Livru atu ajuda joven sira atu hanoin sira-nia Kriadór

“HANOIN-HETAN Ita-nia Kriadór bainhira Ita sei joven”, ida-neʼe mak Salomão, ema matenek ida, hakerek tinan 3.000 liubá. (Ecle 12:1) Ohin loron, joven kristaun sira iha livru ida tan atu ajuda sira halo ida-neʼe. Neʼe mak livru Pertanyaan Kaum Muda—Jawaban yang Praktis, Jilid 2, neʼebé ita simu iha reuniaun boot ho tema “Husik Maromak nia espíritu hatudu dalan ba ita” neʼebé Testemuña ba Jeová halaʼo iha mundu tomak husi fulan-Maiu 2008 toʼo fulan-Janeiru 2009.

Antes pájina 1 iha livru neʼe, ita bele hetan karta husi Grupu Administradór neʼebé hakerek ba joven sira. Liafuan balu husi karta neʼe, hatete: “Ami halo orasaun katak informasaun husi livru neʼe sei ajuda imi atu tahan hasoru susar no tentasaun neʼebé imi joven sira hetan ohin loron no sei ajuda imi atu halo desizaun tuir Maromak nia hakarak.”

Inan-aman sira hakarak atu haboot sira-nia oan tuir “dixiplina no Naʼi [Jeová] nia doutrina loloos”. (Ef 6:4) Maibé, nuʼudar oan sira sai boot toʼo sai joven, sira barak ladún fiar an, no presiza ema atu fó matadalan ba sira. Se Ita iha oan joven, oinsá mak Ita bele uza livru neʼe atu ajuda Ita-nia oan? Mai ita haree dalan balu.

▪ Hetan livru ida ba Ita-nia an rasik no buka atu hatene didiʼak informasaun iha laran. Diʼak atu la lee liu deʼit, maibé buka mós atu komprende informasaun. Livru neʼe diʼak atu treinu joven sira atu ‘komprende no hatene’ kona-ba buat neʼebé diʼak no buat neʼebé aat, tanba livru neʼe la hatete deʼit saida mak joven sira tenke halo. (Ebr 5:14) Livru neʼe mós fó ezemplu balu kona-ba oinsá joven sira bele hamriik metin ba buat neʼebé loos. Porezemplu, kapítulu 15 (‘Bagaimana Aku Bisa Menolak Tekanan Teman?’) la esplika deʼit ba joven sira katak sira tenke dehan lae. Maibé, kapítulu neʼe esplika oinsá atu uza matadalan husi Bíblia atu rezolve problema no oinsá atu “hatán ba ema ida-ida” bainhira hasoru situasaun ruma iha sira-nia moris.—Kol 4:6.

▪ Uza fatin mamuk iha livru neʼe neʼebé bele hakerek resposta ka planu. Maski ida-neʼe ba joven  sira, maibé diʼak atu Ita, nuʼudar inan ka aman mós hakerek iha Ita-nia livru rasik. * Porezemplu, kuandu Ita hanoin kona-ba pergunta rua iha pájina 16 kona-ba namora, koko atu hanoin-hetan oinsá Ita sente kuandu Ita-nia tinan hanesan Ita-nia oan. Karik iha fatin mamuk iha livru neʼe, Ita bele hakerek Ita-nia resposta ba pergunta sira-neʼe tuir buat neʼebé Ita sente kuandu Ita-nia tinan hanesan Ita-nia oan. Depois, Ita bele husu Ita-nia an: ‘Oinsá mak haʼu-nia hanoin kona-ba namora troka nuʼudar haʼu-nia tinan aumenta? Haʼu aprende saida kona-ba neʼe husi tempu neʼebé haʼu sei joven, no oinsá mak haʼu bele hanorin fali ida-neʼe ba haʼu-nia oan?’

