Laʼo iha dalan diʼak liu hotu atu moris!
Laʼo iha dalan diʼak liu hotu atu moris!
“Ita moris ka mate, ita Naʼi [Jeová] ninian.”—ROM 14:8.
1. Saida mak Jesus hanorin kona-ba dalan diʼak liu hotu atu moris?
MAROMAK JEOVÁ hakarak ita atu haksolok ho dalan diʼak liu hotu atu moris. Ema bele moris iha dalan oioin, maibé dalan ida deʼit mak diʼak liu hotu. Dalan diʼak liu hotu atu halaʼo ita-nia moris mak hodi moris tuir Maromak nia Liafuan no aprende husi ninia Oan, Jesus Kristu. Jesus hanorin ninia dixípulu sira atu adora Maromak ho espíritu no lia-loos, no nia haruka sira atu halo ema sai dixípulu. (Mt 28:19, 20; Joao 4:24) Hodi moris tuir buat neʼebé Jesus hanorin, ita halo Maromak Jeová kontente no ita haksolok tanba ita hetan bensaun husi Nia.
2. Iha apóstolu sira-nia tempu, saida mak ema barak halo kuandu rona mensajen Reinu nian? Moris tuir “Dalan” katak sá?
2 Kuandu ema neʼebé laran-maus sai fiar-naʼin no hetan batizmu, ita kontente tebes atu haree sira kontinua laʼo iha dalan diʼak liu hotu atu moris. Iha apóstolu sira-nia tempu, ema rihun ba rihun husi nasaun oioin simu lia-loos no hodi hetan batizmu sira hatudu ba ema seluk katak sira fó sira-nia an ba Maromak. (Apos 2:41) Sira neʼebé sai dixípulu iha tempu neʼebá moris tuir buat neʼebé ema bolu nuʼudar “Dalan”. (Apos 9:2; 19:23) Ida-neʼe loos tanba sira neʼebé sai ema kristaun, sira moris iha dalan neʼebé hatudu katak sira fiar Jesus Kristu no halo tuir nia ezemplu.—1 Ped 2:21.
3. Tanbasá mak Maromak Jeová nia povu hetan batizmu? Ema naʼin-hira mak hetan batizmu durante tinan sanulu nia laran?
3 Iha loron ikus sira-neʼe, serbisu atu ajuda ema sai dixípulu aumenta ba beibeik no agora halaʼo ona iha rai 230 liu. Durante tinan sanulu nia laran, ema naʼin-2.700.000 liu halo desizaun atu serbí Maromak Jeová no hetan batizmu atu hatudu katak sira dedika ona sira-nia an ba Maromak. Ida-neʼe hatudu katak semana-semana ema naʼin-5.000 liu hetan batizmu! Sira halo desizaun neʼe tanba sira hadomi Maromak, sira iha koñesimentu kona-ba Bíblia, no sira tau fiar ba buat neʼebé sira hanorin. Batizmu mak buat neʼebé importante tanba ida-neʼe hatudu katak ema hahú ona atu iha relasaun neʼebé besik ho Maromak Jeová. Ida-neʼe mós hatudu katak sira fiar katak Maromak sei ajuda sira atu serbí nia ho laran-metin, hanesan nia ajuda ninia atan sira iha tempu uluk atu laʼo iha ninia dalan.—Isa 30:21.
Tansá mak hetan batizmu?
4, 5. Hodi hetan batizmu, bensaun no buat diʼak saida deʼit mak Ita bele hetan?
4 Karik Ita hetan ona koñesimentu kona-ba Maromak, no troka ona buat balu iha Ita-nia moris, no Ita sai ona haklaken-naʼin neʼebé seidauk hetan batizmu. Halo ida-neʼe mak buat neʼebé kapás tebes. Maibé, Ita dedika ona Ita-nia an ba Maromak liuhusi orasaun, no hakarak atu hetan batizmu ka lae? Hodi estuda Bíblia, karik Ita hatene ona katak buat neʼebé importante liu iha Ita-nia moris mak atu hahiʼi Maromak Jeová, laʼós deʼit atu halo Ita-nia an kontente ka atu buka rikusoin. (Lee Salmo 148:11-13; * Lucas 12:15.) Nuneʼe, hodi hetan batizmu, bensaun no buat diʼak saida deʼit mak Ita bele hetan?
