Ita haree Jeová nuʼudar Ita-nia Aman ka lae?

KUANDU Jesus nia dixípulu ida hatete ba nia: “Naʼi, hanorin ami atu harohan,” Jesus hatán hodi dehan: “Wainhira imi harohan, hateten nuneʼe: ‘Aman, tulun ema atu hahiʼi Ita naran.’” (Lc 11:1, 2) Karik Jesus bele hanorin sira atu halo orasaun ba Maromak hodi uza títulu hanesan “Maromak Forsa Boot Liu Hotu”, “Mestre Boot”, “Kriadór”, “Ida neʼebé Idade Boot Liu”, no “Liurai Rohan-Laek”. (Gên 49:25; Isa 30:20; 40:28; Dan 7:9; 1 Tim 1:17) Maibé, Jesus hili atu uza títulu “Aman”. Tanbasá? Karik tanba nia hakarak ita atu hakbesik ba Ida neʼebé aas liu hotu iha lalehan no rai hanesan labarik ida hakbesik ba ninia aman neʼebé hadomi nia.

Maibé susar ba ema balu atu hanoin kona-ba Maromak nuʼudar sira-nia Aman. Feto kristaun ida naran Atsuko * hatete: “Durante tinan balu depois haʼu hetan batizmu, susar ba haʼu atu hakbesik ba Jeová atu halo orasaun ba nia nuʼudar Aman.” Nia esplika tansá nia sente hanesan neʼe: “Haʼu-nia aman rasik nunka hatudu domin ba haʼu.”

Iha loron ikus sira-neʼe, ema “la hatene sadiʼa maluk”, tan neʼe susar ba oan sira atu hetan domin husi sira-nia aman rasik. (2 Tim 3:1, 3) Nuneʼe, ita la hakfodak katak ema barak sente hanesan Atsuko. Maibé tuir loloos, ita iha razaun barak atu haree Jeová nuʼudar ita-nia Aman neʼebé hadomi ita.

Maromak Jeová tau matan ita

Atu ita bele haree Jeová nuʼudar ita-nia Aman, ita presiza koñese nia didiʼak. Jesus hatete: “Ema ida la hatene Oan, Aman deʼit mak hatene; nuneʼe mós ema ida la hatene Aman, Oan deʼit mak hatene, no mós ema neʼebé Oan hakarak hatudu ba nia.” (Mt 11:27) Dalan diʼak atu hatene kona-ba Jeová nuʼudar Aman mak hodi hanoin didiʼak saida mak Jesus fó sai kona-ba Maromak neʼebé loos. Nuneʼe, saida mak Jesus fó sai kona-ba Aman?

Tanba Jesus hatene katak Maromak Jeová mak moris nia hun, nia hatete: “Haʼu moris tanba Aman.” (Joao 6:57) Ita hotu mós moris tanba Aman. (Sal 36:9; Apos 17:28) Saida mak book Maromak Jeová atu fó moris ba ninia kriatura sira? Domin, loos ka lae? Tanba ita-nia Aman iha lalehan fó moris mai ita nuʼudar prezente, ita tenke hadomi fali nia.

Dalan boot liu hotu neʼebé Maromak hatudu nia domin ba ema mak hodi fó Jesus nia moris nuʼudar sakrifísiu. Tanba Maromak Jeová hatudu domin hanesan neʼe, ema sala-naʼin bele iha relasaun diʼak ho nia liuhusi ninia Oan doben. (Rom 5:12; 1 Joao 4:9, 10) No tanba ita-nia Aman iha lalehan halo tuir buat hotu neʼebé nia promete, ita bele fiar katak ema hotu neʼebé hadomi nia no halo tuir nia ikusmai sei haksolok hodi sai ‘Maromak nia oan neʼebé laʼós atan tan’.—Rom 8:21.