▪ Respeita Ita-nia oan atu halo buat balu mesak. Pergunta sira iha livru neʼe mak atu book Ita-nia oan atu hakerek ninia resposta iha fatin neʼebé mamuk ka atu hanoin deʼit kona-ba ninia resposta. Nuʼudar inan ka aman importante liu mak atu hatene buat neʼebé Ita-nia oan hanoin, laʼós buat neʼebé nia hakerek iha ninia livru. Iha parte ho títulu ‘Pesan untuk Orang Tua’, iha pájina 3, hatete: “Atubele book Ita-nia oan joven atu hakerek sira-nia hanoin iha livru neʼe ho laran-moos, diʼak atu respeita sira hodi la haree buat neʼebé sira hakerek. Se Ita halo nuneʼe, ikusmai Ita-nia oan karik sei fó-hatene ba Ita buat neʼebé sira hakerek.”

Uza iha estudu Bíblia família nian

Livru Pertanyaan Kaum Muda, Jilid 2, mak diʼak tebes atu uza kuandu halaʼo Adorasaun Família nian. Maibé, tanba livru neʼe la iha pergunta ba parágrafu ida-idak, oinsá mak Ita bele uza livru neʼe atu estuda ho Ita-nia oan? Karik Ita rasik bele hili dalan ida neʼebé diʼak liu ba sira.

Porezemplu, kuandu estuda kona-ba ‘Rencana Tindakan’, iha pájina 132 no 133, família balu karik bele halo drama kiʼik atu treinu oan sira. Pergunta primeiru iha parte neʼe, karik bele ajuda Ita-nia oan atu hanoin kona-ba susar saida mak nia hasoru. Pergunta segundu mak atu buka-hatene iha situasaun saida susar neʼe bele mosu. Depois koʼalia tiha kona-ba saida mak sei akontese se Ita-nia oan rende an kuandu kolega obriga nia atu halo buat ruma, livru neʼe ajuda Ita-nia oan atu halo planu kona-ba oinsá atu defende an iha dalan oioin. Ajuda Ita-nia oan atu hanoin rasik no prepara resposta neʼebé nia sente katak nia sei bele uza atu hatán ho laran-metin.—Sal 119:46.

Ajuda joven atu koʼalia

Livru Pertanyaan Kaum Muda, Jilid 2, ajuda joven sira atu koʼalia ba inan-aman. Porezemplu, kaixa sira ho títulu ‘Bagaimana Caranya Bertanya kepada Papa atau Mama tentang Seks?’ (pájina 63-64) no ‘Bicarakan dengan Orang Tuamu!’ (pájina 189) iha informasaun neʼebé bele ajuda  oan sira atu bele komesa koʼalia ho inan-aman kona-ba buat neʼebé baibain susar atu koʼalia sai ba ema seluk. Labarik feto ida neʼebé tinan 13, hatete: “Livru neʼe fó haʼu aten-brani atu koʼalia ho haʼu-nia inan-aman kona-ba buat neʼebé iha haʼu-nia hanoin, no buat neʼebé haʼu halo ona.”

Livru neʼe mós ajuda joven no inan-aman sira iha dalan seluk tan atubele koʼalia ba malu. Iha kapítulu ida-idak nia rohan iha kaixa ho títulu ‘Menurutmu . . .’ Pergunta sira iha kaixa neʼe laʼós deʼit atu hanoin-hetan informasaun, maibé bele uza mós kuandu koʼalia hamutuk nuʼudar família. Besik kapítulu ida-idak nia rohan, iha mós kaixa seluk ho títulu ‘Rencanaku!’ Kaixa neʼe fó oportunidade ba joven sira atu hakerek oinsá mak sira bele halo tuir buat neʼebé sira aprende iha kapítulu neʼe. Parte ikus iha kaixa ho títulu ‘Rencanaku!’, hatete: “Saida mak haʼu hakarak husu ba haʼu-nia inan ka aman kona-ba . . .” Parte neʼe bele ajuda joven sira atu buka konsellu husi sira-nia inan-aman.

Book sira-nia laran!

Nuʼudar inan ka aman, Ita hakarak duni atu book Ita-nia oan nia laran. Livru Pertanyaan Kaum Muda, Jilid 2, bele ajuda Ita atu halo ida-neʼe. Haree toʼok oinsá mak aman ida uza livru neʼe atu book nia oan-feto nia laran atu koʼalia nakloke ho nia.

“Rebekah no haʼu iha fatin balu neʼebé ami gosta atu bá pasiar. Ida-neʼe fó oportunidade ba nia atu koʼalia nakloke ba haʼu.

