun barak iha tempu neʼebá mak “ema baibain neʼebé la matenek”, ida-neʼe hatudu ho klaru katak buat neʼebé book sira atu haklaken mak forsa neʼebé boot liu hotu.—Apos 4:13.
14. Saida deʼit mak bele ajuda ita atu “laran-manas nafatin iha espíritu”?
14 Kuandu ita husik espíritu santu hatudu dalan iha ita-nia moris, ida-neʼe bele book ita atu halo serbisu haklaken ho aten-brani. Hodi halo orasaun beibeik atu husu Maromak nia espíritu, hodi badinas atu estuda Bíblia mesak, hodi hanoin kleʼan kona-ba buat neʼebé ita lee, no hodi tuir reuniaun beibeik, buat sira-neʼe bele ajuda ita atu “laran-manas nafatin iha espíritu”. (Rom 12:11) Kona-ba “ema judeu ida naran Apolo husi Alexandria neʼebé koʼalia diʼak loos; [neʼebé] mai toʼo Éfezu”, Bíblia hatete: “Ho laran-manas [“iha espíritu”, MF] nia koʼalia no hanorin momoos kona-ba Jesus.” (Apos 18:24, 25) Hodi “laran-manas nafatin iha espíritu”, ita mós bele hatudu aten-brani kuandu ita haklaken uma ba uma ka haklaken iha situasaun naran deʼit.
15. Oinsá mak haklaken ho aten-brani fó buat diʼak mai ita?
15 Kuandu ita sai aten-brani liután iha serbisu haklaken, ida-neʼe bele fó buat diʼak mai ita. Porezemplu, ita sei hafolin diʼak liután serbisu haklaken tanba ita komprende katak serbisu neʼe importante no bele ajuda ema seluk. Ita-nia laran-manas mós sei aumenta liután tanba ita haksolok kona-ba rezultadu diʼak neʼebé ita hetan husi serbisu haklaken. No ita-nia laran-manas mós sai metin liután tanba ita komprende katak haklaken mak serbisu neʼebé ita tenke halo agora kedas.
16. Saida mak ita presiza halo se ita-nia laran-manas ba serbisu haklaken la hanesan uluk ona?
16 Saida mak ita bele halo se ita-nia laran-manas ba serbisu haklaken la hanesan uluk ona? Se nuneʼe, ita presiza hanoin didiʼak kona-ba ita-nia an. Apóstolu Paulo hatete: “Haree didiʼak imi an atu haree imi moris iha fiar ka lae. Koko imi an.” (2 Kor 13:5) Tan neʼe, husu Ita-nia an: ‘Haʼu sei laran-manas nafatin iha espíritu ka lae? Haʼu halo orasaun ba Maromak Jeová atu husu ninia espíritu ka lae? Haʼu-nia orasaun hatudu katak haʼu sadere ba Maromak atu halo ninia hakarak ka lae? Haʼu fó-agradese ba serbisu haklaken neʼebé Maromak fó ka lae? Oinsá mak haʼu-nia toman atu estuda mesak? Tempu hira mak haʼu uza atu hanoin didiʼak kona-ba buat neʼebé haʼu lee no rona? Haʼu hola parte beibeik iha reuniaun sira ka lae?’ Hodi hanoin kona-ba pergunta hanesan sira-neʼe, bele ajuda ita atu hatene saida mak ita tenke hadiʼa no atu halo diʼak liután.
Husik espíritu halo ita aten-brani
17, 18. (a) Oinsá mak serbisu haklaken halo ohin loron? (b) Oinsá mak ita bele haklaken Maromak nia Reinu “ho aten-barani”?
17 Jesus hatete ba ninia dixípulu sira: “Wainhira espíritu santu tun ba imi, imi sei simu kbiit; imi sei sai haʼu-nia sasin iha Jeruzalein, iha Judeia no Samaria tomak toʼo rai nia rohan.” (Apos 1:8) Serbisu neʼebé hahú iha tempu neʼebá, ohin loron halo iha dalan boot liután. Testemuña ba Jeová besik naʼin-7.000.000 haklaken mensajen Reinu nian iha rai 230 liu, no tinan-tinan sira uza oras besik 1.500.000.000 iha serbisu haklaken. Ita kontente tebes atu hola parte ho laran-manas iha serbisu neʼebé sei nunka halo fali!
18 Ohin loron Maromak nia espíritu mak dirije serbisu haklaken iha mundu tomak hanesan iha tempu uluk. Se ita husik espíritu santu hatudu dalan mai ita, ita sei “koʼalia ho aten-barani” iha serbisu haklaken. (Ef 6:19) Nuneʼe, mai ita husik espíritu santu hatudu dalan mai ita nuʼudar ita haklaken lia-foun diʼak kona-ba Maromak nia Reinu!
[Nota–rodapé]
^ par. 7 Naran sira laʼós naran neʼebé loos.
^ par. 10 Ezequiel 2:8; 3:2-4: “‘No ó, oh, oan-mane, rona buat neʼebé haʼu hatete ba ó. Keta sai hanesan ema-lubun neʼebé kontra beibeik. Loke ó-nia ibun bá no han buat neʼebé haʼu fó ba ó.’ Tan neʼe, haʼu loke haʼu-nia ibun, no neineik-neineik nia halo haʼu han livru neʼe. No nia hatete tan mai haʼu: ‘Oan-mane, han no ó tenke halo nakonu ó-nia kabun ho ida-neʼe, atu nuneʼe ó sei halo nakonu ó-nia aten ho livru neʼe neʼebé haʼu fó ba ó.’ No haʼu komesa atu han neʼe, no ida-neʼe midar hanesan bani-been iha haʼu-nia ibun. No nia kontinua tan dehan mai haʼu: ‘Oan-mane, bá, tama iha Izraél nia umakain, no ó tenke fó-hatene haʼu-nia liafuan ba sira.’”
^ par. 11 Atu hetan buat diʼak kuandu Ita lee no estuda Bíblia, haree livru Memperoleh Manfaat dari Pendidikan Sekolah Pelayanan Teokratis, iha kapítulu neʼebé iha tema ‘Kerahkan Diri Saudara untuk Membaca’ no ‘Belajar Itu Bermanfaat’, iha pájina 21-32.
Saida mak Ita aprende?
• Tanbasá mak ita presiza aten-brani atu koʼalia Maromak nia liafuan?
• Saida mak ajuda ema kristaun iha tempu uluk atu haklaken ho aten-brani?
• Oinsá mak ita bele sai aten-brani?
• Oinsá mak haklaken ho aten-brani fó buat diʼak mai ita?
[Pergunta estudu nian]
[Dezeñu iha pájina 7]
Oinsá mak inan-aman bele ajuda oan sira atu sai aten-brani?
[Dezeñu iha pájina 8]
Halo orasaun badak bele ajuda ita sai aten-brani kuandu haklaken