5 Nuʼudar ema kristaun neʼebé dedika an ona, Ita-nia moris iha folin duni. Ita sei kontente tanba Ita halo Maromak nia hakarak. (Rom 12:1, 2) Maromak Jeová nia espíritu santu sei ajuda Ita atu hatudu hahalok hanesan dame no fiar. (Gal 5:22, 23) Maromak sei rona Ita-nia orasaun no haraik bensaun ba Ita-nia hakaʼas an atu moris tuir ninia Liafuan. Ita sei haksolok ho Ita-nia serbisu haklaken, no hodi moris iha dalan neʼebé Maromak simu, ida-neʼe sei hametin Ita-nia esperansa atu moris ba nafatin. No mós, dedika an no hetan batizmu sei hatudu katak Ita hakarak duni atu sai Testemuña ba Jeová.—Isa 43:10-12.
6. Batizmu hatudu saida deʼit?
6 Hodi dedika ita-nia an ba Maromak no hetan batizmu, ita hatudu katak ita sai Maromak Jeová ninian. Apóstolu Paulo hatete: “Ita ida la moris ba nia an rasik, no ita ida la mate ba nia an rasik. Basá, ita moris karik, ita moris ba Naʼi, no mate karik, ita mate ba Naʼi; neʼe duni, ita moris ka mate, ita Naʼi [Jeová] ninian.” (Rom 14:7, 8) Maromak hatudu katak nia hafolin ita ida-idak hodi fó ita liberdade atu hili. Kuandu ita deside atu moris tuir dalan neʼe tanba ita hadomi Maromak, ita sei halo nia laran kontente. (Prov 27:11) Ita-nia batizmu hatudu ba ema seluk katak ita dedika an ona ba Maromak no katak Maromak Jeová mak ita-nia Ukun-Naʼin. Batizmu hatudu katak ita apoia Maromak nia direitu atu ukun. (Apos 5:29, 32) Tan neʼe, Maromak Jeová mós sei apoia ita. (Lee Salmo 118:6. *) Batizmu mós loke dalan ba ita atu simu bensaun barak ohin loron no mós iha futuru.
Bensaun atu sai parte ba família boot
7-9. (a) Saida mak Jesus hatete ba sira neʼebé husik tiha buat barak hodi tuir nia? (b) Oinsá mak Jesus nia liafuan iha Marcos 10:29, 30 sai loos ohin loron?
7 Apóstolu Pedro hatete ba Jesus: “Ami neʼebé husik tiha buat hotu hodi tuir Ita-Boot: ba ami neʼe saida?” (Mt 19:27) Pedro hakarak hatene saida mak nia no Jesus nia dixípulu sira seluk sei hetan iha futuru. Tanba atubele halaʼo serbisu haklaken, sira husik buat barak. (Mt 4:18-22) Saida mak Jesus hatete ba sira?
8 Tuir buat neʼebé Marcos mós hakerek, Jesus hatudu katak ninia dixípulu sira sei sai parte ba família boot kristaun loos nian. Jesus hatete: “La iha ema neʼebé husik uma, maun-alin, biin-feton, inan, aman, oan sira ka toʼos tanba haʼu no tanba liafuan diʼak, neʼebé sei la simu iha tempu neʼe uma, maun-alin, biin-feton, inan, oan no toʼos sira dala atus ida liu fali uluk nian hamutuk ho susar oioin, no iha tempu neʼebé atu mai, moris rohan-laek.” (Mc 10:29, 30) Hanesan Jesus promete nanis ona, ema kristaun iha apóstolu sira-nia tempu, hanesan Lídia, Áquila, Priscila, no Gaio, simu maluk iha sira-nia “uma” no sai “maun-alin, biin-feton, inan” ba maluk fiar-naʼin sira.—Apos 16:14, 15; 18:2-4; 3 Joao 1, 5-8.