“Parte primeiru neʼebé ami haree hamutuk iha livru neʼe mak karta husi Grupu Administradór no ‘Pesan untuk Orang Tua’. Hanesan hatete iha pájina 3, haʼu hakarak haʼu-nia oan atu hatene katak nia bele hakerek iha ninia livru buat hotu neʼebé nia sente, no katak haʼu sei la haree buat neʼebé nia hakerek.

“Haʼu husik Rebekah atu hili kapítulu sira neʼebé nia hakarak atu ami koʼalia hamutuk. Kapítulu neʼebé nia hili uluk mak ‘Bolehkah Aku Bermain Game Elektronik?’ Haʼu nunka hanoin katak nia sei hili kapítulu neʼe! Maibé nia iha razaun atu hili ida-neʼe. Ninia kolega balu halimar game ida neʼebé aat tebetebes. Haʼu la hatene katak game neʼe nakonu ho violénsia no liafuan neʼebé aat! Maibé nia fó sai buat neʼe hotu kuandu ami koʼalia hamutuk kona-ba ‘Rencanaku!’ iha pájina 251. Kaixa neʼe mós ajuda Rebekah atu prepara resposta atu hatán ba nia kolega bainhira sira koko atu obriga nia atu halimar game neʼe.

“Tanba ami halo hanesan neʼe, Rebekah la taʼuk atu fó-hatene haʼu kona-ba buat neʼebé nia hakerek iha ninia livru. Kuandu ami estuda, ami koʼalia la para. Ami troka malu atu lee, no nia mós hakarak atu koʼalia kona-ba buat hotu, inklui dezeñu no informasaun iha kaixa sira. Ida-neʼe mós fó oportunidade mai haʼu atu fó-hatene ba nia buat neʼebé haʼu hasoru kuandu haʼu tinan hanesan nia, no nia fó-hatene haʼu buat neʼebé nia hasoru agora. Nia hakarak konta kona-ba buat hotu!”

Se Ita mak inan ka aman ida, karik Ita mós kontente tebes kuandu simu livru foun neʼe. Agora Ita iha oportunidade atu uza livru neʼe ho didiʼak. Grupu Administradór hein katak livru Pertanyaan Kaum Muda—Jawaban yang Praktis, Jilid 2, sei sai hanesan bensaun ida ba Ita-nia família. Livru neʼe bele ajuda duni ema hotu, liuliu ita-nia joven sira atubele ‘husik espíritu lori sira’.—Gal 5:16.

[Nota–rodapé]

[Kaixa iha pájina 30]

Saida mak joven balu hatete

“Ida-neʼe livru ida neʼebé diʼak atu lee kedas no presiza uza lapis. Tanba livru neʼe mak hanesan livru neʼebé ita bele hakerek buat neʼebé ita halo loroloron no atubele hanoin kona-ba oinsá ita bele tuir dalan diʼak liu hotu atu moris.”—Nicola.

“Ema barak hakarak obriga haʼu atu namora, inklui sira neʼebé hanoin haʼu. Parte primeiru iha livru neʼe ajuda haʼu atu komprende katak maski ema barak hatete buat oioin, maibé haʼu seidauk prontu atu namora.”—Katrina.

“Kaixa ho títulu ‘Kamu Ingin Dibaptis?’ ajuda haʼu atu hanoin didiʼak kona-ba hetan batizmu. Ida-neʼe book haʼu atu hanoin hodi hadiʼa haʼu-nia toman atu estuda no atu halo orasaun.”—Ashley.

“Maski haʼu-nia inan-aman mak ema kristaun no hanorin haʼu husi kiʼik kedas, maibé livru neʼe ajuda haʼu atu hanoin mesak kona-ba hakat saida mak haʼu presiza halo iha haʼu-nia moris. Livru neʼe mós ajuda haʼu atu koʼalia nakloke ho haʼu-nia inan-aman.”—Zamira.

[Dezeñu iha pájina 31]

Inan ka aman, buka atu hatene didiʼak informasaun husi livru neʼe

[Dezeñu iha pájina 32]

Nuʼudar inan ka aman, Ita hakarak duni atu book Ita-nia oan nia laran