Loron-loron, ita-nia Aman iha lalehan mós “halo loron saʼe ba” ita hotu. (Mt 5:45) Maski karik ita hanoin katak la presiza atu husu Maromak atu halo loron saʼe, maibé ita presiza duni loron nia manas. Liután neʼe, la iha kriatura ida neʼebé bele fó buat neʼebé ita-nia Aman bele fó, tanba nia hatene buat neʼebé ita presiza antes ita husu ba Nia. Tan neʼe, ita hakarak duni atu haree ba ita-nia Aman iha lalehan nia kriasaun no hatudu agradese ba dalan neʼebé nia tau matan ba ninia kriasaun, loos ka lae?—Mt 6:8, 26.

 Ita-nia Aman proteje ita

Liuhusi profeta Isaías, Maromak promete ba ninia povu iha tempu uluk: “Foho sira sei muda no nakdoko, maibé haʼu-nia relasaun ho imi nuʼudar belun sei nunka muda no haʼu-nia aliansa dame nian sei la nakdoko, Jeová, ida neʼebé proteje ó ho domin mak hatete.” (Isa 54:10, The Bible in Living English) Iha Jesus nia orasaun iha kalan ikus antes mate, nia hatudu katak Maromak Jeová mak ida neʼebé ‘proteje ho domin’. Jesus halo orasaun kona-ba ninia dixípulu sira, hodi dehan: “Sira sei hela iha mundu, no haʼu bá hasoru Ita. Aman Santu, tau matan ba sira iha Ita naran.” (Joao 17:11, 14) Maromak Jeová tau matan no proteje sira neʼebé tuir Jesus.

Ohin loron, dalan ida neʼebé Maromak proteje ita husi Satanás nia lasu sira mak hodi fó ita hanorin husi Bíblia neʼebé hanesan ai-han, no nia fó ida-neʼe iha tempu neʼebé loos liuhusi atan “laran-metin no matenek”. (Mt 24:45) Ita presiza aproveita ai-han neʼe atu ita bele “tau hatais funu nian neʼebé Maromak haraik tiha” ba ita. Porezemplu, hanoin toʼok kona-ba ita-nia ‘fiar nuʼudar ita-nia eskudu’ neʼebé ita uza atu bele “hasoru rama ho ahi neʼebé mai husi Diabu”. (Ef 6:11, 16) Ita-nia fiar bele proteje ita husi buat neʼebé bele estraga ita-nia relasaun ho Maromak no hatudu katak ita fiar ba ita-nia Aman nia forsa atu proteje ita.

Ita bele aprende liután kona-ba ita-nia Aman iha lalehan nia domin hodi hatene kona-ba ninia Oan nia hahalok kuandu nia iha rai. Haree toʼok buat neʼebé hakerek iha Marcos 10:13-16. Iha eskritura neʼe, Jesus hatete ba ninia dixípulu sira: “Husik labarik sira mai hakbesik haʼu.” Nuʼudar labarik sira-neʼe hakbesik ba Jesus, nia hakoʼak sira ho domin no fó bensa ba sira. Karik labarik sira-neʼe kontente tebes, loos ka lae? Jesus mós hatete: “Ema neʼebé haree ona haʼu, haree ona mós haʼu Aman.” Tan neʼe, Jesus nia liafuan neʼe hatudu katak Maromak hakarak ita atu hakbesik ba nia.—Joao 14:9.

Maromak Jeová mak domin nia Hun, ninia domin la iha rohan. La iha kriatura ida neʼebé bele tau matan no proteje ita hanesan Maromak, ida neʼebé hakarak ita atu hakbesik ba nia. (Tgo 4:8) Tan neʼe, ita la duvida katak Jeová mak Aman neʼebé diʼak liu hotu!

Ita hetan duni buat diʼak!