9 Jesus nia liafuan mós sai loos ohin loron. “Toʼos” neʼebé Jesus nia dixípulu sira husik hela hodi bele serbí Maromak mak sira-nia serbisu atu manán osan atubele halaʼo sira-nia moris loroloron nian. Sira barak neʼebé prontu atu halo ida-neʼe inklui sira neʼebé serbí nuʼudar misionáriu, serbí iha Betel, no irmaun-irmán seluk tan neʼebé serbí iha rai seluk. Irmaun no irmán barak mós husik sira-nia uma hodi bele halaʼo moris neʼebé simples liu, no ita kontente tebes atu rona kona-ba sira-nia esperiénsia neʼebé hatudu oinsá mak Maromak Jeová tau matan ba sira no oinsá mak sira-nia serbisu ba Maromak halo sira kontente. (Apos 20:35) Liután neʼe, Maromak Jeová nia atan sira iha mundu tomak neʼebé hetan ona batizmu bele mós hetan bensaun atu sai parte ba Maromak nia família boot tanba sira “buka uluknanain Maromak nia reinu ho nia justisa”.—Mt 6:33.
Seguru iha “fatin segredu”
10, 11. Saida mak “fatin segredu” neʼe”? Oinsá mak ita bele tama iha fatin neʼe?
10 Dedikasaun no batizmu lori bensaun seluk tan, neʼe mak oportunidade espesiál atu hela iha “fatin segredu husi Ida neʼebé Aas Liu Hotu”. (Lee Salmo 91:1. *) Fatin neʼe reprezenta protesaun neʼebé Maromak fó atu proteje ita husi buat naran deʼit neʼebé bele halakon ita-nia relasaun diʼak ho nia. Ida-neʼe “fatin segredu” tanba ema neʼebé la fiar Maromak Jeová la hatene kona-ba neʼe. Hodi moris tuir ita-nia dedikasaun no hodi tau fiar ba Maromak Jeová, ida-neʼe hanesan ita hatete ba nia: “Ita mak haʼu-nia mahon no haʼu-nia abrigu, haʼu-nia Maromak neʼebé haʼu fiar.” (Sal 91:2) Maromak Jeová sai ita-nia fatin neʼebé seguru. (Sal 91:9) La iha fatin neʼebé diʼak liu fali ida-neʼe, loos ka lae?
11 Tama iha Maromak Jeová nia “fatin segredu” mós hatudu katak ita hetan bensaun tanba ita haburas ona relasaun neʼebé besik ho nia. Ida-neʼe hahú kuandu ita dedika an no hetan batizmu. Depois neʼe, ita kontinua atu hametin ita-nia relasaun ho Maromak hodi estuda Bíblia, halo orasaun ho laran, no halo tuir nia iha buat hotu. (Tgo 4:8) Jesus deʼit mak besik liu Maromak Jeová, no ninia fiar ba Maromak nunka namlele. (Joao 8:29) Nuneʼe, mai ita sempre fiar ba Maromak Jeová no fiar katak nia hakarak no bele ajuda ita atu halo tuir ita-nia promesa kuandu ita dedika an ba nia. (Ecle 5:4) Buat hotu neʼebé Maromak fó ba ninia povu hatudu ho klaru katak nia hadomi tebes ita no nia hakarak ita atu serbí nia ho susesu.
Hafolin dame no unidade nuʼudar Maromak nia povu
12, 13. (a) Dedikasaun no batizmu loke dalan saida? (b) Oinsá mak ita bele ajuda ema foun iha kongregasaun?
12 Dedikasaun no batizmu mós loke dalan ba ita atu bele hamutuk ho Maromak nia povu neʼebé iha dame ho Maromak Jeová no ho sira-nia maluk. (Sal 29:11; Isa 54:13) Dame neʼebé ita iha la hanesan duni ho mundu. Ita bele haree dame, unidade, no domin neʼebé ita-nia irmaun no irmán sira husi nasaun, língua, no rasa oioin hatudu ba malu, liuliu kuandu sira halibur hamutuk iha reuniaun boot sira.
13 Dame no unidade neʼebé ita iha mak la hanesan duni ho situasaun aat iha mundu ohin loron. (Lee Isaías 65:13, 14. *) Hodi haklaken mensajen Reinu nian, ita iha oportunidade espesiál atu konvida ema seluk atu sai parte husi Maromak nia povu neʼebé iha dame no unidade. Ita mós iha oportunidade atu ajuda sira neʼebé foin sai parte iha kongregasaun atu hanorin sira oinsá atu haklaken iha dalan neʼebé diʼak liután. Karik katuas sira iha kongregasaun fó ita oportunidade espesiál atu ajuda ema foun, hanesan Áquila no Priscila neʼebé esplika ho loloos ba Apolo kona-ba Maromak nia dalan.—Apos 18:24-26.
