“Labarik nia direitu atu haburas ninia fiar”

IHA loron 9 Dezembru 2008, Akademia ba Labarik nia Direitu iha rai-Suésia halaʼo enkontru espesiál ida ho tema: “Labarik nia direitu atu haburas ninia fiar.” Reprezentante sira husi Igreja Suésia nian, husi igreja kristaun seluk, husi relijiaun Izlaun, no husi movimentu umanista neʼebé hafolin ema nia hakarak, sira hotu hatoʼo ideia oioin.

Amlulik ida neʼebé hatoʼo diskursu iha enkontru neʼe, hatete: “La iha liafuan atu esplika tansá mak istória husi Bíblia importante tebes atu labarik sira bele haburas sira-nia fiar.” Nuneʼe, oinsá mak istória husi Bíblia bele ajuda labarik kona-ba sira-nia presiza atu adora Maromak?

Amlulik neʼe mós hatete: “Eskritura no istória sira fó informasaun ba labarik sira atu hanoin kleʼan no hanoin didiʼak.” Nia temi “istória kona-ba Adão no Eva, kona-ba Caim no Abel, kona-ba David no Golias, kona-ba kuandu Jesus moris, kona-ba Zaqueu neʼebé kobradór impostu, ai-knanoik kona-ba oan neʼebé husik hela uma, no ai-knanoik kona-ba samaritanu diʼak”. Nia temi istória sira-neʼe nuʼudar “ezemplu diʼak balu neʼebé bele sai matadalan ba labarik sira no ajuda sira atu iha hanoin loos kona-ba hahalok ruma, hanesan bosok, perdua, halo dame, odi, hahalok neʼebé hamoe ema, taka sala, no domin neʼebé la hanoin an deʼit”. Nia hatutan tan: “Istória sira-neʼe fó ezemplu kona-ba oinsá mak ema bele halo tuir iha sira-nia moris rasik.”

Maski diʼak atu fó laran-manas ba labarik sira atu lee Bíblia, maibé sira bele ka lae, “hanoin kleʼan no hanoin didiʼak” kona-ba buat neʼebé sira lee atu sira bele komprende ho loloos?

Ema boot mós presiza ema seluk atu esplika ba sira kona-ba eskritura sira husi Bíblia. Porezemplu, Bíblia konta kona-ba mane ida neʼebé la konsege atu adora Maromak iha dalan loos maski nia “hanoin kleʼan no hanoin didiʼak”. Mane neʼe mak ema-boot husi rai-Etiópia. Kuandu nia lee eskritura iha livru Isaías, nia la komprende buat neʼebé nia lee. Tanba nia hakarak hatene kona-ba ida-neʼe, nia kontente atu simu buat neʼebé dixípulu Filipe esplika ba nia. (Apos 8:26-40) Laʼós ema Etiópia neʼe deʼit mak presiza ajuda atu komprende eskritura sira, maibé ita hotu mós presiza, liuliu labarik sira.

Bíblia fó avizu mai ita katak: “Hahalok beik mak iha oan nia laran.” (Prov 22:15) Tan neʼe, labarik sira presiza simu hanorin no matadalan, no inan-aman mak iha responsabilidade atu hanorin sira-nia oan kona-ba morál no kona-ba Maromak nia hanorin neʼebé mai husi Bíblia no husi kongregasaun kristaun. Labarik sira iha direitu atu simu hanorin sira-neʼe. Husi kiʼik kedas, sira presiza ajuda atu komprende Bíblia hodi bele haburas sira-nia fiar atu nuneʼe sira bele sai “ema boot, . . . neʼebé komprende ona atu hatene buat neʼebé diʼak husi buat neʼebé aat”.—Ebr 5:14.