Ita hetan duni buat diʼak hodi tau fiar ba Jeová nuʼudar ita-nia Aman neʼebé domin. (Prov 3:5, 6) Jesus hetan buat diʼak hodi tau fiar tomak ba nia Aman. Kristu hatete ba ninia dixípulu sira: “Haʼu la hela mesak. Haʼu hela ho Aman, Ida neʼebé haruka haʼu mai.” (Joao 8:16) Jesus sempre fiar ba Maromak Jeová nia ajuda. Porezemplu, kuandu Jesus hetan batizmu, ho domin ninia Aman hatete: “Ida-neʼe mak haʼu-nia Oan doben, neʼebé fó ksolok mai haʼu.” (Mt 3:15-17) Antes Jesus mate, nia hakilar ho lian makaʼas, dehan: “Aman, iha Ita liman haʼu saran haʼu-nia klamar! [“moris”, MF]” (Lc 23:46) Jesus nia fiar ba ninia Aman metin nafatin.

Ita mós bele halo hanesan Jesus. Se Maromak Jeová hamutuk ho ita, ita taʼuk saida? (Sal 118:6) Atsuko, neʼebé temi uluk, nia iha toman atu fiar deʼit ba ninia forsa rasik atu hasoru problema ruma. Maibé, saida mak akontese kuandu nia estuda kona-ba Jesus nia moris, kona-ba Jesus nia serbisu haklaken, no liuliu kona-ba Jesus nia relasaun diʼak ho ninia Aman iha lalehan? Atsuko hatete: “Haʼu aprende katak haʼu bele iha Aman ida neʼebé haʼu bele fiar.” No nia hatutan tan: “Haʼu sente dame no kontente. Tuir loloos, ita la presiza laran-susar kona-ba buat ruma.”

Buat diʼak saida tan mak ita bele hetan tanba ita haree Jeová nuʼudar ita-nia Aman? Labarik sira baibain hadomi sira-nia inan-aman no hakarak halo sira kontente. Tanba domin, Maromak nia Oan ‘sempre halo buat neʼebé fó ksolok ba nia Aman’. (Joao 8:29) Hanesan neʼe mós, domin ba ita-nia Aman iha lalehan bele book ita atu hatudu matenek no atu hahiʼi nia.—Mt 11:25; Joao 5:19.

 Ita-nia Aman ‘kaer ita-nia liman loos’

Ita-nia Aman iha lalehan mós fó espíritu santu atu ajuda ita. Jesus hatete katak espíritu santu ‘sei hanorin lia-loos tomak ba ita’. (Joao 14:15-17; 16:12, 13) Maromak nia espíritu bele ajuda ita atu hatene diʼak liután ita-nia Aman. Espíritu santu mós bele ajuda ita atu “sobu rahun uma fatuk nian”, neʼe mak hanorin no hanoin neʼebé laloos, hodi bele “halo hanoin hotu-hotu halo tuir Kristu”. (2 Kor 10:4, 5) Nuneʼe, mai ita halo orasaun hodi husu espíritu santu neʼebé Maromak promete, hodi fiar katak ita-nia “Aman iha lalehan sei haraik espíritu santu ba sira neʼebé husu ba Nia”. (Lc 11:13) Diʼak mós atu husu iha orasaun atu espíritu santu ajuda ita hakbesik liután ba Aman Jeová.

Labarik sente seguru no la taʼuk buat ida kuandu laʼo hodi kaer ninia aman nia liman. Se Ita haree Jeová nuʼudar Ita-nia Aman, Ita bele fiar liafuan sira tuirmai neʼe: “Haʼu Jeová, ó-nia Maromak, haʼu kaer ó-nia liman loos, Ida neʼebé hatete ba ó: ‘Keta taʼuk. Haʼu rasik sei ajuda ó.’” (Isa 41:13) Ita bele iha oportunidade kapás tebes atu “laʼo” ho Maromak ba nafatin. (Miq 6:8) Se Ita halo tuir nafatin ninia hakarak, Ita sei sente ksolok, seguru, no sente katak Maromak Jeová hadomi Ita, tanba Ita haree nia nuʼudar Ita-nia Aman.

[Nota–rodapé]