Kontinua aprende husi Jesus
14, 15. Ita iha razaun diʼak saida deʼit atu kontinua aprende husi Jesus?
14 Ita iha razaun diʼak barak atu kontinua aprende husi Jesus. Antes Jesus mai iha rai, nia serbisu hamutuk ho ninia Aman durante tinan rihun ba rihun. (Prov 8:22, 30) Jesus hatene katak dalan diʼak liu hotu atu moris mak hodi serbí Maromak no fó sasin kona-ba lia-loos. (Joao 18:37) Jesus hatene ho klaru katak moris iha dalan seluk mak hanoin an deʼit no la hanoin kona-ba futuru. Nia mós hatene katak nia sei hetan terus no sei mate. (Mt 20:18, 19; Ebr 4:15) Liuhusi Jesus nia ezemplu, nia hanorin ita oinsá atu laran-metin nafatin.
15 Lakleur depois Jesus hetan batizmu, Satanás tenta nia atu husik dalan diʼak liu hotu atu moris, maibé Satanás la hetan susesu. (Mt 4:1-11) Ida-neʼe hanorin ita katak ita bele laran-metin nafatin maski Satanás hakaʼas an atu tenta ita. Satanás buka atu tenta liuliu sira neʼebé besik ona atu hetan batizmu no mós sira neʼebé foin hetan batizmu. (1 Ped 5:8) Ita-nia família rasik karik kontra hasoru ita tanba sira rona informasaun neʼebé la loos kona-ba Testemuña ba Jeová, no sira hakarak atu proteje ita. Maski nuneʼe, susar sira-neʼe fó oportunidade ba ita atu hatudu hahalok diʼak kristaun nian, hanesan respeitu no matenek atubele hatán pergunta ruma kuandu ita haklaken. (1 Ped 3:15) Halo ida-neʼe, bele book ema neʼebé rona ita.—1 Tim 4:16.
Laʼo nafatin iha dalan diʼak liu hotu atu moris!
16, 17. (a) Tuir Deuteronômio 30:19, 20, buat tolu saida mak ema presiza atu moris? (b) Oinsá mak Jesus, João, no Paulo apoia buat neʼebé Moisés hakerek?
16 Maizumenus tinan 1.500 antes Jesus mai iha rai, Moisés hatete ba ema Izraél atu hili dalan diʼak liu hotu atu moris. Nia hatete: “Ohin lalehan no rai sai nuʼudar sasin hasoru imi, katak haʼu tau moris no mate iha ó-nia oin, bensaun no malisan; no ó tenke hili moris atu ó bele moris nafatin, ó no ó-nia oan sira, hodi hadomi Jeová ó-nia Maromak, hodi rona ba ninia liafuan no hodi laran-metin ba nia.” (Deut 30:19, 20) Maski ema Izraél hatudu katak sira la laran-metin ba Maromak, maibé buat tolu neʼebé Moisés hatete neʼebé ema presiza atu moris sei hanesan nafatin. Jesus no ema seluk mós koʼalia kona-ba buat tolu neʼe.
17 Primeiru, ‘ita tenke hadomi Jeová, ita-nia Maromak’. Ita hatudu katak ita hadomi Maromak hodi moris tuir ninia dalan neʼebé loos. (Mt 22:37) Segundu, ‘ita tenke rona Maromak Jeová nia liafuan’ hodi estuda Bíblia no halo tuir nia ukun-fuan sira. (1 Joao 5:3) Ida-neʼe hatudu katak ita presiza tuir reuniaun sira beibeik, tanba iha neʼebá mak esplika kona-ba Bíblia. (Ebr 10:23-25) Terseiru, ‘ita tenke laran-metin ba Maromak Jeová’. Maski ita hasoru susar naran deʼit, mai ita hatudu fiar ba Maromak no halo tuir ninia Oan.—2 Kor 4:16-18.
18. (a) Saida mak livru The Watch Tower hatete kona-ba lia-loos iha tinan 1914? (b) Oinsá mak ita sente kona-ba lia-loos nia naroman ohin loron?
18 Bensaun boot tebes atu bele moris tuir lia-loos husi Bíblia! Iha tinan 1914, livru The Watch Tower hatete: “Ita mak povu neʼebé kontente no neʼebé hetan bensaun, loos ka lae? Ita-nia Maromak mak laran-metin, loos ka lae? Se ema ida hatene buat neʼebé diʼak liu, husik nia tuir ida-neʼe. Se imi ida hetan buat neʼebé diʼak liu, ami hein katak imi sei fó-hatene ami. Ami la hetan buat ida neʼebé diʼak liu fali buat neʼebé ami hetan ona iha Maromak nia Liafuan. . . . La iha liafuan ida atu esplika kona-ba dame no ksolok neʼebé ita hetan ona iha ita-nia moris tanba koñesimentu loos kona-ba Maromak neʼebé loos. Buat neʼebé ita aprende kona-ba Maromak nia matenek, justisa, kbiit no domin halo ita kontente. Ita la buka buat seluk tan. La iha buat seluk neʼebé ita hakarak neʼebé diʼak liu fali aumenta koñesimentu kona-ba Maromak.” (The Watch Tower, 15 Dezembru 1914, pájina 377-37) Ohin loron ita mós hafolin tebes naroman no lia-loos husi Maromak nia Liafuan. Tuir loloos, ita haksolok liután atu “laʼo iha Maromak Jeová nia naroman”.—Isa 2:5; Sal 43:3; Prov 4:18.
19. Tanbasá mak ita labele demora atu hetan batizmu?
19 Se Ita hakarak atu “laʼo iha Maromak Jeová nia naroman” maibé seidauk dedika an no seidauk hetan batizmu, keta demora atu halo ida-neʼe. Hakaʼas an atu halo tuir matadalan husi Bíblia atubele hetan batizmu, tanba hodi halo ida-neʼe deʼit mak Ita hatudu agradese ba buat neʼebé Maromak no Jesus halo ona mai ita. Fó ba Maromak Jeová buat neʼebé folin boot liu hotu ba Ita, neʼe mak Ita-nia moris. Hakaʼas an atu hatudu katak Ita hakarak duni halo Maromak nia hakarak hodi halo tuir ninia Oan. (2 Kor 5:14, 15) Ita la duvida katak neʼe mak dalan diʼak liu hotu atu moris!
[Nota–rodapé]
^ par. 4 Salmo 148:11-13: “Imi liurai sira iha rai no imi nasaun hotu, imi liurai-oan sira no imi juis hotu iha rai, imi mane joven sira no mós feto-raan sira, imi katuas hamutuk ho labarik sira. Husik sira hahiʼi Jeová nia naran, tanba ninia naran deʼit mak aas liu hotu. Ninia pozisaun mak aas liu fali rai no lalehan.”
^ par. 6 Salmo 118:6: “Jeová iha haʼu-nia sorin; haʼu sei la taʼuk buat ida. Ema bele halo saida mai haʼu?”
^ par. 10 Salmo 91:1: “Ema naran deʼit neʼebé hela iha fatin segredu husi Ida neʼebé Aas Liu Hotu, nia sei hetan fatin ida ba nia an atu hela iha Ida neʼebé Forsa Boot Liu Hotu nia mahon.”
^ par. 13 Isaías 65:13, 14: “Nuneʼe, neʼe mak Naʼi Ukun-Naʼin Boot Liu Hotu Jeová hatete: ‘Haree! Haʼu-nia atan sira sei han, maibé imi sei hamlaha. Haree! Haʼu-nia atan sira sei hemu, maibé imi rasik sei hamrook. Haree! Haʼu-nia atan sira sei haksolok, maibé imi rasik sei sente moe. Haree! Haʼu-nia atan sira sei hasaʼe lian ho haksolok tanba sente diʼak iha laran, maibé imi rasik sei tanis hakilar tanba imi-nia laran-susar no imi sei halerik tanba laran-kraik.’”
Oinsá Ita hatán?
• Ita-nia batizmu hatudu saida?
• Bensaun saida deʼit mak ita hetan hodi dedika an no hetan batizmu?
• Tanbasá mak importante atu aprende husi Jesus?
• Saida mak ajuda ita atu laʼo nafatin iha dalan diʼak liu hotu atu moris?
[Pergunta estudu nian]
[Dezeñu iha pájina 25]
Batizmu hatudu katak Ita hili dalan diʼak liu hotu atu moris
[Dezeñu iha pájina 26]
Ita sente seguru iha “fatin segredu” ka lae?